អតីតតំណាងរាស្ត្រអូស្ត្រាលីដើមកំណើតខ្មែរ រួមជាមួយអង្គការសង្គមស៊ីវិលនៅក្រៅស្រុកជិត ៤០ស្ថាប័ន បានដាក់លិខិតទៅនាយករដ្ឋមន្ត្រី និងរដ្ឋសភានៃប្រទេសអូស្ត្រាលី ឱ្យជំរុញទៅមេដឹកនាំពិភពលោកដែលចូលរួមក្នុងកិច្ចប្រជុំកំពូលអាស៊ាន និង G20 បញ្ចប់ការគ្រប់គ្រងតាមបែបឃោរឃៅរបស់រដ្ឋាភិបាលលោក ហ៊ុន សែន ដើម្បីស្ដារសិទ្ធិមនុស្ស លទ្ធិប្រជាធិបតេយ្យ នីតិរដ្ឋ និងដើម្បីឱ្យមានការបោះឆ្នោតដោយសេរី និងយុត្តិធម៌នៅកម្ពុជាឡើងវិញ។
អតីតតំណាងរាស្ត្រអូស្ត្រាលីដើមកំណើតខ្មែរ លោក ហុង លីម រួមជាមួយអង្គការសង្គមស៊ីវិលនៅបរទេសចំនួន ៣៨ស្ថាប័ន បានចុះហត្ថលេខាលើលិខិតផ្លូវការរួមគ្នាមួយផ្ញើទៅកាន់នាយករដ្ឋមន្ត្រី និងរដ្ឋសភានៃប្រទេសអូស្ត្រាលី កាលពីថ្ងៃទី៨ ខែវិច្ឆិកា ឆ្នាំ២០២២ នេះ ឱ្យជួយជំរុញមេដឹកនាំអាមេរិក លោក ចូ បៃដិន សហភាពអឺរ៉ុប និងមេដឹកនាំប្រទេសជាច្រើនទៀត ទាមទារឱ្យរដ្ឋាភិបាលឯកបក្សរបស់លោក ហ៊ុន សែន ស្ដារលទ្ធិប្រជាធិបតេយ្យឡើងវិញដើម្បីធានាឱ្យមាននូវការបោះឆ្នោតដោយសេរី និងយុត្តិធម៌នៅកម្ពុជា នៅខែកក្កដា ឆ្នាំ២០២៣ ខាងមុខនេះ។
ពួកគេក៏បានទាមទារឱ្យរដ្ឋាភិបាលឯកបក្សនៅកម្ពុជា គោរពលក្ខខណ្ឌចំនួន ១០ចំណុច ដូចជាបញ្ឈប់នូវការយាយី ឬវាយប្រហារអ្នកដែលត្រូវបានកាត់ទោស និងដាក់ពន្ធនាគារដោយហេតុផលនយោបាយ។ ជាងនេះទៀត ត្រូវអនុញ្ញាតឱ្យបណ្ដាញផ្សព្វផ្សាយឯករាជ្យទាំងអស់ដែលត្រូវបានបិទខ្ទប់តាំងពីឆ្នាំ២០១៧ មក អាចដំណើរការឡើងវិញ ព្រមទាំងដោះលែងអ្នកសារព័ត៌មានឯករាជ្យទាំងអស់ចេញពីពន្ធនាគារឱ្យមានសេរីភាពពេញលេញផងដែរ។
ប្រភពដដែលទាមទារឱ្យប្រទេសអូស្ត្រាលី និងរដ្ឋាភិបាលនៃប្រទេសដទៃទៀតសម្របសម្រួលជាមួយសម្ពន្ធមិត្តសហរដ្ឋអាមេរិក ដាក់ទណ្ឌកម្មសេដ្ឋកិច្ច រួមទាំងទណ្ឌកម្មបន្ទាប់បន្សំផ្សេងទៀតដោយការហ៊ុមព័ទ្ធអាវុធលើកងទ័ពរដ្ឋាភិបាលលោក ហ៊ុន សែន ឥស្សរជនដែលពាក់ព័ន្ធនឹងការរំលោភសិទ្ធិមនុស្ស ការប្រព្រឹត្តអំពើពុករលួយ អំពើក្បត់ជាតិឆ្លងដែន ការបំផ្លិចបំផ្លាញបរិស្ថាន និងការរំលោភដីធ្លីទ្រង់ទ្រាយធំនៅកម្ពុជាសព្វថ្ងៃនេះឱ្យកាន់តែធ្ងន់ធ្ងរថែមទៀត។
