រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈកម្ពុជា ស្នើឱ្យប្រទេសដែលជាដៃគូអភិវឌ្ឍន៍របស់ខ្លួន ជួយផ្សព្វផ្សាយពីវឌ្ឍនភាព លក្ខខណ្ឌការងារសមរម្យនៅកម្ពុជា ដើម្បីរួមចំណែកជំរុញឲ្យមានកំណើននៃការបញ្ជាទិញ និងការនាំចេញរបស់កម្ពុជាបន្តទៀត ដើម្បីបន្តវឌ្ឍនភាពវិស័យការងារ លើកកម្ពស់កម្មករនិយោជិត និងជំរុញការនាំចេញផលិតផលវាយនភណ្ឌ សម្លៀកបំពាក់ ស្បែកជើង កាបូប និងសម្ភារៈធ្វើដំណើរទៅកាន់បរទេសឲ្យបានកាន់តែច្រើន។
រដ្ឋមន្ត្រីក្រសួងការងារ លោក អ៊ិត សំហេង បានលើកឡើងនៅក្នុងជំនួបជាមួយនាយកកម្មវិធីនៃមជ្ឈមណ្ឌលអាមេរិកាំងសម្រាប់សាមគ្គីភាពការងារអន្តរជាតិ (ACILS) លោក វីល្លៀម ខន់គ្លីន (William Conklin) នៅថ្ងៃទី៤ ខែកក្កដា ឆ្នាំ២០២៣ នេះថា គោលបំណងរបស់រដ្ឋាភិបាលកម្ពុជាគឺមានផែនការលើកកម្ពស់សុខភាព និងសុវត្ថិភាពការងារដល់កម្មករនិយោជិត ប្រាក់ឈ្នួលអប្បបរមា របបសន្តិសុខសង្គម កិច្ចគាំពារមាតុភាព ការលុបបំបាត់អំពើហិង្សា និងការរំលោភសិទ្ធិការងារ ជាដើម។
លោក អ៊ិត សំហេង អះអាងថា កម្ពុជានៅតែបន្តកិច្ចសហប្រតិបត្តិការជាមួយដៃគូនានា ដើម្បីបន្តវឌ្ឍនភាពវិស័យការងារ លើកកម្ពស់កម្មករនិយោជិត និងជំរុញការនាំចេញផលិតផលវាយនភណ្ឌ សម្លៀកបំពាក់ ស្បែកជើង កាបូប និងសម្ភារៈធ្វើដំណើរទៅកាន់បរទេសបន្តទៀត ដើម្បីរួមចំណែកជំរុញកំណើននៃការបញ្ជាទិញ និងការនាំចេញរបស់កម្ពុជាឲ្យបានកាន់តែច្រើនផងដែរ។
រដ្ឋមន្ត្រីក្រសួងការងារកម្ពុជារូបនេះបញ្ជាក់ថា បន្ទាប់ពីកម្ពុជារៀបចំរាជរដ្ឋាភិបាលអាណត្តិទី៧ រួចរាល់ ក្រសួងការងារនឹងបន្តកិច្ចសហប្រតិបត្តិការជាមួយមជ្ឈមណ្ឌល ACILS និងដៃគូនានាផ្សេងទៀត ដើម្បីអនុវត្តគោលនយោបាយដែលបានដាក់ចេញឱ្យមានប្រសិទ្ធភាព។
វិស័យការងារនៅកម្ពុជាត្រូវគេមើលឃើញថា កំពុងរងនូវការប្រឈមធ្ងន់ធ្ងរលើការនាំចេញទៅកាន់បរទេស បន្ទាប់ពីប្រព័ន្ធអនុគ្រោះពន្ធរបស់សហភាពអឺរ៉ុប និងសហរដ្ឋអាមេរិកស្ថិតក្នុងភាពមិនច្បាស់។
នៅដើមឆ្នាំ២០២៣ នេះ មានរោងចក្រនៅកម្ពុជាប្រមាណជាង ១០កន្លែងហើយដែលបានបិទទ្វារ និងរោងចក្រចំនួន ៧១ បានព្យួរកិច្ចសន្យាការងារ ខណៈរោងចក្រ ៦០ ផ្សេងទៀតបានកាត់បន្ថយបុគ្គលិក ដែលនាំឱ្យប៉ះពាល់ដល់កម្មករជាង ៣ម៉ឺន ២ពាន់នាក់ និងកម្មករច្រើននាក់ទៀតត្រូវបានបាត់បង់ការងារទាំងស្រុងតែម្ដង។
