ពលករខ្មែរនៅប្រទេសជប៉ុនរាប់រយនាក់នាំគ្នាចេញធ្វើយុទ្ធនាការដង្ហែក្បួនតាមដងផ្លូវ ទាមទារឱ្យរដ្ឋាភិបាលកម្ពុជាបើកលំហសេរីភាព និងបើកលំហប្រជាធិបតេយ្យសម្រាប់ការបោះឆ្នោតជាតិនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ។
ពួកគេបាននាំគ្នាពាក់អាវមានរូបសញ្ញាភ្លើងទៀន បានចេញធ្វើបាតុកម្មកាលពីថ្ងៃទី២៥ ខែមិថុនា នេះ ដោយមានកាន់បដាទង់ជាតិកម្ពុជា និងទង់គណបក្សភ្លើងទៀនតាមដងផ្លូវ។ ពួកគេបានស្រែកទាមទារឱ្យរដ្ឋាភិបាលកម្ពុជាបើកលំហសេរីភាព បើកលំហប្រជាធិបតេយ្យ ដោះលែងកម្ពុជា Free Cambodia ដោះលែងប្រជាធិបតេយ្យ Free Democracy និងការបោះឆ្នោតដោយសេរី ត្រឹមត្រូវ និងយុត្តិធម៌ Free and Fair Election ជាដើម សម្រាប់ការបោះឆ្នោតជាតិនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ។
ការចេញដង្ហែក្បួនប្រឆាំងនឹងការបោះឆ្នោតជាតិនៅកម្ពុជាក្នុងខែកក្កដា ឆ្នាំ២០២៣ ខាងមុខនេះ ធ្វើឡើងបន្ទាប់ពីមានការរិះគន់ជុំទិសថារដ្ឋាភិបាលឯកបក្សរបស់បុរសខ្លាំងក្រាញអំណាចលោក ហ៊ុន សែន គឺជាអ្នកនៅពីក្រោយនៃការគាបសង្កត់ និងការតាមកម្ទេចក្រុមបក្សប្រឆាំង។
ការបោះឆ្នោតជាតិអាណត្តិទី៧ នៅសល់តែជាង ២២ថ្ងៃទៀតប៉ុណ្ណោះដែលនឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ ប៉ុន្តែការបោះឆ្នោតជាតិក្នុងឆ្នាំ២០២៣ នេះ ត្រូវរងនូវការរិះគន់ពីមជ្ឈដ្ឋានជាតិ និងអន្តរជាតិជុំទិស ថាជាការបោះឆ្នោតមួយដែលបម្រើឱ្យបក្សកាន់អំណាច ជាជាងការធានាបាននូវលទ្ធិប្រជាធិបតេយ្យ និងការគោរពសិទ្ធិមនុស្ស និងសិទ្ធិនយោបាយរបស់ពលរដ្ឋ។
ការបោះឆ្នោតជាតិនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ មិនត្រឹមតែអវត្តមានគណបក្សសង្គ្រោះជាតិ និងមេដឹកនាំបក្សប្រឆាំងលោក កឹម សុខា និងលោក សម រង្ស៊ី ប៉ុណ្ណោះទេ សូម្បីគណបក្សភ្លើងទៀនដែលមានពលរដ្ឋគាំទ្រជាង ១លាន ៦សែននាក់ ក៏ត្រូវបានមេដឹកនាំបក្សកាន់អំណាចលោក ហ៊ុន សែន រារាំងមិនឱ្យចូលរួមបោះឆ្នោតដែរ ក្រោមលេសដ៏មិនសមហេតុសមផល ព្រមទាំងព្រមានបង្ក្រាបការតវ៉ានានាថែមទៀតផង។
