បុរសខ្លាំងកម្ពុជា លោក ហ៊ុន សែន និងកូនប្រុស គឺលោក ហ៊ុន ម៉ាណែត ដែលជាបេក្ខជនអនាគតនាយករដ្ឋមន្ត្រី ប្រកាសថា ពួកលោកបានទន្ទឹងរង់ចាំបន្តធ្វើការយ៉ាងជិតស្និទ្ធជាមួយប្រធានាធិបតីពីបក្សកុម្មុយនីស្តចិន លោក ស៊ី ជីនពីង ដើម្បីពង្រឹងបន្ថែមទៀតនូវមិត្តភាពជាប្រពៃណីរវាងគណបក្សប្រជាជនកម្ពុជា និងគណបក្សកុម្មុយនីស្តចិន ក្នុងការលើកកម្ពស់កិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ។
មេដឹកនាំខ្មែរដែលចូលចិត្តប្រើអំណាចតាមរបៀបកុម្មុយនីស្ត លោក ហ៊ុន សែន កាលពីថ្ងៃទី២៣ ខែតុលា ឆ្នាំ២០២២ នេះ បានផ្ញើលិខិតអបអរសាទរលោក ស៊ី ជីនពីង ដែលបានជាប់ឆ្នោតជាអគ្គលេខាធិការគណបក្សកុម្មុយនីស្តចិនសាជាថ្មីនៅក្នុងសមាជជាតិរបស់គណបក្សកុម្មុយនីស្តចិន លើកទី២០ កាលពីចុងសប្តាហ៍កន្លងទៅ។
មេដឹកនាំបក្សកាន់អំណាចដែលមានភាពល្អូកល្អើនជាមួយមេដឹកនាំបក្សកុម្មុយនីស្តចិន លោក ហ៊ុន សែន អះអាងថា ទំនាក់ទំនងទ្វេភាគីរវាងកម្ពុជា និងចិន គឺមានភាពល្អប្រសើរ ដែលរីកចម្រើនជាលំដាប់ និងកិច្ចសហប្រតិបត្តិការកាន់តែជិតស្និទ្ធគ្រប់ជ្រុងជ្រោយ ដោយសារមិត្តភាពជាប្រពៃណី និងទំនាក់ទំនងដ៏ស្និទ្ធស្នាលរបស់គណបក្សដែលកំពុងដឹកនាំប្រទេសទាំងពីរ។
មេដឹកនាំកម្ពុជាដែលកំពុងជំពាក់បំណុលចិនវ័ណ្ឌក លោក ហ៊ុន សែន បញ្ជាក់ថា ប៉ុន្មានឆ្នាំកន្លងមកនេះ គណបក្សប្រជាជនកម្ពុជា (CPP) និងគណបក្សកុម្មុយនីស្តចិន (CPC ឬ CCP) បានពង្រឹងទំនាក់ទំនងមិត្តភាពរឹងមាំដូចដែកថែប ដែលបានធ្វើឱ្យទំនាក់ទំនងទ្វេភាគីរវាងកម្ពុជា-ចិន រីកចម្រើនឥតឈប់ឈរសម្រាប់ជាផលប្រយោជន៍ដល់ប្រជាជននៃប្រទេសទាំងពីរ។
កាលពីថ្ងៃទី២២ ខែតុលា ឆ្នាំ២០២២ គណបក្សកុម្មុយនីស្តចិនបានបិទបញ្ចប់សមាជបក្សលើកទី២០ របស់ខ្លួន ដោយតែងតាំងប្រធានាធិបតីចិន លោក ស៊ី ជីនពីង ជាអគ្គលេខាធិការ និងជាប្រធានគណៈកម្មការយោធាមជ្ឈិមនៃគណបក្សកុម្មុយនីស្តចិន សម្រាប់អាណត្តិទី៣ រយៈពេល ៥ឆ្នាំបន្តទៀត។
