អ្នកគ្រប់គ្រងទំព័រហ្វេសប៊ុកនាយករដ្ឋមន្ត្រីកម្ពុជា លោក ដួង តារា បានស្នើសុំទំព័រហ្វេសប៊ុកផ្លូវការរបស់បុរសខ្លាំងលោក ហ៊ុន សែន ឱ្យដំណើរការ ឬ Activated ឡើងវិញហើយនៅថ្ងៃទី២០ កក្កដា នេះ បន្ទាប់ពីទំព័រហ្វេសប៊ុកនេះត្រូវរងនូវការព្រមានពីក្រុមហ៊ុនមេតាហ្វេសប៊ុក និងការប្រកាសលុបចោលលែងប្រើប្រាស់ជាផ្លូវការពីសំណាក់មេដឹកនាំខ្មែរលោក ហ៊ុន សែន អស់រយៈពេលជិត ១ខែកន្លងមក។
អ្នកគ្រប់គ្រងទំព័រហ្វេសប៊ុកនាយករដ្ឋមន្ត្រីកម្ពុជា លោក ដួង តារា សរសេរលើទំព័រហ្វេសប៊ុកលោកនាយករដ្ឋមន្ត្រី ហ៊ុន សែន ដែលទើបនឹងដំណើរការឡើងវិញនៅថ្ងៃទី២០ កក្កដា នេះថា ការបើកឱ្យទំព័រហ្វេសប៊ុកផ្លូវការរបស់លោក ហ៊ុន សែន ដំណើរការ ឬ Activated ឡើងវិញនៅពេលនេះ ដោយសារតែលោកមិនចង់ឱ្យបាត់បង់នូវទំព័រហ្វេសប៊ុកដ៏មានសារសំខាន់ដែលលោកបានប្រើរយៈពេលអស់ ១៣ឆ្នាំក្នុងការផ្សព្វផ្សាយសកម្មភាពរបស់លោក ហ៊ុន សែន កន្លងមកនោះទេ។
លោក ដួង តារា លើកឡើងថា លោកបានសម្រេចចិត្តស្នើយកទំព័រហ្វេសប៊ុកលោក ហ៊ុន សែន មកប្រើប្រាស់ឡើងវិញ និងស្នើសុំរក្សាទំព័រហ្វេសប៊ុកមួយនេះទុកបន្តប្រើជាប្រយោជន៍សម្រាប់សង្គមជាតិទៅថ្ងៃមុខ ទោះបីលោក ហ៊ុន សែន មិនប្រើប្រាស់ទំព័រហ្វេសប៊ុកមួយនេះទៅថ្ងៃក្រោយក៏ដោយ។
អ្នកគ្រប់គ្រងទំព័រហ្វេសប៊ុកនាយករដ្ឋមន្ត្រីកម្ពុជារូបនេះបញ្ជាក់ថា កាលពីថ្ងៃទី២៨ ខែមិថុនា ឆ្នាំ២០១០ មុនលោកចូលបម្រើការងារឱ្យលោក ហ៊ុន សែន លោកបានបង្កើតទំព័រហ្វេសប៊ុកមួយដែលមានឈ្មោះថា “Samdech Hun Sen, Cambodian Prime Minister” ដើម្បីទុកជូនគាត់សម្រាប់ប្រើប្រាស់ក្នុងការទំនាក់ទំនងជាមួយពលរដ្ឋខ្មែរទាំងក្នុង និងក្រៅប្រទេស ហើយចាប់តាំងពីពេលនោះមក ទំព័រហ្វេសប៊ុកមួយនេះបានផ្តល់អត្ថប្រយោជន៍ច្រើនណាស់សម្រាប់ពលរដ្ឋក្នុងការទាក់ទងជាមួយលោក ហ៊ុន សែន។
លោក ដួង តារា បញ្ជាក់ថា ដោយសារតែលោកបានឃើញអំពីសារសំខាន់នៃបណ្ដាញទំនាក់ទំនងសង្គមហ្វេសប៊ុកបែបនេះហើយ ទើបលោកមិនចង់ឱ្យបាត់បង់នូវទំព័រហ្វេសប៊ុកដ៏មានសារសំខាន់មួយនេះដោយប្រការណាមួយនោះ។
ការអះអាងនេះ ធ្វើឡើងបន្ទាប់ពីទំព័រហ្វេសប៊ុករបស់នាយករដ្ឋមន្ត្រីកម្ពុជាត្រូវបានបើកឱ្យដំណើរការ ឬ Activated ឡើងវិញនៅថ្ងៃទី២០ កក្កដា នេះ ក្រោយពេលលោក ហ៊ុន សែន ប្រកាសលុបចោលលែងប្រើប្រាស់កាលពីចុងខែមិថុនា កន្លងទៅ។
ជុំវិញការបើកឱ្យដំណើរការឡើងវិញនូវទំព័រហ្វេសប៊ុករបស់លោក ហ៊ុន សែន នៅពេលនេះ ក៏មានអ្នកលេងបណ្ដាញសង្គមហ្វេសប៊ុកបញ្ចេញទស្សនៈយល់ឃើញរៀងៗខ្លួន ដោយការរិះគន់ផង និងគាំទ្រផងដែរព្រោងព្រាតលើបណ្ដាញសង្គមហ្វេសប៊ុក។
ជាក់ស្តែង សកម្មជនគណបក្សសង្គ្រោះជាតិ លោក ប៉ាង សុខឿន បានសរសេរក្នុងប្រអប់បញ្ចេញមតិនៃទំព័រហ្វេសប៊ុកលោក ហ៊ុន សែន ដែលទើបនឹងដំណើរការឡើងវិញនៅថ្ងៃនេះថា លោកមិនជឿថាលោក ដួង តារា ស្នើឱ្យទំព័រហ្វេសប៊ុករបស់លោកនាយករដ្ឋមន្ត្រីឡើងវិញដោយគ្មានការអនុញ្ញាតិពីលោក ហ៊ុន សែន នោះទេ។
លោកបានចោទសួរទៅកាន់លោក ហ៊ុន សែន ថា តើមកពីខ្លាចខ្មាសគេមែនទេ បានជាប្រើឱ្យលោក ដួង តារា ធ្វើល្បិចកលនិយាយបែបនេះ?
