ការបោះឆ្នោតជ្រើសតាំងតំណាងរាស្ត្រនីតិកាលទី៧ នៅខែកក្កដា ឆ្នាំ២០២៣ ខាងមុខនេះ នឹងមិនមានវត្តគណបក្សភ្លើងទៀនចូលរួមប្រកួតប្រជែងឡើយ បន្ទាប់ពីក្រុមប្រឹក្សាធម្មនុញ្ញបានបដិសេធការចុះបញ្ជីបោះឆ្នោតជ្រើសតាំងតំណាងរាស្ត្រនីតិកាលទី៧ របស់គណបក្សនេះ ដោយបិទផ្លូវតវ៉ាក្រោមហេតុផលថាខុសនឹងគតិច្បាប់។
ការប្រកាសបដិសេធនេះ ធ្វើឡើងបន្ទាប់ពីក្រុមប្រឹក្សាធម្មនុញ្ញបានបើកកិច្ចប្រជុំពិភាក្សានៅថ្ងៃទី២៥ ខែឧសភា នេះ លើបណ្ដឹងតវ៉ារបស់គណបក្សភ្លើងទៀន និងគណបក្សមហាសាមគ្គីជាតិខ្មែរ ដែលបានប្តឹងកាលពីពាក់កណ្ដាលខែឧសភា។
ក្នុងសេចក្តីប្រកាសរបស់ក្រុមប្រឹក្សាធម្មនុញ្ញចុះថ្ងៃទី២៥ ខែឧសភា ឆ្នាំ២០២៣ ឲ្យដឹងថា ការមិនអនុញ្ញាតគណបក្សភ្លើងទៀន និងគណបក្សមហាសាមគ្គីជាតិខ្មែរ ចុះបញ្ជីចូលរួមប្រកួតប្រជែងក្នុងការបោះឆ្នោតថ្នាក់ជាតិ ដោយសារខុសនឹងគតិច្បាប់។ សេចក្ដីសម្រេចបដិសេធរបស់ក្រុមប្រឹក្សាធម្មនុញ្ញនេះក៏បានបិទផ្លូវតវ៉ាផងដែរ។ ដូច្នេះការបោះឆ្នោតជ្រើសតាំងតំណាងរាស្ត្រនីតិកាលទី៧ នៅខែកក្កដា ឆ្នាំ២០២៣ ខាងមុខនេះ មិនមានវត្តមានគណបក្សភ្លើងទៀនចូលរួមប្រកួតប្រជែងឡើយ។
ក្នុងសន្និសីទសារព័ត៌មានបន្ទាប់ពីបញ្ចប់កិច្ចប្រជុំនាថ្ងៃទី២៥ ឧសភា នេះ អគ្គលេខាធិការរងនៃក្រុមប្រឹក្សាធម្មនុញ្ញ លោក ព្រហ្ម វិចិត្រអក្ខរា លើកឡើងថា ការសម្រេចរបស់ក្រុមប្រឹក្សាធម្មនុញ្ញឆ្លុះបញ្ចាំងពីគោលការណ៍សេរី ត្រឹមត្រូវ និងតម្លាភាព ដោយមិនបានប្រាសចាក ឬឃ្លាតឆ្ងាយពីគោលការណ៍សេរី ត្រឹមត្រូវ និងតម្លាភាពនោះទេ។
លោកបានថ្លែងការពារទៀតថា ក្រុមប្រឹក្សាធម្មនុញ្ញនេះជាស្ថាប័នកំពូលរបស់ជាតិ មិនអាចធ្វើអ្វីដែលខុសពីសមត្ថកិច្ចដែលមានចែងក្នុងរដ្ឋធម្មនុញ្ញ ដែលប្រគល់ភារកិច្ចឲ្យក្រុមប្រឹក្សាធម្មនុញ្ញពិនិត្យ និងដោះស្រាយវិវាទនានាដែលពាក់ព័ន្ធនឹងការបោះឆ្នោតបានឡើយ។
ចំពោះការបដិសេធវិញ លោក ព្រហ្ម វិចិត្រអក្ខរា អះអាងថា ដោយក្រុមប្រឹក្សាធម្មនុញ្ញពិនិត្យទៅលើសេចក្ដីសម្រេច និងថ្លឹងថ្លែងលើការអះអាងរបស់គណៈកម្មាធិការជាតិរៀបចំការបោះឆ្នោត រួមទាំងពាក្យបណ្ដឹងគណបក្សភ្លើងទៀន។
