មេដឹកនាំខ្មែរកាងអំណាចផ្ដាច់មុខនៅកម្ពុជាលោក ហ៊ុន សែន លើកឡើងសាជាថ្មីថា មូលហេតុដែលប្រធានគណបក្សសង្គ្រោះជាតិលោក កឹម សុខា ជាប់គុកដោយគ្មានការលើកលែងទោស គឺដោយសារបរទេសដែលមានបំណងបំផ្លាញរដ្ឋាភិបាលរបស់លោក គឺស្រឡាញ់លោក កឹម សុខា ពេក។
អតីតទាហានខ្មែរក្រហមរូបនេះលើកឡើងក្នុងពិធីជួបជាមួយកម្មករក្នុងរាជធានីភ្នំពេញ នៅថ្ងៃទី២៨ ខែមិថុនា នេះថា បរទេសទាំងនោះធ្វើនយោបាយចាប់ដៃជាន់ជើងរបស់លោករហូត ព្រោះថាលោក កឹម សុខា ដែលកំពុងត្រូវបានរដ្ឋាភិបាលរបស់លោកចោទប្រកាន់ពីបទឃុបឃិតជាមួយរដ្ឋបរទេស ស្រាប់តែបរទេសទាំងនោះនាំគ្នាមកសួរសុខទុក្ខលោក កឹម សុខា និងនាំលោក កឹម សុខា ទៅទស្សនកិច្ចនៅស្ថានទូតរបស់ពួកគេទៅវិញ។
មេដឹកនាំដែលកំពុងក្តាប់អំណាចតាមបែបកុម្មុយនីស្តលោក ហ៊ុន សែន ព្រមានថា ចាប់ពីពេលនេះតទៅ ឱ្យតែបរទេសណាហ៊ានអន្តរាគមន៍ចំពោះបុគ្គលណាដែលតុលាការបានសម្រេចផ្ដន្ទាទោស បុគ្គលនោះនឹងត្រូវអនុវត្តទោសតាមច្បាប់កំណត់តែម្ដងដោយគ្មានការលើកលែងឡើយ ដើម្បីព្រមានកុំឱ្យមានការជ្រៀតជ្រែកកិច្ចការផ្ទៃក្នុងរបស់កម្ពុជាពីបរទេសខាងក្រៅបន្តទៀត។
ការព្រមាននេះ គឺជាលើកទីពីរហើយបន្ទាប់ពីលោក ហ៊ុន សែន បានព្រមានទៅកាន់សហគមន៍អន្តរជាតិជាលើកដំបូងកាលពីអំឡុងខែឧសភា ឆ្នាំ២០២៣ កន្លងទៅ ជុំវិញករណីប្រធានគណបក្សសង្គ្រោះជាតិ លោក កឹម សុខា នេះ។
យ៉ាងណាក៏ដោយ កាលពីចុងឆ្នាំ២០២១ ប្រធានគណបក្សសង្គ្រោះជាតិ លោក កឹម សុខា ធ្លាប់អះអាងថា បើទោះបីជាលោកត្រូវរងនូវការចោទប្រកាន់ពីរដ្ឋាភិបាលកម្ពុជាបែបណាក៏ដោយ ក៏បណ្តាប្រទេសលោកសេរីនៅតែទទួលស្គាល់អំពីគុណតម្លៃរបស់លោកក្នុងការងារសិទ្ធិមនុស្ស និងប្រជាធិបតេយ្យដដែល។
ជាងនេះទៀត ពួកគេក៏បានទទួលស្គាល់នូវគោលជំហររបស់លោកដែលតែងប្រកាន់ភ្ជាប់នូវគោលការណ៍អហិង្សា ការអត់ធ្មត់ និងតែងតែស្វែងរកដំណោះស្រាយបញ្ហានានាដោយសន្តិវិធី ដើម្បីបម្រើប្រយោជន៍ពលរដ្ឋខ្មែរដែរ។
