ក្រុមអង្គការសង្គមស៊ីវិល និងស្ថាប័នព័ត៌មានចំនួន ៤០ស្ថាប័ន ទាមទារឲ្យរដ្ឋាភិបាលកម្ពុជាបើកការស៊ើបអង្កេតដោយឥតលម្អៀង ករណីក្រុមអង្គរក្សដែលឃាត់ខ្លួន និងប្រើហិង្សាលើអ្នកសារព័ត៌មាន និងសកម្មជនបរិស្ថានអំឡុងពេលពួកគេចុះទៅបរិវេណនៅតំបន់ភ្នំតាម៉ៅ។
សេចក្ដីថ្លែងការណ៍រួមរបស់អង្គការសិទ្ធិមនុស្ស និងសង្គមស៊ីវិលចំនួន ៤០ស្ថាប័ន ចេញនៅថ្ងៃទី១៩ ខែសីហា ឆ្នាំ២០២២ បានឲ្យដឹងថា អ្នកសារព័ត៌មានចំនួន ៥នាក់មកពីអង្គភាពសារព័ត៌មានឯករាជ្យវីអូឌី (VOD) និងយុវជនខ្មែរថាវរៈចំនួន ៤នាក់ ត្រូវបានឃាត់ខ្លួននៅក្នុងព្រៃភ្នំតាម៉ៅកាលពីថ្ងៃទី១៦ ខែសីហា ដោយមន្ត្រីកងអង្គរក្សរបស់នាយករដ្ឋមន្ត្រី (BHQ) និងបញ្ជូនមកកាន់អធិការដ្ឋាននគរបាលស្រុកបាទី ខេត្តតាកែវ។
សេចក្ដីថ្លែងការណ៍បញ្ជាក់ថា អំឡុងពេលឃាត់ខ្លួននោះ មន្ត្រីកងអង្គរក្សរបស់នាយករដ្ឋមន្ត្រី (BHQ) ក៏បានប្រើប្រាស់អំពើហិង្សាលើអ្នកថតវីដេអូរបស់វីអូឌីម្នាក់ និងយុវជនខ្មែរថាវរៈ ក្រោយពីបដិសេធមិនប្រគល់ទូរស័ព្ទដែលប្រើឲ្យមន្ត្រីកងអង្គរក្ស។ ពួកគេចាត់ទុកការប្រើប្រាស់អំពើហិង្សា និងការឃាត់ខ្លួនតាមទំនើងចិត្តនោះ ថាជាការបំភិតបំភ័យអ្នកសារព័ត៌មាន និងសកម្មជនពីសំណាក់មន្ត្រីកងអង្គរក្សនាយករដ្ឋមន្ត្រីនៅតំបន់ព្រៃភ្នំតាម៉ៅ។
ពួកគេថា ការឃាត់ខ្លួនទាំងនោះក្រោមហេតុផលថា អ្នកកាសែតវីអូឌីមិនត្រូវបានអនុញ្ញាតឲ្យថតរូប វីដេអូ ឬបង្ហោះដ្រូននៅភ្នំតាម៉ៅ ដោយអះអាងថា រូបថត និងវីដេអូទាំងនោះអាចត្រូវបានប្រើប្រាស់ដើម្បីផ្សព្វផ្សាយព័ត៌មានមិនពិត ជារឿងមិនសមហេតុផល ប៉ុន្តែក្រុមសង្គមស៊ីវិល និងស្ថាប័នព័ត៌មានចាត់ទុកការចោទប្រកាន់នោះ ថាជាការរឹតត្បិតសិទ្ធិតាមអំពើចិត្តលើអ្នកសារព័ត៌មាន។
ពួកគេថា អ្នកសារព័ត៌មានមានសិទ្ធិក្នុងការចងក្រងឯកសារ និងត្រួតពិនិត្យដោយសេរីអំពីការបំផ្លិចបំផ្លាញបរិស្ថាន និងការរំលោភសិទ្ធិ និងបញ្ចេញមតិជាសាធារណៈ ដែលជាសិទ្ធិត្រូវបានការពារដោយរដ្ឋធម្មនុញ្ញនៃប្រទេសកម្ពុជា និងច្បាប់ស្ដីពីសិទ្ធិមនុស្សអន្តរជាតិ។
មួយវិញទៀត អ្នកកាសែតឯករាជ្យមានមុខនាទីរាយការណ៍ព័ត៌មានដោយសេរីនៅក្នុងប្រទេសកម្ពុជា ត្រូវតែមានការការពារ ជាពិសេសនៅពេលរាយការណ៍អំពីបញ្ហាផលប្រយោជន៍សាធារណៈ ដូចជាការកាប់បំផ្លាញព្រៃឈើនៅភ្នំតាម៉ៅអស់ជាច្រើនហិកតារនាពេលថ្មីៗនេះ ជាដើម។
ក្រុមសង្គមស៊ីវិល និងស្ថាប័នព័ត៌មាន សម្ដែងការសោកស្ដាយចំពោះការប្រើអំណាចដោយខុសច្បាប់របស់អាជ្ញាធរ និងការប្រើអំពើហិង្សាលើរូបរាងកាយអ្នកសារព័ត៌មាន និងសកម្មជនខ្មែរថាវរៈ។ ករណីនេះ ពួកគេអំពាវនាវឲ្យមានការស៊ើបអង្កេតដោយឥតលម្អៀងលើហេតុការណ៍នេះ ក៏ដូចជាផ្ដន្ទាទោសចំពោះអាជ្ញាធរណាដែលប្រព្រឹត្តល្មើសនឹងច្បាប់ និងផ្តល់យុត្តិធម៌សម្រាប់ជនរងគ្រោះ។
ពួកគេស្នើទៅអាជ្ញាធរជាតិឲ្យគោរពច្បាប់ស្ដីពីរបបសារព័ត៌មាន រដ្ឋធម្មនុញ្ញ ព្រមទាំងច្បាប់ជាតិ និងអន្តរជាតិទាំងអស់ដែលធានាសិទ្ធិសេរីភាពនៃការបញ្ចេញមតិ និងសិទ្ធិរបស់អ្នកសារព័ត៌មាន និងអ្នកការពារសិទ្ធិមនុស្សទាំងអស់ក្នុងការចងក្រងឯកសារ និងផ្សព្វផ្សាយជាសាធារណៈនូវសកម្មភាពរបស់រដ្ឋ និងបម្រើសង្គម៕