អតីតមេដឹកនាំបក្សប្រឆាំងលោក សម រង្ស៊ី អះអាងថា លោក ហ៊ុន សែន បានចោទរូបលោកថាមានទោស ប៉ុន្តែនៅពេលដែលលោកប្រកាសអំពីការធ្វើដំណើរវិលត្រឡប់ទៅកម្ពុជាវិញ ដើម្បីឱ្យលោក ហ៊ុន សែន ចាប់ខ្លួន បែរជាមេដឹកនាំបក្សកាន់អំណាចរូបនេះគំរាមសម្លាប់រូបលោកដោយប្រើគ្រាប់ BM-21 តទល់ជាមួយលោកដែលមានតែបាតដៃទទេទៅវិញ។
លោក សម រង្ស៊ី បានសរសេរលើទំព័រហ្វេសប៊ុករបស់លោកកាលពីថ្ងៃទី១ មិថុនា ដោយរំលឹកឡើងវិញថា លោក ហ៊ុន សែន បានអះអាងថា នាយករដ្ឋមន្ត្រីប្រទេសម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) បានសន្យាជាមួយគាត់ចំនួន “៤ដង” ថានឹងមិនអនុញ្ញាតឲ្យលោក សម រង្ស៊ី មកជាន់ទឹកដីប្រទេសម៉ាឡេស៊ី ដាច់ខាត។
លោកបន្ថែមថា បើរឿងនេះជារឿងពិតមែន នោះលោក អាន់វ៉ា អ៊ីប្រាហ៊ីម ច្បាស់ជាមិនបានសន្យាជាមួយលោក ហ៊ុន សែន បែបនេះ “៤ដង” ដោយទទេៗទេ ប្រសិនបើលោក ហ៊ុន សែន មិនបានទទូចអង្វរសុំ “៤ដង” ឲ្យលោក អាន់វ៉ា អ៊ីប្រាហ៊ីម សន្យារារាំងដំណើររបស់លោក សម រង្ស៊ី ទៅកាន់ទឹកដីម៉ាឡេស៊ី នោះ។
លោក សម រង្ស៊ី លើកជាសំណួរថា តើហេតុអ្វីបានជាលោក ហ៊ុន សែន នៅពេលជួបថ្នាក់ដឹកនាំប្រទេសជិតខាងម្តងៗមិនលើកយករឿងសំខាន់របស់ប្រទេសជាតិដែលទាក់ទងផលប្រយោជន៍កម្ពុជាមកជជែកពិភាក្សា តែបែរជាលើកតែពីករណីរបស់លោកមកពិភាក្សាទៅវិញ។
ការអះអាងរបស់អតីតមេដឹកនាំបក្សប្រឆាំងបែបនេះ ធ្វើឡើងបន្ទាប់ពីមេដឹកនាំបក្សកាន់អំណាចគំរាមប្រើគ្រាប់ BM-21 ផ្គុំបាញ់លោក សម រង្ស៊ី នៅពេលដែលគាត់ឈានជើងចូលទឹកដីនៃប្រទេសកម្ពុជានៅពេលនេះ។
ក្នុងពិធីសម្ពោធស្ពានអាកាសឫស្សីកែវ កាលពីថ្ងៃទី៣១ ខែឧសភា ឆ្នាំ២០២៣ បុរសខ្លាំងក្រាញអំណាចតពូជនៅកម្ពុជា លោក ហ៊ុន សែន គំរាមបាញ់លោក សម រង្ស៊ី ដោយគ្រាប់ BM-21 បើសិនលោក សម រង្ស៊ី ហ៊ានឈានជើងចូលទឹកដីខ្មែរវិញ។
លោក ហ៊ុន សែន អះអាងថា នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានសន្យាជាមួយលោកចំនួន ៤ដងរួចហើយថានឹងមិនឲ្យលោក សម រង្ស៊ី ជាន់ទឹកដីម៉ាឡេស៊ី ជាដាច់ខាត ប៉ុន្តែលោក សម រង្ស៊ី នៅតែប្រើល្បិចលួចចូលទៅប្រទេសម៉ាឡេស៊ី តាមវិស័យឯកជនដោយប្រើប៉ាសស្ព័របារាំងបានទៀត។
