មេដឹកនាំគណបក្សប្រឆាំងដែលមិនទាន់មានសេរីភាពពេញលេញឡើងវិញ លោក កឹម សុខា បានជួបពិភាក្សាជាមួយមេដឹកនាំបក្សកាន់អំណាច លោក ហ៊ុន សែន ជាង ៤ម៉ោងអំពីបញ្ហាវិបត្តិជាប់គាំងនយោបាយ និងសុខទុក្ខរបស់ពលរដ្ឋខ្មែរនៅក្នុងឱកាសមេបក្សប្រឆាំងរូបនេះ បានដឹកនាំគណៈប្រតិភូចូលរួមគោរពវិញ្ញាណក្ខន្ធសពលោក ហ៊ុន ណេង ដែលជាបងប្រុសបង្កើតរបស់លោកនាយករដ្ឋមន្ត្រី។
ប្រធានគណបក្សសង្គ្រោះជាតិ ដែលកំពុងត្រូវរឹតត្បិតសេរីភាព លោក កឹម សុខា បានសរសេរលើទំព័រហ្វេសប៊ុករបស់លោកកាលពីថ្ងៃទី៨ ឧសភា ថា ក្នុងឱកាសដែលលោក និងសហការីទៅចូលរួមគោរពវិញ្ញាណក្ខន្ធបងប្រុសបង្កើតទីពីររបស់លោកនាយករដ្ឋមន្ត្រី ហ៊ុន សែន គឺលោក ហ៊ុន ណេង នៅក្នុងខេត្តកំពង់ចាម លោកបានពិភាក្សាយ៉ាងច្រើនអំពីវិបត្តិជាប់គាំងនយោបាយ និងសុខទុក្ខរបស់ពលរដ្ឋជាមួយប្រមុខរដ្ឋាភិបាលកម្ពុជា។
កាលពីថ្ងៃទី៨ ខែឧសភា ឆ្នាំ២០២២ មេដឹកនាំបក្សប្រឆាំងដែលកំពុងរងការគាបសង្កត់សិទ្ធិសេរីភាពនយោបាយ លោក កឹម សុខា បានដឹកនាំសហការីរបស់លោកជាច្រើនរូប ដូចជាអតីតអ្នកទោសនយោបាយ លោក មាជ សុវណ្ណារ៉ា អតីតប្រធានចលនាយុវជនគណបក្សសង្គ្រោះជាតិប្រចាំប្រទេសកូរ៉េខាងត្បូង លោក យឹម ស៊ីណន និងអតីតនាយកខុទ្ទកាល័យប្រធានគណបក្សសង្គ្រោះជាតិ លោក មុត ចន្ថា ជាដើម ទៅចូលរួមគោរពវិញ្ញាណក្ខន្ធបងប្រុសបង្កើតរបស់លោកនាយករដ្ឋមន្ត្រី ហ៊ុន សែន នៅក្នុងខេត្តកំពង់ចាម។
ជុំវិញបញ្ហានេះ មេដឹកនាំបក្សកាន់អំណាច លោក ហ៊ុន សែន បានសរសេររៀបរាប់ពីអនុស្សាវរីយ៍ និងភាពជូរចត់ក្នុងក្រុមគ្រួសាររបស់លោកលើទំព័រហ្វេសប៊ុករបស់ខ្លួនកាលពីថ្ងៃទី៨ ឧសភា ថា បងប្រុសរបស់លោកបានបែកពីលោកជារៀងរហូតដែលមិនអាចជួបគ្នាវិញបាន សូម្បីពាក្យលាគ្នាមួយម៉ាត់នៅដង្ហើមចុងក្រោយ ក៏លោកមិនបាននិយាយទៅកាន់បងប្រុសរបស់លោកដែរ។
ជុំវិញមរណភាពរបស់លោក ហ៊ុន ណេង នេះ មេដឹកនាំបក្សប្រឆាំង លោក កឹម សុខា និងភរិយា បានបង្ហាញពីសេចក្តីសោកស្តាយយ៉ាងក្រៃលែង និងបានសម្ដែងនូវការចូលរួមរំលែកមរណទុក្ខដ៏ធំធេងជាមួយប្រមុខរដ្ឋាភិបាលកម្ពុជា លោក ហ៊ុន សែន និងក្រុមគ្រួសាររបស់លោកផងដែរ។
