បណ្ដាញសហជីពកម្ពុជាដែលការពារផលប្រយោជន៍របស់កម្មករ សម្ដែងការព្រួយបារម្ភយ៉ាងខ្លាំងចំពោះអនាគតកម្មករនិយោជិតកម្ពុជានៅពេលរោងចក្រដែលកំពុងវិនិយោគនៅក្នុងប្រទេស នាំគ្នាប្រកាសបិទបញ្ចប់កិច្ចសន្យាការងារ និងព្យួរការងារកម្មករនិយោជិត បន្ទាប់ពីដំណើរនៃការបោះឆ្នោតឆ្នាំ២០២៣ នេះកំពុងរងនូវការព្រមានដាក់ទណ្ឌកម្មសេដ្ឋកិច្ច និងទណ្ឌកម្មបុគ្គលពីសហគមន៍អន្តរជាតិ។
សហព័ន្ធសហជីពសេរីកម្មករកម្ពុជា (FTUWKC) បានសរសេរលើទំព័រហ្វេសប៊ុករបស់ខ្លួនកាលពីថ្ងៃទី២៦ ខែកក្កដា ឆ្នាំ២០២៣ នេះថា ពួកគេមានការភ័យព្រួយយ៉ាងខ្លាំងក្រោយទទួលបានព័ត៌មានពីតំណាងសហជីពមូលដ្ឋានដែលជាសមាជិកថា នៅតាមបណ្តាក្រុមហ៊ុននានានៅកម្ពុជា ថៅកែរោងចក្របានបញ្ចប់កិច្ចសន្យាការងារ និងព្យួរការងារកម្មករនិយោជិតជាបន្តបន្ទាប់ហើយនៅពេលនេះ។
ការសម្រេចបញ្ចប់កិច្ចសន្យាការងារ និងព្យួរការងារកម្មករនិយោជិតកម្ពុជានៅពេលនេះ ត្រូវគេរិះគន់ថា មូលហេតុចម្បងគឺបណ្តាលមកពីការបោះឆ្នោតដែលសហគមន៍អន្តរជាតិមិនអាចទទួលយកបាននៅពេលនេះ។
អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន បានសរសេរលើគណនីហ្វេសប៊ុករបស់លោកនៅថ្ងៃទី២៧ កក្កដា នេះថា ក្រុមហ៊ុនរោងចក្រនានានៅកម្ពុជាបានបញ្ចប់កិច្ចសន្យាការងារ និងព្យួរការងារកម្មករនិយោជិត ដោយសារតែក្រុមហ៊ុនទាំងនោះគ្មានការបញ្ជាទិញពីសហគមន៍អឺរ៉ុប បន្ទាប់ពីការបោះឆ្នោតក្លែងក្លាយមួយដែលគេមើលឃើញថា កម្ពុជានឹងរងនូវទណ្ឌកម្មនានានៅថ្ងៃមុខ។
លោក អ៊ុំ សំអាន លើកឡើងថា បន្ទាប់ពីការបោះឆ្នោតក្លែងក្លាយ សហភាពអឺរ៉ុបនឹងផ្តាច់ប្រព័ន្ធការអនុគ្រោះពន្ធ EBA ១០០ភាគរយ ខណៈសហរដ្ឋអាមេរិកក៏នឹងមិនផ្តល់ប្រព័ន្ធការអនុគ្រោះពន្ធទូទៅ (GSP) ដល់កម្ពុជាវិញដែរ ស្របពេលដែលមេដឹកនាំបក្សកាន់អំណាចលោក ហ៊ុន សែន មិនខ្វល់ពីជីវភាពរបស់កម្មករនោះទេ ទោះជាប្រព័ន្ធអនុគ្រោះពន្ធទាំងនោះត្រូវបានកាត់ផ្តាច់ដោយសារការរំលោភច្បាប់ក្រោមការដឹកនាំរបស់គាត់ក៏ដោយ សំខាន់ឱ្យតែគាត់អាចផ្ទេរអំណាចផ្ដាច់ការតពូជទៅកូនរបស់គាត់បាន គាត់មិនខ្វល់ពីសុខទុក្ខកម្មករអ្វីទាំងអស់។
