បុរសខ្លាំងកាន់អំណាចតពូជនៅកម្ពុជាលោក ហ៊ុន សែន បានប្រកាសអនុញ្ញាតឲ្យលោក សាន សុជា ចូលជួបនៅភូមិគ្រឹះរបស់លោកនៅក្រុងតាខ្មៅខេត្តកណ្ដាល បន្ទាប់ពីលោក សាន សុជា ត្រឡប់ពីអូស្ត្រាលីមកដល់ប្រទេសកម្ពុជា។
ក្នុងពិធីជួបសំណេះសំណាលជាមួយនឹងកម្មករកម្មការិនីក្នុងខណ្ឌពោធិ៍សែនជ័យ រាជធានីភ្នំពេញ នាថ្ងៃទី១៣ មិថុនា នេះ លោក ហ៊ុន សែន បានថ្លែងថា នៅពេលអន្ទិត សាន សុជា មកដល់កម្ពុជាភ្លាមៗ បានទាក់ទងមកសុំជួបជាមួយលោកនៅថ្ងៃទី១៤ ខែមិថុនា ប៉ុន្តែដោយសារថ្ងៃស្អែកនេះលោកជាប់រវល់ ទើបអនុញ្ញាតឲ្យលោក សាន សុជា ចូលជួបថ្ងៃនេះជំនួសវិញ។
លោកថា លោកនឹងជួបលោក សាន សុជា នៅភូមិគ្រឹះរបស់លោកក្នុងក្រុងតាខ្មៅ បន្ទាប់ពីអន្ទិតដែលទើបនឹងលាចាកសិក្ខាបទ ឬសឹកថ្មីៗ ត្រឡប់ពីប្រទេសអូស្ត្រាលី មកកម្ពុជា។ ប៉ុន្តែការប្រកាសរបស់បុរសខ្លាំងកាន់អំណាចជិត ៤០ឆ្នាំនៅកម្ពុជា លោក ហ៊ុន សែន ដែលថាលោក សាន សុជា សុំជួបនោះ ហាក់មិនបានឆ្លុះបញ្ចាំងការពិតឡើយ។
បើតាមប្អូនរបស់លោក សាន សុជា ឈ្មោះ សាន ណាវី (San Navy) សរសេរលើហ្វេសប៊ុករបស់ខ្លួននាថ្ងៃទី១៣ ខែមិថុនា នេះថា បងប្រុសរបស់គាត់មកស្រុកខ្មែររយៈពេលខ្លី ក្នុងគោលបំណងដើម្បីធ្វើប៉ាសស្ព័រ និងអត្តសញ្ញាណប័ណ្ណខ្មែរ។
ក្នុងឱកាសនេះដែរ អ្នកនាងថាលោកគ្រូក៏បានទទួលការអនុញ្ញាតឲ្យចូលជួបសម្ដែងការគួរសមជាមួយលោក ហ៊ុន សែន ខណៈព័ត៌មានមួយចំនួនបានផ្សព្វផ្សាយថា លោក ហ៊ុន សែន ទេដែលជាអ្នកសុំជួបលោក សាន សុជា នោះ។
ភិក្ខុវជិរប្បញ្ញោ សាន សុជា បានលាចាកសិក្ខាបទនៅប្រទេសអូស្ត្រាលី កាលពីថ្ងៃទី២១ ខែឧសភា ឆ្នាំ២០២៣ បន្ទាប់ពីសាងផ្នួសអស់រយៈពេល ៣១វស្សា៕