ទាក់ទិនបញ្ហានេះ ក្រសួងសេដ្ឋកិច្ច និងហិរញ្ញវត្ថុកម្ពុជា បានព្យាករកាលពីដើមឆ្នាំ២០២៣ នេះថា កំណើនវិស័យកាត់ដេរនៅកម្ពុជាក្នុងឆ្នាំ២០២៣ នេះ នឹងថយចុះពី ១០% មកនៅ ៥,៥% ដោយសារការថមថយតម្រូវការសកល ជាពិសេសពីទីផ្សារសហរដ្ឋអាមេរិក និងសហភាពអឺរ៉ុប។
អគ្គលេខាធិការរងសមាគមរោងចក្រកាត់ដេរកម្ពុជា (GMAC) លោក កាំង ម៉ូនីកា បានអះអាងកាលពីពេលកន្លងទៅថា កំណើននៃវិស័យកាត់ដេរសម្លៀកបំពាក់នៅកម្ពុជាអាចធ្លាក់មកទាប ដោយសារការនាំចេញទៅទីផ្សារខាងក្រៅ ជាពិសេសទីផ្សារអាមេរិក សហភាពអឺរ៉ុប អង់គ្លេស កាណាដា និងជប៉ុន ជាដើម បានថយចុះ។
ទាក់ទិននឹងបញ្ហានេះ សហជីពមួយចំនួនលើកឡើងថា កម្មករនឹងប្រឈមការបាត់បង់ការងារ បើសិនប្រព័ន្ធអនុគ្រោះពន្ធ GSP របស់អាមេរិក និងប្រព័ន្ធអនុគ្រោះពន្ធ EBA របស់សហភាពអឺរ៉ុប ត្រូវដកចេញពីកម្ពុជា ខណៈបច្ចុប្បន្ននេះមានរោងចក្រមួយចំនួនបានបិទទ្វារ និងព្យួរការងារកម្មករដោយសារតែគ្មានការបញ្ជាទិញទៅហើយនោះ។
យ៉ាងណាក៏ដោយ លោក ហ៊ុន សែន បានអះអាងកាលពីដើមខែមិថុនា ឆ្នាំ២០២៣ នេះថា លោកមិនខ្វល់ពីសហភាពអឺរ៉ុបដក EBA ពីកម្ពុជានោះទេ ពីព្រោះប្រព័ន្ធអនុគ្រោះនេះគង់តែសហភាពអឺរ៉ុបដកហូតនៅពេលដែលស្ថានភាពសេដ្ឋកិច្ចរបស់កម្ពុជាចាកផុតពីប្រទេសមានការអភិវឌ្ឍតិចតួចនៅឆ្នាំ២០២៧ ខាងមុខនេះ។
លោក ហ៊ុន សែន អះអាងថា ទោះបីស្ថិតក្នុងតម្លៃណាក៏ដោយ រដ្ឋាភិបាលរបស់លោកមិនយកអធិបតេយ្យរបស់ជាតិទៅប្ដូរជាមួយ EBA របស់សហភាពអឺរ៉ុប និងជំនួយរបស់ប្រទេសណាមួយនោះទេ ជាក់ស្តែង សហភាពអឺរ៉ុបបានដកប្រព័ន្ធអនុគ្រោះពន្ធ ២០% ពីកម្ពុជារយៈពេលកន្លងមកពុំបានប៉ះពាល់ដល់ការនាំចេញទំនិញ និងសេដ្ឋកិច្ចរបស់កម្ពុជានោះទេ ហើយកម្ពុជាក៏អាចរស់បានដោយមិនត្រូវការប្រព័ន្ធអនុគ្រោះពន្ធលើមុខទំនិញពីអឺរ៉ុបនោះដែរ។
ទោះជាបែបនេះក្តី ក្រុមអ្នកសង្កេតការណ៍លើកឡើងថា បើទោះបីលោក ហ៊ុន សែន អះអាងថាសេដ្ឋកិច្ចកម្ពុជានឹងមិនត្រូវការប្រព័ន្ធអនុគ្រោះពន្ធពីសហភាពអឺរ៉ុបក្តី ប៉ុន្តែបច្ចុប្បន្ន រដ្ឋាភិបាលរបស់លោកនៅតែមិនអាចរស់ដោយខ្លួនឯងបាន ក្រៅតែពីពឹងផ្អែកទៅលើការខ្ចីបុល និងត្រូវការជំនួយពីបរទេសជាង ២ពាន់លានដុល្លារអាមេរិកក្នុងមួយឆ្នាំៗដើម្បីរស់។
ចំណែកកម្មករនៅតាមរោងចក្រសហគ្រាសវិញនៅតែរងផលប៉ះពាល់ពីការបាត់បង់ការងារ និងការកាត់បន្ថយម៉ោងធ្វើការជាបន្តបន្ទាប់ ខណៈផលិតផលកសិកម្មរបស់កសិករគ្មានទីផ្សារ ដែលធ្វើឱ្យពួកគេបង្ខំចិត្តរស់នៅក្នុងជីវភាពលំបាកលំបិនធ្លាក់ចូលទៅក្នុងបំណុលវ័ណ្ឌករហូតធ្វើចំណាកស្រុកដើម្បីរកលុយសងធនាគារ ហើយអ្នកខ្លះទៀតត្រូវធនាគាររឹបអូសទ្រព្យសម្បត្តិថែមទៀត៕