38 C
Phnom Penh

តុលាការ​មិន​ឱ្យ​លោក ថាច់ សេដ្ឋា នៅ​ក្រៅ​ឃុំ​ទោះបីជា​លោក​សុំ​តម្កល់​ប្រាក់​៣​ម៉ឺន​ដុល្លារ​ក្ដី

ដោយ ឌឹ ខេមបូឌា ដេលី

បទវិភាគ

សាលា​ឧទ្ធរណ៍​ភ្នំពេញ​មិន​អនុញ្ញាត​ឲ្យ​អនុប្រធាន​គណបក្ស​ភ្លើង​ទៀន លោក ថាច់ សេដ្ឋា នៅ​ក្រៅ​ឃុំ​បណ្ដោះអាសន្ន ទោះបីជា​លោក​សុំ​តម្កល់​ប្រាក់​ចំនួន ៣​ម៉ឺន​ដុល្លារ​ជា​ថ្នូរ​ទៅ​នឹង​ការ​ដោះលែង​ក្ដី ក្រោម​ហេតុផល​ដើម្បី​រក្សា​ជន​ជាប់​ចោទ​ទុក​ជូន​តុលាការ។

លោក ជូង ជូងី មេធាវី​ការពារ​ក្ដី​ឲ្យ​លោក ថាច់ សេដ្ឋា បាន​ប្រាប់​សារព័ត៌មាន​ក្នុង​ស្រុក​ថា ទោះបីជា​កូនក្ដី​របស់​លោក​សុខចិត្ត​តម្កល់​ប្រាក់​ចំនួន ៣​ម៉ឺន​ដុល្លារ​ហើយ​ក្ដី ប៉ុន្តែ​ចៅក្រម​ស៊ើបសួរ​នៃ​តុលាការ​ក្រុង​ភ្នំពេញ​នៅតែ​មិន​អនុញ្ញាត​ឲ្យ​កូនក្ដី​របស់​លោក​នៅ​ក្រៅ​ឃុំ។

ប្រភព​ដដែល​ថា ការ​សម្រេច​របស់​ចៅក្រម​ស៊ើបសួរ​សាលា​ឧទ្ធរណ៍​កាលពី​ថ្ងៃទី​៣០ មីនា នេះ ដោយ​សំអាង​ថា រក្សា​ជន​ជាប់​ចោទ​ទុក​ជូន​តុលាការ។

ជុំវិញ​ការ​សម្រេច​នេះ សហ​មេធាវី​របស់​លោក ថាច់ សេដ្ឋា ថា​លោក​នឹង​ពិភាក្សា​ជាមួយ​កូនក្ដី​ដើម្បី​ប្ដឹង​សារទុក្ខ​ទៅ​តុលាការ​កំពូល​បន្ត​ទៀត បន្ទាប់ពី​សភា​ស៊ើបសួរ​សាលា​ឧទ្ធរណ៍​ភ្នំពេញ​ច្រានចោល​សំណើ​សុំ​តម្កល់​ប្រាក់ ៣​ម៉ឺន​ដុល្លារ​ដូច​តុលាការ​ក្រុង​ភ្នំពេញ​សម្រេច​ដែរ​នោះ។

អនុប្រធាន​គណបក្ស​ភ្លើង​ទៀន លោក ថាច់ សេដ្ឋា ត្រូវ​បាន​ចៅក្រម​សាលាដំបូង​រាជធានី​ភ្នំពេញ លោក ទិត ដាលីន ឃុំ​ខ្លួន​នៅ​ពន្ធនាគារ​បណ្ដោះអាសន្ន​កាលពី​ថ្ងៃទី​១៦ ខែ​មករា ឆ្នាំ​២០២៣ ពាក់ព័ន្ធ​នឹង​ការ​ចោទប្រកាន់​ចេញ​សែក​អត់​មាន​លុយ ឬ​ហៅថា​សែក​ស្អុយ។

ការ​ចាប់ និង​ឃុំ​ខ្លួន​លោក ថាច់ សេដ្ឋា នេះ ធ្វើឡើង​តាម​បណ្ដឹង​របស់​ក្រុមហ៊ុន រិន ឆាយ ផនសប ដែល​ប្ដឹង​លោក​ពាក់ព័ន្ធ​នឹង​ករណី​ជំពាក់​បំណុល​ប្រមាណ ៣៣៤០០​ដុល្លារ។

តាម​របាយការណ៍​របស់​ក្រសួង​ពាណិជ្ជកម្ម ក្រុមហ៊ុន រិន ឆាយ ផនសប នេះ បាន​ចុះបញ្ជី​ពាណិជ្ជកម្ម​ផ្លូវការ​នៅ​ក្នុង​ក្រសួង​ពាណិជ្ជកម្ម កាលពី​ខែ​តុលា ឆ្នាំ​២០១៥។ ម្ចាស់​ក្រុមហ៊ុន លោក ហៃ វ៉ាន់រិន នេះ​ដែល​ជា​មនុស្ស​ស្និទ្ធ​នឹង​គណបក្ស​ប្រជាជន​កម្ពុជា។

ក្រៅពី​កាន់កាប់​ក្រុមហ៊ុន រិន ឆាយ ផនសប ហើយ លោក ហៃ វ៉ាន់រិន ក៏​ជា​ម្ចាស់​ក្រុមហ៊ុន Dynith Commercial ដែល​មាន​ទីតាំង​នៅ​សង្កាត់​ទំនប់ទឹក ខណ្ឌ​ចំការមន រាជធានី​ភ្នំពេញ​ថែម​ទៀត។ ក្រុមហ៊ុន Dynith Commercial នេះ ត្រូវ​បាន​ចុះបញ្ជី​នៅ​ក្រសួង​ពាណិជ្ជកម្ម កាលពី​ចុង​ខែ​មីនា ឆ្នាំ​២០១៤។ បច្ចុប្បន្ន ក្រុមហ៊ុន​នេះ​គ្រប់គ្រង​ដោយ​អ្នកស្រី ឌី សុខឃី ជា​កូនស្រី​អតីត​អគ្គស្នងការ​នគរបាល​ជាតិ លោក ហុក ឡង់ឌី ហើយ​ក៏​ត្រូវ​ជា​ភរិយា​លោក ហ៊ុន ម៉ានិត ដែល​ជា​កូនប្រុស​ទី​២ របស់​លោក​នាយករដ្ឋមន្ត្រី ហ៊ុន សែន៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស