រដ្ឋាភិបាលឯកបក្សរបស់លោក ហ៊ុន សែន សម្រេចបណ្តេញសមាជិកក្រុមប្រឹក្សាត្រួតពិនិត្យរបស់ក្រុមហ៊ុនហ្វេសប៊ុក ២២នាក់ចេញពីប្រទេសកម្ពុជា ក្នុងរយៈពេល ៤៨ម៉ោង ដោយគិតចាប់ពីម៉ោង ៤ល្ងាចថ្ងៃទី០៤ ខែកក្កដា ឆ្នាំ២០២៣ នេះ និងហាមមិនឲ្យពួកគេជាន់ទឹកដីខ្មែរជារៀងរហូត បន្ទាប់ពីក្រុមហ៊ុនមេតាហ្វេសប៊ុកប្រកាសព្យួរទំព័រហ្វេសប៊ុករបស់លោក ហ៊ុន សែន រយៈពេល ៦ខែកាលពីពេលថ្មីៗនេះ។
ក្រសួងការបរទេស និងសហប្រតិបត្តិការអន្តរជាតិ បានចេញសេចក្ដីថ្លែងការណ៍នៅថ្ងៃទី០៤ ខែកក្កដា ឆ្នាំ២០២៣ នេះថា ប្រសិនបើបុគ្គលទាំង ២២នាក់នេះរួមទាំងលោក Ronaldo Lemos លោក Khaled Mansour និងលោក Nicolas Suzor ជាដើម បើមានអ្នកណាម្នាក់កំពុងមានវត្តមាននៅក្នុងប្រទេសកម្ពុជា ត្រូវតែចាកចេញជាបន្ទាន់ ព្រោះក្រុមហ៊ុនមេតាហ្វេសប៊ុករបស់ពួកគេបានសម្រេចផ្អាកជាបណ្ដោះអាសន្ននូវទំព័រហ្វេសប៊ុកផ្លូវការរបស់លោក ហ៊ុន សែន ដែលមានលក្ខណៈជាហេតុផលនយោបាយ។
ប្រភពដដែលលើកឡើងថា ក្នុងស្មារតីនៃការអនុវត្តយ៉ាងម៉ឺងម៉ាត់ចំពោះការប្រកាន់ខ្ជាប់នូវគោលការណ៍អធិបតេយ្យភាព និងដើម្បីទប់ស្កាត់ការជ្រៀតជ្រែកចូលកិច្ចការផ្ទៃក្នុងរបស់កម្ពុជា រាជរដ្ឋាភិបាលកម្ពុជាបានប្រកាសថា សមាជិកក្រុមប្រឹក្សាភិបាលត្រួតពិនិត្យនៃក្រុមហ៊ុន Meta Platforms Inc. ចំនួន ២២នាក់នេះ មិនអាចឲ្យបន្តមានវត្តមាននៅកម្ពុជាទៀតបានឡើយ។
ក្រសួងការបរទេសកម្ពុជា បញ្ជាក់ថា ការព្យួរទំព័រហ្វេសប៊ុករបស់លោក ហ៊ុន សែន ពីក្រុមហ៊ុនហ្វេសប៊ុក គឺជាចេតនារារាំងសេរីភាពសារព័ត៌មានរបស់ពលរដ្ឋកម្ពុជា និងសិទ្ធិរបស់ពលរដ្ឋក្នុងការទទួលបានព័ត៌មានពិតពីថ្នាក់ដឹកនាំដែលពួកគេគាំទ្រ និងពេញចិត្ត។
ការបណ្ដេញសមាជិកក្រុមប្រឹក្សាត្រួតពិនិត្យរបស់ក្រុមហ៊ុនហ្វេសប៊ុកនេះ ធ្វើឡើងត្រូវគេមើលឃើញថា លោក ហ៊ុន សែន កំពុងសងសឹកទៅកាន់ក្រុមហ៊ុនមេតាហ្វេសប៊ុកប៉ុណ្ណោះ។
