27 C
Phnom Penh

ក្រុម​អ្នក​ច្បាប់៖ គម្រោង​ផ្ទះល្វែង​ឧកញ៉ា ឡេង ណាវ៉ាត្រា គឺជា​បទល្មើស​រំលោភ​លើ​ទំនុក​ចិត្ត ដោយសារ​មិន​គោរព​តាម​កិច្ចសន្យា​ទិញ​លក់

ដោយ ឌឹ ខេមបូឌា ដេលី

បទវិភាគ

អត្ថបទ​ដោយ៖ តាំង សារ៉ាដា

បុគ្គលិក​ក្នុង​ក្រុមហ៊ុន Galaxy Navatra មួយ​រូប​បាន​បង្ហើប​ឱ្យ​ដឹង​ថា ឧកញ៉ា ឡេង ណាវ៉ាត្រា បាន​ជួល​ក្រុម​ការងារ​របស់​ខ្លួន​ឱ្យ​ថត​សម្ដែង និង​ដើរ​តួ​ជា​អតិថិជន និយាយ​អួត និង​ជឿជាក់​អំពី​គម្រោង​ផ្ទះល្វែង​ខ្យល់​របស់​ខ្លួន ដើម្បី​បោកប្រាស់​អតិថិជន​ពិតប្រាកដ។

យុទ្ធនាការ​បោកប្រាស់​នេះ គឺ​ដើម្បី​ឱ្យ​អតិថិជន​ដទៃ​ទៀត​មើល​ឃើញ​អំពី​គម្រោង​របស់​លោក ឡេង ណាវ៉ាត្រា មាន​សកម្មភាព​អំពី​សកម្មភាព​សាងសង់​ផ្ទះ​ដែល​សម្រេច​រួច និង​ផ្ទះ​កំពុង​សាងសង់។

ក្រុម​អ្នក​ច្បាប់​ចាត់ទុក​ថា យុទ្ធនាការ​បោកប្រាស់​ជា​ប្រព័ន្ធ​នេះ ជា​បទល្មើស «រំលោភ​លើ​ទំនុកចិត្ត» បន្ទាប់ពី​អតិថិជន​ដែល​ជា​ម្ចាស់​ផ្ទះ​ដល់​កុងត្រា​ហើយ តែ​នៅ​មិនទាន់​ឃើញ​ផ្ទះ និង​ភ្នាក់ងារ​លក់​ផ្ទះ​របស់​ឧកញ៉ា​ជំនាន់​ថ្មី​នេះ​បាន​នាំគ្នា​ទាមទារ​ប្រាក់​កម្រៃ​ជើងសា​របស់​ពួកគេ​នៅ​លើ​បណ្ដាញ​សង្គម​ហ្វេសប៊ុក​កន្លងមក។

បុគ្គលិក​ផ្ទាល់​របស់​លោក ឡេង ណាវ៉ាត្រា បាន​លាតត្រដាង​អំពី​គម្រោង​មួយ​ចំនួន​របស់​ក្រុមហ៊ុន Galaxy Navatra ដែល​កំពុង​បង្កើត​ឡើង​ថ្មីៗ​ដើម្បី​គ្រាន់តែ​បន្លំ និង​គ្រាន់តែ​ជា​រូបភាព​ទាក់ទាញ​ឱ្យ​មហាជន​ទូទៅ​ជឿ​ទុកចិត្ត​ថា អ្នកឧកញ៉ា​រូប​នេះ​កំពុង​ធ្វើ​ជំនួញ​ខាង​ផ្នែក​អចលនទ្រព្យ​ដ៏​ត្រឹមត្រូវ​ពិតប្រាកដ ប៉ុន្តែ​ធាតុ​ពិត ក្រុមហ៊ុន ហ្គាឡាក់ស៊ី ណាវ៉ាត្រា កំពុងតែ​ធ្វើ​ដំណើរ​ឆ្ពោះ​ទៅ​រក​ភាព​ក្ស័យ​ធន​ហើយ​នៅ​ពេលនេះ។

បុគ្គលិក​រូប​នោះ​បាន​ឱ្យ​ដឹង​ថា លោក ឡេង ណាវ៉ាត្រា កំពុង​ជួប​វិបត្តិ​ហិរញ្ញវត្ថុ​ធ្ងន់ធ្ងរ ដោយសារ​ក្រុមហ៊ុន​របស់​លោក​ដែល​មាន​អ្នក​មាន​អំណាច​កាង​ពីក្រោយ មិន​បាន​ទម្លាក់​លុយ​ឱ្យ​រកស៊ី​បន្ត​ទៀត បន្ទាប់ពី​មាន​រឿង​អាស្រូវ​ជា​បន្តបន្ទាប់​ត្រូវ​បាន​លាតត្រដាង​តាម​បណ្ដាញ​សង្គម។

បុគ្គលិក​របស់​លោក ឡេង ណាវ៉ាត្រា ខ្លះ​បាន​ទម្លាយ​ប្រាប់ The Cambodia Daily ថា បន្ទាប់ពី​អតិថិជន​ដែល​ជា​ម្ចាស់​ផ្ទះ​ដល់​កុងត្រា​ហើយ តែ​នៅ​មិនទាន់​ឃើញ​ផ្ទះ និង​ភ្នាក់ងារ​លក់​ផ្ទះ​របស់​ឧកញ៉ា​រូប​នេះ​បាន​នាំគ្នា​ទាមទារ​នៅ​លើ​បណ្ដាញ​សង្គម​ហ្វេសប៊ុក​ជា​បន្តបន្ទាប់​នោះ ជា​ហេតុ​នាំ​ឱ្យ​លោក ឡេង ណាវ៉ាត្រា ជួល​ក្រុម​ការងារ​សំណង់​ប្រចាំ​ក្រុមហ៊ុន​របស់​ខ្លួន​ថត​ជា​វីដេអូ និយាយ​ដូចៗ​គ្នា​អំពី​ដំណើរការ​គម្រោង​សាងសង់​ផ្ទះ​របស់​ក្រុមហ៊ុន​ខ្លួន។

ជាង​នេះ​ទៅ​ទៀត លោក ឡេង ណាវ៉ាត្រា ក៏​បាន​ជួល​ក្រុម​ការងារ​របស់​លោក​ឱ្យ​ថត​សម្ដែង​ជា​អតិថិជន និយាយ​អួត និង​សម្ដែង​ជា​អតិថិជន​មក​ទទួល​ប្លង់​កម្មសិទ្ធិ​ផ្ទះ​ថែម​ទៀត ជាពិសេស​គម្រោង​ផ្លូវជាតិ​លេខ 6A ក្នុង​ស្រុក​មុខកំពូល ខេត្ត​កណ្តាល និង​គម្រោង​នៅ​ខេត្ត​បាត់ដំបង។

អ្នកឧកញ៉ា ឡេង ណាវ៉ាត្រា

បុគ្គលិក​ដដែល​បាន​ឱ្យ​ដឹង​ទៀត​ថា លោក ឡេង ណាវ៉ាត្រា បាន​ឱ្យ​ក្រុម​ការងារ​របស់​លោក​ជួល​ឡាន​ដឹក​ដី និង​គ្រឿងចក្រ​បើក​ចេញ​ចូល​ក្នុង​ដី​គម្រោង​ទាំងនោះ សម្ដែង​ឆ្ពិន​ភ្នែក​អតិថិជន ដើម្បី​ឱ្យ​មាន​ការ​មើល​ឃើញ​ថា គម្រោង​របស់​លោក​នៅ​មាន​សកម្មភាព​ដដែល។

បុគ្គលិក​ផ្ទាល់​របស់​លោក ឡេង ណាវ៉ាត្រា រូប​នោះ​បាន​ឱ្យ​ដឹង​ទៀត​ថា ក្រុមហ៊ុន​មួយ​នេះ​ហាក់បីដូចជា​ត្រូវ​ទំនាយ​នៃ​បារមី​ទឹកដី​ភ្នំ​តាម៉ៅ ឬ​ក៏​ព្រោះតែ​ជា​ទង្វើ​អកុសល​អស់​បុណ្យ​ដោយសារតែ​លោក​ក្បត់​មនសិការ​របស់​ខ្លួន ចូល​ខ្លួន​ស៊ីឈ្នួល​ឱ្យ​អ្នក​មាន​អំណាច​ដើម្បី​បង្កើត​បណ្ដាញ​បោកប្រាស់​តាមរយៈ​គម្រោង​លក់​ផ្ទះល្វែង​ខ្យល់ ជា​ថ្នូរ​ទទួល​បាន​នូវ​លាភសក្ការៈ អំណាច ភាព​ឡូយឆាយ និង​ភាព​អស្ចារ្យ។

ប្រភព​ដដែល​អះអាង​ថា ចាប់​តាំងតែ​ពី​លោក​ដក​ខ្លួន​ពី​សកម្មជន​របស់​បក្ស​ប្រឆាំង​រួច​មក លោក ឡេង ភត្រា ហៅ ឡេង ណាវ៉ាត្រា ត្រូវ​បាន​គ្រួសារ​ត្រកូល​ហ៊ុន​កាង​ពីក្រោយ ឬ​ធ្វើ​ជា​យ័ន្ត​សក្ដិសិទ្ធិ​មួយ​ក្នុង​ការ​ផ្តល់​អំណាច​ដល់​ឧកញ៉ា​រូប​នេះ​កើប​លុយ​ពី​អតិថិជន។

បន្ទាប់ពី​ប្រមូល​លុយ​ឱ្យ​អ្នក​មាន​អំណាច​ដែល​កាង​ពីក្រោយ​រួច​ហើយ ឧកញ៉ា​រូប​នេះ​ក៏​បាន​អស់​លុយ​យក​ទៅ​អភិវឌ្ឍ​គម្រោង ហើយ​ក៏​មិន​ហ៊ាន​លើក​ដៃ​សុំ​ពី​មេ​របស់​គាត់​វិញ​ដែរ។

ស្ថិត​នៅ​លើ​វិថី​ទាល់ច្រក​ក្នុង​ការ​ដោះស្រាយ​ជាមួយ​អតិថិជន​ដែល​បាន​ទិញ​ផ្ទះ​យូរ​ណាស់​មក​ហើយ ហើយ​មិន​មាន​ផ្ទះ​នៅ​ទាំងនោះ គឺ​ឧកញ៉ា​រូប​នេះ​មាន​តែ​លើក​ម្រាមដៃ​ដប់​សុំ​អង្វរ​ដល់​អតិថិជន​ឱ្យ​យល់យោគ​ដល់​រូបលោក កុំ​សូវ​នាំគ្នា​ទាមទារ​ផ្ទះ​នៅ​ពេលនេះ​អី និយាយ​ជា​រួម គឺ​រក​លេស​ដោះស្រាយ​ឱ្យ​រួច​មួយ​គ្រាៗ​សិន។

បុគ្គលិក​របស់​លោក ឡេង ណាវ៉ាត្រា រូប​នេះ​អះអាង​ថា មុខរបរ​លក់​ផ្ទះល្វែង​របស់​លោក ឡេង ណាវ៉ាត្រា កំពុង​ធ្វើ​ដំណើរ​ឆ្ពោះ​ទៅ​រក​ភាព​ក្ស័យ​ធន​ហើយ ស្រប​ពេល​ដែល​អ្នកឧកញ៉ា​រូប​នេះ​កំពុង​លក់​ទ្រព្យ​របស់​ខ្លួន​ដើម្បី​ដោះ​ទាល់ និង​ដោះស្រាយ​ជីវភាព​ប្រចាំ​ខែ ព្រោះ​បច្ចុប្បន្ន ក្រុមហ៊ុន ហ្គាឡាក់ស៊ី ណាវ៉ាត្រា កំពុង​ជួប​វិបត្តិ​ហិរញ្ញវត្ថុ​យ៉ាង​ធ្ងន់ធ្ងរ​បំផុត​ដែល​មិន​អាច​ដោះស្រាយ​បាន​ឡើយ។

អ្នកឧកញ៉ា ឡេង ណាវ៉ាត្រា និង​ភរិយា គឺ​លោកជំទាវ ឈឺន ស្រីម៉ាច។

លោក ឡេង ណាវ៉ាត្រា ចាប់ផ្ដើម​លេច​មុខ​មាត់​ខ្លាំង​ក្រោយ​លោក​ទទួល​បាន​ងារ​ជា​ឧកញ៉ា​នៅ​ឆ្នាំ​២០១៨ និង​ជា​អ្នកឧកញ៉ា​នៅ​ឆ្នាំ​២០២១។ លោក​មាន​រថយន្ត​ម៉ាក​ល្បីៗ​ប្រមាណ ១០​គ្រឿង ដូចជា៖

  • រ៉ូលរ៉យស៍ (Roll Royce)
  • ឡាំបូហ្គីនី (Lamborghini)
  • ហ្វើរ៉ារី (Ferrari)
  • ផច្ឆ (Porsche)
  • ​ប៊ែនលី (Bentley)
  • ព្រមទាំង​ឧទ្ធម្ភាគចក្រ​ផ្ទាល់ខ្លួន​មួយ​គ្រឿង​ទៀត និង​មាន​ផ្ទះ​កម្សាន្ត Penthouse ដែល​សរុប​ជា​ទឹកប្រាក់​មាន​តម្លៃ​រាប់​សិប​លាន​ដុល្លារ។

ប៉ុន្តែ​ក្នុង​រយៈពេល​ចុងក្រោយ​នេះ គេ​ឃើញ​លោក ឡេង ណាវ៉ាត្រា ជិះ​តែ​រថយន្ត​ម៉ាក ឡិចស៊ីស (Luxus) ៥៧០ មួយ​គ្រឿង​ប៉ុណ្ណោះ ស្រប​ពេល​ដែល​ក្រុម​គ្រួសារ​របស់​លោក​មួយ​ចំនួន​ក៏​បាន​នាំគ្នា​លក់​ទ្រព្យ​ដែល​មាន​តម្លៃ​ថ្លៃៗ​របស់​ខ្លួន​ច្រើន ដើម្បី​ដោះ​ទាល់​ជា​ជីវភាព​ប្រចាំ​ថ្ងៃ​ដូចៗ​គ្នា​ដែរ។

រថយន្ត​ខ្លះៗ​របស់​អ្នកឧកញ៉ា ឡេង ណាវ៉ាត្រា។

បុគ្គលិក​របស់​លោក ឡេង ណាវ៉ាត្រា បាន​ឱ្យ​ដឹង​ថា អ្នកឧកញ៉ា​រកស៊ី​ជំនាន់​ថ្មី​សម្ដី​ហួស​មាឌ ដែល​តែងតែ​បង្ក​វិវាទ​ជាមួយ​គេ​ឯង​រូប​នេះ ធ្លាប់​រកស៊ី​លក់​ផ្ទះល្វែង និង​ដី​ឡូត៍​ចំណេញ​កប់​ក្តោង​កើនឡើង​ខ្ពស់​ដូច​កាំជ្រួច​ផ្ទុះ​ហោះ​ឡើង​លើ​អាកាស​អ៊ីចឹង​ដែរ ប៉ុន្តែ​បច្ចុប្បន្ន កាំជ្រួច​នោះ​ហាក់ដូចជា​កំពុង​ដាំ​ក្បាល​ធ្លាក់​ចុះ​ធ្លាក់​មក​ក្រោម​យ៉ាង​លឿន ដែល​មិន​មាន​អ្វី​អាច​ទប់ស្កាត់​បាន​ឡើយ។ ហើយ​រាល់​ថ្ងៃ លោក ឡេង ណាវ៉ាត្រា កំពុង​ប្រើ​កាយវិការ​ដ៏​ទន់ភ្លន់ រញីរញ័រ សម្ដី​កន្ត្រាក់ៗ​ដូច​គ្មាន​ព្រលឹង​ក្នុង​ខ្លួន​លួងលោម​ក្រាប​សំពះ​អតិថិជន​ដែល​សួរនាំ​រឿង​ផ្ទះ​របស់​ពួកគេ ដើម្បី​បន្លប់ និង​ដើម្បី​យកចិត្ត​អតិថិជន​កុំ​ឱ្យ​នាំគ្នា​តវ៉ា។