លោក ហ៊ុន សែន អះអាងថា លោកធ្លាប់បាននិយាយទៅកាន់នាយករដ្ឋមន្ត្រីម៉ាឡេស៊ី ថា បើលោក អាន់វ៉ា អ៊ីប្រាហ៊ីម ហ៊ានឱ្យលោក សម រង្ស៊ី ចូលទឹកដីម៉ាឡេស៊ី នោះរដ្ឋាភិបាលកម្ពុជា និងរដ្ឋាភិបាលម៉ាឡេស៊ី នឹងមើលមុខគ្នាមិនចំនោះទេទៅថ្ងៃក្រោយ។
កាលពីថ្ងៃទី៣១ ខែឧសភា ឆ្នាំ២០២៣ ក្រសួងការបរទេសម៉ាឡេស៊ី បានចេញសេចក្តីប្រកាសព័ត៌មានថា នាយករដ្ឋមន្ត្រីម៉ាឡេស៊ី មិនបានដឹងអំពីការមកដល់របស់លោក សម រង្ស៊ី លើទឹកដីម៉ាឡេស៊ី នោះទេ។
ការចេញសេចក្តីប្រកាសព័ត៌មាននេះ ធ្វើឡើងបន្ទាប់ពីលោក សម រង្ស៊ី បានចាកចេញពីប្រទេសម៉ាឡេស៊ី នៅថ្ងៃទី៣១ ឧសភា ដដែលនោះ ប៉ុន្តែវត្តមានរបស់លោក សម រង្ស៊ី លើទឹកដីនេះគ្មានកម្មវិធីសាធារណៈណាមួយត្រូវបានប្រារព្ធឡើងនោះទេ ដោយគ្រាន់តែមានការជួបជុំជាមួយអ្នកគាំទ្ររូបលោកជាលក្ខណៈធម្មតាប៉ុណ្ណោះ។
កាលពីថ្ងៃទី២៩ ខែឧសភា ឆ្នាំ២០២៣ លោក សម រង្ស៊ី បានបង្ហោះសារ និងរូបថតមួយចំនួនដែលលោកបានទៅដល់ទីក្រុងកូឡាឡាំពួរ ប្រទេសម៉ាឡេស៊ី លើទំព័រហ្វេសប៊ុករបស់លោក រួមទាំងរូបថតដែលលោកបានចាកចេញពីប្រទេសនេះនៅថ្ងៃទី៣១ ខែឧសភា ឆ្នាំ២០២៣ ផងដែរ ដែលមានន័យថា លោក សម រង្ស៊ី បានស្នាក់នៅទីនោះអស់រយៈពេល ២យប់ ២ថ្ងៃ មុននឹងលោកចាកចេញនៅថ្ងៃទី៣១ ខែឧសភា នោះ។
ជាងនេះទៀត លោក សម រង្ស៊ី ក៏បានបង្ហាញរូបថតដែលលោកបានថតជាមួយតំណាងរាស្ត្ររបស់ប្រទេសម៉ាឡេស៊ី អំឡុងពេលដែលលោកមានវត្តមាននៅទីនោះផងដែរ។ លើសពីនេះ លោក សម រង្ស៊ី ក៏បានបង្ហាញសំបុត្រយន្តហោះដែលលោកបានកក់នៅប្រទេសអូស្ត្រាលី ថែមទៀតសម្រាប់ការធ្វើដំណើរទៅកាន់ទីក្រុងកូឡាឡាំពួរ ប្រទេសម៉ាឡេស៊ី ដែលលោកបានទិញតាំងពីថ្ងៃទី២២ ខែឧសភា មកម្ល៉េះ។ ក្នុងន័យនេះ ទំនងលោក សម រង្ស៊ី ចង់បញ្ជាក់ថា ដំណើររបស់លោកមិនត្រូវបាននាយករដ្ឋមន្ត្រីម៉ាឡេស៊ី ហាមឃាត់ដូចជាការលើកឡើងរបស់លោក ហ៊ុន សែន នោះទេ។
មេដឹកនាំបក្សកាន់អំណាចលោក ហ៊ុន សែន តែងចោទប្រកាន់អតីតមេដឹកនាំបក្សប្រឆាំងលោក សម រង្ស៊ី ថាជាជនក្បត់ជាតិ និងត្រូវបានតុលាការកម្ពុជាផ្ដន្ទាទោសយ៉ាងធ្ងន់ធ្ងរ ប៉ុន្តែលោក ហ៊ុន សែន នៅតែបន្តបិទផ្លូវលោក សម រង្ស៊ី មិនឱ្យចូលប្រទេសកម្ពុជា ដើម្បីចាប់ខ្លួនយកទៅផ្ដន្ទាទោសនោះទេ។ ជាងនេះទៀត ថែមទាំងស្នើរដ្ឋាភិបាលរបស់ប្រទេសជិតខាងជួយរារាំងលោក សម រង្ស៊ី មិនឱ្យចូលទៅទឹកដីនៃប្រទេសទាំងនោះថែមទៀត៕