អ្នកឃ្លាំមើលអះអាងថា លោក ហ៊ុន សែន ញៀនអំណាច ខ្លាចព្រៃភ្នំតាម៉ៅក្លាយជាទីតាំងលាក់បំពួនកងកម្លាំងប្រដាប់អាវុធសម្រាប់ផ្ដួលអំណាចគ្រួសារត្រកូល ហ៊ុន ទើបប្រើល្បិចបំផ្លាញព្រៃឈើភ្នំតាម៉ៅឲ្យក្លាយជាវាលរហោឋាន ទើបសម្រេចលុបចោល ស.ជ.ណ ទាំងអស់វិញ។
ប្រធានវេទិកាពលរដ្ឋ និងជាអ្នកវិភាគនយោបាយ លោក គឹម សុខ លើកឡើងថា ការបញ្ឈប់គម្រោងឈូសបំផ្លាញតំបន់ព្រៃឈើភ្នំតាម៉ៅ ពិតមែនតែមើលឃើញរូបភាពបណ្ដាលមកពីប្រតិកម្មចម្រុះរបស់ពលរដ្ឋ សកម្មជនសង្គម សកម្មជនបរិស្ថាន និងអង្គការការពារធម្មជាតិ ទាំងជាតិ និងអន្តរជាតិ ដើម្បីសម្រួលការខឹងសម្បារបស់ពលរដ្ឋនៅមុនការបោះឆ្នោតឆ្នាំ២០២៣ ប៉ុន្តែការពិត ជ្រៅជាងនេះ លោកថាការបញ្ឈប់នេះជាស្នៀតមួយរបស់លោក ហ៊ុន សែន ក្នុងការសម្រេចផែនការបំផ្លាញព្រៃភ្នំតាម៉ៅជាអាទិភាព។
លោកបញ្ជាក់ថា មូលហេតុដែលលោក ហ៊ុន សែន ត្រូវបំផ្លាញព្រៃភ្នំតាម៉ៅជាអាទិភាព ពីព្រោះលោក ហ៊ុន សែន ភ័យខ្លាចព្រៃតំបន់ភ្នំតាម៉ៅ ក្លាយជាទីតាំងលាក់បំពួនសម្រាប់កងកម្លាំងប្រដាប់អាវុធ ជាពិសេសពីក្នុងផ្ទៃក្នុងគណបក្សប្រជាជនកម្ពុជាដែលចិញ្ចឹមចិត្តផ្ដួលអំណាចគ្រួសារត្រកូល ហ៊ុន។
មួយវិញទៀត ព្រៃភ្នំតាម៉ៅ ក៏នៅជិតបន្ទាយកងទ័ពឯកជនរបស់លោក ហ៊ុន សែន នៅទួលក្រសាំង និងក៏ជិតផ្ទះលោក ហ៊ុន សែន នៅក្រុងតាខ្មៅដែរ។ បើមានកម្លាំងចាំផ្ដួលលោក ហ៊ុន សែន បង្កប់នៅព្រៃភ្នំតាម៉ៅ ពួកគេអាចចល័តកម្លាំងតែកន្លះយប់ដល់បន្ទាយទ័ព ឬផ្ទះលោក ហ៊ុន សែន នៅតាខ្មៅតែម្ដង។
លោក គឹម សុខ ថាលោក ហ៊ុន សែន ភ័យខ្លាចខ្លាំង ខណៈដែលលោកត្រូវត្រៀមជើងការនៅមុនការផ្ទេរអំណាច។ ម្យ៉ាងទៀត ព្រៃភ្នំតាម៉ៅ ក៏មានប្រវត្តិជាព្រៃហ្វឹកហាត់កងទ័ពរំដោះទសវត្សរ៍ទី៧០ ហើយលោក ហ៊ុន សែន ក៏ជាសមាជិកនៃក្រុមហ្វឹកហាត់ក្នុងព្រៃភ្នំតាម៉ៅនៅពេលនោះដែរ។ ដូច្នេះ គាត់ដឹងរឿងដែលអាចជាស្រមោលអតីតកាលតាមបន្លាចគាត់ ហើយគាត់តាំងចិត្តកម្ទេចព្រៃនេះចោល។
