មេដឹកនាំខ្មែរដែលវៀតណាមលើកបន្តុបកាលពីទសវត្សរ៍ឆ្នាំ១៩៨០ លោក ហ៊ុន សែន អះអាងថា ការឆ្លងដែនចូលទឹកដីវៀតណាម កាលពីថ្ងៃទី២០ ខែមិថុនា ឆ្នាំ១៩៧៧ មិនមែនលោកមានបំណងរត់ចោលទឹកដីខ្មែរនោះទេ ប៉ុន្តែគឺដើម្បីសង្គ្រោះជាតិកម្ពុជាពីរបបប្រល័យពូជសាសន៍ ប៉ុល ពត ប៉ុណ្ណោះ។
បុរសខ្លាំងសល់ពីរបបខ្មែរក្រហម លោក ហ៊ុន សែន បានលើកឡើងក្នុងពិធីរំលឹកថ្ងៃឆ្លងដែនទៅកាន់ប្រទេសវៀតណាម កាលពី ៤៦ឆ្នាំមុន នៅថ្ងៃទី២០ ខែមិថុនា ឆ្នាំ២០២៣ នេះថា លោកបានសម្រេចចិត្តក្នុងស្ថានភាពដ៏តានតឹងបំផុតក្នុងការលាចាកទឹកដី លាភរិយា ឆ្លងកាត់ព្រំដែនទាំងគ្រោះថ្នាក់បំផុតឆ្ពោះទៅកាន់ប្រទេសវៀតណាម ដើម្បីស្វែងរកការគាំទ្រក្នុងការរំដោះជាតិ និងប្រជាជនកម្ពុជាចេញពីក្រញាំបិសាចដ៏សែនឃោរឃៅ ប៉ុល ពត នាពេលនោះ។
លោក ហ៊ុន សែន អះអាងថា នៅថ្ងៃទី២០ ខែមិថុនា ឆ្នាំ២០២៣ នេះ គឺមានរយៈពេល ៤៦ឆ្នាំហើយដែលលោកបានយកជីវិតធ្វើជាដើមទុនចេញទៅកាន់ប្រទេសវៀតណាម ស្វែងរកការគាំទ្រដើម្បីតស៊ូរំដោះជាតិ និងប្រជាជនកម្ពុជា ដូច្នេះហើយលោកនឹងមិនអនុញ្ញាតឱ្យស្ថានភាពបែបនេះវិលមកគ្របដណ្តប់លើទឹកដីកម្ពុជាបានទៀតឡើយ។
ការអះអាងនេះ ធ្វើឡើងដើម្បីរំលឹកពីការតស៊ូរបស់លោកដែលបានឆ្លងដែនចូលទៅកាន់ទឹកដីវៀតណាម ដើម្បីស្វែងរកការគាំទ្រពីកងទ័ពវៀតណាម ឱ្យជួយរំដោះពលរដ្ឋខ្មែរពីរបប ប៉ុល ពត ប្រល័យពូជសាសន៍នាសម័យនោះ។
កាលពីថ្ងៃទី១៩ ខែមិថុនា ឆ្នាំ២០២៣ អតីតមេដឹកនាំបក្សប្រឆាំងលោក សម រង្ស៊ី បានសរសេរលើទំព័រហ្វេសប៊ុករបស់លោកថា មេដឹកនាំបក្សកាន់អំណាចលោក ហ៊ុន សែន បានយកថ្ងៃទី២០ ខែមិថុនា ឆ្នាំ២០២៣ នេះធ្វើជាថ្ងៃប្រារព្ធពិធីរំលឹកខួប ៧២ឆ្នាំនៃការបង្កើតបក្សប្រជាជនកម្ពុជា ក្រោមរូបភាពរំលឹកខួប ៤៦ឆ្នាំដែលគាត់បានរត់ទៅជ្រកកោននៅប្រទេសវៀតណាម កាលពីថ្ងៃទី២០ ខែមិថុនា ឆ្នាំ១៩៧៧ នោះ។