បុគ្គលិក​ជា​ស្ត្រី​របស់​លោក ឡេង ណាវ៉ាត្រា មួយ​រូប​បាន​ប្រាប់ The Cambodia Daily ថា ប្រសិនបើ​អ្នកឧកញ៉ា​រូប​នេះ​គោរព​តាម​កិច្ចសន្យា និង​រកស៊ី​ដោយ​ទៀងត្រង់​សុចរិត​មែន នោះ​គាត់​នឹង​ដាក់​ពាក្យបណ្ដឹង​ទៅ​លើ​អតិថិជន​ដែល​បង្ហោះ​សារ​ទាមទារ​ផ្ទះ​នៅ​តាម​ហ្វេសប៊ុក​ទាំងនោះ​បាត់​ទៅ​ហើយ មិនមែន​លោក ឡេង ណាវ៉ាត្រា មិន​ប្តឹង​បញ្ហា​វិវាទ​ក្នុង​អាជីវកម្ម​របស់​លោក​ទៅ​តុលាការ ហើយ​បែរ​ជា​ចំណាយ​ពេល​បកស្រាយ​តាម​ហ្វេសប៊ុក​រាប់​សិប​វីដេអូ​ដូច​ដែល​បាន​ធ្វើ​កន្លងមក​នោះ​ទេ។

ប្រភព​ដដែល​ឱ្យ​ដឹង​ទៀត​ថា ទាក់ទង​នឹង​កម្រៃ​ជើងសា និង​បំណុល​សំណង់ បើ​ទោះជា​មាន​ការ​ត្អូញត្អែរ​ដ៏​គួរ​ឱ្យ​សង្វេគ​ពី​សំណាក់​បុគ្គលិក​ទីផ្សារ និង​កម្មករ​យ៉ាងណា​ក្ដី ក៏​អ្នកឧកញ៉ា​ជំនាន់​ថ្មី​រូប​នេះ​នៅតែ​មិន​អើពើ ហើយ​ថែមទាំង​គំរាម​រក​មុខ​បុគ្គលិក​ណា​មួយ​ដែល​ហ៊ាន​ផុស​តាម​បណ្ដាញ​សង្គម​បរិហារ​អំពី​រូបលោក​ទៀត​ផង។

អ្នកឧកញ៉ា ឡេង ណាវ៉ាត្រា

មាន​សំណួរ​ច្រើន​ណាស់​ពី​អតិថិជន និង​បុគ្គលិក​របស់​លោក ឡេង ណាវ៉ាត្រា ចោទ​ជា​សំណួរ​សួរ​ថា៖ តើ​អ្នកឧកញ៉ា​រូប​នេះ​យក​លុយ​ទៅ​ទុក​នៅ​ឯណា ស្រប​ពេល​ដែល​អតិថិជន​បាន​បង់​ប្រាក់​ទៅ​ឱ្យ​ក្រុមហ៊ុន Galaxy អស់​ទៅ​ហើយ​នោះ?

ក្រោយពី​អត្ថបទ​ស៊ើបអង្កេត​ទី​បី​របស់​សារព័ត៌មាន ឌឹ ខេមបូឌា ដេលី បាន​ចុះផ្សាយ​រួច​មក អតិថិជន​បាន​នាំគ្នា​ធ្វើការ​តវ៉ា​នៅ​លើ​បណ្ដាញ​ហ្វេសប៊ុក​យ៉ាង​ទូលំទូលាយ ដែល​អតិថិជន​ទាំងនោះ​មាន​ទាំង​អ្នក​សារព័ត៌មាន ពលករ​ធ្វើការ​នៅ​ក្រៅ​ប្រទេស និង​អ្នកជំនួញ ជាដើម។

ជាក់ស្តែង​ម្ចាស់​គណនី​ហ្វេសប៊ុក​ឈ្មោះ Du Ku បាន​សរសេរ​បង្ហោះ​សារ​ថា «សូម​បង​ឧកញ៉ា​ជួយ​មើល​ផ្ទះ​ផ្លូវ 6A ផង បង់​លុយ​ដាច់​អស់​ហើយ (បង់​ផ្ដាច់) យូរ​ឆ្នាំ​ហើយ​មិន​ដឹង​ផ្ទះ​នៅ​ណា កុំ​វិនិយោគ​លើ​ទឹកភ្នែក​រាស្ត្រ លុយ​ជិត ២​ម៉ឺន​ដុល្លារ វា​ច្រើន​ណាស់​សម្រាប់​អ្នក​ក្រ​ខ្សត់ ខ្ចី​គេ​ផង ត្រូវ​បង់​ទាំង​ការ ទាំង​ដើម​ឱ្យ​គេ​ផង តែ​ពុំ​មាន​ដំណោះស្រាយ​ល្អ​ណា​មួយ​សោះ​មក​អតិថិជន។»

គណនី​ហ្វេសប៊ុក​ដដែល​សរសេរ​ថា «ពេល​ខ្លះ​ឃើញ​បង​ថត​បង្ហោះ​រូបភាព​ហូប​បាយ​កម្សត់ៗ​នៅ​ការដ្ឋាន។ ចង់​និយាយ​ថា គ្រឺត​លោក​ឧកញ៉ា​ណាស់។ ចង់​សួរ​ថា តើ​យក​លុយ​របស់​ខ្ញុំ​យក​ទៅ​ទុក​នៅ​ឯណា? ផ្ទះ​ខ្ញុំ​នៅ​ណា? មក​ទល់​នឹង​ពេលនេះ ដី​នៅតែ​ជា​ដី​ដដែល​ហ្នឹង។»

ប្រភព​ដដែល​បាន​សរសេរ​ថា «បងប្អូន​ខ្លះ​ត្មះ​តិះដៀល​គំនិត​របស់​ខ្ញុំ​ថា មាន​លុយ​ហើយ​ហេតុ​អី​ទៅ​ទិញ​គម្រោង​របស់​អ្នកឧកញ៉ា។ ហឺ​ស្ដាយ​លុយ និង​ស្ដាយ​ពេលវេលា​ណាស់។ ម្ចាស់​បុរី អាង​អី​មើល​កុងត្រា។ ប៉ុន្តែ​កាលណា​ទិញ​ផ្ទះ គឺ​ចង់​បាន​ដី ចង់​បាន​ផ្ទះ និង​ចង់​បាន​ប្លង់ មិនមែន​ឱ្យ​លុយ​អស់​ហើយ ឃើញ​តែ​ដី​នោះ​ទេ។»

អ្នកឧកញ៉ា ឡេង ណាវ៉ាត្រា

ចំណែកឯ​ម្ចាស់​ហ្វេសប៊ុក​ឈ្មោះ Chity Pynara បាន​សរសេរ​ចូល​ទៅ​ក្នុង​គណនី​ហ្វេសប៊ុក​របស់​លោក ឡេង ណាវ៉ាត្រា ថា «ផ្ទះ​ដែល​បាន​ទិញ​នៅ​គម្រោង​ផ្លូវ​៦A សូម​លោក​ឧកញ៉ា​ជួយ​មើល​ផ្ទះ​របស់​ខ្ញុំ​ផង។ ក្នុង​នាម​ជា​អតិថិជន​ម្នាក់ ពិត​ជា​ភ័យ​ខ្លាំង​ណាស់ ថា​លុយ​ដែល​បង់​ទៅ​បុរី​បាត់​ទៅ​ណា​ហើយ ព្រោះ​កិច្ចសន្យា​កុងត្រា​បាន​ផុត​កំណត់​ហើយ តែ​ផ្ទះ​មិន​ដឹង​នៅ​ទីណា ហើយ​បុគ្គលិក​របស់​លោក​ឧកញ៉ា​ក៏​ពូកែ​ដោះសា​មក​កាន់​អតិថិជន​ថែម​ទៀត។»

