នៅខណៈនេះ ពិភពលោកកំពុងសម្លឹងទៅរកប្រទេសអង់គ្លេស ដែលកំពុងដំណើរការជ្រើសរើសនាយករដ្ឋមន្ត្រីម្នាក់ជំនួសលោក Boris Johnson ដែលបានលាលែងពីតំណែង។ ការបោះឆ្នោតចេញពីសកម្មជនគណបក្សអភិរក្សនិយម ដែលមានចំនួន ២០ម៉ឺននាក់ នឹងប្រព្រឹត្តនៅថ្ងៃទី០២ ខែកញ្ញា។
បេក្ខជនដែលត្រូវឡើងមកដល់វគ្គផ្ដាច់ព្រ័ត្រ គឺមាន ២រូប គឺលោក Rishi Sunak អតីតរដ្ឋមន្ត្រីក្រសួងសេដ្ឋកិច្ច និងអ្នកស្រី Liz Truss ដែលជារដ្ឋមន្ត្រីការបរទេសកំពុងកាន់តំណែង។ បេក្ខជនដែលបានដាក់ពាក្យប្រកួតតំណែងនាយករដ្ឋមន្ត្រីមានដល់ទៅ ៨រូប។
មុននឹងសម្រេចដល់វគ្គជម្រុះ គឺបេក្ខជន ៦រូបបានធ្លាក់ជាបន្តបន្ទាប់ដែលចេញពីការបោះឆ្នោតសមាជិកសភានៃបក្សអភិរក្សនិយម។ មកដល់ជុំទី៥ គឺនៅសល់បេក្ខជន ២រូបប៉ុណ្ណោះដែលទទួលបានសំឡេងឆ្នោតច្រើនជាងគេ គឺលោក Rishi Sunak និងអ្នកស្រី Liz Truss។
នៅក្នុងវគ្គទី៥ នេះ លោក Rishi Sunak ទទួលបានសំឡេង ១៣៧។ ចំណែកអ្នកស្រី Liz Truss បានហក់ឡើងខ្លាំងដោយរំលងបេក្ខជន ៦រូបដោយបាននាំឱ្យការគាំទ្រអ្នកស្រីកើនសំឡេងពី ៦០ មកដល់ ១១៣សំឡេង បានរុញឱ្យបេក្ខជនស្រីរូបនេះឡើងទៅដល់វគ្គផ្ដាច់ព្រ័ត្រ ហើយវគ្គចុងក្រោយបំផុតនេះ នឹងប្រព្រឹត្តនៅថ្ងៃទី២ ខែកញ្ញា ចំណែកលទ្ធផលនឹងប្រកាសជាផ្លូវការនៅថ្ងៃទី៥ ខែកញ្ញា។
ចំពោះលោក Rishi Sunak គឺលោកទទួលបានសំឡេងច្រើនដាច់គេតាំងពីជុំទី១ គឺជាង ១១០សំឡេង ប៉ុន្តែរយៈពេលនៃការប្រកួតប្រាំដង សំឡេងគាំទ្ររបស់លោក Rishi Sunak មានការហក់ឡើងតែ ២៧សំឡេងប៉ុណ្ណោះ។
ការពិត អ្នកស្រី Liz Truss ដំបូងៗស្ថិតក្នុងស្ថានភាពស្ទាក់ស្ទើរ។ អ្នកស្រីមិនបានប្រកាសថាចង់ដាក់ពាក្យជាបេក្ខជននាយករដ្ឋមន្ត្រីនោះទេ តែនៅពេលដឹងថាលោក Ben Wallace រដ្ឋមន្ត្រីការពារជាតិប្រកាសមិនឈរឈ្មោះ ទើបអ្នកស្រីសម្រេចឈរឈ្មោះ។ ឥឡូវនេះ សមាជិកសភានៃបក្សអភិរក្សនិយម និងអ្នកគាំទ្របក្សនេះជាសកម្មជនចំនួន ២០ម៉ឺននាក់ គឺជាអ្នកសម្រេចលើឋានៈជាប្រធានគណបក្សអភិរក្សនិយម និងជានាយករដ្ឋមន្ត្រីអង់គ្លេសជំនួសលោក Boris Johnson។