កាលពីថ្ងៃទី២៩ ខែមិថុនា ឆ្នាំ២០២៣ ក្រុមប្រឹក្សាភិបាលក្រុមហ៊ុនមេតាហ្វេសប៊ុកបានអំពាវនាវឲ្យព្យួរគណនីហ្វេសប៊ុកផ្លូវការរបស់នាយករដ្ឋមន្ត្រីកម្ពុជា លោក ហ៊ុន សែន រយៈពេល ៦ខែ ដោយអះអាងថា វីដេអូមួយដែលបានបង្ហោះតាមទំព័រហ្វេសប៊ុករបស់លោកបានរំលោភវិធានការរបស់ក្រុមហ៊ុនមេតាហ្វេសប៊ុកធ្ងន់ធ្ងរ ជុំវិញការគំរាមកំហែងដោយហិង្សា។
ក្រុមប្រឹក្សាភិបាលក្រុមហ៊ុនមេតាហ្វេសប៊ុកបញ្ជាក់ថា ការព្យួរទំព័រហ្វេសប៊ុករបស់លោក ហ៊ុន សែន បែបនេះក្រោយពេលមានបណ្តឹងពីអ្នកប្រើប្រាស់បណ្ដាញសង្គមហ្វេសប៊ុកជាបន្តបន្ទាប់ពីការគំរាមកំហែងដែលអាចនាំទៅដល់ការស្លាប់ពីសំណាក់លោក ហ៊ុន សែន តាមរយៈសុន្ទរកថាលើវេទិការបស់គាត់ ដែលបានបំពានលើគោលការណ៍របស់ក្រុមហ៊ុនមេតាហ្វេសប៊ុកយ៉ាងធ្ងន់ធ្ងរផងដែរ។
ក្រោយពីក្រុមហ៊ុនមេតាហ្វេសប៊ុកព្យួរទំព័រហ្វេសប៊ុកផ្លូវការរបស់លោកហើយនោះ មេដឹកនាំខ្មែររូបនេះបានប្រកាសលុបចោលនូវទំព័រហ្វេសប៊ុកផ្លូវការរបស់លោកផងដែរកាលពីថ្ងៃទី២៩ ខែមិថុនា ឆ្នាំ២០២៣ ដែលមានអ្នកតាមដានជាង ១៤លាននាក់។
បន្ទាប់ពីលោក ហ៊ុន សែន ប្រកាសលុបទំព័រហ្វេសប៊ុករបស់ខ្លួន ក្រសួងប្រៃសណីយ៍ និងទូរគមនាគមន៍ បានប្រកាសសម្រេចកាលពីថ្ងៃទី៣០ មិថុនា បណ្តេញតំណាងក្រុមហ៊ុន Facebook ចេញពីប្រទេសកម្ពុជា និងបញ្ឈប់រាល់សកម្មភាព ដូចជាភាពជាតំណាងរបស់ក្រុមហ៊ុន ទំនាក់ទំនងជាមួយរាជរដ្ឋាភិបាល និងកិច្ចសហការដៃគូក្នុងវិស័យឯកជននៅប្រទេសកម្ពុជា ចាប់ពីថ្ងៃទី៣០ ខែមិថុនា ឆ្នាំ២០២៣ នេះតទៅផងដែរ។
បុរសខ្លាំងក្រាញអំណាចផ្ដាច់មុខនៅកម្ពុជាលោក ហ៊ុន សែន បានសរសេរនៅក្នុងបណ្ដាញទំនាក់ទំនងតេឡេក្រាមបែបផ្ចាញ់ផ្ចាលនៅក្រោយសេចក្តីថ្លែងការណ៍របស់ក្រសួងការបរទេសកម្ពុជា ថា មុខមនុស្សទាំងនេះមិនត្រូវបានអនុញ្ញាតឲ្យចូលស្រុកខ្មែរអស់មួយជីវិត ហើយនេះគឺជាលទ្ធផលដែលពួកអ្នកបង្កឡើងតាមរយៈនយោបាយជ្រៀតជ្រែកកិច្ចការផ្ទៃក្នុងរបស់កម្ពុជា៕