រីឯ​ម្ចាស់​ហ្វេសប៊ុក​ឈ្មោះ Mrr Dola បាន​សរសេរ​ថា «ខ្ញុំ​បាន​ទិញ​ផ្ទះ​នៅ​ផ្លូវ​លេខ​៦A យូរ​ហើយ បង់​ទាំង​ដុល ៤​ម៉ឺន​ដុល្លារ​ថែម​ទៀត។ អស់​រយៈពេល​ពីរ​ឆ្នាំ​ហើយ វា​មិន​ដែល​ម៉ែ​អាណា​ផ្ទះ​វីឡា​តូច​មួយ​ធ្វើ​ពីរ​ឆ្នាំ​ធ្វើ​មិន​ហើយ។ សូម្បីតែ​ដី​ខ្លួនឯង​មិន​ដឹង​ថា​បែរ​មុខ​ទៅ​ទីណា​ផង ទៅ​មើល ៤​ដង ឃើញ​ដែរ​ដី​ទទេ គ្មាន​អ្វី​សាងសង់​សោះ។ ម៉ែ​ប្រាប់​ថា​កុំ​ឱ្យ​ទិញ ឥឡូវ​ជាប់​អន្ទាក់​មែន តាម​ពិត​គេ​យក​លុយ​ទៅ​បង្វិល​រកស៊ី​អី​ផ្សេង ស្រឡាញ់​ខ្មែរ​តែ​ឯង​ស្អី បោក​លុយ​គេ​សោះ​ហ្នឹង។»

ទោះជា​យ៉ាងណា​ក៏ដោយ វីដេអូ​របស់​លោក ឡេង ណាវ៉ាត្រា និង​វីដេអូ​ដែល​លោក​រៀបចំ​ឱ្យ​អ្នក​ផ្សេង​និយាយ គឺ​មិន​បាន​បកស្រាយ​លើ​បញ្ហា​ដែល​អតិថិជន​របស់​លោក​ចោទ​សួរ​នោះ​ទេ ប៉ុន្តែ​វីដេអូ​នោះ​តែងតែ​ចោទប្រកាន់ ឬ​វាយបក​វិញ​ថា អ្នក​រិះគន់​ទាំងនោះ​ជា​ក្រុម​ប្រឆាំង ឬ​ជា​ក្រុម​អគតិ​នៅ​ក្រៅ​ប្រទេស​ទៅវិញ។

លោក ឡេង ណាវ៉ាត្រា បាន​ព្រមាន​ថា សូម​អតិថិជន​បើក​កុងត្រា​មើល ពេល​ដែល​ក្រុមហ៊ុន​មាន​ការ​យឺតយ៉ាវ គឺ​មាន​ការ​សង​ត្រឡប់​ទៅ​វិញ ហើយ​ការ​ទិញ​លក់​មាន​កិច្ចសន្យា​ត្រឹមត្រូវ និង​មាន​ការ​ផ្ដិត​មេដៃ​ជាមួយ​អតិថិជន និង​ជាមួយ​រូបលោក​ថែម​ទៀត។

ចំណែក​លោក ព្រាប សុវត្ថិ ដែល​ជា​តារា​ចម្រៀង​ប្រុស​លំដាប់​កំពូល​ល្បីល្បាញ​ខាង​ច្រៀង​ចម្រៀង​បែប​សម័យ ហើយ​ដែល​ចម្រៀង​របស់​លោក​ភាគច្រើន​ចម្លង​ពី​ថៃ និង​ពី​ចិន អស់​រយៈពេល​ជាង​ពីរ​ទសវត្សរ៍​ចាប់តាំងពី​លោក​បាន​ចូលរួម​ប្រឡូក​ក្នុង​វិស័យ​សិល្បៈ​ដំបូង​កាលពី​ឆ្នាំ​១៩៩២ ជាមួយ​ផលិតកម្ម ហង្សមាស ហើយ​ពេល​ថ្មីៗ​នេះ​លោក​បាន​មក​ចូលរួម​ជីវភាព​ជា​តារា​ចម្រៀង​ប្រចាំ​ផលិតកម្ម Galaxy Navatra បទ​ចម្រៀង​របស់​លោក​មិន​សូវ​មាន​ភាព​ល្បីល្បាញ​ដូច​កាលពី​ពេល​ដែល​លោក​នៅ​ច្រៀង​ឱ្យ​ផលិតកម្ម ហង្សមាស នោះ​ទេ។

លោក​បាន​ក្លាយ​ខ្លួន​ជា​ឧកញ៉ា​កាលពី​ខែ​មេសា ឆ្នាំ​២០២២។ ឧកញ៉ា​រូប​នេះ​ក៏​បាន​ចេញ​មុខ​ប្រតិកម្ម​ការពារ​ថៅកែ​របស់​គេ​ផង​ដែរ ដោយ​ចេញ​វីដេអូ​ឃ្លីប​នៅ​លើ​ហ្វេសប៊ុក​របស់​លោក​ថា លោក​ឧកញ៉ា ឡេង ណាវ៉ាត្រា កំពុង​រងគ្រោះ​ដោយសារ​ក្រុម​ប្រឆាំង​រិះគន់ ឬ​វាយប្រហារ​ញុះញង់​អតិថិជន។

លោក ព្រាប សុវត្ថិ បាន​លើកឡើង​ថា អ្នកឧកញ៉ា ឡេង ណាវ៉ាត្រា ធ្លាប់​បាន​ជួយ​សង្គម​ច្រើន​តាំងពី​ទឹកជំនន់ មន្ទីរពេទ្យ​គន្ធបុប្ផា កូវីដ និង​តាម​ព្រឹត្តិការណ៍​ផ្សេងៗ​ទៀត ហើយ​ថា​ការ​តស៊ូ​មក​ទល់​ពេលនេះ មិនមែន​ជា​រឿង​ងាយស្រួល​នោះ​ទេ ទម្រាំ​តែ​បាន​ជោគជ័យ​បែប​នេះ។ ហើយ​ភាព​ជោគជ័យ​នេះ គឺ​បាន​មកពី​ការ​ខំ​ប្រឹងប្រែង​ប្រកប​ដោយ​សីលធម៌ សុជីវធម៌ និង​ភាព​ទទួល​ខុសត្រូវ​គ្រប់​បែប​យ៉ាង។

តារា​ចម្រៀង​លោក ព្រាប សុវត្ថិ

មុន​ក្លាយ​ខ្លួន​ជា​ឧកញ៉ា បុរស​វ័យ ៤៧​ឆ្នាំ​រូប​នេះ​មាន​ការងារ និង​មុខជំនួញ​ជាច្រើន​នៅ​ក្នុង​ដៃ ដូចជា៖

  • ជា​តារា​ចម្រៀង​ប្រចាំ​ផលិតកម្ម Galaxy Navatra
  • ជា​ម្ចាស់ Brand សាប៊ូ​កក់សក់ ព្រាប សុវត្ថិ
  • ហាង​កាត់​សក់ ព្រាប សុវត្ថិ
  • ផ្ទះ ព្រាប សុវត្ថិ ដែល​លក់​បាយ​ម្ហូប បុកល្ហុង និង​នំ​បញ្ចុក
  • គម្រោង​ដី​ឡូត៍ ព្រាប សុវត្ថិ
  • បុរី ព្រាប សុវត្ថិ
  • អ្នក​តំណាង​ផលិតផល​ទូរសព្ទ​ដៃ Vivo
  • ទូត​សុឆន្ទៈ​របស់​ក្រុមហ៊ុន​រថយន្ត Isuzu
  • ទូត​សុឆន្ទៈ​ធនាគារ DGB
  • និង​ជា​ទូត​សុឆន្ទៈ​របស់​គម្រោង​ខុនដូ និង​លំនៅឋាន​ប្រណិត Morgan Enmaison រួម​ទាំង​ការងារ​ជាមួយ​ក្រុមហ៊ុន​ផ្សេងៗ​ជាច្រើន​ទៀត។

