ពុំមានអ្វីដែលធ្វើឱ្យមេដឹកនាំពិភពលោកមិនភ្ញាក់ផ្អើល ហើយមិនចាប់អារម្មណ៍នោះទេ ព្រោះមេដឹកនាំមហាអំណាចដ៏កំពូលមួយសម្រេចជាន់ដែនដីប្រទេសមួយដែលកំពុងធ្លាក់ក្នុងសង្គ្រាមរបស់មហាអំណាចយោធាលំដាប់ទី២ ពិភពលោក។
កាលពីព្រឹកថ្ងៃចន្ទ ទី២០ ខែកុម្ភៈ ម៉ោងប្រមាណជា ៨ និង ៣០នាទី ម៉ោងនៅក្នុងប្រទេសអ៊ុយក្រែន លោក ចូ បៃដិន ប្រធានាធិបតីសហរដ្ឋអាមេរិកបានបង្ហាញវត្តមានភ្លាមនៅរដ្ឋធានីគៀវ នៃប្រទេសមួយនេះដែលហែកហួរទៅដោយសង្គ្រាម។ ទស្សនកិច្ចរបស់មេដឹកនាំមហាអំណាចមួយនេះ ត្រូវគេចាត់ទុកថាជាការបំបែកសំណុំរឿងប្រវត្តិសាស្ត្ររបស់អាមេរិក ដែលកម្រណាស់ មេដឹកនាំកំពុងកាន់អំណាចទៅជាន់ដែនដីមួយកំពុងធ្លាក់ក្នុងភ្នក់ភ្លើងសង្គ្រាម។
វត្តមានរបស់លោក បៃដិន នៅទីក្រុងគៀវ ដែលបានជួបលោកប្រធានាធិបតីអ៊ុយក្រែន ហ្សេឡេនស្គី បាននាំឱ្យមេដឹកនាំពិភពលោកជាច្រើនមានការភ្ញាក់ផ្អើលជាខ្លាំង។ អ្វីដែលចាប់អារម្មណ៍ គឺក្រុងគៀវ ក៏ជាទីតាំងនៃសង្គ្រាមដែលតែងរងការវាយប្រហារពីសំណាក់មីស៊ីលរបស់រុស្ស៊ីដែរ។
បើតាមទីភ្នាក់ងារសារព័ត៌មាន AFP លោក បៃដិន បានទៅកាន់រដ្ឋធានីគៀវ ដោយធ្វើដំណើរតាមរថភ្លើងរូងក្រោមដីចេញពីប្រទេសប៉ូឡូញ។ ក្នុងការធ្វើដំណើរនេះ លោក បៃដិន ប្រើពេល ១០ម៉ោងទើបទៅដល់រដ្ឋធានីគៀវ តែលោកបានសម្រេចចាកចេញពីទីក្រុងមួយនេះវិញក្រោយពីលោកស្ថិតនៅបានរយៈពេល ៥ម៉ោង។
លោក ចូ បៃដិន បានធ្វើដំណើរទៅដល់ទីក្រុងគៀវ ដោយពុំមានការប្រកាសឱ្យដឹងជាមុននោះឡើយមុនគម្រប់ខួប ១ឆ្នាំនៃសង្គ្រាមឈ្លានពានរបស់រុស្ស៊ីនៅអ៊ុយក្រែន។ នៅទីក្រុងគៀវ លោក បៃដិន បានជួបគ្នាជាមួយប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡេនស្គី។ លោក ហ្សេឡេនស្គី បានបង្ហោះរូបថតការចាប់ឱបលោក បៃដិន។