ប្រធានវេទិកាពលរដ្ឋរូបនេះចាត់ទុកការបញ្ឈប់គម្រោងឈូសព្រៃតំបន់ភ្នំតាម៉ៅ គ្រាន់តែជាល្បិចលោក ហ៊ុន សែន ដើម្បីកាត់បន្ថយការខឹងសម្បាពីសំណាក់ពលរដ្ឋ ហើយធ្វើជាដូរចិត្តស្ដាប់ពលរដ្ឋក្រោយពីបំផ្លាញព្រៃឈើភ្នំតាម៉ៅបានសម្រេចដូចបំណងហើយ។
លោកបញ្ជាក់ថា មូលហេតុដែលលោកលើកឡើងដូច្នេះ ដោយសារកន្លងមក បើលោក ហ៊ុន សែន ចេះស្ដាប់ប្រតិកម្មរបស់ពលរដ្ឋមែននោះ លោកប្រាកដជាសួរពលរដ្ឋមុននឹងឈូសបំផ្លាញព្រៃ ដើម្បីកុំឲ្យពលរដ្ឋខឹង និងដាក់បណ្ដាសាលើរូបលោក និងគ្រួសារ។ ជាក់ស្ដែង បើលោក ហ៊ុន សែន ឲ្យតម្លៃការតវ៉ារបស់ពលរដ្ឋនោះ ប្រាកដណាស់ លោកនឹងដោះស្រាយការទាមទាររបស់កូដករ Naga World មិនមែនអូសបន្លាយរាប់ខែ និងប្រើប្រាស់អំពើហិង្សាលើកូដករនោះទេ។
ចំណែកសកម្មជនព្រៃឈើ លោក ហេង ស្រស់ ចាត់ទុកករណីនេះថាវាជាកំហុសរបស់រដ្ឋាភិបាលទាំងស្រុង ក្នុងការអនុញ្ញាតឲ្យដីគម្របព្រៃឈើទៅឲ្យក្រុមហ៊ុនឯកជនធ្វើការឈូសឆាយ ក្រោមពាក្យថាអភិវឌ្ឍ ហើយក៏មិនមែនជាលើកទីមួយទេដែលរដ្ឋាភិបាលសព្វថ្ងៃបានធ្វើបែបនេះ។ លោកយល់ថា សម្រាប់ពលរដ្ឋ និងប្រទេសកម្ពុជាមានតែខាតបង់មួយគត់ គ្មានភាពល្អប្រសើរ រាល់ការអភិវឌ្ឍរបស់រដ្ឋាភិបាលសព្វថ្ងៃ មានតែបង្កើតការឈឺចាប់ដល់ពលរដ្ឋ និងប្រទេសជាតិបាត់បង់នូវធនធានធម្មជាតិ។
កាលពីថ្ងៃទី៧ ខែសីហា ឆ្នាំ២០២២ លោក ហ៊ុន សែន សម្រេចលុបចោលទាំងអស់ចំពោះការអនុញ្ញាតឱ្យដោះដូរ និងអភិវឌ្ឍតំបន់ភ្នំតាម៉ៅ បន្ទាប់ពីក្រុមហ៊ុនបានឈូសឆាយដីព្រៃភ្នំតាម៉ៅអស់ប្រហែល ៦០០ហិកតារក្នុងចំណោមដីព្រៃ ១៥០០ហិកតារដែលលោក ហ៊ុន សែន ផ្ដល់ឲ្យក្រោមគម្រោងអភិវឌ្ឍន៍។
ភ្នំតាម៉ៅ ដែលមានចម្ងាយប្រមាណ ៤០គីឡូម៉ែត្រពីរាជធានីភ្នំពេញ មានផ្ទៃដីសួនសត្វ ៤០០ហិកតារ និងផ្ទៃដីទំហំ ២៣០០ហិកតារជាព្រៃដែលព័ទ្ធជុំវិញសួនសត្វ។
ក្រុមហ៊ុនឯកជនចំនួន៣ ដែលគេដឹងថាជាប់ពាក់ព័ន្ធការទទួលបានដីព្រៃប្រមាណ ១៥០០ហិកតារនៅតំបន់ភ្នំតាម៉ៅ ពីរដ្ឋាភិបាលនោះរួមមាន ក្រុមហ៊ុន «បាទី ធួរីសឹម ឌីវីឡុបម៉ិនថ៍ (Bati Tourism & Development)» ក្រុមហ៊ុន «ធីភី ម៉ូរ៉ាល់ គ្រុប (TP Moral Group)» និងក្រុមហ៊ុន «ឆាយណា ប៉ោយប៉ែត សែ៍ថឺឡាយន៏ ស៊ីធី ឯ.ក (China Poipet Satellite City)»៕