ប្រទេសចិន ដែលកំពុងបរាជ័យក្នុងការដើរតួនាទីជាអ្នកសម្របសម្រួលឱ្យមានការចរចាឡើងវិញរវាងរុស្ស៊ី និងអ៊ុយក្រែន បានបង្ហាញជំហររបស់ខ្លួនប្រាប់ពិភពលោកថា ក្រុងប៉េកាំង មិនបានលម្អៀងទៅភាគីណាមួយនោះទេរវាងរុស្ស៊ី និងអ៊ុយក្រែន។
នៅក្នុងសន្និសីទអន្តរជាតិមួយស្ដីពីសង្គ្រាមនៅប្រទេសអ៊ុយក្រែន ដែលធ្វើឡើងនៅលើទឹកដីនៃប្រទេសអារ៉ាប៊ីសាអ៊ូឌីត តំណាងប្រទេសចិនបានចេញសេចក្ដីថ្លែងការណ៍បញ្ជាក់អំពីជំហរអព្យាក្រឹត្យរបស់ខ្លួនចំពោះវិបត្តិនៃប្រទេសអ៊ុយក្រែន។
ការប្រកាសរបស់ចិន ដែលបង្ហាញជំហរដូចនេះចំពោះសង្គ្រាមរុស្ស៊ីឈ្លានពានអ៊ុយក្រែន បាននាំឱ្យតំណាងសហរដ្ឋអាមេរិកចាត់ទុកជាជំហានថ្មីដ៏ល្អប្រសើរ។
ប្រទេសចំនួន ៤០ មានទាំងសហរដ្ឋអាមេរិក ចិន ឥណ្ឌា ព្រមទាំងប្រទេសនៅអឺរ៉ុប មានអង់គ្លេស អាល្លឺម៉ង់ បារាំង បានចូលរួមក្នុងសន្និសីទអន្តរជាតិស្ដីពីអ៊ុយក្រែន ដែលរៀបចំឡើងដោយប្រទេសអារ៉ាប៊ីសាអ៊ូឌីត កាលពីថ្ងៃសៅរ៍ និងថ្ងៃអាទិត្យសប្ដាហ៍មកនេះ តំណាងរដ្ឋាភិបាលចិន គឺប្រមុខការទូតលោក វ៉ាង យី បង្ហាញជំហរចង់ឃើញសន្តិភាពឆាប់កើតមាននៅលើទឹកដីអ៊ុយក្រែន ហើយថាចិននៅតែមានឆន្ទៈដើរតួនាទីជាអ្នកសម្របសម្រួលឱ្យភាគីរុស្ស៊ី និងអ៊ុយក្រែន ទៅរកតុចរចាជាថ្មី។
សេចក្ដីថ្លែងការណ៍របស់ក្រុងប៉េកាំង ក៏បានសាទរផងដែរដោយប្រទេសអ៊ុយក្រែន។ រដ្ឋមន្ត្រីការបរទេសអ៊ុយក្រែន លោក Dmytro Kuleba បានហៅវត្តមានរបស់ចិននៅក្នុងសន្និសីទអន្តរជាតិនេះ ប្រៀបបានជាការបំបែកភាពអាថ៌កំបាំង ហើយជាជោគជ័យជាប្រវត្តិសាស្ត្រ។
សម្រាប់អ៊ុយក្រែន ចាត់ទុកជំនួបពិភពលោកនេះបានឈានឆ្ពោះទៅរកការសម្របសម្រួលអន្តរជាតិមួយលើគោលការណ៍គ្រឹះនៃកិច្ចព្រមព្រៀងសន្តិភាពដើម្បីបញ្ចប់សង្គ្រាម។
តែយ៉ាងណា រុស្ស៊ីដែលគ្មានវត្តមានក្នុងកិច្ចប្រជុំអន្តរជាតិនេះ បានហៅថាជារឿងបរាជ័យចំពោះអ៊ុយក្រែន ដែលប៉ុនប៉ងចង់បានការគាំទ្រពីប្រទេសដែលមានកម្លាំងសេដ្ឋកិច្ចខ្លាំងក្លា។ នៅក្នុងជំនួបតាមទូរសព្ទកាលពីថ្ងៃចន្ទ ទី៧ ខែសីហា ប្រមុខការទូតចិន លោក វ៉ាង យី បានប្រាប់សមភាគីរុស្ស៊ី លោក សែកហ្គៃ ឡារ៉ូវ ថាចិននៅតែរក្សាជំហរអព្យាក្រឹត្យជានិច្ចចំពោះវិបត្តិនៅអ៊ុយក្រែន។ ចំណែកលោក ឡារ៉ូវ បានសាទរជំហររបស់ចិន ដោយជូនពរចិនឱ្យកាន់តែជោគជ័យធំធេងថែមទៀត។ នេះបើតាមបណ្ដាញផ្សាយព័ត៌មាន CNN។
តើចិនពិតជាមានជំហរអព្យាក្រឹត្យមែនទេ?
