ក្រុមប្រឹក្សាធម្មនុញ្ញប្រកាសបើកកិច្ចប្រជុំពេញអង្គនៅថ្ងៃពុធ នេះ មុននឹងឈានទៅធ្វើវិសោធនកម្មមាត្រាមួយចំនួនក្នុងរដ្ឋធម្មនុញ្ញរបស់ព្រះរាជាណាចក្រកម្ពុជា តាមសំណើរបស់បុរសខ្លាំងលោក ហ៊ុន សែន ដើម្បីធានាស្ថាប័នកំពូលរបស់ជាតិមាននិរន្តរភាព និងធានាស្ថិរភាពនយោបាយនៅក្នុងប្រទេសគ្រប់កាលៈទេសៈ។
យោងតាមសេចក្ដីប្រកាសរបស់អគ្គលេខាធិការដ្ឋានក្រុមប្រឹក្សាធម្មនុញ្ញចុះថ្ងៃទី១១ ខែកក្កដា ឆ្នាំ២០២២ ឱ្យដឹងថា ក្រុមប្រឹក្សាធម្មនុញ្ញនឹងបើកកិច្ចប្រជុំពេញអង្គនៅថ្ងៃទី១៣ ខែកក្កដា ដើម្បីពិគ្រោះយោបល់ និងពិនិត្យមើលសេចក្ដីព្រាងច្បាប់ធម្មនុញ្ញស្ដីពីការស្នើសុំធ្វើវិសោធនកម្មរដ្ឋធម្មនុញ្ញ។
ការស្នើសុំធ្វើវិសោធនកម្មរដ្ឋធម្មនុញ្ញត្រង់មាត្រា១៩ថ្មី(មួយ) មាត្រា៨៩ថ្មី មាត្រា៩៨ មាត្រា១០២ថ្មី មាត្រា១១៩ថ្មី(មួយ) និងមាត្រា១២៥ថ្មីនៃរដ្ឋធម្មនុញ្ញព្រះរាជាណាចក្រកម្ពុជា និងមាត្រា៣ថ្មី និងមាត្រា៤ថ្មី នៃច្បាប់រដ្ឋធម្មនុញ្ញបន្ថែម សំដៅធានានូវដំណើរការប្រក្រតីភាពនៃស្ថាប័នជាតិ។
បើតាមសេចក្ដីព្រាងស្ដីពីការស្នើសុំធ្វើវិសោធនកម្មរដ្ឋធម្មនុញ្ញខាងលើ ក្រោមហេតុផលថា ធានាស្ថាប័នកំពូលរបស់ជាតិ ជាពិសេសអំណាចនីតិប្រតិបត្តិដែលមានបេសកកម្មចម្បងក្នុងការដឹកនាំការងារទូទៅរបស់រដ្ឋ ឱ្យមានដំណើរការប្រព្រឹត្តទៅដោយរលូនប្រកបដោយនិរន្តរភាពគ្រប់កាលៈទេសៈ។ មួយទៀត ធានាការពារ និងថែរក្សាបាននូវសន្តិភាព សន្តិសុខសង្គម សណ្ដាប់ធ្នាប់សាធារណៈ និងស្ថិរភាពនយោបាយរបស់ប្រទេសជាតិគ្រប់កាលៈទេសៈ ដើម្បីជាគ្រឹះសម្រាប់អភិវឌ្ឍប្រទេសលើគ្រប់វិស័យ។
អគ្គលេខាធិការនៃក្រុមប្រឹក្សាធម្មនុញ្ញ លោក តាំង រតនា បានប្រាប់សារព័ត៌មានក្នុងស្រុកថា សេចក្តីព្រាងច្បាប់ស្ដីពីការធ្វើវិសោធនកម្មរដ្ឋធម្មនុញ្ញ និងច្បាប់ធម្មនុញ្ញបន្ថែម ត្រូវបានគណៈរដ្ឋមន្ត្រីអនុម័តទាំងស្រុងតាមរយៈកិច្ចប្រជុំដែលដឹកនាំដោយលោក ហ៊ុន សែន កាលពីថ្ងៃទី៨ ខែកក្កដា ឆ្នាំ២០២២ ក្នុងគោលដៅធានាស្ថាប័នកំពូលរបស់ជាតិមាននិរន្តរភាព និងធានាស្ថិរភាពនយោបាយនៅក្នុងប្រទេសគ្រប់កាលៈទេសៈ។
តែយ៉ាងណា ក្រុមសង្គមស៊ីវិលក្នុងស្រុកអះអាងថា ការធ្វើវិសោធនកម្មច្បាប់រដ្ឋធម្មនុញ្ញដែលមានតែសភាឯកបក្ស មិនបានឆ្លុះបញ្ចាំងអំពីការរួបរួមជាតិតែមួយ និងឆន្ទៈរបស់ពលរដ្ឋឡើយ ក្រៅតែបម្រើឲ្យផលប្រយោជន៍បក្សកាន់អំណាចតែប៉ុណ្ណោះ។
ចំណែកអ្នកវិភាគនយោបាយ បណ្ឌិត ឡៅ ម៉ុងហៃ បានថ្លែងថា រដ្ឋាភិបាលមិនមានអ្វីចាំបាច់ត្រូវធ្វើវិសោធនកម្មរដ្ឋធម្មនុញ្ញ និងច្បាប់ធម្មនុញ្ញបន្ថែមនោះទេ ពីព្រោះច្បាប់កំពូលរបស់ជាតិដែលបង្កើតឡើងតាំងពីសម័យអន្តរកាលឆ្នាំ១៩៩៣ នេះ បានឆ្លុះបញ្ចាំងពីឆន្ទៈ និងស្មារតីប្រជាពលរដ្ឋពិតប្រាកដទៅហើយ។ លោកថា បើរដ្ឋាភិបាល និងរដ្ឋសភាធ្វើវិសោធនកម្មរដ្ឋធម្មនុញ្ញ និងច្បាប់ធម្មនុញ្ញបន្ថែមនោះ នឹងធ្វើឱ្យប៉ះពាល់ដល់ស្មារតី និងខ្លឹមសារដើម ខណៈការធ្វើវិសោធនកម្មនោះធ្វើឡើងដោយឯកបក្ស។
គិតមកដល់ឆ្នាំ២០២២ នេះ រដ្ឋាភិបាលបានធ្វើវិសោធនកម្មរដ្ឋធម្មនុញ្ញចំនួន ១០ដង ខណៈការវិសោធនកម្មរដ្ឋធម្មនុញ្ញលើកទី៩ ឆ្នាំ២០២១ គឺជាវិសោធនកម្មមួយដែលអ្នកច្បាប់ចាត់ទុកថាជាការកែប្រែកំណែទម្រង់ច្បាប់ជាតិដ៏អាក្រក់មួយ ដែលហាមឃាត់មិនឱ្យប្រធានក្រុមប្រឹក្សាធម្មនុញ្ញ ប្រធានព្រឹទ្ធសភា ប្រធានរដ្ឋសភា និងនាយករដ្ឋមន្ត្រីមានសញ្ជាតិបរទេសឡើយ គឺត្រូវតែមានសញ្ជាតិខ្មែរតែមួយគត់៕