ប្រធានសហភាពសហជីពកម្ពុជា លោក រ៉ុង ឈុន ប្រកាសចូលរួមជីវភាពនយោបាយជាមួយគណបក្សភ្លើងទៀន ដើម្បីចូលរួមការប្រកួតប្រជែងការបោះឆ្នោតជ្រើសតាំងតំណាងរាស្ត្រនៅខែកក្កដា ឆ្នាំ២០២៣ ខាងមុខនេះ។
ប្រធានសហភាពសហជីពកម្ពុជា លោក រ៉ុង ឈុន បានធ្វើសន្និសីទសារព័ត៌មាននៅថ្ងៃទី៣១ ខែមករា ឆ្នាំ២០២៣ នេះថា ការចូលរួមក្នុងសកម្មភាពនយោបាយជាមួយគណបក្សភ្លើងទៀនរបស់លោក ដោយសារតែគណបក្សនេះមានការគាំទ្រពីពលរដ្ឋលំដាប់ទី២ បន្ទាប់ពីគណបក្សកាន់អំណាច។ ដូច្នេះ លោកអាចប្រើឥទ្ធិពលរបស់លោកបូកជាមួយអ្វីដែលគណបក្សភ្លើងទៀនមាន ដើម្បីប្រកួតប្រជែងក្នុងការបោះឆ្នោតនៅពេលខាងមុខនេះ។
លោក រ៉ុង ឈុន លើកឡើងថា លោកមិនអាចរង់ចាំការរស់ឡើងវិញរបស់គណបក្សសង្គ្រោះជាតិបន្តទៀតទេ ព្រោះថាប្រសិនបើគណបក្សប្រឆាំងនេះអាចរស់ឡើងវិញនៅក្រោយការបោះឆ្នោត នោះមានន័យថា ពេលវេលានៃការធ្វើឱ្យមានការប្រែប្រួលស្ថានការណ៍នយោបាយនៅកម្ពុជា គឺត្រូវខាតពេលអស់ ៥ឆ្នាំបន្តទៀត ដូច្នេះអ្នកដែលរង់ចាំការរស់ឡើងវិញរបស់គណបក្សសង្គ្រោះជាតិ មិនគួរបន្តរង់ចាំទៀតទេ។
ប្រធានសហភាពសហជីពកម្ពុជារូបនេះបញ្ជាក់ថា បើទោះបីជា គ.ជ.ប មិនមានភាពអព្យាក្រឹតក៏ដោយ ឱ្យតែមានការគាំទ្រពីពលរដ្ឋ គណបក្សភ្លើងទៀននឹងទទួលបានអាសនៈក្នុងរដ្ឋសភានៅក្រោយការបោះឆ្នោតជាតិអាណត្តិទី៧ នេះជាមិនខាន ព្រោះវត្តមានរបស់លោកក្នុងគណបក្សភ្លើងទៀន គឺជាផ្នែកមួយទាក់ទាញការគាំទ្រពីប្រជាពលរដ្ឋ រួមផ្សំនឹងបក្សនេះក៏មានសមាជិកគាំទ្រច្រើនស្រាប់ទៅហើយនោះ។
លោក រ៉ុង ឈុន គឺជាអតីតប្រធានសមាគមគ្រូបង្រៀនកម្ពុជាឯករាជ្យ មុនពេលលោកចូលបម្រើការងារជាមន្ត្រីជាន់ខ្ពស់នៅក្នុងស្ថាប័នជាតិរៀបចំការបោះឆ្នោត ប៉ុន្តែលោកបានលាលែងតំណែងនេះវិញ ក្រោយពីគណបក្សសង្គ្រោះជាតិត្រូវតុលាការកំពូលប្រកាសរំលាយកាលពីឆ្នាំ២០១៧។
សព្វថ្ងៃនេះ លោក រ៉ុង ឈុន បានដើរតួនាទីជាប្រធានសហភាពសហជីពកម្ពុជា ដើម្បីដឹកនាំតវ៉ាទាមទារសិទ្ធិការងាររបស់កម្មករយ៉ាងសកម្ម ដើម្បីការពារផលប្រយោជន៍កម្មករនិយោជិតនៅកម្ពុជា។
