ពលរដ្ឋ និងយុវជនមួយចំនួនស្នើឲ្យរដ្ឋមន្ត្រីក្រសួងអប់រំ យុវជន និងកីឡា លោក ហង់ ជួន ណារ៉ុន បញ្ឈប់ការបង្កើតអគារសិក្សាភាសាវៀតណាមនៅកម្ពុជា ដោយថាការបង្កើតនេះវាផ្ដល់ហានិភ័យខ្ពស់ ខណៈវៀតណាមមានមហិច្ឆតាជ្រៀតចូលគ្រប់ចក្ខុវិស័យនៅកម្ពុជា និងនៅចិញ្ចឹមចិត្តយកទឹកដីកម្ពុជា។
ក្នុងញត្តិដែលដាក់ទៅរដ្ឋមន្ត្រីក្រសួងអប់រំ យុវជន និងកីឡា លោក ហង់ ជួន ណារ៉ុន នៅថ្ងៃទី២៩ ខែសីហា នេះ បានលើកឡើងថា ភាសាវៀតណាមមិនមែនជាតម្រូវការចាំបាច់ និងផ្ដល់ប្រយោជន៍ខ្លាំងនោះទេ បើប្រៀបធៀបនឹងអគារសិក្សាភាសានានាដែលមានស្រេចនៅសាកលវិទ្យាល័យភូមិន្ទភ្នំពេញ។ ផ្ទុយទៅវិញ វាអាចផ្ដល់ជាហានិភ័យខ្ពស់ចំពោះការជ្រៀតចូលរបស់ភាសាវៀតណាមនៅតាមគ្រឹះស្ថានស្ថាប័ន។
មួយវិញទៀត ការបង្កើតអគារសិក្សានេះ វាជាការបំពេញនូវតម្រូវការវៀតណាម ដែលមានមហិច្ឆតាជ្រៀតចូលគ្រប់ចក្ខុវិស័យនៅកម្ពុជា ខណៈវៀតណាមជាប្រជាជាតិមួយដែលកម្ពុជាត្រូវប្រុងប្រយ័ត្នចំពោះចំណងមិត្តភាព និងទំនាក់ទំនងផ្សេងៗ ដោយសារកម្ពុជាបានបាត់បង់ធនធាន ទឹកដី និងទ្រព្យសម្បត្តិជាតិច្រើន ដូចជាទឹកដីកម្ពុជាក្រោម និងកោះត្រល់ ជាដើមនោះទៅវៀតណាម។
ញត្តិដដែលបានរៀបរាប់ថា ហានិភ័យនៃការឈានទៅរកការគ្រប់គ្រងដោយមនោគមន៍វិជ្ជា និងចិត្តសាស្ត្រដោយប្រយោលមកលើកម្ពុជា បន្ទាប់ពីរដ្ឋាភិបាលបានផ្ដល់ដីចំនួន ៤០ហិកតារឲ្យជនជាតិវៀតណាមរស់នៅដោយសង់លំនៅឋាន ស្របពេលដែលពលរដ្ឋម្ចាស់ដីរងគ្រោះដោយការរំលោភជម្លោះដីធ្លីនោះ។
ជាមួយគ្នានេះដែរ ការបង្កើតអគារនេះបង្ហាញពីការគ្មានតុល្យភាព និងសមរម្យចំពោះការទូត ដោយសារភាគីវៀតណាមមិនបានផ្ដល់សិទ្ធិពេញដល់ការសិក្សាភាសាខ្មែរនៅវៀតណាម ជាពិសេសពលរដ្ឋខ្មែរដែលរស់នៅកម្ពុជាក្រោម គ្មានសិទ្ធិទទួលបានការសិក្សាអក្សរ និងភាសាខ្មែរស្របច្បាប់ឡើយ។
ពួកគេស្នើទៅរដ្ឋមន្ត្រីក្រសួងអប់រំ យុវជន និងកីឡា លោក ហង់ ជួន ណារ៉ុន បញ្ឈប់ការបង្កើតអគារសិក្សាភាសាវៀតណាមក្នុងគ្រឹះស្ថានក្របខ័ណ្ឌរដ្ឋនៅកម្ពុជា ដោយថាតាំងពីសម័យបុរាណរហូតដល់បច្ចុប្បន្ន វៀតណាមមិនដែលបោះបង់នូវមហិច្ឆតាឈ្លានពានទឹកដីខ្មែរឡើយ។