លោក ហ្សេឡេនស្គី បានហៅដំណើរទស្សនកិច្ចរបស់លោក បៃដិន ថាជាសញ្ញាដ៏សំខាន់បំផុតបង្ហាញពីការគាំទ្រប្រជាជនអ៊ុយក្រែន ហើយថានេះជាទស្សនកិច្ចលើកដំបូងរបស់លោក បៃដិន មកកាន់ទីក្រុងគៀវ គិតចាប់តាំងពីសង្គ្រាមផ្ទុះឡើង។ ជាមួយគ្នានេះ លោក បៃដិន ក៏បានប្រកាសផ្ដល់ជំនួយយោធាបន្ថែម ៥០០លានដុល្លារសម្រាប់អ៊ុយក្រែនមួយដំណាក់កាលទៀត។
បើតាមសេតវិមានសហរដ្ឋអាមេរិក បានបញ្ជូនជំនួយយោធាអស់សាច់ប្រាក់ជិត ៣០ពាន់លានដុល្លារក្នុងកញ្ចប់ថវិកាសរុបដែលសភាអនុម័តឱ្យក្នុងរយៈពេល ២ឆ្នាំ ពីឆ្នាំ២០២២ និងឆ្នាំ២០២៣ មានសរុប ៩៥ពាន់លានដុល្លារ។
បើតាមដំណឹងរបស់ AFP លោកប្រធានាធិបតីសហរដ្ឋអាមេរិកវ័យ ៨០ឆ្នាំរូបនេះ បានធ្វើដំណើរទៅដល់រដ្ឋធានីវ៉ាសូវី នៃប្រទេសប៉ូឡូញ ហើយកាលពីល្ងាចថ្ងៃចន្ទ។
បើតាមការគ្រោងទុក លោក ចូ បៃដិន បានជួបជាមួយប្រធានាធិបតីប៉ូឡូញ លោក Andrzej Duda នៅថ្ងៃអង្គារ នេះ ដោយបានពិភាក្សាគ្នាពីកិច្ចសហប្រតិបត្តិការជាមួយប៉ូឡូញ និងកិច្ចខិតខំប្រឹងប្រែងគាំទ្រអ៊ុយក្រែន រួមទាំងបក្សសម្ព័ន្ធយោធាណាតូ (NATO)។ ស្ថិតនៅទីក្រុងវ៉ាសូវី លោក បៃដិន ក៏ត្រូវថ្លែងសុន្ទរកថាមួយដើម្បីរំឭកខួបមួយឆ្នាំនៃសង្គ្រាមឈ្លានពានរបស់រុស្ស៊ីនៅអ៊ុយក្រែន ដែលនឹងចូលមកដល់នៅថ្ងៃទី២៤ ខែកុម្ភៈ នេះ។
តែជាមួយគ្នានេះ ពីទីក្រុងមូស្គូ ឯណោះវិញ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានថ្លែងសារទៅកាន់ប្រជាជាតិរុស្ស៊ី មុន ២ថ្ងៃនៃខួបរយៈពេល ១ឆ្នាំ ក្រោយការចាប់ផ្តើមនៃសង្គ្រាមនៅអ៊ុយក្រែន ដោយចោទថា ក្រុមប្រទេសលោកខាងលិចទេគឺជាអ្នកដែលដុតបញ្ឆេះឱ្យសង្គ្រាមផ្ទុះឡើង។
ថ្លែងនៅចំពោះមុខក្រុមមន្ត្រីជាន់ខ្ពស់ សមាជិកសភា និងមេបញ្ជាការយោធាក្នុងសភាជាតិនៃប្រទេសរុស្ស៊ី លោក ពូទីន បានអះអាងថា រុស្ស៊ីបានព្យាយាមដោះស្រាយវិបត្តិជម្លោះប្រដាប់អាវុធនៅតំបន់ដុនបាស់ ភាគខាងកើតអ៊ុយក្រែន ដោយធ្វើឡើងតាមមធ្យោបាយសន្តិវិធី តែពួកបស្ចិមប្រទេសបានបង្ខំឱ្យប្រើជម្រើសកម្លាំងយោធា។
