សហមេធាវីការពារក្តីប្រធានគណបក្សសង្គ្រោះជាតិ អះអាងថា ដំណើរការសវនាការលើសំណុំរឿងលោក កឹម សុខា លើកទី៣៨ នេះ តុលាការសាកសួរសំណួរផ្ទុយពីបទចោទរបស់ខ្លួន «សន្ទិដ្ឋភាពជាមួយរដ្ឋបរទេស» គឺជាចេតនារំខានពេលវេលា និងធ្វើឲ្យយឺតយ៉ាវសវនាការតែប៉ុណ្ណោះ។
សហមេធាវីការពារក្តីមេដឹកនាំបក្សប្រឆាំង លោក ចាន់ ចេន បានលើកឡើងបន្ទាប់ពីសវនាការលោក កឹម សុខា នៅថ្ងៃទី២៧ ខែមេសា ឆ្នាំ២០២២ នេះថា ការសាកសួរដេញដោលរបស់តុលាការក្នុងរយៈពេលចុងក្រោយនេះ គឺឃ្លាតចាកឆ្ងាយពីបទចោទដែលខ្លួនបានចោទលើកូនក្ដីរបស់ខ្លួនទាំងស្រុង ដែលបង្កជាការរំខានដល់កូនក្ដីរបស់លោកទៅវិញ។
លោក ចាន់ ចេន អះអាងថា តុលាការបង្កើតសំណួរជុំវិញការបោះឆ្នោតកាលពីឆ្នាំ២០១៣ បែបនេះ គឺគ្រាន់តែជាសំណួរបច្ចេកទេសប៉ុណ្ណោះ។ លោកបន្តថា ការយកសំណួរទាំងនេះមកសាកសួរក្នុងនីតិវិធីដំណើរការសវនាការកូនក្ដីរបស់លោកនៅពេលនេះ គ្រាន់តែការរំខានពេលវេលា និងធ្វើឲ្យយឺតយ៉ាវសវនាការលើសំណុំរឿងនេះតែប៉ុណ្ណោះ។
នៅថ្ងៃទី២៧ ខែមេសា ឆ្នាំ២០២២ នេះ សាលាដំបូងរាជធានីភ្នំពេញ បានបើកសវនាការលើសំណុំរឿងប្រធានគណបក្សសង្គ្រោះជាតិ លោក កឹម សុខា លើកទី៣៨ ប៉ុន្តែតុលាការនៅតែបន្តការសាកសួរជុំវិញដំណើរការនៃការបោះឆ្នោតឆ្នាំ២០១៣ ដូចសវនាការលើកទី៣៧ ដែរ ខណៈសវនាការលើកក្រោយ តុលាការមិនទាន់កំណត់ពេលវេលាជាក់លាក់នៅឡើយទេ។
យ៉ាងណាក៏ដោយ នៅក្នុងកិច្ចប្រជុំគណៈរដ្ឋមន្ត្រីនៅវិមានសន្តិភាពកាលពីចុងឆ្នាំ២០២០ លោក ហ៊ុន សែន ធ្លាប់បានអះអាងថា ករណីលោក កឹម សុខា អាចនឹងត្រូវពន្យារពេល ៤ឆ្នាំទៀត គឺត្រូវពន្យាររហូតដល់ក្រោយការបោះឆ្នោតឃុំ-សង្កាត់ឆ្នាំ២០២២ និងក្រោយការបោះឆ្នោតជាតិក្នុងឆ្នាំ២០២៣ ឯណោះ។
មេដឹកនាំបក្សប្រឆាំង លោក កឹម សុខា ត្រូវបានតុលាការក្រុងភ្នំពេញចោទប្រកាន់ពីបទឃុបឃិតជាមួយរដ្ឋបរទេស ដើម្បីផ្តួលរំលំរដ្ឋាភិបាលកម្ពុជារហូតឈានដល់ការចាប់ខ្លួនដាក់ពន្ធនាគារកាលពីឆ្នាំ២០១៧ កន្លងទៅ ប៉ុន្តែរហូតដល់ពេលនេះ តុលាការកម្ពុជាមិនទាន់មានភស្តុតាងណាមួយដើម្បីដាក់បន្ទុកឈានដល់ការកាត់ទោសលោកនៅឡើយទេ។ ខណៈបរទេសដែលតុលាការចោទថាជាអ្នកនៅពីក្រោយលោក កឹម សុខា ក្នុងផែនការផ្តួលរំលំនោះ ក៏តុលាការមិនបានបង្ហាញថាជាប្រទេសណានោះដែរ។
ជុំវិញបញ្ហានេះ កាលពីថ្ងៃទី១៧ ខែមេសា ឆ្នាំ២០២២ មេដឹកនាំបក្សប្រឆាំងដែលកំពុងរងការរឹតត្បិតសេរីភាពពីគណបក្សកាន់អំណាច លោក កឹម សុខា លើកឡើងថា សន្តិភាពពិតប្រាកដកើតឡើងបានលុះត្រាតែប្រទេសមួយអាចទទួលយកបាននូវទស្សនៈខុសគ្នា មិនចាត់ទុកគ្នាជាសត្រូវ និងគោរពសិទ្ធិមូលដ្ឋានរបស់មនុស្សគ្រប់រូបដោយមិនប្រកាន់និន្នាការអ្វីទាំងអស់។
ទាក់ទិននឹងបញ្ហានេះ តំណាងសហភាពអឺរ៉ុប បានថ្លែងក្នុងសម័យប្រជុំពេញអង្គលើកទី៤៩ នៃក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងហ្សឺណែវ ប្រទេសស្វីស នៃកិច្ចប្រជុំអន្តរសកម្មលើកទី៥០ ស្ដីពីស្ថានការណ៍សិទ្ធិមនុស្សនៅកម្ពុជាកាលពីថ្ងៃទី៣១ ខែមីនា ឆ្នាំ២០២២ កន្លងទៅថា កម្ពុជាគួរបើកលំហឱ្យមេដឹកនាំបក្សប្រឆាំងលោក កឹម សុខា អាចចូលរួមការបោះឆ្នោតឆ្នាំ២០២២ និងឆ្នាំ២០២៣ ដើម្បីធានាការបោះឆ្នោតមួយដែលប្រកបទៅដោយសេរី ត្រឹមត្រូវ និងយុត្តិធម៌។
ក្រុមអ្នកឃ្លាំមើលសង្គម ព្រមានថា ការបិទខ្ទប់សេរីភាពមេដឹកនាំបក្សប្រឆាំង លោក កឹម សុខា ដូចសព្វថ្ងៃនេះ សហគមន៍អន្តរជាតិអាចនឹងដាក់ចេញនូវសេណារីយ៉ូថ្មីបន្ថែមទៀតដែលទាក់ទងទៅនឹងនយោបាយប្រជាធិបតេយ្យូបនីយកម្មកម្ពុជា ដើម្បីកំណត់ផ្លូវឲ្យរដ្ឋាភិបាលលោក ហ៊ុន សែន ដើរទៅថ្ងៃមុខជាមិនខាន៕