ចាប់តាំងពីដើមឆ្នាំ២០២៣ មក ត្រូវគេមើលឃើញថា មេដឹកនាំបក្សកាន់អំណាចលោក ហ៊ុន សែន បានប្រើល្បិចនយោបាយគាបសង្កត់បក្សក្រៅរដ្ឋាភិបាលជាបន្តបន្ទាប់ ជាពិសេសគឺការគាបសង្កត់ទៅលើមន្ត្រីជាន់ខ្ពស់គណបក្សភ្លើងទៀនយ៉ាងខ្លាំង ក្នុងនោះលោក ថាច់ សេដ្ឋា ត្រូវចាប់ឃុំខ្លួនក្នុងពន្ធនាគារ លោក សុន ឆ័យ ត្រូវរងនូវបណ្តឹង និងរងនូវការរឹបអូសទ្រព្យសម្បត្តិថែមទៀត ដែលធ្វើឱ្យលទ្ធិប្រជាធិបតេយ្យនៅកម្ពុជាធ្លាក់ចុះយ៉ាងធ្ងន់ធ្ងរនៅមុនការបោះឆ្នោតជាតិឆ្នាំ២០២៣ នេះ។
ក្រៅពីរារាំងគណបក្សសង្គ្រោះជាតិ មេដឹកនាំបក្សប្រឆាំងទាំងលោក កឹម សុខា លោក សម រង្ស៊ី និងគណបក្សភ្លើងទៀនដែលមិនត្រូវបានអនុញ្ញាតឱ្យចូលរួមការបោះឆ្នោតជាតិនាខែកក្កដា ខាងមុខនេះ លោក ហ៊ុន សែន បានបោះពួយធ្វើវិសោធនកម្មច្បាប់បោះឆ្នោតមួយទៀតដើម្បីគាបសង្កត់មន្ត្រីបក្សក្រៅរដ្ឋាភិបាលឱ្យទៅបោះឆ្នោតផងដែរ ទាំងដែលខ្លួនរារាំងមិនឱ្យគណបក្សរបស់ពួកគេចូលរួមការបោះឆ្នោតផងនោះ។
ទាក់ទិននឹងបញ្ហានេះ ក្រុមអ្នកឃ្លាំមើលសង្គម និងនយោបាយលើកឡើងថា ដើម្បីលទ្ធិប្រជាធិបតេយ្យ មានតែអ្នកប្រជាធិបតេយ្យ ក្រុមបក្សប្រឆាំង អង្គការសង្គមស៊ីវិល សហជីព និងបណ្ឌិតបញ្ញវន្តខ្មែរដែលមាននិន្នាការប្រជាធិបតេយ្យសហការគ្នាចេញតវ៉ាបង្កើតជាបណ្តឹងសង្គមប្រឆាំងតវ៉ានឹងការដឹកនាំនៃរដ្ឋាភិបាលឯកបក្សរបស់លោក ហ៊ុន សែន ជាពិសេសប្រឆាំងនឹងការបោះឆ្នោតនាពេលខាងមុខនេះតែប៉ុណ្ណោះ ទើបអាចសង្ឃឹមថានឹងទទួលបានយុត្តិធម៌មកវិញ។
ប្រភពដដែលបញ្ជាក់ថា ការចេញតវ៉ានេះមិនមែនដើម្បីផ្តួលរំលំរដ្ឋាភិបាលកម្ពុជានោះទេ ហើយក៏មិនមែនប្រឆាំងនឹងការបោះឆ្នោតនោះដែរ ប៉ុន្តែជាការតវ៉ាដើម្បីទាមទារយុត្តិធម៌សង្គមទាំងមូល ហើយការធ្វើបែបនេះក៏ស្របទៅនឹងរដ្ឋធម្មនុញ្ញ និងស្មារតីនៃកិច្ចព្រមព្រៀងសន្តិភាពទីក្រុងប៉ារីសដែរ។
ជុំវិញបញ្ហានេះ អតីតមេដឹកនាំបក្សប្រឆាំងលោក សម រង្ស៊ី អំពាវនាវឱ្យពលរដ្ឋខ្មែរទាំងអស់ដែលមានឈ្មោះទៅបោះឆ្នោត ចូលរួមធ្វើយុទ្ធនាការគូសខ្វែងសន្លឹកឆ្នោតឱ្យបានគ្រប់ៗគ្នាមុននឹងយកទៅដាក់ក្នុងហិបឆ្នោត ព្រោះថាការធ្វើបែបនេះ គឺជាការឆ្លើយតបទៅនឹងលោក ហ៊ុន សែន ដែលកំពុងគាបសង្កត់សិទ្ធិពលរដ្ឋខ្មែរនៅទូទាំងប្រទេសនៅពេលនេះ៕