ក្រុមឧកញ៉ាមួយចំនួនដែលបានរំលោភដីធ្លីរបស់ប្រជាពលរដ្ឋ និងបំផ្លាញធនធានធម្មជាតិនៅក្នុងប្រទេសកម្ពុជា ឧបត្ថម្ភទឹកប្រាក់ជិត ៣លានដុល្លារដល់លោកនាយករដ្ឋមន្ត្រី ហ៊ុន សែន ដើម្បីផលិតខ្សែភាពយន្តរឿងប្រវត្តិរបស់លោកនាយករដ្ឋមន្ត្រី «កូនប្រុសក្រោមពន្លឺព្រះចន្ទពេញបូណ៌មី»។
បើតាមបញ្ជីឈ្មោះសប្បុរសជនឧបត្ថម្ភប្រាក់កាលពីថ្ងៃទី៣១ ខែធ្នូ ឆ្នាំ២០២២ ដែលមានចុះហត្ថលេខាអ្នករៀបចំដោយមេបញ្ជាការនៃអគ្គបញ្ជាការដ្ឋានកងអង្គរក្សលោក ហ៊ុន សែន គឺលោក ហ៊ីង ប៊ុនហៀង បង្ហាញឈ្មោះបុគ្គលចំនួន ២៣នាក់ដែលភាគច្រើនសុទ្ធសឹងតែជាឧកញ៉ា។
ក្នុងបញ្ជីឈ្មោះនោះ ពួកគេបានបរិច្ចាគទឹកប្រាក់ចាប់ពី ៥ម៉ឺនដុល្លារ (៥០០០០ដុល្លារ) រហូតដល់ ៦០ម៉ឺនដុល្លារអាមេរិកក្នុងម្នាក់ ក្នុងនោះលោក គិត ម៉េង ផ្ដល់ប្រាក់ ៦០ម៉ឺនដុល្លារ ហើយលោក លី យ៉ុងផាត់ ៥០ម៉ឺនដុល្លារ ព្រមទាំងឧកញ៉ា លី សុខថៃ ចំនួន ៣០ម៉ឺនដុល្លារ និងឧកញ៉ា ឃុន សៀ ចំនួន ២០ម៉ឺនដុល្លារ ខណៈលោក ឡេង ណាវ៉ាត្រា ឧបត្ថម្ភចំនួន ៥ម៉ឺនដុល្លារ។
ចំណែកឧកញ៉ាមួយចំនួនទៀតក៏បរិច្ចាគម្នាក់ៗចំនួន ៥ម៉ឺនដុល្លារ ខណៈក្រុមហ៊ុន ជីប ម៉ុង ឧបត្ថម្ភជាស្រាបៀ ៥០០០កេសស្មើនឹងប្រាក់ ៣០ម៉ឺនដុល្លារ។
យ៉ាងណា ឧកញ៉ាដែលបានបរិច្ចាគទឹកប្រាក់រាប់ម៉ឺនដុល្លារខាងលើ សុទ្ធសឹងតែជាអ្នកដែលបានរំលោភដីធ្លីរបស់ប្រជាពលរដ្ឋ និងបំផ្លាញធនធានធម្មជាតិនៅក្នុងប្រទេសកម្ពុជា។
ក្រៅពីក្រុមឧកញ៉ានៅក្នុងបញ្ជីសប្បុរសជនឧបត្ថម្ភប្រាក់ផលិតខ្សែភាពយន្ត «កូនប្រុសក្រោមពន្លឺព្រះចន្ទពេញបូណ៌មី» ក៏បានបង្ហាញឈ្មោះមន្ត្រីនៅក្នុងជួររដ្ឋាភិបាលមួយចំនួនដែរ ក្នុងនោះមានរដ្ឋមន្ត្រីក្រសួងបរិស្ថាន លោក សាយ សំអាល់ អភិបាលសាលារាជធានីភ្នំពេញលោក ឃួង ស្រេង ព្រមទាំងរដ្ឋមន្ត្រីក្រសួងយុត្តិធម៌ លោក កើត រិទ្ធ និងរដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល ជាដើម។
