ក្រុមសហជីពនាំគ្នាយកញត្តិសុំជួបរដ្ឋមន្ត្រីក្រសួងការងារ លោក អ៊ិត សំហេង ដោយផ្ទាល់ ដើម្បីស្វែងរកដំណោះស្រាយ និងបញ្ចប់វិវាទនៅក្នុងក្រុមហ៊ុនណាហ្គាវើលដ៍ (Naga World) ខណៈវិវាទនេះបានអូសបន្លាយរយៈពេល ៧ខែមកហើយ។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ បានប្រាប់ក្រុមអ្នកសារព័ត៌មាននៅមុខក្រសួងការងារ ថា ការដែលក្រុមសហជីពសុំជួបរដ្ឋមន្ត្រីក្រសួងការងារដោយផ្ទាល់ ដោយសារវិវាទការងារនេះបានអូសបន្លាយយូរណាស់មកហើយ ប៉ុន្តែនៅមិនទាន់មានដំណោះស្រាយ ហើយក្រុមហ៊ុនណាហ្គាវើលដ៍ក៏គ្មានឆន្ទៈក្នុងការដោះស្រាយដែរ។
កញ្ញា ស៊ីថរ អះអាងថា ក្រសួងការងារក៏មិនបានបំពេញតួនាទីរបស់ខ្លួនដោយឯករាជ្យក្នុងការជំរុញឲ្យក្រុមហ៊ុនអនុវត្តច្បាប់។ ដូច្នេះប្រសិនបើក្រសួងអនុញ្ញាតឲ្យក្រុមហ៊ុនរំលាយសហជីពឯករាជ្យបែបនេះ វានឹងប៉ះពាល់ដល់សេរីភាពសហជីព និងកម្មករនៅទូទាំងប្រទេសកម្ពុជាតែម្ដង។
យ៉ាងណាក៏ដោយ ក្រោយពីបានចូលជួបដាក់ញត្តិនៅក្រសួងការងាររួច កញ្ញា ឈឹម ស៊ីថរ បង្ហាញការខកចិត្តចំពោះមន្ត្រីក្រសួងការងារ ដែលបានប្រើប្រាស់សារព្រមានលើពួកគាត់រឿងជាប់បណ្ដឹងនៅតុលាការ ព្រមទាំងលើកយករឿងរ៉ាវដែលបានកើតឡើងតាំងពីយូរណាស់មកហើយនោះ ដើម្បីដាក់បន្ទុកលើសហជីព ក្នុងនោះក៏មានលោក វន់ ពៅ ផងដែរ។
ចំណែកប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) លោក វន់ ពៅ ដែលបានចូលរួមដាក់ញត្តិនៅក្រសួងការងារជាមួយសហជីពទាំង ១៤ស្ថាប័នផ្សេងទៀត អះអាងថា ក្រសួងការងារហាក់គ្មានឆន្ទៈក្នុងការដោះស្រាយ ទើបរុញឲ្យសហជីព និងកូដករប្ដឹងទៅតុលាការ។ លោកក៏បង្ហាញការសោកស្ដាយផងដែរដែលក្រសួងមិនខិតខំដោះស្រាយវិវាទការងារឲ្យកូដករ បែរជាមកព្រមានសហជីពដែលតាមដាន និងឃ្លាំមើលទៅវិញ។ ប៉ុន្តែទោះបីជាមានការព្រមានបែបនេះក្ដី ក៏ពួកគាត់នៅតែបន្តការងារដដែល ដើម្បីការពារផលប្រយោជន៍កម្មករនិយោជិតស្របច្បាប់ជាតិ និងអន្តរជាតិ។
លោក វន់ ពៅ ស្នើទៅរដ្ឋាភិបាលឲ្យពន្លឿនការដោះស្រាយវិវាទការងារជូនកម្មករដូចដោះស្រាយនៅភ្នំតាម៉ៅ។
កាលពីថ្ងៃទី២៣ ខែកក្កដា រដ្ឋបាលរាជធានីភ្នំពេញបានចេញសេចក្ដីប្រកាសព័ត៌មានមួយដោយបានចោទប្រកាន់ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) លោក វន់ ពៅ និងអ្នកស្រី យ៉ាង សុភ័ណ្ឌ ថាបានញុះញង់ឱ្យកូដករណាហ្គាវើលដ៍បុកទម្លុះបារ៉ាស់របស់សមត្ថកិច្ចរហូតមានអំពើហិង្សាកើតឡើង ប៉ុន្តែការចោទប្រកាន់នេះ ត្រូវបានសហជីព និងក្រុមអង្គការសង្គមស៊ីវិលច្រានចោល។
ខណៈដែលដំណោះស្រាយមិនទាន់មាននោះ នៅថ្ងៃព្រហស្បតិ៍ ទី១១ សីហា នេះ ក្រុមកូដករបាននាំគ្នាបន្តចេញធ្វើកូដកម្មទៀត ដើម្បីទាមទារឲ្យមានដំណោះស្រាយវិវាទការងារ។ អំឡុងពេលតវ៉ានារសៀលនេះ ក្រុមអាជ្ញាធរបានដាក់របាំងរារាំងមិនឲ្យទៅឈរធ្វើកូដកម្មនៅមុខក្រុមហ៊ុនណាហ្គាវើលដ៍។ ក្រៅពីរារាំងហើយ ក្រុមអាជ្ញាធរក៏បានរុញច្រាន និងប្រើអំពើហិង្សាលើកូដករ ដោយអ្នកខ្លះដួលខ្ទប់នឹងថ្នល់បណ្ដាលឲ្យរងរបួសផងដែរ។
វិវាទការងារក្រុមហ៊ុនណាហ្គាវើលដ៍បានកើតឡើងជាង ១ឆ្នាំមកហើយ ក្រោយពេលក្រុមហ៊ុននេះបានបញ្ឈប់បុគ្គលិកចំនួន ១៣២៩នាក់ក្នុងចំណោមបុគ្គលិកសរុបជាង ៨ពាន់នាក់ពីការងារ ក្រោមហេតុផលថា ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩។
យ៉ាងណា បុគ្គលិកដែលចេញធ្វើកូដកម្មអះអាងថា ការបញ្ឈប់នោះដោយសារថៅកែមានចេតនារំលាយសហជីពការពារសិទ្ធិកម្មករឲ្យអស់ពីក្រុមហ៊ុនកាស៊ីណូមួយនេះតែប៉ុណ្ណោះ៕