អតីតមេដឹកនាំបក្សប្រឆាំងលោក សម រង្ស៊ី លាតត្រដាងនូវលិខិតរបាយការណ៍សម្រាប់បម្រើការឱ្យការបោះឆ្នោតទម្រង់ ១១/០២ ថាជាភស្តុតាងបន្ថែមទៀតដែលអាចបញ្ជាក់ថា សន្លឹកឆ្នោតជាច្រើននៅតាមការិយាល័យបោះឆ្នោតទាំងជាង ២ម៉ឺនកន្លែងនៅទូទាំងប្រទេស សុទ្ធតែត្រូវបានគណៈកម្មាធិការជាតិរៀបចំការបោះឆ្នោត (គ.ជ.ប) លួចបន្លំឱ្យគណបក្សប្រជាជនកម្ពុជា។
អតីតមេដឹកនាំបក្សប្រឆាំងលោក សម រង្ស៊ី បានទម្លាយនូវទម្រង់បែបបទ ១១/០២ សម្រាប់បម្រើការឱ្យការបោះឆ្នោតនៅថ្ងៃទី២៣ ខែកក្កដា កន្លងទៅនេះថា នៅក្នុងរបាយការណ៍ដែលបានកត់ត្រាអំពីសន្លឹកឆ្នោតនៅលើលិខិតនេះមិនមានការកត់ត្រាបែងចែកសន្លឹកឆ្នោតរបស់គណបក្សនយោបាយនីមួយៗនោះទេ គឺកត់ត្រាតែចំនួនសន្លឹកឆ្នោតសរុបតែប៉ុណ្ណោះ។
លោក សម រង្ស៊ី ចោទថា ផ្អែកតាមការកត់ត្រាលើទម្រង់របាយការណ៍ ១១/០២ នេះ បង្ហាញថាគណៈកម្មាធិការជាតិរៀបចំការបោះឆ្នោត (គ.ជ.ប) ពិតជាបានលួចបន្លំសន្លឹកឆ្នោតតាមអំពើចិត្តក្នុងបំណងបំប៉ោងតួលេខសន្លឹកឆ្នោតឱ្យគណបក្សប្រជាជនកម្ពុជាយ៉ាងពិតប្រាកដ ដើម្បីកាត់បន្ថយចំនួនសន្លឹកឆ្នោតដែលត្រូវបានប្រជាពលរដ្ឋគូសខ្វែងចោលនៅថ្ងៃបោះឆ្នោតនោះ។
អតីតមេដឹកនាំបក្សប្រឆាំងរូបនេះបញ្ជាក់ថា ប្រទេសដែលប្រកាន់របបប្រជាធិបតេយ្យសេរីនៅលើពិភពលោក មិនអាចទទួលយកការបោះឆ្នោតឆ្នាំ២០២៣ នៅកម្ពុជានេះបានទេ ព្រោះគេចាត់ទុកថាជាការបោះឆ្នោតដែលបំផ្លាញលទ្ធិប្រជាធិបតេយ្យ ដោយសារតែលោក ហ៊ុន សែន បានរៀបចំឱ្យមានការលួចបន្លំក្នុងដំណើរការនៃការបោះឆ្នោតនេះ ដែលផ្ទុយពីឆន្ទៈរបស់ពលរដ្ឋម្ចាស់ឆ្នោតក្នុងការជ្រើសរើសមេដឹកនាំ និងគណបក្សនយោបាយដែលពួកគេស្រឡាញ់ពេញចិត្ត។
កាលពីថ្ងៃទី២៦ ខែកក្កដា ឆ្នាំ២០២៣ លោក សម រង្ស៊ី បានបង្ហោះទម្រង់លិខិត ១១/០២ នៃការិយាល័យបោះឆ្នោតចំនួន៣ ក្នុងខេត្តកណ្តាល រួមមានការិយាល័យលេខ ១៥.៨៨ ការិយាល័យលេខ ១៥.៨៤ និងការិយាល័យលេខ ១៥.៩៦ ជាដើម សម្រាប់បម្រើការឱ្យការបោះឆ្នោតកាលពីថ្ងៃទី២៣ ខែកក្កដា ឆ្នាំ២០២៣ កន្លងទៅ ដែលបង្ហាញថា ការិយាល័យទាំងនោះមិនបានកត់ត្រាចំនួនសន្លឹកឆ្នោតរបស់គណបក្សនយោបាយដែលបានចូលរួមឈរឈ្មោះបោះឆ្នោតនៅការិយាល័យទាំងនោះទេ គ្រាន់តែកត់ត្រានូវចំនួនសន្លឹកឆ្នោតសរុបប៉ុណ្ណោះ ដែលជាភស្តុតាងមួយបញ្ជាក់ថា សន្លឹកឆ្នោតទាំងនោះត្រូវបានគេលួចបន្លំ។
ទាក់ទិននឹងការបោះឆ្នោតជាតិនៅកម្ពុជាឆ្នាំ២០២៣ នេះ សារព័ត៌មានបរទេសដែលមានឈ្មោះថា NIKEI ASIA បានចុះផ្សាយកាលពីថ្ងៃទី២៦ កក្កដា នេះថា ការបោះឆ្នោតដែលគណបក្សប្រជាជនកម្ពុជាទទួលជ័យជម្នះភ្លូកទឹកភ្លូកដីកាលពីថ្ងៃទី២៣ ខែកក្កដា កន្លងទៅ គឺជាដំណើរការមួយដែលនៅឆ្ងាយពីលទ្ធិប្រជាធិបតេយ្យយ៉ាងខ្លាំង ដោយសារតែគណបក្សប្រឆាំងដ៏ធំបំផុតត្រូវបានដកហូតសិទ្ធិមិនឱ្យចូលរួម ដូច្នេះដំណើរការទាំងមូលជុំវិញការបោះឆ្នោតនេះគ្មានអ្វីក្រៅពីការរំលោភអំណាចដើម្បីបំផ្លាញលទ្ធិប្រជាធិបតេយ្យនោះឡើយ។
សារព័ត៌មានបរទេសខាងលើលើកឡើងថា ការបង្ក្រាបឥតឈប់ឈររបស់មេដឹកនាំបក្សកាន់អំណាចលោក ហ៊ុន សែន លើគូប្រជែងនយោបាយ ត្រូវបានគេយល់ថាជាការខិតខំឱ្យគ្រួសាររបស់គាត់អាចបន្តកាន់អំណាចទៅថ្ងៃមុខ ហើយបើផ្អែកតាមរយៈនៃការបោះឆ្នោតឆ្នាំ២០២៣ នេះ ដោយគិតតាំងពីកម្ពុជាមានការបោះឆ្នោតសកលតាមបែបប្រជាធិបតេយ្យលើកដំបូងនៅឆ្នាំ១៩៩៣ មក កម្ពុជានៅតែមិនទាន់ធ្វើឱ្យមានប្រជាធិបតេយ្យពេញលេញដូចអ្វីដែលបានចែងក្នុងកិច្ចព្រមព្រៀងសន្តិភាពឆ្នាំ១៩៩១ នៅឡើយ៕