បេក្ខជនអនាគតនាយករដ្ឋមន្ត្រីខាងគណបក្សប្រជាជនកម្ពុជា លោក ហ៊ុន ម៉ាណែត ដែលត្រូវជាកូនប្រុសបង្កើតលោក ហ៊ុន សែន បានចេញលិខិតអបអរសាទរប្រធានាធិបតីបក្សកុម្មុយនីស្តចិន លោក ស៊ី ជីនពីង ដែលបានជាប់ឆ្នោតបន្តក្នុងអាណត្តិទី៣ កាលពីថ្ងៃទី២៣ តុលា នេះដែរថា លោកប្ដេជ្ញាបន្តជំរុញបន្ថែមនូវមិត្តភាពជាប្រពៃណី ដើម្បីបង្កើនភាពជាដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា-ចិន ក្នុងការស្វែងរកផលប្រយោជន៍សម្រាប់ប្រជាជននៃប្រទេសទាំងពីរ។
ទោះជាបែបនេះក្តី អនុប្រធានវេទិកាពលរដ្ឋ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី២៥ តុលា នេះថា ការចេញលិខិតអបអរសាទររបស់លោកនាយករដ្ឋមន្ត្រី ហ៊ុន សែន និងបេក្ខជនអនាគតនាយករដ្ឋមន្ត្រីខាងបក្សកាន់អំណាច លោក ហ៊ុន ម៉ាណែត គឺបង្ហាញពីការយកចិត្តថ្លើមចិន ដោយការដាក់ខ្លួនព្រមរស់នៅក្រោមនយោបាយចិន ជាជាងការបង្កើតចំណងមិត្តភាពតាមលក្ខណៈការទូត ព្រោះថាបើគ្រាន់តែចង់រក្សាមិត្តភាពជាមួយចិន ត្រឹមតែលោក ហ៊ុន សែន ដែលជានាយករដ្ឋមន្ត្រីម្នាក់ផ្ញើលិខិតអបអរសាទរ គឺគ្រប់គ្រាន់ហើយ មិនចាំបាច់ដល់ថ្នាក់លោក ហ៊ុន ម៉ាណែត ដែលជាកូន ផ្ញើលិខិតអបអរសាទរបន្ថែមទៀតនោះទេ។
លោក ម៉ែន ណាត សម្ដែងនូវការព្រួយបារម្ភជុំវិញបញ្ហានានាដែលកំពុងកើតមានរវាងចិន និងកម្ពុជា ដូចជាមូលដ្ឋានទ័ពជើងទឹករាម និងការស្ដារលទ្ធិប្រជាធិបតេយ្យ ជាដើម ដែលអាចនឹងវិវឌ្ឍទៅរកភាពកាន់តែអាក្រក់នៅពេលដែលទំនាក់ទំនងកម្ពុជា-ចិន កាន់តែស៊ីជម្រៅលើសពីទំនាក់ទំនងការទូតដូចសព្វថ្ងៃនេះ។
អនុប្រធានវេទិកាពលរដ្ឋរូបនេះបញ្ជាក់ថា តាមទំនាក់ទំនងកម្ពុជា-ចិនបែបនេះ រដ្ឋាភិបាលវៀតណាមដែលធ្លាប់តែជាអាណាព្យាបាលរបស់គណបក្សប្រជាជនកម្ពុជារហូតមក នឹងមិននៅស្ងៀមចំពោះរឿងនេះឡើយ ចំណែករដ្ឋាភិបាលកម្ពុជាដើម្បីរក្សាទំនាក់ទំនងជាមួយវៀតណាមបន្តទៀត គឺមានតែសម្បទានទឹកដីរបស់ខ្មែរត្រង់ចំណែកណាមួយបន្ថែមទៀតប៉ុណ្ណោះ ដូច្នេះកម្ពុជានឹងធ្លាក់ខ្លួនជាជនរងគ្រោះយ៉ាងធ្ងន់ធ្ងរ ដោយការបាត់បង់ទឹកដីផង និងក្លាយជាកូនអុកភូមិសាស្ត្រនយោបាយរបស់ចិនទៅថ្ងៃមុខផង។
ទាក់ទិននឹងបញ្ហានេះ លោកនាយករដ្ឋមន្ត្រី ហ៊ុន សែន បានបញ្ជាក់ជំហររបស់ខ្លួនកាលពីថ្ងៃទី២០ ខែឧសភា ឆ្នាំ២០២១ ទៅកាន់ប្រទេសក្នុងតំបន់អាស៊ី និងមហាអំណាចពិភពលោកដទៃទៀត ដូចជាសហរដ្ឋអាមេរិក ជាដើម ថា បើកម្ពុជាមិនបានពឹងមហាអំណាចកុម្មុយនីស្តចិនទេ តើឱ្យកម្ពុជាទៅពឹងមហាអំណាចមួយណា៕