សមាជិកមេធាវីកម្ពុជាលោក ជូង ជូងី សម្រេចដាក់ពាក្យទៅកាន់សាលាដំបូងរាជធានីភ្នំពេញ ដើម្បីស្នើសុំឱ្យតុលាការដោះលែងអនុប្រធានគណបក្សភ្លើងទៀន លោក ថាច់ សេដ្ឋា ឱ្យមានសេរីភាពឡើងវិញ ស្របពេលដែលកូនក្ដីរបស់លោកកំពុងមានបញ្ហាសុខភាពជាច្រើនមុខ ដើម្បីទទួលការព្យាបាលពីគ្រូពេទ្យជំនាញ។
លោក ជូង ជូងី បានដាក់ពាក្យទៅកាន់តុលាការក្រុងភ្នំពេញ កាលពីថ្ងៃទី២៥ ខែកក្កដា ឆ្នាំ២០២៣ និងត្រូវបានផ្សព្វផ្សាយកាលពីយប់ថ្ងៃទី២៧ កក្កដា នេះ ដោយស្នើឱ្យសាលាដំបូងរាជធានីភ្នំពេញដោះលែងអនុប្រធានគណបក្សភ្លើងទៀន លោក ថាច់ សេដ្ឋា ពីមន្ទីរឃុំឃាំងដើម្បីឱ្យលោកមានសេរីភាពឡើងវិញ ព្រោះថាតាមគោលការណ៍ច្បាប់ នៅពេលដែលមិនទាន់មានសាលក្រមស្ថាពរណាមួយសម្រេចផ្ដន្ទាទោសលោក ថាច់ សេដ្ឋា ទេ នោះកូនក្ដីរបស់លោកនៅតែជាជនគ្មានទោសដដែល។
លោក ជូង ជូងី លើកឡើងថា ចាប់តាំងពីលោក ថាច់ សេដ្ឋា ត្រូវបានចាប់ឃុំខ្លួនមក ចៅក្រមស៊ើបសួរបានបញ្ចប់ការស៊ើបសួរអស់ហើយ ដូច្នេះនីតិវិធីក្នុងរឿងក្ដីនេះគឺនៅសល់តែសវនាការវិនិច្ឆ័យសេចក្តីតែប៉ុណ្ណោះ ដូចនេះមិនមានភាពចាំបាច់ត្រូវរក្សាលោក ថាច់ សេដ្ឋា ទុកជូនតុលាការចាត់ការតាមនីតិវិធីទៀតទេ។
មេធាវីកម្ពុជារូបនេះបញ្ជាក់ថា អំឡុងពេលដែលលោក ថាច់ សេដ្ឋា កំពុងត្រូវបានឃុំខ្លួនក្នុងពន្ធនាការនៅពេលនេះ គាត់មានបញ្ហាសុខភាពធ្ងន់ធ្ងរច្រើនប្រភេទ ដូចជាខ្លាញ់រុំបេះដូង លើសឈាម ឡើងជាតិស្ករ ឡើងជាតិអាស៊ីត ដែលត្រូវការការព្យាបាលពីវេជ្ជបណ្ឌិតជាប្រចាំ ហើយបញ្ហាសុខភាពទាំងនេះក៏មិនអាចឱ្យលោករត់គេចខ្លួនពីប្រព័ន្ធច្បាប់បានដែរ។
ការស្នើសុំតុលាការឱ្យដោះលែងលោក ថាច់ សេដ្ឋា នៅពេលនេះ ធ្វើឡើងបន្ទាប់ពីអនុប្រធានគណបក្សភ្លើងទៀនរូបនេះកំពុងញាំញីដោយជំងឺអំឡុងពេលលោកត្រូវបានឃុំខ្លួននៅក្នុងពន្ធនាគារ ដែលធ្វើឱ្យសុខភាពរបស់លោកធ្លាក់ចុះពីមួយថ្ងៃទៅមួយថ្ងៃជាលំដាប់។
កាលពីថ្ងៃទី១៧ ខែកក្កដា ឆ្នាំ២០២៣ អនុប្រធានគណបក្សភ្លើងទៀន លោក ថាច់ សេដ្ឋា បានសម្រេចប្រគល់សិទ្ធិជូនសមាជិកគណៈមេធាវីកម្ពុជាលោក ជូង ជូងី ឱ្យរៀបចំដាក់ពាក្យទៅតុលាការដើម្បីស្នើសុំឱ្យដោះលែងរូបលោកបាននៅក្រៅឃុំបណ្ដោះអាសន្នតាមនីតិវិធីច្បាប់។
