បណ្ដាញសហគមន៍ព្រៃឡង់ លើកឡើងថា ការចាប់សត្វស្វានៅតំបន់ព្រៃឡង់ក្នុងខេត្តកំពង់ធំ ខេត្តស្ទឹងត្រែង ខេត្តព្រះវិហារ និងខេត្តមណ្ឌលគិរី ដើម្បីយកមកលក់ គឺកំពុងកើតឡើងដោយពុំមានសមត្ថកិច្ចទប់ស្កាត់។
ការលើកឡើងរបស់បណ្ដាញសហគមន៍ព្រៃឡង់បែបនេះ បន្ទាប់ពីពួកគេបានចុះល្បាតនៅតំបន់ព្រៃឡង់ ដោយរកឃើញថា ករណីចាប់ស្វានៅតំបន់ព្រៃឡង់ក្នុងខេត្តកំពង់ធំ ស្ទឹងត្រែង និងព្រះវិហារ ជាដើម ដើម្បីយកទៅលក់ កំពុងកើតឡើង។ សហគមន៍បង្ហាញក្ដីបារម្ភ ដោយសត្វស្វា និងព្រៃឈើ បាននិងកំពុងបាត់បង់ ក្រោយពីប្រជាពលរដ្ឋមួយចំនួនបាននាំគ្នាយកសំណាញ់ទៅដាក់ដើម្បីចាប់យកសត្វស្វា និងកាប់បំផ្លាញព្រៃឈើ។
សមាជិកបណ្ដាញសហគមន៍ព្រៃឡង់នៅខេត្តស្ទឹងត្រែង លោក ឡាយ ផល្លី បានលើកឡើងថា ទីតាំងទាំងពីរកន្លែងដែលមានទំហំមួយហិកតារ ស្ថិតក្នុងឃុំកាំងចាម ត្រង់វាលត្រពាំងត្រសេក ត្រូវបានជនល្មើសកាប់ដើមឈើព័ទ្ធជុំវិញដើមឈើណាដែលមានស្វារស់នៅច្រើន។ ក្រោយពីកាប់ដើមឈើហើយ លោកថាជនល្មើសក៏ចាប់ផ្ដើមយកសំណាញ់ទៅដាក់ ដោយកាប់ផ្ដួលរំលំដើមឈើដែលមានស្វាទាំងនោះ ដើម្បីឱ្យវារត់ចេញទៅជាប់សំណាញ់ដែលបានរៀបចំរួច។
លោកបន្តថា ជនល្មើសទាំងនោះបានចាប់សត្វស្វាទាំងរស់ និងយកទៅលក់ ដោយមិនដែលឃើញមន្ត្រីចុះបង្ក្រាប និងផ្ដន្ទាទោសលើពួកគេទេ។
ករណីនេះ លោក ឡាយ ផល្លី ស្នើអាជ្ញាធរពាក់ព័ន្ធ និងអង្គការពាក់ព័ន្ធ ជួយថែរក្សា និងអភិរក្សព្រៃឡង់ដោយចាត់វិធានការទប់ស្កាត់ឲ្យម៉ឺងម៉ាត់ ដើម្បីធានាថាបទល្មើសទាំងនោះលែងកើតឡើងទៀត។
ចំណែកអ្នកសម្របសម្រួលបណ្ដាញព្រៃឡង់ខេត្តកំពង់ធំ លោក ហឿន សុភាព លើកឡើងដែរថា ការចាប់សត្វស្វានៅស្រុកសណ្ដាន់ មានពីរប្រភេទដែលជាការដាក់អន្ទាក់ និងប្រភេទមួយទៀតគឺការកាប់ព្រៃឈើព័ទ្ធជុំវិញ រាយសំណាញ់ រួចដេញឲ្យស្វាជាប់សំណាញ់ ដើម្បីចាប់តែម្ដង។
តំណាងជនជាតិដើមភាគតិចពូនង នៅភូមិឡៅកា លោកស្រី ភ្លឹក ភារម្យ ធ្លាប់លើកឡើងថា បច្ចុប្បន្នការកាប់បំផ្លាញព្រៃឈើដើម្បីចាប់សត្វនៅខេត្តមណ្ឌលគិរី កំពុងកើតឡើងរាល់ថ្ងៃដែរ។
ប្រធានមន្ទីរបរិស្ថានខេត្តស្ទឹងត្រែង លោក អេង ភីរុង ប្រាប់សារព័ត៌មានក្នុងស្រុកថា លោកនៅមិនទាន់ដឹងចំនួនករណីនៃបទល្មើសកាប់ឈើនៅដែនជម្រកព្រៃឡង់ក្នុងឆ្នាំនេះនៅឡើយទេ។ ចំណែកឯបទល្មើសចាប់សត្វព្រៃ ជាពិសេសសត្វស្វានោះ ខាងមន្ត្រីក៏មិនទាន់ចាប់ជនល្មើសបាននៅឡើយដែរ។
សារព័ត៌មាន ឌឹ ខេមបូឌា ដេលី ពុំអាចទាក់ទងអ្នកនាំពាក្យក្រសួងបរិស្ថាន លោក នេត្រ ភក្ត្រា ដើម្បីធ្វើការអត្ថាធិប្បាយបានទេរហូតដល់ម៉ោងចេញផ្សាយនេះ។
ពាក់ព័ន្ធនឹងរឿងសត្វស្វានេះដែរ កាលពីថ្ងៃទី១៦ ខែវិច្ឆិកា ឆ្នាំ២០២២ ការិយាល័យមេធាវីសហរដ្ឋអាមេរិកប្រចាំតំបន់ភាគខាងត្បូងនៃរដ្ឋផ្លរីដា បានចេញសេចក្ដីថ្លែងការណ៍មួយដោយលើកឡើងថា ក្នុងសំណុំរឿងរត់ពន្ធសត្វស្វាព្រៃខុសច្បាប់នេះមានជនសង្ស័យ ៨នាក់ ក្នុងនោះមន្ត្រីជាន់ខ្ពស់ក្រសួងកសិកម្ម ២នាក់ និងបុគ្គលិក ៦នាក់របស់ក្រុមហ៊ុន Vanny Bio Research។
សំណុំរឿងរត់ពន្ធសត្វស្វាព្រៃខុសច្បាប់នេះ មន្ត្រីជាន់ខ្ពស់ក្រសួងកសិកម្មទាំង ២នាក់នោះមានប្រធាននាយកដ្ឋានសត្វព្រៃ និងជីវចម្រុះ លោក គ្រី ម៉ះផល ដែលត្រូវបានសហរដ្ឋអាមេរិកចាប់ខ្លួនកាលពីថ្ងៃទី១៦ ខែវិច្ឆិកា និងអគ្គនាយករដ្ឋបាលព្រៃឈើនៃក្រសួងកសិកម្ម លោក កែវ អូម៉ាលីស។
សេចក្តីថ្លែងការណ៍បន្តថា ជនសង្ស័យទាំង ៨នាក់ត្រូវបានចោទប្រកាន់ថាបានចាប់ប្រមូលសត្វស្វាក្ដាមនៅក្នុងឧទ្យានជាតិ និងតំបន់ការពារ ដើម្បីនាំចេញទៅសហរដ្ឋអាមេរិក ដោយក្នុងនោះមានសត្វស្វាចំនួន ៣០០០ក្បាលត្រូវបានអនុញ្ញាត ហើយមន្ត្រីក្រសួងកសិកម្មក៏ទទួលការទូទាត់ជាសាច់ប្រាក់ត្រឡប់មកវិញដែរ៕