ចិនជាប្រទេសធំមួយនៅតែគាំទ្រនយោបាយការទូតរុស្ស៊ី ដោយមិនបានចូលរួមជាមួយអន្តរជាតិថ្កោលទោសរុស្ស៊ីឈ្លានពានអ៊ុយក្រែននោះទេ ហើយផ្ទុយទៅវិញ ចិនបានបង្កើនកិច្ចខំប្រឹងប្រែងការទូតជាខ្លាំងជាមួយក្រុងមូស្គូ ដោយមានមហិច្ឆតាស្រូបផលប្រយោជន៍ដែលបានពីស្ថានភាពសង្គ្រាមនៅអ៊ុយក្រែន។
ផលប្រយោជន៍ដែលចិនកំពុងទាញបានពីសង្គ្រាមនៅអ៊ុយក្រែន ដូចជាការទទួលបានការទិញឧស្ម័ន និងប្រេងពីរុស្ស៊ីដោយតម្លៃថោក និងទាញរុស្ស៊ីឱ្យបង្ហាញកម្លាំង និងឥទ្ធិពលរួមជាមួយចិន នៅក្នុងតំបន់អាស៊ីប៉ាស៊ីហ្វិក ដូចជាធ្វើសមយុទ្ធរួមគ្នាជាញឹកញាប់នៅសមុទ្រចិនខាងកើត ដែលជាការគំរាមប្រទេសជប៉ុន ហើយរហូតដល់ក្រុងប៉េកាំង សាទររុស្ស៊ីបញ្ជូននាវាចម្បាំងបើកឆ្លងកាត់ច្រកសមុទ្រតៃវ៉ាន់ទៀតផង។
អ្នកវិភាគ និងអ្នកតាមដានស្ថានភាពពិភពលោក បានហៅការបង្ហាញជំហររបស់ចិន ដែលខ្លួនតាំងចិត្តអព្យាក្រឹត្យ គឺមិនមែនជាការប្តូរផ្លាស់ជំហរងាកចេញពីរុស្ស៊ីនោះទេ។ ក្រុមអ្នកវិភាគនៅតែគិតថា ក្រុងប៉េកាំង មិនមានភាពស្មោះត្រង់ដូចនឹងការបង្ហាញជំហររបស់ខ្លួននោះទេ។ គេថាចិនត្រូវការផលប្រយោជន៍នៅពេលដែលពិភពលោកធ្លាក់ក្នុងវិបត្តិ គឺធ្វើយ៉ាងណាឱ្យសេដ្ឋកិច្ចរបស់ខ្លួនកាន់តែរឹងមាំ ហើយមានឥទ្ធិពល។
ដូចគេដឹងហើយថា នៅពេលពិភពលោករួមគ្នាដាក់ទណ្ឌកម្មសេដ្ឋកិច្ចទៅលើប្រទេសរុស្ស៊ី បែរជាក្រុងប៉េកាំង ពង្រីកពាណិជ្ជកម្មតាមព្រំដែនជាមួយរុស្ស៊ីកាន់តែធំជាងមុនទៀត។ គេថាចិននៅតែផ្ដល់ដង្ហើមសេដ្ឋកិច្ចទៅឱ្យរុស្ស៊ី ដើម្បីបន្តសង្គ្រាមឈ្លានពានអ៊ុយក្រែន រហូតដល់ដំណាក់កាលចុងក្រោយ។
ដូចនេះហើយបានជាអ្នកនាំពាក្យក្រសួងការបរទេសសហរដ្ឋអាមេរិក លោក Matthew Miller នៅតែបន្តទាមទារឱ្យចិនបញ្ចេញសេចក្ដីថ្លែងការណ៍ជំរុញរុស្ស៊ីត្រូវគោរពបូរណភាព និងអធិបតេយ្យភាពរបស់អ៊ុយក្រែន ហើយត្រូវដកទ័ពរុស្ស៊ីចេញពីទឹកដីនៃប្រទេសអ៊ុយក្រែន៕