មន្ត្រីជាន់ខ្ពស់គណបក្សប្រឆាំង រិះគន់ថា រចនាបថមេដាយដែលជាពានរង្វាន់សម្រាប់ផ្តល់ជូនអត្តពលិកឆ្នើមក្នុងការប្រកួតស៊ីហ្គេម ក្នុងឆ្នាំ២០២៣ ដែលកម្ពុជាធ្វើជាម្ចាស់ផ្ទះ បង្កប់ខ្លឹមសារពីការលើកតម្កើងបុគ្គលជាមេដឹកនាំ ជាជាងការបង្ហាញពីការលើកតម្កើងកិត្តិយស និងមុខមាត់របស់ប្រទេសនៅលើឆាកអន្តរជាតិ។
អតីតអ្នកទោសនយោបាយ និងជាមន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា ប្រាប់សារព័ត៌មាន The Cambodia Daily នៅថ្ងៃទី១៤ កុម្ភៈ នេះថា មេដាយដែលផលិតឡើងសម្រាប់ការប្រកួតស៊ីហ្គេមក្នុងឆ្នាំ២០២៣ នេះ ក្នុងនាមកម្ពុជាជាម្ចាស់ផ្ទះ គួរតែឆ្លាក់ឱ្យមានរចនាបថប្រាសាទអង្គរវត្តដែលជាអត្តសញ្ញាណជាតិខ្មែរ ព្រោះរចនាបថនេះគឺបង្ហាញនូវមហាអាណាចក្រខ្មែរដ៏រុងរឿងនាសម័យអង្គរ ដែលខ្មែរធ្លាប់ជាមហាអាណាចក្រដ៏អស្ចារ្យកាលពីអតីតកាល។
លោក មាជ សុវណ្ណារ៉ា រិះគន់ថា ការរំលេចនូវស្តូបវិមានឈ្នះឈ្នះ ពហុកីឡាដ្ឋានមរតកតេជោ ដែលតំណាងនូវការអភិវឌ្ឍជាតិនៃមិត្តភាពដែកថែបកម្ពុជា-ចិន មិនមែនជារូបតំណាងជាតិរបស់ខ្មែរនោះទេ គ្រាន់តែជាសមិទ្ធផលដែលកសាងដោយរដ្ឋាភិបាលដែលកំពុងដឹកនាំដោយមេដឹកនាំបក្សកាន់អំណាច លោក ហ៊ុន សែន ប៉ុណ្ណោះ។
កាលពីថ្ងៃទី១៣ ខែកុម្ភៈ ឆ្នាំ២០២៣ អគ្គលេខាធិការគណៈកម្មាធិការជាតិរៀបចំការប្រកួតស៊ីហ្គេម និងអាស៊ានប៉ារ៉ាហ្គេម ក្នុងឆ្នាំ២០២៣ នេះ លោក វ៉ាត់ ចំរើន បានផ្សព្វផ្សាយនូវរចនាបថមេដាយដែលជាពានរង្វាន់សម្រាប់ផ្តល់ជូនអត្តពលិកឆ្នើមក្នុងការប្រកួតស៊ីហ្គេម ក្នុងឆ្នាំ២០២៣ ដែលកម្ពុជាធ្វើជាម្ចាស់ផ្ទះតាមរយៈសារព័ត៌មានដែលស្និទ្ធនឹងរដ្ឋាភិបាលកម្ពុជា BTV Cambodia ថា មេដាយទាំងនេះបានផលិតនៅប្រទេសសិង្ហបុរីទាំងអស់ ហើយមានលក្ខណៈប្រណិតបំផុត និងមានធាតុផ្សំពិសេសៗជាច្រើនផងដែរ។
លោក វ៉ាត់ ចំរើន អះអាងថា តាមការគ្រោងទុក មេដាយដែលត្រូវផលិតសម្រាប់ព្រឹត្តិការណ៍កីឡាអន្តរជាតិនេះមានចំនួនសរុបប្រមាណជាង ៦ពាន់មេដាយសម្រាប់កីឡាករ។ ជាងនេះទៀត ក៏មានការផលិតមេដាយជាច្រើនទៀតសម្រាប់ទុកជាវត្ថុអនុស្សាវរីយ៍ដើម្បីផ្តល់ជូនគណៈប្រតិភូ ម្ចាស់ឧបត្ថម្ភ និងភ្ញៀវនានាផងដែរ។
