មេដឹកនាំខ្មែរដែលវៀតណាមលើកបន្តុប លោក ហ៊ុន សែន លើកឡើងថា ដោយសារតែនយោបាយសន្តិភាពរបស់កម្ពុជាស្របគ្នាទៅនឹងនយោបាយសន្តិភាពរបស់វៀតណាម បានធ្វើឲ្យមានកិច្ចសហប្រតិបត្តិការល្អផ្នែកពាណិជ្ជកម្មរវាងប្រទេសទាំងពីរ។
លោក ហ៊ុន សែន ដែលត្រូវបានកងទ័ពវៀតណាមលើកបន្តុបឱ្យធ្វើជានាយករដ្ឋមន្ត្រីរបស់កម្ពុជា បានលើកឡើងក្នុងពិធីជួបជាមួយកម្មករនៅតំបន់សេដ្ឋកិច្ចពិសេស មេនហាតធេន (MANHATTAN) ក្រុងបាវិត ខេត្តស្វាយរៀង កាលពីថ្ងៃទី២៥ ខែមិថុនា ឆ្នាំ២០២៣ នេះថា គោលនយោបាយរបស់រដ្ឋាភិបាលកម្ពុជា គឺព្យាយាមប្រែក្លាយតំបន់អតីតសមរភូមិឲ្យទៅជាតំបន់អភិវឌ្ឍន៍ និងមានទីផ្សារនៅគ្រប់ទីកន្លែង។
នាយករដ្ឋមន្ត្រីខ្មែរដែលនៅក្រោមបង្គាប់វៀតណាម លោក ហ៊ុន សែន អះអាងថា កម្ពុជាមិនត្រឹមតែធ្វើតំបន់ដែលជាអតីតសមរភូមិឲ្យទៅជាតំបន់អភិវឌ្ឍន៍ទេ គឺត្រូវកែប្រែតំបន់ព្រំដែនជាមួយប្រទេសជិតខាងទាំងអស់ ឲ្យទៅជាព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍថែមទៀត ដូច្នេះហើយទើបតំបន់ព្រំដែនកម្ពុជា-វៀតណាម ទទួលបាននូវជោគជ័យតាមរយៈចំនួនរោងចក្រ តំបន់ឧស្សាហកម្មកើនឡើងជាបន្តបន្ទាប់រហូតមក។
មេដឹកនាំបក្សកាន់អំណាចដែលមានវៀតណាមជាខ្នងបង្អែកលោក ហ៊ុន សែន បញ្ជាក់ថា នយោបាយធ្វើសង្គ្រាមជាមួយប្រទេសជិតខាងជាការញុះញង់បង្កឲ្យមានការរើសអើងដើម្បីសន្លឹកឆ្នោតតែប៉ុណ្ណោះ មិនមែនជាគោលនយោបាយដែលគួរឲ្យគាំទ្រនោះទេ ហើយនយោបាយជ្រុលនិយមបង្កអរិភាពបែបនេះ គឺជានយោបាយដ៏គ្រោះថ្នាក់បំផុតសម្រាប់កម្ពុជា។
មន្ត្រីជាន់ខ្ពស់អតីតគណបក្សសង្គ្រោះជាតិ លោក អ៊ុំ សំអាន លើកឡើងកាលពីថ្ងៃទី២៥ មិថុនា ថា ដីសម្បទានសេដ្ឋកិច្ចមួយចំនួនដែលរដ្ឋាភិបាលលោក ហ៊ុន សែន ចុះហត្ថលេខាឱ្យក្រុមហ៊ុនវៀតណាមគ្រប់គ្រងរយៈពេល ៩៩ឆ្នាំ ដែលស្ថិតនៅតាមបណ្តោយព្រំដែនបានបង្កគ្រោះថ្នាក់ដល់ព្រំដែនកម្ពុជា និងប្រទេសកម្ពុជាយ៉ាងធ្ងន់ធ្ងរទៅថ្ងៃអនាគត។
លោក អ៊ុំ សំអាន លើកឡើងថា ក្នុងប្រវត្តិសាស្ត្រខ្មែរ គឺវៀតណាមបានខ្ចីដីកម្ពុជាក្រោមពីស្តេចខ្មែរត្រឹមតែ ៥ឆ្នាំប៉ុណ្ណោះក្នុងរជ្ជកាលស្តេចជ័យជេដ្ឋាទី២ ដែលមានមហេសីជាជនជាតិវៀតណាម ប៉ុន្តែគេមិនបានសងទឹកដីកម្ពុជាក្រោមមកខ្មែរវិញទេ ចុះទម្រាំសព្វថ្ងៃ វៀតណាមខ្ចីដីខ្មែររហូតដល់ទៅ ៩៩ឆ្នាំ តើវៀតណាមនឹងព្រមប្រគល់ឱ្យខ្មែរវិញដែរឬទេនៅថ្ងៃមុខ?