ក្រៅពី​ការងារ និង​មុខជំនួញ​ទាំងនេះ ឧកញ៉ា ព្រាប សុវត្ថិ ក៏​មាន​ក្របខ័ណ្ឌ​នៅ​ក្នុង​ក្រសួង​ការពារ​ជាតិ​ផង​ដែរ ដោយ​បច្ចុប្បន្ន​លោក​មាន​ឋានន្តរស័ក្តិ​ជា​វរសេនីយ៍ឯក និង​មាន​តួនាទី​ជា​នាយរង​ការិយាល័យ​ទី​៥ នៃ​កងទ័ព​ជើងគោក។

ក្រៅពី​ខ្លួន​មាន​តួនាទី​ក្នុង​ក្រសួង​ការពារ​ជាតិ​នោះ កូនប្រុស​ទាំង​បី​របស់​តារា​ចម្រៀង​រូប​នេះ​ក៏​ជា​ទាហាន​ក្នុង​ជួរ​ទ័ព​ផង​ដែរ៖

  • សុវត្ថិ មុនីនាគ មាន​ឋានន្តរសក្តិ​ជា​ពលទោ មាន​តួនាទី​ជា​ជំនួយការ​ផ្នែក​ចម្រៀង​សម័យ​សម្រាប់​យោធា​ភិរម្យ​ការិយាល័យ​ទី​៥។
  • សុវត្ថិ មុនីវណ្ណ មាន​ឋានន្តរសក្តិ​ជា​ព្រឹន្ទបាលឯក មាន​តួនាទី​ជា​ជំនួយការ​ការិយាល័យ​ទី​៥ នៃ​កងទ័ព​ជើងគោក។
  • ពលទោ សុវត្ថិ សិរីវុឌ្ឍ មាន​តួនាទី​ជា​ជំនួយការ​ផ្នែក​ចម្រៀង​សម័យ​យោធា​ភិរម្យ​នៃ​ការិយាល័យ​ទី​៥ ផង​ដែរ។

មិន​ខុស​គ្នា​ពី​លោក ព្រាប សុវត្ថិ តារា​ប្រុស​ស្រី​ប្រចាំ​ផលិតកម្ម Galaxy Navatra ដូចជា​លោក​ឧកញ៉ា ខេមរៈ សេរីមន្ត ដែល​មាន​ឈ្មោះ​ដើម​ថា ខែម ប៊ុនថៃ ធ្លាប់​ឧបត្ថម្ភ​ដល់​រដ្ឋាភិបាល​កាលពី​ចុង​ឆ្នាំ​២០២១ កន្លងមក​ចំនួន ២​លាន​ដុល្លារ​សម្រាប់​ការ​កសាង​ផ្លូវ និង​ប្រឡាយ​ទឹក​នៅ​ស្រុក​ម៉ាឡៃ ខេត្ត​បន្ទាយមានជ័យ ក្នុង​តំបន់​រកស៊ី​លក់​ផ្ទះ និង​ដី​ឡូត៍​របស់​ខ្លួន ក៏​បាន​ចេញ​វីដេអូ​ឡាយ​ដោយ​ព្យាយាម​និយាយ​សម្ដែង​ធ្វើ​ជា​យំ ដើម្បី​ការពារ​មេ​របស់​ខ្លួន ដែល​លើកឡើង​ប្រហាក់ប្រហែល​គ្នា​ដោយ​បញ្ជាក់​ថា លោក ឡេង ណាវ៉ាត្រា កំពុង​រងគ្រោះ​ដោយសារ​ក្រុម​ប្រឆាំង​រិះគន់ ឬ​វាយប្រហារ​ញុះញង់​អតិថិជន។

ឧកញ៉ា ខេមរៈ សិរីមន្ត អ្នកឧកញ៉ា ឡេង ណាវ៉ាត្រា និង​ឧកញ៉ា ព្រាប សុវត្ថិ។
អ្នកឧកញ៉ា ឡេង ណាវ៉ាត្រា ពេល​ចុះ​ចែក​អំណោយ​ជាមួយ​លោក​នាយករដ្ឋមន្ត្រី ហ៊ុន សែន នៅ​ខេត្ត​បន្ទាយមានជ័យ កាលពី​ថ្ងៃទី​២១ ខែ​តុលា ឆ្នាំ​២០២២។

អ្នកឧកញ៉ា ឡេង ណាវ៉ាត្រា ដែល​តែងតែ​ផ្តល់​ជំនួយ​មនុស្សធម៌​រាប់​លាន​ដុល្លារ​ជួយ​ដល់​រដ្ឋាភិបាល​កម្ពុជា តាម​ការ​អំពាវនាវ​របស់​លោក ហ៊ុន សែន ម្តងៗ មិន​បាន​ឆ្លើយតប​ទៅ​នឹង​ការ​ទាមទារ​របស់​អតិថិជន​ទេ ប៉ុន្តែ​បែរ​ជា​បន្ត​វាយប្រហារ​តាម​បណ្ដាញ​ទំនាក់ទំនង​សង្គម ដោយ​បាន​ផ្សព្វផ្សាយ​វីដេអូ​ជាច្រើន​ឃ្លីប​ជា​រៀង​រាល់​ថ្ងៃ​បង្ហាញ​ពី​ផ្ទះ​ដែល​សាងសង់​ហើយ និង​ផ្ទះ​កំពុង​សាងសង់ ហើយ​ដែល​ក្រុម​អ្នក​ច្បាប់​បាន​អះអាង​ថា​ជា​ទង្វើ​រំលោភ​លើ​ទំនុកចិត្ត។

ទាក់ទង​ទៅ​នឹង​បញ្ហា​នេះ មេធាវី​ម្នាក់​ដែល​ថ្លែង​ស្នើសុំ​មិន​បញ្ចេញ​ឈ្មោះ​បាន​ឱ្យ​ដឹង​ថា ទង្វើ​របស់​លោក ឡេង ណាវ៉ាត្រា គឺជា​អំពើ​ល្មើស​ពី​បទ “រំលោភ​លើ​ទំនុកចិត្ត”។ បទល្មើស​នេះ​ត្រូវ​បាន​បញ្ញត្តិ​ក្នុង​ក្រមព្រហ្មទណ្ឌ​នៃ​ព្រះរាជាណាចក្រ​កម្ពុជា​ឆ្នាំ​២០០៩ ចាប់ពី​មាត្រា​៣៩១ ដល់​មាត្រា​៣៩៦។

លោក​ថា ក្នុង​មាត្រា​៣៩១ បាន​ចែង​ការ​រំលោភ​លើ​ទំនុកចិត្ត។ អំពើ​រំលោភ​លើ​ទំនុកចិត្ត គឺជា​អំពើ​គៃ​បំបាត់​មូលនិធិ តម្លៃ ឬ​ទ្រព្យសម្បត្តិ​អ្វី​មួយ នាំ​ឱ្យ​ខូច​ប្រយោជន៍​អ្នក​ដទៃ ប្រព្រឹត្ត​ដោយ​បុគ្គល​ណា​ម្នាក់​ដែល​គេ​បាន​ប្រគល់​ឱ្យ​បុគ្គល​នោះ ហើយ​បុគ្គល​នោះ​បាន​យល់ព្រម​ដោយ​មាន​ភារកិច្ច​ប្រគល់​សង​វិញ បង្ហាញ ឬ​យក​មូលនិធិ តម្លៃ ឬ​ទ្រព្យសម្បត្តិ​នោះ​ទៅ​ធ្វើ​ការ​ប្រើប្រាស់​ជា​កំណត់។