កាលពីថ្ងៃទី២៦ ខែកក្កដា ឆ្នាំ២០២៣ មេដឹកនាំខ្មែរក្រាញអំណាចតត្រកូល លោក ហ៊ុន សែន សម្ដែងការសោកស្តាយដែលលោកមិនបានចុះសួរសុខទុក្ខកម្មករតាមរោងចក្រដូចការសន្យានៅមុនការបោះឆ្នោត ប៉ុន្តែមេដឹកនាំខ្មែររូបនេះបញ្ជាក់ថា រដ្ឋាភិបាលថ្មី និងនាយករដ្ឋមន្ត្រីថ្មី គឺលោក ហ៊ុន ម៉ាណែត ដែលនឹងឡើងកាន់តំណែងនៅក្រោយការបោះឆ្នោតនេះ នឹងចុះសួរសុខទុក្ខកម្មករទាំងនោះជំនួសលោកជាមិនខាន។
ទាក់ទិននឹងបញ្ហានេះ អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី២៥ ខែកក្កដា នេះថា រដ្ឋាភិបាលថ្មីដែលកើតក្រោយការបោះឆ្នោតរំលោភច្បាប់ឆ្នាំ២០២៣ នេះ កំពុងបង្កវិនាសកម្មយ៉ាងធំធេងដល់ផលប្រយោជន៍របស់ប្រទេសកម្ពុជា និងពលរដ្ឋខ្មែរ ក្នុងនោះប្រព័ន្ធអនុគ្រោះពន្ធនានាទាំង EBA របស់សហភាពអឺរ៉ុប និង GSP សហរដ្ឋអាមេរិក នឹងត្រូវបាត់បង់ទាំងស្រុង។
លោក គឹម សុខ លើកឡើងថា គ្រាន់តែការបោះឆ្នោតក្លែងក្លាយបានបញ្ចប់ភ្លាម សហរដ្ឋអាមេរិកក៏បានសម្រេចដាក់ទណ្ឌកម្មភ្លាមដែរ ទាំងដែលរដ្ឋាភិបាល និងនាយករដ្ឋមន្ត្រីថ្មីដែលដឹកនាំដោយលោក ហ៊ុន ម៉ាណែត មិនទាន់ត្រូវបានបង្កើតឡើងផងនោះ ដែលនេះគឺមានន័យថា ប្រសិនបើរដ្ឋាភិបាលថ្មីនេះនៅតែបន្តរំលោភច្បាប់ទៀតនោះ ទណ្ឌកម្មនានាដូចជាការបិទទិដ្ឋាការប្រាកដជានឹងដាក់ចំមុខលោក ហ៊ុន ម៉ាណែត ដែលជានាយករដ្ឋមន្ត្រីថ្មីនេះតែម្តង។
អ្នកវិភាគនយោបាយរូបនេះបញ្ជាក់ថា នៅពេលដែលប្រព័ន្ធអនុគ្រោះពន្ធ EBA របស់សហភាពអឺរ៉ុប និង GSP សហរដ្ឋអាមេរិកត្រូវបានកាត់ផ្តាច់ ព្រមទាំងការដាក់បម្រាមរបស់សហរដ្ឋអាមេរិកមិនឱ្យប្រទេសដែលធ្លាប់មានទំនាក់ទំនងសេដ្ឋកិច្ចពាណិជ្ជកម្មជាមួយប្រទេសកម្ពុជាបន្តការរកស៊ីជាមួយកម្ពុជាទៅមុខទៀតដែលនឹងអាចកើតមានឡើង ដោយសារតែរដ្ឋាភិបាលខុសច្បាប់នេះ នោះផលប្រយោជន៍របស់ប្រជាពលរដ្ឋខ្មែរ ជាពិសេសកម្មករ នឹងត្រូវបាត់បង់ធ្ងន់ធ្ងរ ដូចជាភាពអត់ការងារធ្វើនឹងកើតមានពេញផ្ទៃប្រទេសជាមិនខាន។
នៅដើមឆ្នាំ២០២៣ នេះ មានរោងចក្រជាង ១០កន្លែងហើយដែលបានបិទទ្វារ ខណៈរោងចក្រចំនួន ៧១ ព្យួរកិច្ចសន្យាការងារ និងរោងចក្រ ៦០ ផ្សេងទៀតបានកាត់បន្ថយបុគ្គលិក ដែលនាំឱ្យប៉ះពាល់ដល់កម្មករជាង ៣ម៉ឺននាក់ ខណៈកម្មករជាច្រើននាក់ផ្សេងទៀតបានបាត់បង់ការងារទាំងស្រុង៕