បុរសម្នាក់ដែលអះអាងថាខ្លួនជាអតីតអង្គរក្សដែលជិតស្និទ្ធនឹងមេដឹកនាំបក្សប្រឆាំង ចោទថា លោក សម រង្ស៊ី កំពុងប្រឌិតព្រឹត្តិការណ៍កាលពី ២៦ឆ្នាំមុនជុំវិញការបំផ្ទុះគ្រាប់បែកសម្លាប់ហ្វូងបាតុករនៅមុខវិមានរដ្ឋសភាជាតិ កាលពីថ្ងៃទី៣០ ខែមីនា ឆ្នាំ១៩៩៧ កន្លងទៅ។
អតីតអង្គរក្សផ្ទាល់របស់អតីតមេដឹកនាំបក្សប្រឆាំង លោក សម រង្ស៉ី គឺលោក ងួន ងឹម បានចេញវីដេអូដែលផ្សព្វផ្សាយដោយសារព័ត៌មានស្និទ្ធនឹងបក្សកាន់អំណាចរបស់លោក ហ៊ុន សែន គឺ Fresh News នៅថ្ងៃទី៣ ខែមេសា ឆ្នាំ២០២៣ នេះថា បន្ទាប់ពីលោកចូលរួមជីវភាពនយោបាយជាមួយគណបក្សប្រជាជនកម្ពុជា លោកក៏សម្រេចចិត្តទម្លាយការពិតអំពីព្រឹត្តិការណ៍បំផ្ទុះគ្រាប់បែកកាលពីថ្ងៃទី៣០ ខែមីនា ឆ្នាំ១៩៩៧ ដែលលោក សម រង្ស៊ី តែងចោទថាលោក ហ៊ុន សែន ជាអ្នកបញ្ជាពីក្រោយនៃហេតុការណ៍នោះ។
លោក ងួន ងឹម អះអាងថា នៅថ្ងៃគេបោកគ្រាប់បែក លោកបានធ្វើដំណើរលើរថយន្តជាមួយលោក សម រង្ស៉ី ទៅដល់មុខវិមានរដ្ឋសភាជាតិ។ ភ្លាមៗនោះ ក៏មានគេគប់គ្រាប់បែកបំផ្ទុះលើក្រុមបាតុករ ខណៈលោក សម រង្ស៉ី ហាក់ដូចជាដឹងមុនថាគ្រាប់បែកនោះមិនមែនគប់សំដៅមករកគាត់ទេ។
លោកបន្ថែមថា ក្រោយផ្ទុះគ្រាប់បែក លោក សម រង្ស៉ី ប្រុងនឹងរត់គេចចេញពីកន្លែងកើតហេតុដែរ ប៉ុន្តែត្រូវអង្គរក្សប្រាប់ថាកុំឱ្យរត់ ដើម្បីកុំឲ្យអ្នកគាំទ្របាក់ទឹកចិត្ត។
លោក ងួន ងឹម ដាក់ការសង្ស័យថា ករណីបំផ្ទុះគ្រាប់បែកនៅខាងមុខរដ្ឋសភាជាតិកាលពីថ្ងៃទី៣០ ខែមីនា ឆ្នាំ១៩៩៧ ទំនងជាលោក សម រង្ស៊ី ជាអ្នករៀបចំផែនការនេះឡើង ព្រោះពេលដែលផ្ទុះគ្រាប់បែកនៅពេលនោះ លោក សម រង្ស៊ី មិនបានត្រូវរបួសអ្វីនោះទេ ប៉ុន្តែគាត់បានចូលទៅឱបជនរងគ្រោះដែលធ្វើឱ្យគាត់ប្រឡាក់ឈាមរបស់បាតុករទាំងនោះ ដែលគេល្បីតៗគ្នាថា លោក សម រង្ស៊ី ត្រូវរបួសក្នុងហេតុការណ៍គប់គ្រាប់បែកនោះទៅវិញ។
កាលពីថ្ងៃទី៣០ ខែមីនា ឆ្នាំ២០២៣ អតីតមេដឹកនាំបក្សប្រឆាំង លោក សម រង្ស៊ី បានសរសេរលើទំព័រហ្វេសប៊ុករបស់ខ្លួនថា ថ្ងៃទី៣០ ខែមីនា ឆ្នាំ២០២៣ នេះ គឺជាខួប ២៦ឆ្នាំនៃសោកនាដកម្មអំពើភេរវកម្មគប់គ្រាប់បែកនៅទីក្រុងភ្នំពេញ កាលពីថ្ងៃទី៣០ ខែមីនា ឆ្នាំ១៩៩៧ ដែលបណ្តាលឲ្យមនុស្សស្លូតត្រង់ស្លាប់យ៉ាងតិច ១៦នាក់ និងរបួសធ្ងន់ជាង ១០០នាក់នៅក្នុងហេតុការណ៍នោះ។
លោក សម រង្ស៊ី អះអាងថា កាលពីថ្ងៃទី៣០ ខែធ្នូ ឆ្នាំ២០២១ តុលាការបារាំងនៅទីក្រុងប៉ារីសបានវែកមុខជនដៃដល់រួចហើយ ព្រមទាំងបានចេញដីកាឲ្យចាប់ខ្លួនលោក ហ៊ុយ ពិសិដ្ឋ និងលោក ហ៊ីង ប៊ុនហៀង ដែលជាមេអង្គរក្សរបស់លោក ហ៊ុន សែន ថែមទៀត។