អតីតមេដឹកនាំបក្សប្រឆាំងរូបនេះលើកឡើងថា លោក ហ៊ុន សែន បានរៀបចំគម្រោងប្រារព្ធពិធីនេះមុនថ្ងៃកំណើតផ្លូវការរបស់បក្សប្រជាជនកម្ពុជា ៨ថ្ងៃ ដោយគាត់សម្រេចយកថ្ងៃទី២០ ខែមិថុនា ជំនួសថ្ងៃទី២៨ ខែមិថុនា បែបនេះ គឺជាជំហានទី១ នៃការប៉ុនប៉ងបំភ្លេចចោលនូវថ្ងៃកំណើតផ្លូវការរបស់បក្សប្រជាជនកម្ពុជា និងដើមកំណើតរបស់បក្សនេះ។
លោក សម រង្ស៊ី អំពាវនាវឱ្យពលរដ្ឋខ្មែរស្វែងយល់ឲ្យកាន់តែច្បាស់ថែមទៀតពីដើមកំណើតគណបក្សប្រជាជនកម្ពុជា ដែលអ្នកសិក្សាប្រវត្តិសាស្ត្រឲ្យឈ្មោះថា ជាគណបក្ស “បង្កើតដោយវៀតណាមបង្កប់ក្នុងទឹកដីខ្មែរដោយវៀតណាម និងទទួលបាននូវការបង្គាប់បញ្ជាដោយវៀតណាម” ហើយគណបក្សនេះ និងមេដឹកនាំរបស់គេ គឺជាជនក្បត់ជាតិដែលមិនអាចប្រកែកបានឡើយ។
អតីតមេដឹកនាំបក្សប្រឆាំងរូបនេះចោទថា លោក ហ៊ុន សែន ជាប្រធានគណបក្សប្រជាជនកម្ពុជា ហើយក៏ជាជនក្បត់ជាតិបន្តវេនពីលោក សឺន ង៉ុក មិញ ដែលជាជនក្បត់ជាតិដូចគ្នាក្នុងឋានៈគាត់ជាបិតាស្ថាបនិកនៃគណបក្សប្រជាជនកម្ពុជាកាលពីឆ្នាំ១៩៥១ នោះ។
បក្សប្រជាជនកម្ពុជា ដែលមានឈ្មោះដើមថា បក្សប្រជាជនបដិវត្តន៍កម្ពុជា ត្រូវបានបង្កើតឡើងដោយលោក សឺន ង៉ុក មិញ ហៅអាចារ្យ មៀន កាលពីថ្ងៃទី២៨ ខែមិថុនា ឆ្នាំ១៩៥១។ លោក សឺន ង៉ុក មិញ ដែលមានឈ្មោះជាភាសាវៀតណាមថា ផាម យ៉ាំង ហួ (Phạm Văn Hua) និងជាអតីតសមាជិកបក្សកុម្មុយនីស្តឥណ្ឌូចិន ដែលត្រូវបានបង្កើតឡើងដោយលោក ហូ ជី មិញ (Ho Chi Minh) តាំងពីឆ្នាំ១៩៣០។ ចំណែកនាយករដ្ឋមន្ត្រីខ្មែរបច្ចុប្បន្ន លោក ហ៊ុន សែន ក៏ជាមេដឹកនាំដែលកងទ័ពវៀតណាមលើកបន្តុបកាលពីឆ្នាំ១៩៨៥ ដែរ។
ជុំវិញប្រវត្តិនៃការកកើតគណបក្សប្រជាជនកម្ពុជានេះ ត្រូវគេដឹងថា ដោយសារតែគណបក្សនេះមានដើមកំណើតពីបក្សកុម្មុយនីស្តវៀតណាម ហើយលោក ហ៊ុន សែន សែន ក៏ជាមេដឹកនាំដែលកងទ័ពវៀតណាមលើកបន្តុប ដូច្នេះហើយបានជាមេដឹកនាំខ្មែររូបនេះហ៊ានចុះកិច្ចព្រមព្រៀងខុសច្បាប់កាត់ទឹកដីកម្ពុជាឱ្យរដ្ឋាភិបាលវៀតណាមជាបន្តបន្ទាប់រហូតមក៕