មេបញ្ជាការនៃអគ្គបញ្ជាការដ្ឋានកងអង្គរក្សលោក ហ៊ុន សែន គឺលោក ហ៊ីង ប៊ុនហៀង បានប្រាប់សារព័ត៌មានក្នុងស្រុកថា ការផលិតខ្សែភាពយន្តនេះ គឺបានឆ្លុះបញ្ចាំងពីការពិតអំពីប្រវត្តិតស៊ូរបស់លោក ហ៊ុន សែន ដើម្បីជួយសង្គ្រោះប្រទេសកម្ពុជាពីរបបប្រល័យពូជសាសន៍។
ប្រធានសហភាពសហជីពកម្ពុជា លោក រ៉ុង ឈុន បានថ្លែងថា ការបរិច្ចាគប្រាក់របស់ក្រុមឧកញ៉ាទាំងនេះ ធ្វើឡើងដើម្បីទទួលបានសិទ្ធិអភិវឌ្ឍន៍ លុបបឹងបួ ទន្លេ ឬដីសាធារណៈ ដើម្បីការពារដំណើរការអាជីវកម្មក្រុមហ៊ុនរបស់ពួកគេតែប៉ុណ្ណោះ។
លោកថា តាមរយៈការបរិច្ចាគប្រាក់ទាំងនេះ ក៏អាចនឹងធ្វើឱ្យអ្នកប្រកបអាជីវកម្មដោយសុចរិតមិនអាចប្រកួតប្រជែងជាមួយក្រុមឧកញ៉ាទាំងនោះបាន។ ការបរិច្ចាគប្រាក់ខ្ទង់រាប់ម៉ឺនដុល្លារពីសំណាក់មន្ត្រីរដ្ឋាភិបាលដូចនេះ ត្រូវបានគេសង្ស័យថា មានភាពមិនប្រក្រតី ឬជាប់ពាក់ព័ន្ធជាមួយអំពើពុករលួយ។
ទាក់ទងនឹងរឿងពុករលួយដោយឡែកមួយទៀតកាលពីថ្ងៃទី១០ ខែតុលា ឆ្នាំ២០២២ រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) លោក ស ខេង បានទម្លាយរឿងពុករលួយរបស់រដ្ឋមន្ត្រីមួយរូបដោយមិនបញ្ចេញឈ្មោះ ពាក់ព័ន្ធគម្រោងធ្វើផ្លូវ ខណៈរដ្ឋមន្ត្រីរូបនោះចោទក្រសួងមហាផ្ទៃថាព្យាយាមប្រមូលអំណាច។
លោកបញ្ជាក់ថា គម្រោងធ្វើផ្លូវមួយចាយអស់តែ ៤០ម៉ឺនដុល្លារប៉ុណ្ណោះ ប៉ុន្តែរដ្ឋមន្ត្រីរូបនោះបានដាក់ការចំណាយរហូតដល់ ១លានដុល្លារ។
បើតាមសន្ទស្សន៍រកឃើញពីអំពើពុករលួយឆ្នាំ២០២១ ចេញផ្សាយដោយអង្គការតម្លាភាពអន្តរជាតិ (Transparency International) នៅថ្ងៃទី២៥ ខែមករា ឆ្នាំ២០២២ គេបង្ហាញថា កម្ពុជាជាប់ចំណាត់ថ្នាក់លេខ១៥៧ ក្នុងចំណោមប្រទេស និងដែនដីចំនួន ១៨០ នៅលើពិភពលោករឿងពុករលួយ។ ចំណាត់ថ្នាក់នេះបង្ហាញថា កម្ពុជានៅតែជាប្រទេសមានកម្រិតពុករលួយអាក្រក់ជាងគេបំផុតក្នុងចំណោមប្រទេសទាំង ១០ នៃសមាជិកអាស៊ាន៕