លោក​មេធាវី​ដដែល​បាន​ឱ្យ​ដឹង​ថា ករណី​លោក ឡេង ណាវ៉ាត្រា គឺ​បាន​យក​លុយ​របស់​អតិថិជន​ទៅ​ប្រើប្រាស់​គម្រោង​ផ្សេង តែ​នៅ​ពេល​ដែល​ត្រូវ​ប្រគល់​ផ្ទះ​ឱ្យ​អតិថិជន លោក​មិន​បាន​ប្រគល់​ផ្ទះ​ឱ្យ​អតិថិជន​ដូច​ការ​សន្យា​ឡើយ បែរ​ជា​មាន​គំនិត​ទុច្ចរិត​យក​លុយ​ទៅ​វិនិយោគ​លើ​ការងារ​ផ្សេង។ ក្នុង​ករណី​នេះ លោក ឡេង ណាវ៉ាត្រា បាន​ប្រព្រឹត្ត​អំពើ​រំលោភ​លើ​ទំនុកចិត្ត ដោយសារ​គាត់​មាន​ចេតនា​ទុច្ចរិត។

ប្រភព​ដដែល​បាន​ឱ្យ​ដឹង​ទៀត​ថា ចំពោះ​ទោស​ដែល​ត្រូវ​អនុវត្ត​វិញ អនុលោម​តាម​មាត្រា​៣៩២ នៃ​ក្រមព្រហ្មទណ្ឌ បាន​បញ្ញត្តិ​ថា «អំពើ​រំលោភ​លើ​ទំនុកចិត្ត ត្រូវ​ផ្ដន្ទាទោស​ដាក់​ពន្ធនាគារ​ពី ៦ (ប្រាំមួយ) ខែ ទៅ ៣ (បី) ឆ្នាំ និង​ពិន័យ​ជា​ប្រាក់​ពី ១,០០០,០០០ (មួយ​លាន) រៀល ទៅ ៦,០០០,០០០ (ប្រាំមួយ​លាន) រៀល»។ ម្យ៉ាង​វិញ​ទៀត បទល្មើស​រំលោភ​ទំនុកចិត្ត​ក៏​ត្រូវ​ផ្ដន្ទាទោស​ដាក់​ពន្ធនាគារ​ពី ២ (ពីរ) ឆ្នាំ ទៅ ៥ (ប្រាំ) ឆ្នាំ និង​ពិន័យ​ជា​ប្រាក់​ពី ៤,០០០,០០០ (បួន​លាន) រៀល ទៅ ១០,០០០,០០០ (ដប់​លាន) រៀល​ផង​ដែរ ប្រសិនបើ​គេ​រក​ឃើញ​ថា​មាន​ស្ថាន​ទម្ងន់​ទោស​ទាក់ទង​នឹង​ជនល្មើស។

លោក​ថា ប៉ុន្តែ​ត្រូវ​ក្រឡេក​មើល​កុងត្រា​របស់​ក្រុមហ៊ុន​ឱ្យ​បាន​ច្បាស់ ជា​ធម្មតា​គេ​ជួល​មេធាវី​ឱ្យ​សរសេរ​ដើម្បី​ចង​អតិថិជន​ផង​ដែរ។

ទាក់ទិន​ទៅ​នឹង​បទ​រំលោភ​សេចក្តី​ទុកចិត្ត​នេះ នា​ពេល​ថ្មីៗ​នេះ​មាន​ការ​ផ្ទុះឡើង​នូវ​ការ​ដាក់​ពាក្យបណ្ដឹង​ជា​បន្តបន្ទាប់​ទៅ​លើ​ឧកញ៉ា​ដី​ឡូត៍​ជាច្រើន​ពី​បទ​ឆបោក និង​រំលោភ​សេចក្តី​ទុកចិត្ត បន្ទាប់ពី​ពួកគាត់​បាន​ដាក់​ប្រាក់​វិនិយោគ​ទទួល​បាន​ការប្រាក់​ខ្ពស់ ហើយ​ក៏​មាន​ករណី​ទិញ​ដី​ឡូត៍​ហើយ ប៉ុន្តែ​មិន​មាន​ដី​ឱ្យ​អតិថិជន​ក៏​មាន ដូចជា​ឧកញ៉ា ជា សារ៉ន អគ្គនាយក​ក្រុមហ៊ុន ជា សារ៉ន គ្រុប ឧកញ៉ា នួន អក គ្រូ​ជោគជ័យ និង​ជា​អ្នក​វិនិយោគ​អចលនទ្រព្យ​មួយ​រូប​នៅ​កម្ពុជា និង​អ្នកស្រី ម៉ន ដានី ម្ចាស់​បុរី KP ជាដើម។

ចំណែកឯ​អ្នកឧកញ៉ា ឡេង ណាវ៉ាត្រា ដែល​តែងតែ​ឧបត្ថម្ភ​លុយ​សុទ្ធ​ដ៏​ច្រើន​សន្ធឹក​សន្ធាប់​ដល់​លោក ហ៊ុន សែន ដែល​គិត​ជា​រួម តួលេខ​ត្រឹម​ត្រីមាស​ទី​១ ឆ្នាំ​២០២៣ នេះ បេះដូង​សប្បុរសធម៌​នៃ​ការ​បរិច្ចាគ​ទឹកប្រាក់​ចូលរួម​ក្នុង​សកម្មភាព​អភិវឌ្ឍន៍​ប្រទេស​ជាតិ និង​សកម្មភាព​មនុស្សធម៌​របស់​ក្រុមហ៊ុន ហ្គាឡាក់ស៊ី ណាវ៉ាត្រា មាន​ទំហំ​សរុប​ដល់​ទៅ​ជាង ២៥​លាន​ដុល្លារ​អាមេរិក ខណៈ​គម្រោង​ទាំងអស់​ជាប់​គាំង​មិន​មាន​ចរន្ត​ហិរញ្ញវត្ថុ។

បន្ទាប់ពី​មាន​ការ​ឧបត្ថម្ភ​លុយ​សុទ្ធ​ដ៏​ច្រើន​សន្ធឹក​សន្ធាប់​របស់​ឧកញ៉ា ឡេង ណាវ៉ាត្រា គេ​ក៏​ឃើញ​មេដឹកនាំ​បក្ស​កាន់​អំណាច លោក ហ៊ុន សែន សង​គុណ​ដល់​ឧកញ៉ា​រូប​នេះ​វិញ​ដោយ​ផ្តល់​ដី​សម្បទាន​សឹង​គ្រប់​ទីកន្លែង​ដើម្បី​អង្កន់​ជា​ដី​ឡូត៍​សម្រាប់​លក់។

ឧកញ៉ា ឡេង ណាវ៉ាត្រា ទទួល​បាន​សិទ្ធិ​លើ​គម្រោង​អភិវឌ្ឍន៍​នៅ​ឧទ្យាន​សួនសត្វ​ភ្នំ​តាម៉ៅ ពី​រដ្ឋាភិបាល ដោយ​ក្រុមហ៊ុន​របស់​លោក​ដាក់​គ្រឿងចក្រ​ឈូស​ឆាយ​ព្រៃ​នៅ​តំបន់​នោះ​រាប​ដល់​ដី​អស់​ប្រមាណ ៦០០​ហិកតារ​កាលពី​អំឡុង​ខែ​សីហា ឆ្នាំ​២០២២ ប៉ុន្តែ​ក្រោយ​មក លោក ហ៊ុន សែន ក៏​បាន​ប្រកាស​ផ្អាក​គម្រោង​នេះ​វិញ​បន្ទាប់ពី​មាន​ការ​តវ៉ា​ពី​ពលរដ្ឋ​សឹង​ទូទាំង​ប្រទេស។