កាលពីចុងខែមេសា ឆ្នាំ២០២៣ តុលាការក្រុងភ្នំពេញបានចោទប្រកាន់អនុប្រធានគណបក្សភ្លើងទៀន លោក ថាច់ សេដ្ឋា នូវបទល្មើសចំនួនពីរបន្ថែមទៀត គឺបទចោទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបទញុះញង់ឱ្យមានការរើសអើង» បន្ថែមពីលើសំណុំរឿងចាស់ដែលលោកត្រូវបានចោទប្រកាន់ពីបទចេញសែកស្អុយ និងត្រូវបានសមត្ថកិច្ចចាប់ឃុំខ្លួនកាលពីថ្ងៃទី១៦ ខែមករា ឆ្នាំ២០២៣ កន្លងទៅនោះ។
ទាក់ទិននឹងបញ្ហានេះ កាលពីថ្ងៃទី១០ ខែឧសភា ឆ្នាំ២០២៣ ក្នុងសវនាការដែលតុលាការដេញដោលលើបទចោទថ្មីនេះ អនុប្រធានបក្សភ្លើងទៀន លោក ថាច់ សេដ្ឋា បានស្នើទៅតុលាការក្រុងភ្នំពេញឱ្យទម្លាក់បទចោទទាំងនេះ ដោយលោកអះអាងថា លោកមិនបានប្រព្រឹត្តដូចការចោទប្រកាន់នោះឡើយ។
ការចោទប្រកាន់ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបទញុះញង់ឱ្យមានការរើសអើងនេះ ត្រូវបានតុលាការអះអាងថា ធ្វើឡើងជុំវិញការលើកឡើងរបស់លោក ថាច់ សេដ្ឋា អំឡុងពេលដែលលោកទៅបំពេញបេសកកម្មជួបអ្នកគាំទ្រនៅប្រទេសជប៉ុន កាលពីចុងឆ្នាំ២០២២ និងនៅប្រទេសកូរ៉េខាងត្បូង កាលពីដើមឆ្នាំ២០២៣ កន្លងទៅនេះ។
កាលពីអំឡុងខែមករា ឆ្នាំ២០២៣ លោក ថាច់ សេដ្ឋា ធ្លាប់បានលើកឡើងនៅមុខអ្នកគាំទ្ររបស់ខ្លួននៅប្រទេសកូរ៉េខាងត្បូង ថា ប្រទេសដែលដឹកនាំដដែលយូរឆ្នាំមិនបានធ្វើឱ្យជាតិរីកចម្រើនឡើយ។ ជាងនេះទៀត លោកក៏ទាមទារឱ្យមានការធ្វើច្បាប់កំណត់អាណត្តិនាយករដ្ឋមន្ត្រី និងកែទម្រង់ប្រព័ន្ធតុលាការកម្ពុជាផងដែរ។
គិតមកទល់នឹងថ្ងៃទី២៨ ខែកក្កដា ឆ្នាំ២០២៣ នេះ លោក ថាច់ សេដ្ឋា ត្រូវបានឃុំនៅពន្ធនាគារព្រៃស (ម១) អស់រយៈពេល ១៩៣ថ្ងៃ ឬជាង ៦ខែហើយ ប៉ុន្តែប្រសិនបើតុលាការសម្រេចផ្ដន្ទាទោសលោកលើសំណុំរឿងថ្មីនេះ នោះអនុប្រធានគណបក្សភ្លើងទៀនរូបនេះនឹងត្រូវប្រឈមមុខជាប់ពន្ធនាគារពី ០៦ខែទៅ ២ឆ្នាំឯណោះ។
យ៉ាងណាក៏ដោយ កាលពីថ្ងៃទី១០ ខែឧសភា ឆ្នាំ២០២៣ លោក ថាច់ សេដ្ឋា បានប្ដេជ្ញាថា លោកនៅតែបន្តឆន្ទៈជាមួយគណបក្សភ្លើងទៀនដដែល ទោះត្រូវស្ថិតក្នុងកាលៈទេសៈដូចពេលនេះក៏ដោយ៕