យ៉ាងណាក៏ដោយ ប្រធានវិទ្យាស្ថានទំនាក់ទំនងអន្តរជាតិកម្ពុជា បណ្ឌិត គិន ភា សរសេរក្នុងប្រអប់បញ្ចេញមតិរបស់ទំព័រហ្វេសប៊ុកដែលទើបនឹងដំណើរការឡើងវិញនោះថា លោកនៅតែសង្ឃឹមថា លោក ហ៊ុន សែន នឹងប្រើប្រាស់ទំព័រហ្វេសប៊ុកនេះឡើងវិញ ព្រោះទំព័រហ្វេសប៊ុកនេះមានសារប្រយោជន៍សម្រាប់ប្រទេសកម្ពុជា ទាំងទិដ្ឋភាពនយោបាយ សេដ្ឋកិច្ច សង្គម អប់រំ និងទំនាក់ទំនង ជាពិសេសអ្វីៗដែលបានផ្សព្វផ្សាយលើទំព័រហ្វេសប៊ុកមួយនេះអស់រយៈពេលជាង ១០ឆ្នាំកន្លងមក។
កាលពីថ្ងៃទី២៩ ខែមិថុនា ឆ្នាំ២០២៣ បុរសខ្លាំងក្រាញអំណាចលោក ហ៊ុន សែន បានប្រកាសលុបទំព័រហ្វេសប៊ុករបស់លោកជាផ្លូវការ បន្ទាប់ពីទំព័រហ្វេសប៊ុកមួយនេះត្រូវរងនូវការពិន័យពីក្រុមហ៊ុនមេតាហ្វេសប៊ុកដែលនឹងត្រូវព្យួររយៈពេល ៦ខែ ដោយគិតចាប់ពីថ្ងៃទី២៩ ខែមិថុនា ឆ្នាំ២០២៣ តទៅ។
យ៉ាងណាក៏ដោយ បន្ទាប់ពីទំព័រហ្វេសប៊ុករបស់លោក ហ៊ុន សែន ត្រូវរងនូវការព្រមាន មេដឹកនាំខ្មែរក្តោបអំណាចផ្ដាច់មុខនៅកម្ពុជារូបនេះ កាលពីថ្ងៃទី៤ ខែកក្កដា ឆ្នាំ២០២៣ ក៏បានបណ្តេញតំណាងក្រុមហ៊ុនហ្វេសប៊ុកចំនួន ២២នាក់ផងដែរ ក្រោមលេសថា ក្រុមហ៊ុនហ្វេសប៊ុក គឺមានចេតនារារាំងសេរីភាពសារព័ត៌មានរបស់ពលរដ្ឋខ្មែរ និងសិទ្ធិរបស់ប្រជាពលរដ្ឋក្នុងការទទួលបានព័ត៌មានពិតពីថ្នាក់ដឹកនាំដែលពួកគេគាំទ្រ និងពេញចិត្ត។
លោក ហ៊ុន សែន ចំអកថា តំណាងក្រុមហ៊ុនហ្វេសប៊ុកទាំង ២២នាក់នោះមិនត្រូវបានអនុញ្ញាតឱ្យចូលស្រុកខ្មែរអស់មួយជីវិត ហើយនេះគឺជាលទ្ធផលដែលពួកគេបង្កឡើងតាមរយៈនយោបាយជ្រៀតជ្រែកកិច្ចការផ្ទៃក្នុងរបស់កម្ពុជា។
ក្រុមអ្នកសង្កេតការណ៍លើកឡើងថា លោក ហ៊ុន សែន ជាមនុស្សញៀននឹងហ្វេសប៊ុក លោកមិនអាចរស់នៅដោយគ្មានហ្វេសប៊ុកលេងនឹងគេបានទេ ប៉ុន្តែដើម្បីលុបចោលសម្ដីដែលខ្លួនបានប្រកាសឈប់ប្រើហ្វេសប៊ុក គាត់មានតែរកល្បិចឱ្យលោក ដួង តារា ស្នើយកទំព័រហ្វេសប៊ុកនេះមកវិញដូចដែលលោក ដួង តារា បានអះអាងខាងលើនេះប៉ុណ្ណោះ។
ប្រភពដដែលអះអាងថា មិនយូរទេ លោក ហ៊ុន សែន នឹងប្រើទំព័រហ្វេសប៊ុកនេះវិញ ដោយយកពលរដ្ឋជាលេស ឬប្រើល្បិចដូចឧកញ៉ា ឡេង ណាវ៉ាត្រា ដែលបានប្រកាសលុបទំព័រហ្វេសប៊ុករបស់ខ្លួនចោល ហើយប្រកាសប្រើវិញក្រោមហេតុផលថា បញ្ឈឺចិត្តក្រុមប្រឆាំងដែលជំរុញឱ្យគាត់លុបទំព័រហ្វេសប៊ុកនោះ៕