បុរសខ្លាំងកម្ពុជា លោក ហ៊ុន សែន ប្រកាសជំហរថា កម្ពុជានឹងមិនយកអធិបតេយ្យជាតិរបស់ខ្លួនទៅដោះដូរជាមួយនឹងជំនួយ ឬការអនុគ្រោះណាមួយពីសហគមន៍អឺរ៉ុបនោះឡើយ បើទោះបីជាសហភាពអឺរ៉ុបសម្រេចដកប្រព័ន្ធអនុគ្រោះពន្ធ EBA ពីកម្ពុជាយ៉ាងណាក៏ដោយ។
មេដឹកនាំបក្សកាន់អំណាច លោក ហ៊ុន សែន បានលើកឡើងក្នុងជំនួបពិភាក្សាជាមួយតំណាងជាន់ខ្ពស់ទទួលបន្ទុកកិច្ចការបរទេស និងសន្តិសុខ នយោបាយ និងជាអនុប្រធានគណៈកម្មការអឺរ៉ុប លោក ចូសិប បូររែល (Joseph Borelle) កាលពីថ្ងៃទី០៤ ខែសីហា ឆ្នាំ២០២២ នេះថា កម្ពុជាមិនអាចយកអធិបតេយ្យភាពជាតិទៅដោះដូរនឹងជំនួយ ឬការអនុគ្រោះណាមួយពីបរទេសនោះឡើយ។
បុរសខ្លាំងលោក ហ៊ុន សែន បញ្ជាក់ថា បើទោះបីជាសហភាពអឺរ៉ុបសម្រេចដកប្រព័ន្ធអនុគ្រោះពន្ធ EBA ពីកម្ពុជា ២០% ទៅហើយក្តី ក៏លោកនៅតែបន្តពង្រឹងទំនាក់ទំនង និងកិច្ចសហប្រតិបត្តិការរវាងកម្ពុជា និងសហភាពអឺរ៉ុបបន្ថែមទៀតដែរ។
ការអះអាងរបស់ប្រមុខរដ្ឋាភិបាលកម្ពុជាបែបនេះ មិនមែនលើកទីមួយនោះទេ ប៉ុន្តែការលើកឡើងនេះ ត្រូវគេមើលឃើញថា ជាការអះអាងដែលមានលក្ខណៈជ្រុលហួសហេតុពីការទាមទាររបស់សហគមន៍អឺរ៉ុបចំពោះកម្ពុជានាពេលកន្លងមក។
មន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា បានប្រាប់ The Cambodia Daily នៅថ្ងៃទី៥ សីហា នេះថា បើយោងតាមលក្ខខណ្ឌរបស់សហគមន៍អឺរ៉ុបកន្លងមក មិនមានភាពធ្ងន់ធ្ងររហូតដល់ទាមទារឲ្យកម្ពុជាត្រូវតែលះបង់អធិបតេយ្យភាពជាតិរបស់ខ្លួនជាថ្នូរនឹងការផ្តល់ឲ្យ ឬការជួយរបស់ពួកគេនោះទេ គឺគ្រាន់តែទាមទារឲ្យកម្ពុជាគោរពនូវគោលការណ៍សិទ្ធិមនុស្ស និងស្ដារលទ្ធិប្រជាធិបតេយ្យតែប៉ុណ្ណោះ។
លោក មាជ សុវណ្ណារ៉ា អះអាងថា សហគមន៍អឺរ៉ុបតែងយកចិត្តទុកដាក់លើសិទ្ធិសេរីភាពរបស់ពលរដ្ឋខ្មែរក្រោមជំនួយរបស់ពួកគេ ដូចជាការផ្តល់ប្រព័ន្ធអនុគ្រោះពន្ធតាមរយៈរដ្ឋាភិបាលកម្ពុជា ជាដើម ព្រោះថាជំនួយនេះគឺដើម្បីធានានូវសេចក្តីសុខ និងផលប្រយោជន៍របស់ពលរដ្ឋខ្មែរគ្រប់រូប។
កាលពីដើមខែសីហា ឆ្នាំ២០២០ កន្លងទៅ សហភាពអឺរ៉ុបបានសម្រេចដកប្រព័ន្ធអនុគ្រោះពន្ធលើទំនិញរបស់កម្ពុជាប្រមាណ ២០ភាគរយ ហើយការដកប្រព័ន្ធអនុគ្រោះពន្ធនេះ មានន័យថា ទំនិញរបស់កម្ពុជាប្រមាណ ៤០មុខ តម្រូវឱ្យបង់ពន្ធក្នុងការនាំចូលទៅកាន់ប្រទេសនៅតំបន់អឺរ៉ុប ខណៈទំនិញទាំងនោះភាគច្រើនជាសម្លៀកបំពាក់ ស្បែកជើង និងផលិតផលធ្វើដំណើរដែលនាំទៅអឺរ៉ុបក្នុងតម្លៃ ១ពាន់លានអឺរ៉ូ ដែលស្មើនឹងជាង ១ពាន់លានដុល្លារអាមេរិកជារៀងរាល់ឆ្នាំ។
យ៉ាងណាក៏ដោយ ការដកប្រព័ន្ធអនុគ្រោះពន្ធ EBA ២០% នេះ គ្រាន់តែជាជំហានដំបូងរបស់សហភាពអឺរ៉ុបតែប៉ុណ្ណោះ ប៉ុន្តែគណៈកម្មាធិការអឺរ៉ុបនៅតែបើកផ្លូវឱ្យកម្ពុជាអាចទទួលបានផលអនុគ្រោះពន្ធនេះវិញ ប្រសិនបើកម្ពុជាធ្វើតាមការទាមទាររបស់ខ្លួន នោះគឺកម្ពុជាត្រូវធានាឲ្យបាននូវការស្ដារលទ្ធិប្រជាធិបតេយ្យ ការគោរពសិទ្ធិមនុស្ស និងបញ្ឈប់ការបិទសិទ្ធិសេរីភាពលើអ្នកតវ៉ា និងអ្នកបញ្ចេញមតិ ជាដើមតែប៉ុណ្ណោះ៕