ជុំវិញសកម្មភាពការពារផលប្រយោជន៍ប្រជាពលរដ្ឋ លោក រ៉ុង ឈុន ត្រូវបានសមត្ថកិច្ចចាប់ខ្លួនដាក់ពន្ធនាគារចំនួន ៣លើករួចមកហើយ ក្នុងនោះ៖
- កាលពីថ្ងៃទី១៥ ខែតុលា ឆ្នាំ២០០៥ លោកត្រូវបានចាប់ខ្លួន និងចោទប្រកាន់តាមផ្លូវតុលាការ ព្រោះតែរិះគន់អំពីសន្ធិសញ្ញាបំពេញបន្ថែមកម្ពុជា-វៀតណាម។
- នៅចុងខែមករា ឆ្នាំ២០១៤ លោកក៏ត្រូវចាប់ខ្លួនម្តងទៀត ដោយសារតែដឹកនាំទាមទារឱ្យមានការដោះលែងប្រធានសមាគមសេដ្ឋកិច្ចប្រជាធិបតេយ្យឯករាជ្យក្រៅប្រព័ន្ធ លោក វន់ ពៅ។
- រហូតដល់ថ្ងៃទី៣០ ខែកក្កដា ឆ្នាំ២០២០ លោក រ៉ុង ឈុន ក៏ត្រូវចាប់ខ្លួនជាថ្មីទៀត ក្រោយពីលោកបានចេញថ្លែងការណ៍ពីការបាត់ដីរបស់ពលរដ្ឋខ្មែរទៅវៀតណាម នៅខេត្តត្បូងឃ្មុំ ប៉ុន្តែលោកត្រូវតុលាការដោះលែងឱ្យនៅក្រៅឃុំបណ្ដោះអាសន្ន និងដាក់ឱ្យនៅក្រោមការតាមដានរបស់តុលាការនៅឡើយរហូតមកទល់ពេលនេះ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ប្រាប់សារព័ត៌មាន The Cambodia Daily នៅថ្ងៃទី៣១ មករា នេះថា វាជាសិទ្ធិរបស់គាត់ក្នុងការចូលរួមក្នុងជីវភាពនយោបាយជាមួយគណបក្សដែលខ្លួនពេញចិត្ត ប៉ុន្តែលោកមានការបារម្ភថា នៅពេលនេះលោក រ៉ុង ឈុន កំពុងដាក់ឱ្យស្ថិតក្នុងការត្រួតពិនិត្យរបស់តុលាការនៅឡើយ ដូច្នេះលោកមានការភ័យព្រួយពីសុវត្ថិភាពរបស់លោកក្នុងកិច្ចការនេះសម្រាប់បរិយាកាសនយោបាយនៅកម្ពុជាសព្វថ្ងៃ។
លោក ស៊ឹង សែនករុណា អំពាវនាវឱ្យរដ្ឋាភិបាលកម្ពុជាបើកនូវលំហសេរីភាពនយោបាយដល់ពលរដ្ឋគ្រប់រូប ដោយមិនប្រកាន់និន្នាការនយោបាយ ដើម្បីឱ្យពួកគេអាចចូលរួមក្នុងកិច្ចការនយោបាយដោយគ្មានការភ័យខ្លាចដូចរដ្ឋធម្មនុញ្ញបានចែង ដើម្បីជួយជំរុញការអភិវឌ្ឍប្រទេសជាតិឱ្យកាន់តែរីកចម្រើន ក៏ដូចជាការបើកឱកាសនូវការបង្រួបបង្រួមសាមគ្គីជាតិឡើងវិញផងដែរ។
លោក គីមសួរ ភីរិទ្ធ អ្នកនាំពាក្យគណបក្សភ្លើងទៀន សាទរចំពោះជំហររបស់លោក រ៉ុង ឈុន អតីតអ្នកតស៊ូដើម្បីសេរីភាពរូបនេះសម្រេចចិត្តចូលរួមសកម្មភាពនយោបាយជាមួយគណបក្សភ្លើងទៀន ព្រោះគាត់ក្លាហានក្នុងការទាមទារសិទ្ធិសេរីភាពជូនគ្រូបង្រៀន ក៏ដូចជាកម្មករក្នុងពេលកន្លងមក៕