ថ្លែងប្រាប់អ្នកសារព័ត៌មាននៅមុខក្រសួងអប់រំ លោក ធែល ធីលែន អះអាងថា ការទាមទារឲ្យក្រសួងបញ្ឈប់បង្កើតអគារសិក្សាភាសាវៀតណាមនៅកម្ពុជា មិនមែនមានតែរូបលោកនោះទេ ប៉ុន្តែក៏មានពលរដ្ឋមកពីបណ្ដាខេត្តផ្សេងៗនៃប្រទេសកម្ពុជាចូលរួមដែរ។
ប្រធានវេទិកាពលរដ្ឋ និងជាអ្នកវិភាគនយោបាយ លោក គឹម សុខ សម្ដែងការកោតសរសើរចំពោះស្មារតីយុវជន និងពលរដ្ឋខ្មែរដែលហ៊ានបង្ហាញសកម្មភាពតវ៉ាមិនឲ្យមានការបង្កើតដេប៉ាតឺម៉ង់ភាសាវៀតណាម ឬផ្នែកសិក្សាវៀតណាមនៅសាកលវិទ្យាល័យភូមិន្ទភ្នំពេញ។
លោកជំរុញឲ្យសិស្សានុសិស្ស និស្សិត យុវជន និងបញ្ញវន្តខ្មែរនៅទូទាំងប្រទេស និងគ្រប់ទិសទីក្នុងពិភពលោក ប្រើសិទ្ធិជាខ្មែរ ដើម្បីទាមទារឲ្យរដ្ឋាភិបាលបញ្ឈប់ការបង្កើតជាផ្លូវការនូវដេប៉ាតឺម៉ង់ភាសាវៀតណាមនៅលើទឹកដីកម្ពុជា។ លោកថា វៀតណាមកំពុងប្រើស្នៀតនេះដើម្បីពង្រីកមេរោគឈ្លានពានរបស់ពួកគេលើពូជសាសន៍ខ្មែរ និងទឹកដីខ្មែរ ដោយប្រើលេសសមាហរណកម្មសកល។
លោក គឹម សុខ បានដាក់ជាសំណួរថា ដំណាក់កាលនោះ ខ្មែរអាចរក្សាពូជសាសន៍ និងទឹកដីយើងដោយរបៀបណា? ពេលនេះ វៀតណាមកំពុងតែផ្សព្វផ្សាយនៅលើ Wikipedia ថា ភាសាខ្មែរមានអំបូរដើមជាមួយភាសាវៀតណាម ហើយចុះទម្រាំទឹកដីខ្មែរដែលឮទ្រហឹង និងការបំពងសំឡេងរៀនភាសាវៀតណាម តើវៀតណាមនឹងបោកពិភពលោកបានបែបណាទៀត?
ឌឹ ខេមបូឌា ដេលី នៅពុំអាចសុំការបញ្ជាក់ជុំវិញករណីនេះពីអ្នកនាំពាក្យក្រសួងអប់រំ យុវជន និងកីឡា លោក រស់ សុវាចា បាននៅឡើយទេ។
ទឹកដីកម្ពុជាក្រោមបានធ្លាក់ទៅក្រោមការត្រួតត្រារបស់វៀតណាម កាលពីសម័យអាណានិគមនិយមបារាំង ប៉ុន្តែសម្តេចព្រះនរោត្តម សីហនុ តែងតែប្រកាសរក្សាសិទ្ធិរបស់កម្ពុជាជាម្ចាស់កម្មសិទ្ធិលើទឹកដីកំណើតរបស់ដូនតាខ្មែរនេះ។ ចំណែកកោះត្រល់ ចង្កោមកោះក្រចកសេះ ព្រមទាំងតំបន់ជុំវិញ នៅតែជាទឹកដីកម្មសិទ្ធិរបស់កម្ពុជាក្នុងសម័យសង្គមរាស្ត្រនិយម សម័យសាធារណរដ្ឋ និងក្នុងសម័យខ្មែរក្រហម។
ក្រុមអ្នកឃ្លាំមើលបញ្ហាព្រំដែន និយាយថា កោះត្រល់ ចង្កោមកោះក្រចកសេះ ព្រមទាំងតំបន់ជុំវិញនោះទើបតែធ្លាក់ទៅក្រោមការគ្រប់គ្រងរបស់វៀតណាម ក្នុងពេលកម្ពុជាដឹកនាំដោយបុរសខ្លាំងលោក ហ៊ុន សែន៕