បុរសខ្លាំងក្រាញអំណាចនៅកម្ពុជា លោក ហ៊ុន សែន ប្រកាសផ្តល់តំណែងដល់មេដឹកនាំគណបក្សក្រៅរដ្ឋាភិបាលជាមន្ត្រីរដ្ឋាភិបាលបន្តទៀតក្នុងនាមជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ បន្ទាប់ពីមេដឹកនាំបក្សនយោបាយទាំងនោះបារម្ភពីការបាត់បង់តំណែងរបស់ខ្លួនក្រោយពេលលោក ហ៊ុន សែន ប្រកាសលាលែងតំណែងជានាយករដ្ឋមន្ត្រីសម្រាប់អាណត្តិក្រោយនេះ។
លោក ហ៊ុន សែន បានចេញខ្សែអាត់សំឡេងមួយកាលពីថ្ងៃទី៣០ ខែកក្កដា ឆ្នាំ២០២៣ ថា បន្ទាប់ពីមេដឹកនាំគណបក្សក្រៅរដ្ឋាភិបាលភ័យព្រួយពីការបាត់បង់តំណែងជាសមាជិកនៃឧត្តមក្រុមប្រឹក្សាពិគ្រោះ និងផ្តល់យោបល់ ក្រោយការប្រកាសលាលែងពីតំណែងជានាយករដ្ឋមន្ត្រី លោកត្រូវតែប្រកាសទុកមុនឱ្យហើយថា ពួកគេនៅតែត្រូវបានតែងតាំងឱ្យបន្តតំណែងរបស់ខ្លួនដដែលសម្រាប់គណបក្សនយោបាយដែលបានចូលរួមការបោះឆ្នោត ចំណែកគណបក្សដែលមិនបានចូលរួមការបោះឆ្នោត គឺត្រូវរង់ចាំការសម្រេចរបស់នាយករដ្ឋមន្ត្រីថ្មី។
លោក ហ៊ុន សែន បញ្ជាក់ថា ការសម្រេចបន្តសុពលភាពដល់មេដឹកនាំនយោបាយទាំងនោះ ដោយសារតែរដ្ឋាភិបាលដែលដឹកនាំដោយគណបក្សប្រជាជនកម្ពុជាត្រូវការធនធានមនុស្សចូលរួមក្នុងការកសាងសង្គមជាតិទៅថ្ងៃមុខ។
ការអះអាងនេះ ធ្វើឡើងបន្ទាប់ពីលោក ហ៊ុន សែន ប្រកាសរក្សាតំណែងមន្ត្រីរដ្ឋាភិបាលកម្ពុជាដែលលោកធ្លាប់បានតែងតាំងទាំងអស់កាលពីពេលថ្មីៗនេះ អំឡុងពេលដែលលោកក្លាយជានាយករដ្ឋមន្ត្រីចាំផ្ទះនៅពេលនេះ។
កាលពីថ្ងៃទី២៩ ខែកក្កដា ឆ្នាំ២០២៣ លោក ហ៊ុន សែន បានប្រកាសទុកតំណែងមន្ត្រីរាជការទាំងអស់ ទាំងស៊ីវិល និងយោធា ឱ្យរក្សានៅដដែល ក្នុងនោះមន្ត្រីនយោបាយ ដូចជាអនុរដ្ឋលេខាធិការ និងរដ្ឋលេខាធិការ ជាដើម ក៏ត្រូវរក្សាតំណែងទុកដដែលដែរ ប៉ុន្តែសម្រាប់អ្នកមានតំណែងជារដ្ឋមន្ត្រីប្រតិភូអមនាយករដ្ឋមន្ត្រី ត្រូវតែជ្រើសរើសតំណែងតែមួយប៉ុណ្ណោះ ព្រោះអ្នកខ្លះមានតំណែងជារដ្ឋលេខាធិការផង និងមានតំណែងជារដ្ឋមន្ត្រីប្រតិភូអមនាយករដ្ឋមន្ត្រីផងដែរ។