តែយ៉ាងណាក៏ដោយ ការសម្រេចរបស់ក្រុមប្រឹក្សាធម្មនុញ្ញធ្វើឡើងស្របនឹងទៅសេចក្ដីសម្រេចរបស់គណៈកម្មាធិការជាតិរៀបចំការបោះឆ្នោត (គ.ជ.ប) កាលពីពេលថ្មីៗនេះដែរ។
គណៈកម្មាធិការជាតិរៀបចំការបោះឆ្នោត (គ.ជ.ប) កាលពីថ្ងៃទី១៥ ខែឧសភា នេះ បានប្រកាសបដិសេធសំណើសុំចុះឈ្មោះរបស់គណបក្សភ្លើងទៀន ដើម្បីចូលរួមប្រកួតប្រជែងការបោះឆ្នោតនាខែកក្កដា ខាងមុខនេះ។
ការបដិសេធការចុះបញ្ជីនេះ ដោយ គ.ជ.ប លើកហេតុផលថា បក្សភ្លើងទៀនមិនបានភ្ជាប់ប្រកាសស្ដីពីការចុះឈ្មោះក្នុងបញ្ជីគណបក្សនយោបាយនៅក្រសួងមហាផ្ទៃ ដែលមានបញ្ជាក់ពីនីត្យានុកូលកម្មដោយរដ្ឋបាលរាជធានី ខេត្ត ក្រុង ស្រុក ខណ្ឌ នៅការិយាល័យច្រកចេញចូលតែមួយឱ្យបានត្រឹមត្រូវស្របតាមកថាខណ្ឌទី២ និងចំណុចទី១ ក្នុងមាត្រា២៧ នៃច្បាប់ស្ដីពីការបោះឆ្នោតជ្រើសតាំងតំណាងរាស្ត្រ។
គណបក្សភ្លើងទៀនជាគណបក្សជំទាស់ដ៏ធំមួយដែលធ្លាប់ទទួលបានសំឡេងគាំទ្រពីប្រជាពលរដ្ឋជាង ១លាន ៦សែននាក់កាលពីការបោះឆ្នោតជ្រើសរើសក្រុមប្រឹក្សាឃុំ-សង្កាត់នាខែមិថុនា ឆ្នាំ២០២២។ ប៉ុន្តែការបោះឆ្នោតជ្រើសតាំងតំណាងរាស្ត្រនៅខែកក្កដា ខាងមុខនេះ មិនមានគណបក្សភ្លើងទៀនចូលរួមប្រកួតប្រជែងឡើយ។
ទាក់ទិនរឿងនេះ ប្រធានវេទិកាពលរដ្ឋ និងជាអ្នកវិភាគនយោបាយសង្គម លោក គឹម សុខ បានប្រាប់សារព័ត៌មាន The Cambodia Daily ថា លោក ហ៊ុន សែន រកការធានាមិនបានករណីពីរយ៉ាងពីបក្សភ្លើងទៀន ក្នុងនោះលោក ហ៊ុន សែន មិនទុកចិត្តថាបក្សភ្លើងទៀនពិតជានឹងមិនតវ៉ាលទ្ធផលបោះឆ្នោត ស្របពេលដែលកម្ដៅនៃគំនរអយុត្តិធម៌សង្គមកាន់តែពុះខ្លាំងឡើង។ ចំណែកទី២ លោក ហ៊ុន សែន មិនទាន់អាចរកឃើញអ្នកដឹកនាំបក្សភ្លើងទៀនដែលគាត់អាចបង្វិលបានតាមទំនើងចិត្តដូចដែលគាត់ធ្លាប់ចុចតេឡេបញ្ជាលោក ញឹក ប៊ុនឆៃ សម័យបំបែកគណបក្សហ៊្វុនស៊ិនប៉ិច កាលពីឆ្នាំ២០០៦ ក្នុងអំឡុងអាណត្តិទី៣។
លោក គឹម សុខ អះអាងថា កាលណាលោក ហ៊ុន សែន រកបុគ្គលបែបនេះមិនឃើញក្នុងជួរអ្នកដឹកនាំកំពូលរបស់បក្សភ្លើងទៀន ហើយបណ្ដោយឲ្យបក្សភ្លើងទៀនចូលរួមបោះឆ្នោត មានកៅអីខ្លះក្នុងសភា លោក ហ៊ុន សែន បារម្ភថាបក្សភ្លើងទៀនអាចអុកឡុកគាត់ ជាពិសេសរដ្ឋបាលកូនគាត់ក្នុងរដ្ឋសភា៕