ប្រធានាធិបតីរុស្ស៊ីរូបនេះបញ្ជាក់ថា ការលើកទ័ពរបស់រុស្ស៊ីលើអ៊ុយក្រែន ដើម្បីទប់ស្កាត់ផែនការវាយប្រហារទ្រង់ទ្រាយធំរបស់រដ្ឋាភិបាលទីក្រុងគៀវ ដោយមានក្រុមខាងលិចនៅពីក្រោយដែលពួកគេជួយអ៊ុយក្រែន ឱ្យប្រឆាំងមកលើតំបន់ចង់ផ្តាច់ខ្លួននៅភាគខាងកើតអ៊ុយក្រែន ព្រមទាំងមកលើតំបន់គ្រីមៀរ ដែលលោក ពូទីន ថាជាដែនដីរបស់រុស្ស៊ី។
លោក ពូទីន បានសង្កត់ធ្ងន់ក្នុងសុន្ទរកថារបស់លោកថា លោកសូមបញ្ជាក់ម្តងទៀតថា ក្រុមលោកខាងលិចជាអ្នកចាប់ផ្តើមសង្គ្រាមនេះ ហើយរុស្ស៊ីចាំបាច់ប្រើប្រាស់កម្លាំងទ័ពដើម្បីបញ្ឈប់។
លោក ពូទីន បន្តថា សង្គ្រាមរយៈពេល ១២ខែមកនេះដែលទីក្រុងមូស្គូ ហៅថាប្រតិបត្តិការយោធាពិសេសនោះ គឺដើម្បីការពារប្រទេសរុស្ស៊ី និងរារាំងការវាយប្រហារមកលើទឹកដីប្រវត្តិសាស្ត្ររបស់រុស្ស៊ី ដែលលោកចាត់ទុកថាបានរួមបញ្ចូលនូវផ្នែកភាគខាងត្បូង និងខាងកើតរបស់អ៊ុយក្រែន បច្ចុប្បន្ននេះនៅក្នុងដែនអធិបតេយ្យរបស់រុស្ស៊ី។
តែយ៉ាងណា សង្គ្រាមនៅអ៊ុយក្រែន ដែលបានចាប់ផ្តើមឡើងកាលពីថ្ងៃទី២៤ ខែកុម្ភៈ ឆ្នាំ២០២២ ទីក្រុងគៀវ និងសម្ព័ន្ធមិត្តលោកខាងលិច បានចាត់ទុកជាទង្វើឈ្លានពានរបស់រុស្ស៊ី ហើយថាជាសង្គ្រាមឈ្លានពានដើម្បីពង្រីកទឹកដីរុស្ស៊ីដោយប្រឆាំងនឹងប្រទេសជិតខាង។
តែនៅក្នុងឱកាសនោះ លោក ពូទីន ប្រធានាធិបតីមហាអំណាចរុស្ស៊ីបានថ្លែងថា លោកសម្រេចព្យួរសន្ធិសញ្ញាអាវុធនុយក្លេអ៊ែរហៅកាត់ថា New START ជាមួយសហរដ្ឋអាមេរិកហើយចាប់ពីពេលនេះតទៅ ព្រោះភាគីទាំងពីរលែងអង្គុយទល់មុខគ្នាបានទៀតហើយ។
លោក ពូទីន បានបញ្ជាក់ទៀតថា បើទោះមិនបានដកខ្លួនចេញពីសន្ធិសញ្ញានេះក៏ដោយ ប៉ុន្តែការព្យួរសន្ធិសញ្ញានេះព្រោះតែរុស្ស៊ីមិនមានយុទ្ធនាការត្រួតពិនិត្យអាវុធនុយក្លេអ៊ែរនេះជាមួយអាមេរិកទៀតនោះទេ។
រុស្ស៊ី និងអាមេរិក ជាប្រទេសដែលមានក្បាលគ្រាប់នុយក្លេអ៊ែរច្រើនជាងគេបង្អស់នៅលើពិភពលោក។ រុស្ស៊ីមានជាង ៦២០០គ្រាប់ ចំណែកឯអាមេរិកមានជាង ៥៥៥០គ្រាប់៕