កូនប្រុសច្បងរបស់លោក ហ៊ុន សែន គឺលោក ហ៊ុន ម៉ាណែត បានបញ្ជាឲ្យកងទ័ពទប់ស្កាត់ការប៉ុនប៉ងបង្កអស្ថិរភាព ដើម្បីការពារ និងថែរក្សាសុខសន្តិភាព ដែលក្រុមបក្ខពួក និងគ្រួសាររបស់ត្រកូលហ៊ុន កំពុងនាំគ្នាស្រែកបន្ទរ និងបិទនៅទីសាធារណៈនាពេលបច្ចុប្បន្ន។
ក្នុងពិធីសម្ពោធអគារស្នាក់នៅ និងសមិទ្ធផលនានារបស់តំបន់ប្រតិបត្តិការសឹករងកំពត និងកងឯកភាពចំណុះ នាថ្ងៃទី២៩ ខែឧសភា នេះ លោក ហ៊ុន ម៉ាណែត លើកឡើងថា កន្លងមករដ្ឋាភិបាលដឹកនាំដោយឪពុករបស់លោកបានគិតគូរជាប់ជាប្រចាំអំពីសុខទុក្ខរបស់កងកម្លាំង អតីតយុទ្ធជន និងក្រុមគ្រួសារ តាមរយៈការផ្តល់នូវការឧបត្ថម្ភផ្សេងៗសំដៅលើកកម្ពស់កម្រិតជីវភាពរស់នៅ និងផ្តល់លំនឹងនៃសេដ្ឋកិច្ចគ្រួសារ។
ក្រៅពីសួរសុខទុក្ខហើយ លោកថាក៏បានដំឡើងប្រាក់បៀវត្សរ៍ដល់មន្ត្រីរាជការ និងកងកម្លាំងគ្រប់ប្រភេទជាបន្តបន្ទាប់ ដោយរួមទាំងប្រាក់សោធននិវត្តន៍ផងដែរ។ ដូច្នេះ កងទ័ពត្រូវប្ដេជ្ញាការពារ និងថែរក្សាសុខសន្តិភាព សន្តិសុខ និងសណ្ដាប់ធ្នាប់ របៀបរៀបរយសាធារណៈ តាមរយៈការទប់ស្កាត់រាល់ការប៉ុនប៉ងបង្កអស្ថិរភាពណាមួយ ដោយអនុវត្តគ្រប់បទបញ្ជារបស់រាជរដ្ឋាភិបាល។
ការបញ្ជារបស់លោក ហ៊ុន ម៉ាណែត នាពេលនេះ ខណៈដែលលោក ហ៊ុន សែន ប្រកាសតាមកម្ទេចថ្នាក់ដឹកនាំ និងសកម្មជនគណបក្សប្រឆាំង ព្រមទាំងក្រុមអង្គការសង្គមស៊ីវិលដែលមាននិន្នាការផ្ទុយពីគណបក្សប្រជាជនកម្ពុជានាពេលបច្ចុប្បន្ន។
តែយ៉ាងណា ការបញ្ជាទៅកងទ័ពរបស់លោក ហ៊ុន សែន និងកូនច្បងរបស់លោក គឺលោក ហ៊ុន ម៉ាណែត នេះ ធ្វើឡើងផ្ទុយពីច្បាប់ស្ដីពីកងទ័ព។
បើតាមច្បាប់ស្ដីពីសហលក្ខន្តិកៈទូទៅចំពោះយោធិននៃកងយោធពលខេមរភូមិន្ទ មាត្រា៩ ចែងថា យោធិនមានសិទ្ធិសេរីភាពដូចពលរដ្ឋដទៃទៀត ក៏ប៉ុន្តែការប្រើប្រាស់សិទ្ធិ និងសេរីភាពខ្លះ ត្រូវបានកម្រិតតាមលក្ខខណ្ឌដែលមានចែងក្នុងច្បាប់នេះ។
យោធិនត្រូវមានអព្យាក្រឹតភាពក្នុងមុខនាទី ក្នុងសកម្មភាពការងារ និងហាមឃាត់ចំពោះការប្រើប្រាស់មុខងារ និងប្រើប្រាស់សម្ភារៈរដ្ឋដើម្បីបម្រើសកម្មភាពនយោបាយណាមួយឡើយ។
ច្បាប់ស្ដីពីសហលក្ខន្តិកៈទូទៅចំពោះយោធិននៃកងយោធពលខេមរភូមិន្ទ មាត្រា១៧ ចែងថា យោធិនត្រូវគោរព និងអនុវត្តរាល់បញ្ជាដោយមានស្មារតីទទួលខុសត្រូវ។ បញ្ជាណាដែលមានភាពច្បាស់ក្រឡែតផ្ទុយពីច្បាប់ ឬផ្ទុយពីអនុសញ្ញាអន្តរជាតិ ត្រូវហាមឃាត់។ ក្នុងករណីនេះ អ្នកបញ្ជាក្តី អ្នកអនុវត្តន៍ក្តី ត្រូវទទួលខុសត្រូវចំពោះមុខច្បាប់។
ដូចគ្នាដែរ ក្នុងមាត្រា២០ នៃព្រះរាជក្រឹត្យស្ដីពីសហលក្ខន្តិកៈដោយឡែកនៃក្របខ័ណ្ឌមន្ត្រីនគរបាលជាតិកម្ពុជា ចែងថា មន្ត្រីនគរបាលជាតិកម្ពុជាមានអព្យាក្រឹតភាពក្នុងមុខនាទី ក្នុងសកម្មភាពការងារ និងហាមឃាត់ការប្រើមុខងារ ការបំពេញភារកិច្ច និងប្រើប្រាស់មធ្យោបាយសម្ភារៈរបស់រដ្ឋដើម្បីសកម្មភាព និងផលប្រយោជន៍គណបក្សណាមួយ៕