ជុំវិញការពិភាក្សារបស់មេដឹកនាំបក្សប្រឆាំង លោក កឹម សុខា និងមេដឹកនាំបក្សកាន់អំណាច លោក ហ៊ុន សែន នេះ ត្រូវបានសកម្មជននយោបាយ អ្នកសារព័ត៌មាន និងអ្នកឃ្លាំមើលបញ្ហាសង្គម បង្ហាញទស្សនៈវិជ្ជមានខ្លះ និងអវិជ្ជមានខ្លះរៀងៗខ្លួន។
កាលពីថ្ងៃទី៨ ខែឧសភា ឆ្នាំ២០២២ អគ្គនាយកមជ្ឈមណ្ឌលព័ត៌មានដើមអម្ពិល លោក សយ សុភាព បានសរសេរលើគណនីហ្វេសប៊ុករបស់លោកថា ជំនួបរវាងមេដឹកនាំបក្សប្រឆាំង លោក កឹម សុខា និងមេដឹកនាំបក្សកាន់អំណាច លោក ហ៊ុន សែន ក្នុងឱកាសគោរពវិញ្ញាណក្ខន្ធសពលោក ហ៊ុន ណេង នៅខេត្តកំពង់ចាម តាមដងទន្លេមេគង្គនេះ គឺពិតជាបង្ហាញពីភាពត្រជាក់ត្រជុំដល់ប្រជាជាតិខ្មែរពិតប្រាកដមែន។
លោក សយ សុភាព លើកឡើងថា នៅពេលដែលមេដឹកនាំខ្មែររួបរួមគ្នាជាធ្លុងមួយ ខ្មែរពិតជាឆ្លាត និងពូកែក្នុងការគេចផុតពីការឈ្លានពានរបស់បរទេសជិតឆ្ងាយ ហើយខ្មែរនឹងស្គាល់តែភាពរុងរឿងចម្រុងចម្រើនដែលធ្វើឱ្យខ្មែរកាន់តែខ្លាំង ខ្មែរចេះសាមគ្គីចាប់ពីពេលនេះតទៅ។
ដោយឡែកមន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា បានសរសេរលើគណនីហ្វេសប៊ុករបស់លោកនៅថ្ងៃទី៨ ឧសភា ដែរថា ជំនួបរយៈពេល ៤ម៉ោងរវាងលោកនាយករដ្ឋមន្ត្រី ហ៊ុន សែន និងប្រធានគណបក្សសង្គ្រោះជាតិ លោក កឹម សុខា គឺជាកិច្ចសន្ទនាមួយដែលបង្ហាញពីការជឿទុកចិត្តគ្នាទៅវិញទៅមកឈានទៅរកការផ្សះផ្សាជាតិ ដើម្បីប្រយោជន៍ជាតិខ្មែរទាំងមូល។
លោក មាជ សុវណ្ណារ៉ា លើកឡើងថា ដំណើរឆ្ពោះទៅរកការផ្សះផ្សារបួសស្នាមបែកបាក់ និងជំនឿជឿជាក់គ្នា គឺជាសណ្ដាប់ធ្នាប់នយោបាយមួយដែលជាផលប្រយោជន៍ជាតិ និងប្រជារាស្ត្រទៅថ្ងៃអនាគត។ ដូច្នេះ ដំណោះស្រាយចំពោះមុខដែលអាចធ្វើទៅបាន គឺខ្មែរគ្រប់និន្នាការអាចនិយាយគ្នាបាន ដើម្បីរកដំណោះស្រាយជូនជាតិ និងពង្រឹងនូវស្មារតីសាមគ្គីជាតិនិយម ជាជាងពង្រីកជម្លោះរវាងខ្មែរ និងខ្មែរ។
ចំណែកនាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក មឿន តុលា បានប្រាប់សារព័ត៌មាន The Cambodia Daily នៅថ្ងៃទី៩ ឧសភា ថា ការទៅចូលរួមបុណ្យសពរបស់លោក កឹម សុខា គឺជាកាយវិការល្អ ប៉ុន្តែការជួបមេដឹកនាំបក្សកាន់អំណាចក្នុងពិធីនោះ លោកហាក់ពុំទាន់មានការជឿជាក់ថា នឹងមានភ្លើងខៀវក្នុងការចរចានយោបាយដើម្បីដោះស្រាយវិបត្តិជាប់គាំងនៅកម្ពុជាសព្វថ្ងៃនេះទេ ព្រោះលោក កឹម សុខា ធ្លាប់ជួបជាមួយលោកនាយករដ្ឋមន្ត្រី ហ៊ុន សែន ក្នុងពិធីបុណ្យសពម្តាយក្មេករបស់គាត់ម្តងរួចមកហើយកាលពីអំឡុងឆ្នាំ២០២០ ប៉ុន្តែបញ្ហាគឺនៅជាប់គាំងដដែល។
លោក មឿន តុលា បញ្ជាក់ថា មេដឹកនាំបក្សប្រឆាំងនៅតែជាការគំរាមកំហែងដល់ការដឹកនាំរបស់បក្សកាន់អំណាចដដែល ជាពិសេសគំរាមកំហែងធ្ងន់ធ្ងរបំផុតដល់អ្នកបន្តវេនរបស់គណបក្សកាន់អំណាច ប៉ុន្តែប្រសិនបើលោកនាយករដ្ឋមន្ត្រី ហ៊ុន សែន តម្កល់ប្រយោជន៍ជាតិជាធំ វិលទៅរកការចរចានយោបាយមួយដែលពលរដ្ឋខ្មែរទទួលបានផលចំណេញ នោះវិបត្តិនយោបាយនៅកម្ពុជាប្រាកដជាអាចដោះស្រាយបានជាមិនខាន។
ចំណែកប្រធានក្រុមប្រឹក្សាភិបាលនៃចលនាពលរដ្ឋដើម្បីប្រជាធិបតេយ្យ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី៩ ឧសភា ដែរថា ការជួបជជែកពិភាក្សារវាងលោក កឹម សុខា និងលោកនាយករដ្ឋមន្ត្រី ហ៊ុន សែន គឺបង្ហាញពីភាតរភាពរវាងខ្មែរ និងខ្មែរ ក្នុងនាមមេដឹកនាំនយោបាយជាតិដែលត្រូវសហការគ្នាដើម្បីប្រយោជន៍របស់កម្ពុជា។
លោក ម៉ែន ណាត លើកឡើងថា លោក ហ៊ុន សែន ក៏ចង់ឱ្យមានដំណោះស្រាយនយោបាយនៅកម្ពុជាដែរ ប៉ុន្តែអ្វីដែលគាត់បារម្ភនោះ គឺគាត់នៅមិនទាន់ទុកចិត្តបានថា លោក កឹម សុខា នឹងមិនទៅសហការគ្នាជាមួយលោក សម រង្ស៊ី បន្តទៀតនោះទេ។ ទន្ទឹមនេះ គាត់ក៏បារម្ភពីប្រជាប្រិយភាពមេដឹកនាំបក្សប្រឆាំងដែលអាចនឹងគំរាមកំហែងដល់អ្នកបន្តវេនរបស់បក្សកាន់អំណាចផងដែរ។
លោក កឹម សុខា ត្រូវបានតុលាការដកសិទ្ធិធ្វើនយោបាយជាង ៤ឆ្នាំមកហើយ គិតពីថ្ងៃដែលសមត្ថកិច្ចឆ្មក់ចូលចាប់ខ្លួនលោកទាំងកណ្ដាលអធ្រាត្រឆ្លងចូលថ្ងៃទី៣ ខែកញ្ញា ឆ្នាំ២០១៧ ដោយចោទថា «គប់គិតជាមួយសហរដ្ឋអាមេរិកចង់ផ្ដួលរំលំរដ្ឋាភិបាល» ខណៈគណបក្សនេះមានសំឡេងឆ្នោតគាំទ្រប្រហាក់ប្រហែលបក្សកាន់អំណាចដែរនោះ៕