លោក Boris Johnson ត្រូវបានបក្សបង្ខំឱ្យលាលែងពីតំណែង ដោយសារតែលោកមានកំហុសក្នុងការគ្រប់គ្រងបក្ស និងកំហុសតិចតួចក្នុងបញ្ហាសង្គម ដូចជាលោកត្រូវបានផាកពិន័យព្រោះតែមិនពាក់ម៉ាស់បង្ការជំងឺឆ្លងកូវីដ-១៩ និងការជួបជុំមិត្តភ័ក្ដិក្នុងពិធីជប់លៀងដែលជាការបំពានច្បាប់ប្រឆាំងនឹងជំងឺកូវីដ។
តែខណៈនេះ មានការស្ទាបស្ទង់មតិជាបន្តបន្ទាប់ គឺមួយសប្ដាហ៍ម្ដងៗរហូតដល់ថ្ងៃទី២ សីហា ទើបបិទការស្ទាបស្ទង់អំពីប្រជាប្រិយភាពរបស់បេក្ខជនទាំង ២រូបនេះ។ បេក្ខជនទាំង ២រូបនេះ គឺលោក Rishi Sunak អតីតរដ្ឋមន្ត្រីក្រសួងសេដ្ឋកិច្ច និងអ្នកស្រី Liz Truss ដែលជារដ្ឋមន្ត្រីការបរទេសកំពុងកាន់តំណែង។
អ្នកនយោបាយទាំងពីរសុទ្ធតែវ័យក្មេងដូចគ្នា។ លោក Rishi Sunak មានអាយុ ៤២ឆ្នាំ។ ចំណែកអ្នកស្រី Liz Truss មានអាយុ ៤៧ឆ្នាំ។ អ្នកទាំងពីរសុទ្ធតែបានឆ្លងកាត់ការសិក្សាខ្ពង់ខ្ពស់ដូចគ្នា គឺបានបញ្ចប់មហាវិទ្យាល័យដូចគ្នា តែជំនាញចេញពីការសិក្សា គឺខុសគ្នា។ លោក Rishi Sunak មានឯកទេសខាងកិច្ចការហិរញ្ញវត្ថុ និងសេដ្ឋកិច្ច។ ចំពោះអ្នកស្រី Liz Truss មានជំនាញកិច្ចការនយោបាយ និងការបរទេស រួមទាំងកិច្ចការអភិវឌ្ឍន៍សង្គម។
បេក្ខជនទាំងពីររូបនេះបានជាប់ជាសមាជិកសភានៃប្រទេសអង់គ្លេសដូចគ្នា។ អ្នកស្រី Liz Truss ជាប់ជាសមាជិកសភាតាំងពីឆ្នាំ២០១០។ ចំណែកលោក Rishi Sunak ក្លាយជាសមាជិកសភានៅឆ្នាំ២០១៥។ ពួកគាត់សុទ្ធតែមានបទពិសោធន៍ក្នុងកិច្ចការសង្គមប្រហាក់ប្រហែលគ្នា ហើយភាពល្បីល្បាញក្នុងកិច្ចការនយោបាយក៏ប្រហាក់ប្រហែលគ្នាដែរ។
តែយ៉ាងណា លោក Rishi Sunak គឺរុញខ្លាំងឱ្យលោក Boris Johnson សម្រេចលាលែងពីប្រធានបក្សអភិរក្សនិយម និងពីនាយករដ្ឋមន្ត្រី។
នៅពេលដែលលោកលាលែងពីតំណែងរដ្ឋមន្ត្រីហិរញ្ញវត្ថុ គឺលោកបាននាំឱ្យសមាជិកគណៈរដ្ឋមន្ត្រីជាច្រើនរូបលាលែងតាមលោកដែរ គឺលើកលែងតែរដ្ឋមន្ត្រីការពារជាតិ លោក Ben Wallace និងអ្នកស្រី Liz Truss មិនបានចាប់អារម្មណ៍នឹងការលាលែងតាមលោក Rishi Sunak នោះទេ។ ពួកគាត់ទាំងពីរស្ថិតក្នុងការសោកស្ដាយចំពោះលោក Boris Johnson ដែលត្រូវបានបក្សអភិរក្សនិយមបង្ខំឱ្យលាលែងពីប្រធានបក្ស។