យ៉ាងណាក៏ដោយ លោក ហ៊ុន សែន បញ្ជាក់ថា សម្រាប់អគ្គនាយកពន្ធដារ និងអគ្គនាយកគយ ត្រូវបានរក្សាតំណែងទាំងពីរដដែល គឺតំណែងរដ្ឋមន្ត្រីប្រតិភូអមនាយករដ្ឋមន្ត្រីផង និងតំណែងជាអគ្គនាយកផង ព្រោះថាពួកគេត្រូវធ្វើការជាមួយរដ្ឋមន្ត្រីផង និងត្រូវធ្វើការជាមួយនាយករដ្ឋមន្ត្រីផងដែរ ដែលត្រូវរាយការណ៍ដោយផ្ទាល់ពីថវិកាប្រចាំថ្ងៃ និងប្រចាំខែ។
អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ បានប្រាប់សារព័ត៌មាន The Cambodia Daily នៅថ្ងៃទី៣១ កក្កដា នេះថា ការប្រកាសតែងតាំងមន្ត្រីរដ្ឋាភិបាលអាណត្តិថ្មីពីសំណាក់លោក ហ៊ុន សែន ដែលជានាយករដ្ឋមន្ត្រីចាំផ្ទះក្នុងអន្តរកាលនៅពេលនេះ គឺជាទង្វើរំលោភបំពានរដ្ឋធម្មនុញ្ញយ៉ាងធ្ងន់ធ្ងរ ព្រោះថាតាមខ្លឹមសាររដ្ឋធម្មនុញ្ញ មានតែនាយករដ្ឋមន្ត្រីថ្មីដែលកើតឡើងពីការបោះឆ្នោតដោយស្របច្បាប់ប៉ុណ្ណោះ ទើបមានសិទ្ធិផ្គូផ្គងសមាជិករដ្ឋាភិបាលសម្រាប់អាណត្តិថ្មី ដើម្បីស្នើសុំការយល់ព្រមពីរដ្ឋសភា។
លោក គឹម សុខ ត្អូញត្អែរថា បើសរុបអំពីដំណើរការទាំងមូលនៃរដ្ឋាភិបាលដែលដឹកនាំដោយលោក ហ៊ុន សែន និងត្រៀមផ្ទេរទៅឱ្យលោក ហ៊ុន ម៉ាណែត នាពេលខាងមុខនេះ ទោះលោក ហ៊ុន ម៉ាណែត តែងតាំងមន្ត្រីរដ្ឋាភិបាលទាំងនោះក៏នៅតែខុសច្បាប់ដែរ ព្រោះពួកគេបានរំលោភបំពានរដ្ឋធម្មនុញ្ញរួចទៅហើយ ដូច្នេះរដ្ឋាភិបាលដែលនឹងដឹកនាំដោយលោក ហ៊ុន ម៉ាណែត គ្រាន់តែជាកងកម្លាំងឧទ្ទាមដែលគ្រប់គ្រង និងដឹកនាំដោយគ្រួសារហ៊ុនតែប៉ុណ្ណោះ មិនមែនជារដ្ឋាភិបាលសម្រាប់ដឹកនាំប្រទេសកម្ពុជានោះទេ។
ក្រោយការប្រកាសផ្ទេរតំណែងពីលោក ហ៊ុន សែន ទៅលោក ហ៊ុន ម៉ាណែត និងការប្រកាសតែងតាំងមន្ត្រីរដ្ឋាភិបាលសម្រាប់អាណត្តិថ្មីពីសំណាក់លោក ហ៊ុន សែន មានមន្ត្រីបក្សក្រៅរដ្ឋាភិបាលខ្លះបានលើកឡើងថា ពួកគេចង់បាននាយករដ្ឋមន្ត្រីបន្តវេន មិនមែនជានាយករដ្ឋមន្ត្រីបន្តពូជនោះទេ៕