ទិដ្ឋភាព​តំបន់​ភ្នំ​តាម៉ៅ​ថត​ពី​លើ​អាកាស​កាលពី​ថ្ងៃទី​១ ខែ​សីហា និង​ថ្ងៃទី​៨ ខែ​សីហា ឆ្នាំ​២០២២។ (រូបថត​ដោយ VOD)

ជុំវិញ​បញ្ហា​នេះ មាន​ពលរដ្ឋ​ជាច្រើន​ទាមទារ​ឱ្យ​លោក ហ៊ុន សែន ផ្ដន្ទាទោស​ដាក់​ពន្ធនាគារ​ម្ចាស់​ក្រុមហ៊ុន​ដែល​កាប់​បំផ្លាញ​ព្រៃឈើ​ភ្នំ​តាម៉ៅ​នោះ​ទៅ​តាម​ផ្លូវច្បាប់ ប៉ុន្តែ​លោក ហ៊ុន សែន បាន​ចេញ​មុខ​ការពារ​យ៉ាង​ខ្លាំង ដោយ​ប្រតិកម្ម​តប​វិញ​ថា បើ​ចង់​ចាប់​ម្ចាស់​ក្រុមហ៊ុន​នោះ​ដាក់​គុក គឺ​មាន​តែ​ចាប់​លោក​ដាក់​គុក​តែម្តង​ទៅ

បញ្ហា​នេះ​ជា​មូលហេតុ​មួយ​អាច​ឱ្យ​គេ​ដាក់​ការ​សង្ស័យ​បាន​ថា អាជីវកម្ម​របស់​ឧកញ៉ា ឡេង ណាវ៉ាត្រា គឺ​មាន​ក្រុម​គ្រួសារ​ត្រកូល «ហ៊ុន» ជា​ម្ចាស់​ពិតប្រាកដ​ដែល​នៅ​កាង​ពីក្រោយ​ធ្វើ​ជា​ខ្នង​បង្អែក​ដ៏​រឹងមាំ និង​ដ៏​មាន​ឥទ្ធិពល។

លោក ឡេង ភត្រា ហៅ ឡេង ណាវ៉ាត្រា ជា​ឧកញ៉ា​ក្មេង​ជាងគេ​នៅ​កម្ពុជា​ដែល​មាន​អាយុ ៣៨​ឆ្នាំ ហើយ​លោក​មាន​ស្រុក​កំណើត​នៅ​ស្រុក​បាភ្នំ ខេត្ត​ព្រៃវែង ក្នុង​គ្រួសារ​ក្រីក្រ​មួយ​ដែល​មាន​ឪពុក​ឈ្មោះ ឡុង យឿន កន្លង​មក​មាន​មុខរបរ​ជា​អ្នក​ស៊ីឈ្នួល​រែក​ដី ម្ដាយ​ឈ្មោះ ប៉ែន ងឿន បាន​ស្លាប់​អំឡុង​ឆ្នាំ​២០១២។ ដោយសារតែ​ជីវភាព​ក្រីក្រ លោក ឡេង ណាវ៉ាត្រា បាន​បញ្ឈប់​ការ​សិក្សា​ត្រឹម​កម្រិត​មធ្យមសិក្សា​បឋម​ភូមិ​ថ្នាក់​ទី​៩។

ដើម្បី​ជួយ​ជីវភាព​គ្រួសារ លោក ឡេង ណាវ៉ាត្រា បាន​ឆ្លង​ប្រទេស​ទៅ​ធ្វើ​ការងារ​ជា​ពលករ​នៅ​ប្រទេស​កូរ៉េខាងត្បូង អំឡុង​ឆ្នាំ​២០១០ ដល់​ឆ្នាំ​២០១៤។ នៅ​ពេល​នោះ លោក​ក៏​ធ្លាប់​ជា​អ្នក​គាំទ្រ​គណបក្ស​សង្គ្រោះ​ជាតិ​ម្នាក់​ដែល​រិះគន់​ការ​ដឹកនាំ​របស់​លោក ហ៊ុន សែន តាមរយៈ​បទ​ចម្រៀង​ដែល​មាន​ពលករ​ខ្មែរ​ក្នុង​ប្រទេស​កូរ៉េ​ចូលរួម​ផង​ដែរ។

លោក ឡេង ណាវ៉ាត្រា ពេល​ធ្វើ​ជា​ពលករ​នៅ​ប្រទេស​កូរ៉េ។

លោក ឡេង ណាវ៉ាត្រា មាន​បងប្អូន​ចំនួន​បួន​នាក់​ដែល​សុទ្ធតែ​ទទួល​បាន​គោរមងារ​តែងតាំង​ជា​ឧកញ៉ា​ចំនួន​បី​នាក់ និង​អ្នកឧកញ៉ា​ម្នាក់​ពី​ព្រះមហាក្សត្រ​នៃ​ព្រះរាជាណាចក្រ​កម្ពុជា ដែល​ចេញ​មុខ​រកស៊ី​ជា​សាធារណៈ​សព្វថ្ងៃ​នេះ និង​បូក​រួម​ទាំង​សែស្រឡាយ​ដែល​មាន​តែ​កម្លាំង ប៉ុន្តែ​ចំណេះដឹង​នៅ​មាន​កម្រិត។

ក្រុម​អ្នក​សង្កេតការណ៍ និង​អ្នកវិភាគ​របស់​អាមេរិក​មួយ​ចំនួន​បាន​ប្រាប់​សារព័ត៌មាន The Cambodia Daily ក្នុង​លក្ខខណ្ឌ​មិន​បញ្ចេញ​ឈ្មោះ​ថា ប្រសិនបើ​លោក ឡេង ណាវ៉ាត្រា មិន​ប្រញាប់​ដក​ខ្លួន​ចេញពី​ចរន្ត​រកស៊ី​លាង​លុយ​ឱ្យ​គ្រួសារ​អ្នក​មាន​អំណាច​នៅ​កម្ពុជា​ទាន់​ពេល​ទេ នោះ​លោក ឡេង ណាវ៉ាត្រា អាច​នឹង​មាន​វាសនា​ដូច​មេ​អង្គរក្ស និង​មន្ត្រី​យោធា​គ្រាក់ៗ​របស់​លោក ហ៊ុន សែន ផ្សេង​ទៀត​ដែរ ដែល​ពួកគេ​បាន​ជាប់​នូវ​ទណ្ឌកម្ម​របស់​សហរដ្ឋ​អាមេរិក ដោយសារ​ពួកគេ​បាន​ចូលរួម​ក្នុង​ការ​រំលោភ​សិទ្ធិមនុស្ស រំលោភ​ប្រជាធិបតេយ្យ និង​ប្រព្រឹត្ត​អំពើពុករលួយ។ ហើយ​ប្រសិនបើ​ករណី​នេះ​កើតមាន​ចំពោះ​លោក ឡេង ណាវ៉ាត្រា មែន នោះ​ប្រសិទ្ធភាព និង​ឥទ្ធិពល​នៃ​ការ​រកស៊ី​របស់​លោក ឡេង ណាវ៉ាត្រា នឹង​ជួប​មហា​គ្រោះ​យ៉ាង​ធំ​ជាមិនខាន។

ច្បាប់ Global Magnitsky Human Rights Accountability Act ឬ​ហៅ​កាត់​ថា ច្បាប់ Global Magnitsky Act មាន​វិធានការ​ដាក់​ទណ្ឌកម្ម​លើ​មន្ត្រី​កម្ពុជា​ដើម្បី​បង្កក​ទ្រព្យសម្បត្តិ​របស់​ពួកគេ និង​បិទ​ទិដ្ឋាការ​មន្ត្រី​ទាំងនោះ ព្រមទាំង​សមាជិក​ក្រុម​គ្រួសារ​សាច់ញាតិ​របស់​ពួកគេ​មិន​អនុញ្ញាត​ឱ្យ​ជាន់​ទឹកដី​អាមេរិក​ថែម​ទៀត។