រចនាបថដែលបានឆ្លាក់លើមេដាយសម្រាប់ផ្តល់ជូនកីឡាករឆ្នើមក្នុងការប្រកួតស៊ីហ្គេម ដែលកម្ពុជានឹងធ្វើជាម្ចាស់ផ្ទះក្នុងឆ្នាំ២០២៣ នេះ មានដូចជា៖
- រូបពហុកីឡាដ្ឋានមរតកតេជោ តំណាងការអភិវឌ្ឍជាតិនៃមិត្តភាពដែកថែបកម្ពុជា-ចិន ស្ថិតនៅផ្ទៃខាងមុខធំពេញពាក់កណ្តាលតួមេដាយ
- រូបវិមានឯករាជ្យស្ថិតនៅផ្នែកខាងក្រោយត្រង់ខាងស្តាំ
- រូបវិមានឈ្នះឈ្នះ នៅផ្នែកខាងក្រោយត្រង់ខាងឆ្វេង ខណៈនៅផ្ទៃខាងលើមានរូបកងប្រទាក់គ្នា ចំណែកនៅចំកណ្តាល និងចំហៀងសងខាងមានរូបផ្ការំដួលផងដែរ។
អគ្គលេខាធិការគណៈកម្មាធិការជាតិរៀបចំការប្រកួតស៊ីហ្គេមរូបនេះបញ្ជាក់ថា រចនាបថទាំងនេះមានអត្ថន័យផ្សេងៗពីគ្នាទៅតាមរូបតំណាងនីមួយៗ ក្នុងនោះ៖
- រូបវិមានឯករាជ្យតំណាងឱ្យឯករាជ្យជាតិ សន្តិភាព
- រូបភាពវិមានឈ្នះឈ្នះ តំណាងឱ្យនយោបាយឈ្នះៗ
- ផ្ការំដួល ៧ទង តំណាងឱ្យ ៧មករា
- និងមានរចនាបថពិសេសៗជាច្រើនទៀតផងដែរ។
កាលពីថ្ងៃទី២៥ ខែមករា ឆ្នាំ២០២៣ ប្រមុខរដ្ឋាភិបាលកម្ពុជា លោក ហ៊ុន សែន ប្រកាសថា សូមស្វាគមន៍ការរាប់ថយក្រោយ ១០០ថ្ងៃនៃព្រឹត្តិការណ៍ស៊ីហ្គេមលើកទី៣២ ដែលកម្ពុជាទទួលរៀបចំសម្រាប់ព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលកម្ពុជាធ្វើជាម្ចាស់ផ្ទះក្នុងឆ្នាំ២០២៣ នេះ ខណៈព្រឹត្តិការណ៍នេះនៅសល់តែ ៨០ថ្ងៃទៀតប៉ុណ្ណោះ។
ព្រឹត្តិការណ៍ស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ នឹងចាប់ផ្ដើមនៅថ្ងៃទី៥ ដល់ថ្ងៃទី១៧ ខែឧសភា ឆ្នាំ២០២៣ ខាងមុខនេះ ដែលមានប្រទេសចំនួន៦ មកចូលរួម រួមមានឥណ្ឌូនេស៊ី វៀតណាម ហ្វីលីពីន ឡាវ មីយ៉ាន់ម៉ា និងម៉ាឡេស៊ី ផងដែរ ខណៈវិញ្ញាសាប្រកួតមានចំនួន ៣៨ប្រភេទ រួមមានប៉េតង់ តេក្វាន់ដូ (WT) ប្រដាល់គុនខ្មែរ បាល់ទាត់ គុនល្បុក្កតោ និងកាយវប្បកម្ម ជាដើម។
ក្រោយបញ្ចប់ព្រឹត្តិការណ៍ស៊ីហ្គេម ប្រទេសកម្ពុជានឹងរៀបចំធ្វើជាម្ចាស់ផ្ទះលើកដំបូងក្នុងការប្រកួតកីឡាអាស៊ានប៉ារ៉ាហ្គេមលើកទី១២ ដែលនឹងចាប់ផ្តើមពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣ ដោយមានវិញ្ញាសាចំនួន ១២ប្រភេទ រួមមានអត្តពលកម្មហែលទឹក លេងអុក បាល់ទះអង្គុយ វាយសី និងវាយកូនឃ្លីលើតុ ជាដើម៕