អតីតតំណាងរាស្ត្ររបស់គណបក្សសង្គ្រោះជាតិរូបនេះបញ្ជាក់ថា ក្រុមហ៊ុនវៀតណាមជាច្រើនទទួលបានសិទ្ធិកាន់កាប់ដីខ្មែររយៈពេល ៩៩ឆ្នាំ ដូចជាក្រុមហ៊ុនចម្ការកៅស៊ូរ ជាដើម ដែលបានបើកផ្លូវឱ្យកម្មករវៀតណាមចូលទៅរស់នៅលើទឹកដីខ្មែរជាបន្តបន្ទាប់តាមរយៈក្រុមហ៊ុននោះ ដូច្នេះរយៈពេល ៩៩ឆ្នាំ ពួកគេនឹងបង្កើតបានជាកូនពូនជាចៅមិនតិចនោះទេ ហើយនៅទីបំផុត ជនជាតិវៀតណាមទាំងនោះក៏នឹងមិនត្រឡប់ទៅរស់នៅប្រទេសវៀតណាមវិញដែរ ពួកគេនឹងបន្តរស់នៅលើទឹកដីខ្មែរជារៀងរហូត។
ប្រទេសកម្ពុជាមានខេត្តចំនួន៩ ដែលមានព្រំដែនជាប់ជាមួយប្រទេសវៀតណាម ដូចជាខេត្តកណ្តាល ខេត្តតាកែវ ខេត្តព្រៃវែង ខេត្តស្វាយរៀង ខេត្តកំពង់ចាម ខេត្តក្រចេះ ខេត្តមណ្ឌលគិរី ខេត្តរតនគិរី និងខេត្តកំពត ហើយខេត្តទាំងនោះត្រូវគេមើលឃើញថាកំពុងបម្រើផលប្រយោជន៍សេដ្ឋកិច្ច និងពាណិជ្ជកម្មឱ្យប្រទេសវៀតណាមទាំងអស់ គ្រាន់តែតិច និងច្រើនប៉ុណ្ណោះ។
ជាក់ស្តែង ខេត្តក្រចេះ ខេត្តមណ្ឌលគិរី និងខេត្តរតនគិរី ត្រូវបានរដ្ឋាភិបាលកម្ពុជាដាក់ចូលទៅក្នុងតំបន់ត្រីកោណអភិវឌ្ឍន៍ជាមួយវៀតណាម តាំងពីឆ្នាំ១៩៩៩ មក ដែលខេត្តទាំងនេះបានបម្រើផលប្រយោជន៍ឱ្យវៀតណាមយ៉ាងខ្លាំងលើការដឹកជញ្ជូនឈើខុសច្បាប់ចេញពីកម្ពុជា ហើយដែលក្រុមហ៊ុនវៀតណាមបានប្រព្រឹត្តនៅក្នុងខេត្តទាំងនោះ មានដូចជាក្រុមហ៊ុន Think Biotich ក្រុមហ៊ុន ធី ង៉ាន និងក្រុមហ៊ុន សំអឿន សុវណ្ណ ជាដើម ដែលជាក្រុមហ៊ុនរកស៊ីឈើខុសច្បាប់នៅកម្ពុជាដឹកចេញទៅប្រទេសវៀតណាមអស់រយៈពេលរាប់សិបឆ្នាំមកហើយ។
អ្នកជំនាញភូមិសាស្ត្រនយោបាយ បណ្ឌិត ឌី ការ៉េត ធ្លាប់បានព្រមានកាលពីពេលថ្មីៗនេះថា តំបន់អភិវឌ្ឍន៍ត្រីកោណដែលមានខេត្តមណ្ឌលគិរី ខេត្តរតនគិរី ខេត្តស្ទឹងត្រែង និងខេត្តក្រចេះ ដែលបានដាក់បញ្ចូលជាមួយខេត្តឡាវ និងវៀតណាម គឺជាការរៀបចំរបស់វៀតណាមសុទ្ធសាធ ដើម្បីគ្រប់គ្រងខ្មែរជាជំហានៗដោយផ្តើមចេញពីតំបន់នេះទៅថ្ងៃអនាគត៕