វិធានការ​នៃ​ច្បាប់​នេះ ក៏​បាន​ហាមឃាត់​មិន​ឱ្យ​ជនជាតិ ឬ​ក្រុមហ៊ុន​អាមេរិកាំង​ទាំងអស់​រកស៊ី ឬ​ធ្វើ​ប្រតិបត្តិការ​សាច់ប្រាក់​ពាក់ព័ន្ធ​ដោយ​ផ្ទាល់ ឬ​ប្រយោល​ជាមួយ​នឹង​អ្នក​ដែល​រង​នូវ​ទណ្ឌកម្ម​ទាំង​នេះ​ដែរ។

ប្រធាន​វេទិកា​ពលរដ្ឋ លោក គឹម សុខ។

អ្នកវិភាគ​ឯករាជ្យ និង​ជា​ប្រធាន​វេទិកា​ពលរដ្ឋ លោក គឹម សុខ បាន​ប្រាប់​សារព័ត៌មាន The Cambodia Daily ថា មុខរបរ​របស់​លោក ឡេង ណាវ៉ាត្រា ជា​ជំនួញ​ហិរញ្ញវត្ថុ​នយោបាយ ហើយ​បុគ្គល ឡេង ណាវ៉ាត្រា ជា​អ្នក​សម្ដែង​កាន់​លុយ​ឱ្យ​គ្រួសារ​ហ៊ុន​ប៉ុណ្ណោះ ពីព្រោះ​ឧកញ៉ា​ជំនួញ​រូប​នេះ​ហាក់ដូចជា​មិន​ខ្វល់​អំពី​បញ្ហា​ប៉ះពាល់​ដល់​មុខរបរ​របស់​គាត់​ឡើយ ប៉ុន្តែ​មួយ​ថ្ងៃៗ​ខ្វល់​តែ​រឿង​នយោបាយ​របស់​គ្រួសារ​ហ៊ុន និង​បង្កើត​ក្រុម​វាយលុក​លើ​បណ្ដាញ​ព័ត៌មាន​ទៅវិញ។

លោក គឹម សុខ បាន​ឱ្យ​ដឹង​បន្ថែម​ទៀត​ថា ជាក់ស្ដែង ការងារ​របស់​លោក ឡេង ណាវ៉ាត្រា គឺ​ថ្វាយបង្គំ​លោក ហ៊ុន សែន និង​ភរិយា ដើម្បី​បាន​ដី​រាប់​រយ​ហិកតារ​ទៅ​ធ្វើ​ជំនួញ​សង់​ផ្ទះ​ល្វែង ព្រមទាំង​ដើម្បី​អាច​ចាយ​លុយ​សុទ្ធ​ទាំង​លានៗ​ដុល្លារ​ក្រៅ​ប្រព័ន្ធ​ធនាគារ។

អ្នកឧកញ៉ា ឡេង ណាវ៉ាត្រា លុត​ជង្គង់​ថ្វាយ​បង្គំ​លោក​នាយករដ្ឋមន្ត្រី ហ៊ុន សែន។

ប្រភព​ដដែល​អះអាង​ថា និយាយ​ឱ្យ​ចំ លោក ឡេង ណាវ៉ាត្រា មិនមែន​ជា​អ្នកជំនួញ​ទេ តែ​គ្រាន់តែ​ជា​អ្នក​សម្ដែង​ធ្វើ​ជា​អ្នកជំនួញ ដែល​នៅ​ពីក្រោយ​ឈ្មោះ​ជំនួញ​នេះ ជា​អ្នក​លាង​លុយ​កខ្វក់​ឱ្យ​គ្រួសារ​ហ៊ុន។ ជា​ឧទាហរណ៍ បើ​អ្នកជំនួញ​ពិតប្រាកដ គេ​យកចិត្ត​ទុកដាក់​ណាស់​ក្នុង​ការ​គោរព​កិច្ចសន្យា​ជាមួយ​អតិថិជន និង​ខ្វល់ខ្វាយ​ណាស់​អំពី​ប្រតិកម្ម​របស់​អតិថិជន ដើម្បី​ចៀសវាង​ការ​ប៉ះពាល់​ដល់​ទឹកចិត្ត​អតិថិជន។ ប៉ុន្តែ​សម្រាប់​លោក ឡេង ណាវ៉ាត្រា វិញ ពេល​អតិថិជន​មិន​តវ៉ា​ខ្លាំង​រឿង​សង់​ផ្ទះ​មិន​ទាន់​តាម​កិច្ចសន្យា ឧកញ៉ា​រូប​នេះ​ធ្វើ​ព្រងើយ និង​ដោះសា​លើ​វិបត្តិ​សកល។

លុះ​ដល់​ពេល​អតិថិជន​ផ្ទុះ​ការ​តវ៉ា ទើប​ឧកញ៉ា ណាវ៉ាត្រា ដាក់​ពង្រាយ​ប្លង់​ផ្ទះ​ថត​បង្អួត​ជា​សាធារណៈ គឺ​វា​ហាក់ដូចជា​ប្លង់​ផ្ទះ​ធ្លាក់​ពី​ឋាន​ព្រះឥន្ទ ដែល​ការពិត​គ្មាន​ផ្ទះ​ពិតប្រាកដ​នៅ​លើ​ដី។

អ្នកឧកញ៉ា ឡេង ណាវ៉ាត្រា បង្ហោះ​ប័ណ្ណ​រឹង​សម្រាប់​គម្រោង​នៅ​ខេត្ត​បាត់ដំបង កាលពី​ថ្ងៃទី​២៥ ខែ​ឧសភា ឆ្នាំ​២០២៣។

លោក​បន្ត​ថា វា​ពិត​ជា​ចម្លែក ឧកញ៉ា ឡេង ណាវ៉ាត្រា ជា​អ្នកជំនួញ​ដែល​មិន​ខ្វល់​ពី​ជំនួញ ហើយ​ខ្វល់​តែ​ពី​ការ​ប្រមូល​ឧកញ៉ា​ចម្រៀង​សេះ​ហោះ​ឱ្យ​ឃោសនា​ពង្វក់​យុវជន និង​សរសើរ​គ្រួសារ​ហ៊ុន ប៉ុន្តែ​ឃើញ​ប្រកាស​តែ​ពី​ចំណេញ​រយ​លាន​ដុល្លារ និង​ចាយ​លុយ​ក្រៅ​ប្រព័ន្ធ​ធនាគារ​តាម​ចិត្ត​ចង់។

អ្នក​សិក្សា​កិច្ចការ​សង្គម និង​នយោបាយ លោក ប៉ោ មករា បាន​ប្រាប់​សារព័ត៌មាន​ក្នុង​ស្រុក​ថា តាម​ន័យ​ច្បាប់ គឺ​ស្ថាប័ន​តុលាការ​ជា​ទីតាំង​មួយ​ដែល​ផ្តល់​ឱ្យ​មនុស្ស​គ្រប់​រូប​ស្វែងរក​ដំណោះស្រាយ​លើ​វិវាទ​នានា​ដោយ​ស្មើ​ភាព​គ្នា មិន​បែងចែក​អ្នក​មាន ឬ​អ្នក​ក្រ។

លោក​បន្ត​ថា ការ​បកស្រាយ​លើ​បណ្ដាញ​សង្គម​ករណី​លោក ឡេង ណាវ៉ាត្រា ធ្វើ​ឱ្យ​មហាជន​មាន​ការ​យល់​ច្រឡំ ហើយ​បញ្ហា​នឹង​រាលដាល​កាន់តែ​ធំ៕

ចុច​ទីនេះ​ដើម្បី​អាន​អត្ថបទ និង​ទស្សនា​វីដេអូ​ពាក់ព័ន្ធ​នឹង​អ្នកឧកញ៉ា ឡេង ណាវ៉ាត្រា

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស