តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ ទាមទារឱ្យអ្នករាយការណ៍ពិសេសទទួលបន្ទុកសិទ្ធិមនុស្សរបស់អង្គការសហប្រជាជាតិប្រចាំនៅកម្ពុជា ផ្ដល់នូវភស្តុតាងចំពោះការចោទប្រកាន់ថា សិទ្ធិមនុស្ស និងប្រជាធិបតេយ្យនៅកម្ពុជាកំពុងមានការបំភិតបំភ័យ និងដើរថយក្រោយ។
តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ បានចេញសេចក្តីថ្លែងការណ៍កាលពីថ្ងៃទី៣០ ខែមីនា ឆ្នាំ២០២២ ថា របាយការណ៍ផ្ទាល់មាត់របស់អ្នករាយការណ៍ពិសេសស្ដីពីស្ថានភាពសិទ្ធិមនុស្សនៅកម្ពុជា កាលពីថ្ងៃទី២៩ ខែមីនា ឆ្នាំ២០២២ កន្លងទៅ នៅទីក្រុងហ្សឺណែវ គឺជាការលើកឡើងដែលប្រាសចាកពីការពិតរបស់កម្ពុជា។
ប្រភពដដែលអះអាងថា របាយការណ៍របស់អ្នករាយការណ៍ពិសេសពុំបានលើកឡើងឱ្យបានត្រឹមត្រូវ និងគ្រប់ជ្រុងជ្រោយនោះទេ។ ជាងនេះទៅទៀត របាយការណ៍ដែលបានលើកឡើងទាំងនោះ បានរំលងនូវគោលការណ៍សត្យានុម័ត អព្យាក្រឹតទាំងស្រុង។ ដូច្នេះអ្នករាយការណ៍ពិសេស គួរតែផ្ដល់នូវភស្តុតាងរឹងមាំជាក់ស្ដែង ដើម្បីផ្ទៀងផ្ទាត់ចំពោះការចោទប្រកាន់របស់ខ្លួនលើកម្ពុជានាពេលកន្លងមក។
ការអះអាងនេះ ធ្វើឡើងបន្ទាប់ពីអ្នករាយការណ៍ពិសេសរបស់អង្គការសហប្រជាជាតិប្រចាំនៅកម្ពុជា បានសម្ដែងការព្រួយបារម្ភយ៉ាងខ្លាំងអំពីស្ថានភាពសិទ្ធិមនុស្សនៅកម្ពុជា ដែលកំពុងរងការគំរាមកំហែងសព្វថ្ងៃនេះ។
កាលពីថ្ងៃទី២៩ ខែមីនា ឆ្នាំ២០២២ អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា លោក វីទិត ម៉ុនតាប៊ន បានលើកឡើងនៅក្នុងកិច្ចប្រជុំក្រុមប្រឹក្សាសិទ្ធិមនុស្សអង្គការសហប្រជាជាតិលើកទី៤៩ នៅទីក្រុងហ្សឺណែវ ប្រទេសស្វីស ថាទិដ្ឋភាពសិទ្ធិមនុស្ស និងលទ្ធិប្រជាធិបតេយ្យនៅក្នុងប្រទេសកម្ពុជា នៅតែបង្កការព្រួយបារម្ភធ្ងន់ធ្ងរដដែល។
អ្នករាយការណ៍ពិសេសរូបនេះបញ្ជាក់ថា លំហសេរីភាពរបស់ពលរដ្ឋ និងនយោបាយនៅកម្ពុជាកាន់តែរួមតូច និងកំពុងដើរថយក្រោយ ដោយសារតែការគ្រប់គ្រងតាមបែបឯកបក្ស ក្នុងនោះគឺមានការបិទលំហសេរីពលរដ្ឋ និងសិទ្ធិនយោបាយ សវនាការលើសំណុំរឿងនយោបាយ និងការចាប់ខ្លួនអ្នកនយោបាយជំទាស់ដាក់ពន្ធនាគារ ជាដើម។
មន្ត្រីជាន់ខ្ពស់របស់សមាគមការពារសិទ្ធិមនុស្សអាដហុក លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី៣១ មីនា ថា កម្ពុជាគួរតែពិនិត្យមើលការអនុវត្តសិទ្ធិមនុស្សរបស់ខ្លួន ជាជាងប្រតិកម្មតបទៅនឹងការលើកឡើងរបស់អ្នករាយការណ៍ពិសេសរបស់អង្គការសហប្រជាជាតិ។ លោកថា ជាក់ស្តែងការអនុវត្តច្បាប់ដោយរឹតបន្តឹងលើសិទ្ធិសេរីភាពរបស់ប្រជាពលរដ្ឋ គឺអាចមើលឃើញដោយងាយតាមរយៈនៃការរឹតត្បិតការជួបជុំរបស់បុគ្គលិកណាហ្គាវើលដ៍នាពេលកន្លងមក។
លោក ស៊ឹង សែនករុណា អះអាងថា អង្គការសហប្រជាជាតិមិនមានទម្លាប់ទទួលយករបាយការណ៍ដែលគ្រាន់តែរាយការណ៍ផ្ទាល់មាត់ពីអ្នករាយការណ៍ពិសេសរបស់ពួកគេនោះទេ ហើយការទាមទារឱ្យកម្ពុជាកែតម្រូវនូវការអនុវត្តសិទ្ធិមនុស្សរបស់ខ្លួន ក៏មិនមែនគ្រាន់តែការលើកឡើងដោយគ្មានភស្តុតាងជាក់ស្តែង ឬកម្ពុជាមិនបានប្រព្រឹត្តនោះដែរ។
មន្ត្រីសង្គមស៊ីវិលរូបនេះបញ្ជាក់ថា អ្វីដែលកម្ពុជាគួរធ្វើសម្រាប់ពលរដ្ឋរបស់ខ្លួនដើម្បីងាកទៅរកការគោរពសិទ្ធិមនុស្ស និងស្ដារលទ្ធិប្រជាធិបតេយ្យឱ្យកាន់តែប្រសើរឡើងវិញនោះ មានតែកែលំអការអនុវត្តសិទ្ធិមនុស្សរបស់ខ្លួនប៉ុណ្ណោះ ព្រោះការទាមទារឱ្យអនុវត្តសិទ្ធិរបស់ពលរដ្ឋឱ្យបានត្រឹមត្រូវ មិនមែនជាប្រយោជន៍របស់អង្គការសហប្រជាជាតិនោះទេ គឺប្រយោជន៍សម្រាប់កម្ពុជា និងពលរដ្ឋខ្មែរផ្ទាល់តែម្តង។
របាយការណ៍ស្ដីពីនីតិរដ្ឋឆ្នាំ២០២១ នៃគម្រោងយុត្តិធម៌ពិភពលោក (The World Justice Project) បានរកឃើញថា កម្ពុជាបានជាប់ចំណាត់ថ្នាក់លេខទី១៣៨ ក្នុងចំណោមប្រទេស១៣៩ ដោយសារតែការដឹកនាំគ្មានតម្លាភាព ការគំរាមកំហែងសិទ្ធិជាមូលដ្ឋានរបស់ពលរដ្ឋ និងការមិនធានាបាននូវប្រព័ន្ធយុត្តិធម៌របស់ខ្លួនតាមផ្លូវតុលាការ ជាដើម៕