អតីតមេដឹកនាំបក្សប្រឆាំងរូបនេះបញ្ជាក់ថា ចាប់ពីឆ្នាំ២០២៣ នេះទៅ នឹងមានការកាត់ទោសលោក ហ៊ុយ ពិសិដ្ឋ និងលោក ហ៊ីង ប៊ុនហៀង នៅថ្ងៃណាមួយមិនខាន។ លើសពីនេះ ក៏នឹងឈានទៅដល់កាត់ទោសមេដឹកនាំបក្សកាន់អំណាច លោក ហ៊ុន សែន ដែលជាអ្នកបញ្ជាជនដៃដល់ ២នាក់នេះផងដែរ ដូច្នេះជនរងគ្រោះ និងក្រុមគ្រួសារជនរងគ្រោះពីសោកនាដកម្មនៃការគប់គ្រាប់បែកនេះ នឹងទទួលបានយុត្តិធម៌ក្នុងពេលឆាប់ៗខាងមុខមិនខានឡើយ។
កាលពីថ្ងៃទី៣០ ខែមីនា ឆ្នាំ១៩៩៧ ពលរដ្ឋខ្មែរស្លូតត្រង់យ៉ាងហោចណាស់ ១៦នាក់បានស្លាប់ និងជិត ២០០នាក់រងរបួសធ្ងន់ស្រាល ដោយសារជនមិនស្គាល់មុខបានគប់គ្រាប់បែកដៃចំនួន ៤គ្រាប់ចូលក្នុងក្រុមបាតុករដែលកំពុងតវ៉ាទាមទាររកយុត្តិធម៌សង្គម និងទាមទារឱ្យកំណែទម្រង់ប្រព័ន្ធយុត្តិធម៌ដែលដឹកនាំធ្វើបាតុកម្មដោយលោក សម រង្ស៊ី អតីតប្រធានគណបក្សជាតិខ្មែរ នៅខាងត្បូងព្រះបរមរាជវាំងមុខមន្ទីររដ្ឋសភាចាស់ដែលជាទីតាំងតុលាការកំពូលក្រុងភ្នំពេញបច្ចុប្បន្ននេះ។
ជុំវិញបញ្ហានេះ អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) ធ្លាប់ចេញសេចក្ដីថ្លែងការណ៍ដោយចាត់ទុកការវាយប្រហារដោយគ្រាប់បែកដៃនេះ ថាជាចេតនារបស់រដ្ឋាភិបាលក្រុងភ្នំពេញដែលមានលោក ហ៊ុន សែន ជាអ្នកដឹកនាំដើម្បីកម្ទេចអ្នកនយោបាយបក្សប្រឆាំងនៅកម្ពុជា។
អង្គការ យូមែន រ៉ៃត៍ វ៉ច្ឆ ក៏បានលាតត្រដាងដែរថា ការវាយប្រហារនេះ គឺមានការពាក់ព័ន្ធនឹងកងអង្គរក្សរបស់លោក ហ៊ុន សែន គឺលោក ហ៊ីង ប៊ុនហៀង ផងដែរ។
ទាក់ទិននឹងបញ្ហានេះ លោក សម រង្ស៊ី ក៏ធ្លាប់បានដាក់ពាក្យប្ដឹងទៅតុលាការព្រហ្មទណ្ឌអន្តរជាតិ (ICC) ដែរ ក៏ប៉ុន្តែដោយសារមានការចរចានយោបាយរវាងលោក ហ៊ុន សែន និងលោក សម រង្ស៊ី កាលពីឆ្នាំ២០១៣ ដែលរដ្ឋាភិបាលក្រុងភ្នំពេញសុខចិត្តបើកផ្លូវឱ្យមេដឹកនាំបក្សប្រឆាំងរូបនេះវិលចូលប្រទេសកម្ពុជាដើម្បីធ្វើនយោបាយវិញ លោក សម រង្ស៊ី ក៏បានសម្រេចដកពាក្យបណ្ដឹងនោះវិញតែម្តង។
ការដកពាក្យបណ្តឹងរបស់លោក សម រង្ស៊ី នៅពេលនោះក៏ត្រូវរងនូវការរិះគន់ពីមជ្ឈដ្ឋាននានាយ៉ាងចាស់ដៃ ដោយអះអាងថាការធ្វើបែបនេះនឹងផ្តល់ឱកាសឱ្យលោក ហ៊ុន សែន ធ្វើបាបក្រុមប្រឆាំងទៅថ្ងៃក្រោយបន្តទៀត ហើយលោក សម រង្ស៊ី ខ្លួនឯងក៏នឹងរងគ្រោះពីការដកពាក្យបណ្តឹងនេះដែរ ខណៈយុត្តិធម៌សម្រាប់ជនរងគ្រោះនឹងត្រូវជីកកប់បាត់ជារៀងរហូត៕