អតីតតំណាងរាស្ត្រអូស្ត្រាលីដើមកំណើតខ្មែររូបនេះ អំពាវនាវឱ្យអាមេរិកជួយប្រមូលផ្ដុំសហគមន៍អន្តរជាតិដើម្បីទាមទារឱ្យមានសកម្មភាពប្រកបដោយអត្ថន័យ និងកំណែទម្រង់ជាមូលដ្ឋាន ដើម្បីជួយឱ្យមានការបោះឆ្នោតជាតិដោយសេរី ត្រឹមត្រូវ និងយុត្តិធម៌នៅកម្ពុជាស្របតាមឆន្ទៈពិតប្រាកដរបស់ប្រជាពលរដ្ឋខ្មែរ។
លោក ហុង លីម អះអាងថា ដើម្បីឱ្យមានស្ថិរភាពឥណ្ឌូ-ប៉ាស៊ីហ្វិកនាពេលអនាគតក្នុងដំណាក់កាលនៃការផ្លាស់ប្ដូរសណ្ដាប់ធ្នាប់ភូមិសាស្ត្រនយោបាយ គឺមានតែជំរុញឱ្យកម្ពុជាក្លាយជាប្រទេសសេរី និងប្រជាធិបតេយ្យពិតប្រាកដប៉ុណ្ណោះ។
ការអះអាងនេះ ធ្វើឡើងដើម្បីជំរុញឱ្យមេដឹកនាំពិភពលោកក្នុងកិច្ចប្រជុំកំពូលអាស៊ាន និង G20 ដែលបានទៅចូលរួមប្រជុំក្នុងកិច្ចប្រជុំកំពូលអាស៊ានដែលកម្ពុជាធ្វើជាម្ចាស់ផ្ទះនៅពេលនេះ។
នៅថ្ងៃទី១១ ខែវិច្ឆិកា ឆ្នាំ២០២២ នេះ មេដឹកនាំពិភពលោក និងមេដឹកនាំប្រទេសនានាជាច្រើនទៀតបាននាំគ្នាទៅចូលរួមកិច្ចប្រជុំកំពូលអាស៊ានលើកទី៤០ និងទី៤១ និងកិច្ចប្រជុំ G20 ដែលកម្ពុជាធ្វើជាម្ចាស់ផ្ទះក្នុងឆ្នាំ២០២២ នេះ ដូចជាប្រធានាធិបតីអាមេរិក ប្រធានាធិបតីកូរ៉េខាងត្បូង នាយករដ្ឋមន្ត្រីអូស្ត្រាលី និងមេដឹកនាំនៃប្រទេសដទៃទៀតផងដែរ។
កាលពីចុងឆ្នាំ២០២១ អង្គការលើកលែងទោសអន្តរជាតិ (Amnesty International) បានចេញរបាយការណ៍របស់ខ្លួនស្តីអំពីស្ថានភាពសិទ្ធិមនុស្សនៅកម្ពុជាថា អាជ្ញាធរនៃរដ្ឋាភិបាលលោក ហ៊ុន សែន បានរំលោភបំពានទៅលើប្រជាពលរដ្ឋ គណបក្សប្រឆាំង សង្គមស៊ីវិល និងប្រព័ន្ធផ្សព្វផ្សាយឯករាជ្យនានាយ៉ាងធ្ងន់ធ្ងរ។ ចំណែកប្រព័ន្ធយុត្តិធម៌ និងតុលាការ ក៏ត្រូវបានប្រើប្រាស់ដោយមិនត្រឹមត្រូវ ដើម្បីបង្ក្រាបទៅលើអ្នកបញ្ចេញមតិរិះគន់រដ្ឋាភិបាលដែលដឹកនាំដោយឯកបក្សសព្វថ្ងៃនេះថែមទៀត៕