ចាប់តាំងពីអំឡុងខែឧសភា ឆ្នាំ២០២០ មក ប្រធានគណបក្សសង្គ្រោះជាតិ លោក កឹម សុខា បានទទួលជួបពិភាក្សាជាមួយឯកអគ្គរដ្ឋទូតរបស់ប្រទេសដែលប្រកាន់របបប្រជាធិបតេយ្យជាបន្តបន្ទាប់ ដូចជាប្រទេសអាល្លឺម៉ង់ សហភាពអឺរ៉ុប អាមេរិក បារាំង អូស្ត្រាលី ជប៉ុន រហូតដល់មានការអញ្ជើញឱ្យលោកទៅចូលក្នុងកិច្ចប្រជុំនៃប្រទេសមហាអំណាចសេដ្ឋកិច្ច G-20 ថែមទៀត។
ការដែលប្រទេសប្រកាន់របបប្រជាធិបតេយ្យទាំងនោះបង្ហាញការយកចិត្តទុកដាក់ទៅលើមេដឹកនាំបក្សប្រឆាំងលោក កឹម សុខា បែបនេះ គឺបង្ហាញថាពួកគេមិនជឿលើការចោទប្រកាន់លោក កឹម សុខា ថាបានប្រព្រឹត្តអំពើក្បត់ជាតិដូចការចោទប្រកាន់របស់រដ្ឋាភិបាលលោក ហ៊ុន សែន នោះឡើយ ដូច្នេះហើយទើបធ្វើឱ្យលោក ហ៊ុន សែន មានគំនុំជាមួយបរទេសទាំងនោះរហូតដល់ពេលនេះ។
ទាក់ទិននឹងបញ្ហានេះ កាលពីអំឡុងខែសីហា ឆ្នាំ២០២២ តំណាងជាន់ខ្ពស់ទទួលបន្ទុកកិច្ចការបរទេស និងសន្តិសុខនយោបាយ និងជាអនុប្រធានគណៈកម្មការសហគមន៍អឺរ៉ុប លោក ចូសិប បូររែល (Josep Borrll Fontelles) ធ្លាប់បានលើកឡើងថា សហគមន៍អឺរ៉ុបចង់ឃើញការជំនុំជម្រះលើសំណុំរឿងប្រធានគណបក្សសង្គ្រោះជាតិដោយយុត្តិធម៌ ដើម្បីឱ្យលោក កឹម សុខា ទទួលបានសិទ្ធិសេរីភាពពេញលេញ និងអាចចូលរួមការបោះឆ្នោតជាតិក្នុងឆ្នាំ២០២៣ ខាងមុខនេះ។
ចំណែករដ្ឋមន្ត្រីការបរទេសអាមេរិកលោក Antony Blinken បានលើកឡើងកាលពីថ្ងៃទី៥ ខែសីហា ឆ្នាំ២០២២ ថា កម្ពុជានឹងទទួលបានអត្ថប្រយោជន៍យ៉ាងច្រើនពីការស្ដារសិទ្ធិនយោបាយ និងការបើកលំហសេរីភាពរបស់លោក កឹម សុខា ឱ្យអាចចូលរួមក្នុងដំណើរការប្រជាធិបតេយ្យនៅកម្ពុជាទៅថ្ងៃមុខ។
ប្រធានគណបក្សសង្គ្រោះជាតិលោក កឹម សុខា ត្រូវបានតុលាការកម្ពុជាកាត់ទោសឲ្យលោកជាប់គុកក្នុងផ្ទះរយៈពេល ២៧ឆ្នាំពីបទក្បត់ជាតិ កាលពីអំឡុងខែមេសា ឆ្នាំ២០២៣ កន្លងទៅ ដែលធ្វើឲ្យលទ្ធិប្រជាធិបតេយ្យ និងការគោរពសិទ្ធិមនុស្សនៅកម្ពុជាធ្លាក់ចុះយ៉ាងខ្លាំងរហូតដល់ពេលនេះ៕