លោក Ben Wallace នៅពេលចុងក្រោយនេះ លោកបានវាយប្រហារលោក Rishi Sunak ថាជាមេគំនិតបំផុសឱ្យបក្សមានការខ្វែងគំនិតគ្នា រហូតចាត់វិធានការលើលោក Boris Johnson។ លោកថាលោក Rishi Sunak បានដាក់កំហុសថាលោក Boris Johnson ដឹកនាំប្រទេសធ្វើឱ្យសេដ្ឋកិច្ចអង់គ្លេសធ្លាក់ចុះ ហើយចោទថាលោក Johnson ជាអ្នករុញឱ្យលោកដំឡើងពន្ធអាករផ្សេង។
សម្រាប់លោក Ben Wallace ថាលោក Rishi Sunak គឺជាអ្នករួមចំណែកផងដែរ ព្រោះលោកជារដ្ឋមន្ត្រីសេដ្ឋកិច្ច តែលោក Ben Wallace ថាបញ្ហាឱនភាពសេដ្ឋកិច្ចនេះមិនមែនមានតែនៅប្រទេសអង់គ្លេសនោះទេ គឺជារឿងទូទៅនៃពិភពលោក ព្រោះតែការរីករាលដាលជាសកលដោយសារការផ្ទុះជំងឺកូវីដ-១៩។
ទាំងលោក Ben Wallace និងអ្នកស្រី Liz Truss គឺជាអ្នកនយោបាយដែលប្រឆាំងប្រធានាធិបតីរុស្ស៊ី លោក វ៉្លាឌីមៀរ ពូទីន លើកទ័ពឈ្លានពានអ៊ុយក្រែន។ ទាំងលោក Ben Wallace និងអ្នកស្រី Liz Truss នៅពីក្រោយលោក Johnson ក្នុងការពង្រឹងគោលនយោបាយនៃប្រទេសអង់គ្លេស ប្រឆាំងរុស្ស៊ី លើកទ័ពឈ្លានពានអ៊ុយក្រែន។ ពួកគាត់ទាំងបីជាអ្នកដើរតាមសហរដ្ឋអាមេរិកទប់ទល់ឥទ្ធិពលចិន ដែលកំពុងធ្វើអនុត្តរភាពយោធានៅក្នុងតំបន់ឥណ្ឌូ-ប៉ាស៊ីហ្វិក។ ចំណែកលោក Rishi Sunak មិនសូវមានគោលនយោបាយរឹងខ្លាំងអំពីរុស្ស៊ីឈ្លានពានអ៊ុយក្រែននោះទេ តែលោកមានគោលនយោបាយការបរទេសរឹងមាំប្រឆាំងនឹងចិន។
តាមសាវតារ លោក Rishi Sunak មានឪពុកម្ដាយជាជនជាតិឥណ្ឌា។ លោកក៏ត្រូវបានរាយការណ៍មកថាបានទៅរៀបអាពាហ៍ពិពាហ៍នៅប្រទេសឥណ្ឌា តែលោកកើតនៅលើទឹកដីអង់គ្លេស ក្នុងឆ្នាំ១៩៨០។ ចំណែកអ្នកស្រី Liz Truss កើតនៅលើទឹកដីអង់គ្លេសនៅឆ្នាំ១៩៧៥។ ទាំងឪពុក និងម្ដាយសុទ្ធតែជាជាតិសាសន៍អង់គ្លេស។
យ៉ាងណា ពិភពលោកកំពុងតែសម្លឹងមើលបេក្ខជន ២រូបនេះថាតើបេក្ខជនណាមួយនឹងក្លាយជាប្រធានគណបក្សអភិរក្សនិយម និងជានាយករដ្ឋមន្ត្រីអង់គ្លេសជំនួសលោក Boris Johnson គឺនឹងបានដឹងនៅថ្ងៃទី៥ កញ្ញា ជាថ្ងៃដែលបក្សអភិរក្សនិយមត្រូវកំណត់ជាថ្ងៃបើកហិបឆ្នោតដើម្បីរាប់សន្លឹកឆ្នោតជាសាធារណៈប្រកាសលទ្ធផលបោះឆ្នោត ដែលកើតចេញពីការបោះឆ្នោតនៃសំឡេងរបស់សកម្មជនសំខាន់ៗ ២០ម៉ឺននាក់នៃគណបក្សអភិរក្សនិយម៕