តំណាងសហគមន៍ដីធ្លីម្នាក់ក្នុងចំណោម ៩នាក់ទៀតខកចិត្តដែលតុលាការខេត្តកោះកុង កាត់ទោសលោកស្រី និងអ្នកផ្សេងឲ្យជាប់ពន្ធនាគារម្នាក់ៗ ១ឆ្នាំ និងបង្គាប់ឲ្យបង់ប្រាក់ពិន័យម្នាក់ៗ ៤០លានរៀល ដោយសារទាមទាររកដំណោះស្រាយដីធ្លី និងយុត្តិធម៌ដែលត្រូវបានឧកញ៉ា ហេង ហ៊ុយ រំលោភយកកាលពីឆ្នាំ២០០៧។
តំណាងទាំង ១០នាក់ ត្រូវតុលាការកាត់ទោសឲ្យជាប់ពន្ធនាគារម្នាក់ ១ឆ្នាំ និងបង្គាប់ឲ្យតំណាង ៩នាក់បង់ប្រាក់ពិន័យ ៤០លានរៀល ដោយចោទប្រកាន់ពីបទ «ញុះញង់ឲ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបទបរិហារបង្កាច់កេរ្តិ៍» ពាក់ព័ន្ធនឹងជម្លោះដីធ្លីដ៏រ៉ាំរ៉ៃជាមួយឧកញ៉ា ហេង ហ៊ុយ តាំងពីឆ្នាំ២០០៧ មកម្ល៉េះ។
ប្រាប់អ្នកសារព័ត៌មានខាងមុខសាលាដំបូងខេត្តកោះកុង លោកស្រី កើត នៅ ដែលជាតំណាងពលរដ្ឋម្នាក់ក្នុងចំណោមតំណាងទាំង ១០នាក់នោះនិយាយថា លោកស្រីសោកស្ដាយដែលតុលាការកាត់ទោសឲ្យគាត់ជាប់ពន្ធនាគារ ១ឆ្នាំទាំងដែលលោកស្រី និងអ្នកផ្សេងមិនបានធ្វើអ្វីខុសសោះនោះ។
លោកស្រីចាត់ទុកការកាត់ទោសរបស់តុលាការថាជារឿងអយុត្តិធម៌សម្រាប់ពួកគាត់ ព្រោះពួកគាត់រងគ្រោះបាត់បង់ដីធ្លីហើយ ឥឡូវបែរជាមករងគ្រោះដោយសារតុលាការបន្ថែមទៀត។ លោកស្រីថា ពួកគាត់នឹងប្ដឹងសាទុក្ខទៅតុលាការជាន់ខ្ពស់បន្តទៀត ដើម្បីទាមទាររកយុត្តិធម៌ ព្រោះពួកគាត់ជាជនរងគ្រោះបាត់បង់ដីធ្លី មិនមែនជាជនល្មើសឡើយ។
អំឡុងពេលតុលាការប្រកាសសាលក្រមនោះ ពលរដ្ឋរងគ្រោះជាច្រើននាក់បាននាំគ្នាទៅតវ៉ានៅខាងមុខសាលាដំបូងខេត្តនេះ ដោយភ្ជាប់ជាមួយបដាទាមទារទម្លាក់បទចោទ និងដោះលែងតំណាងពួកគេដែលកំពុងជាប់ឃុំនៅពន្ធនាគារផងដែរ។
កាលពីថ្ងៃទី២៩ ខែមិថុនា ឆ្នាំ២០២៣ នគរបាលស្រុកស្រែអំបិល ខេត្តកោះកុង បានចាប់ខ្លួនសកម្មជនដីធ្លីចំនួន ១១នាក់ រួមមានអ្នកស្រី ដេត ហួរ លោក ហេង ជ័យ និងលោក សុខ ជ័យ ខណៈពួកគេកំពុងធ្វើដំណើរទៅកាន់ក្រសួងយុត្តិធម៌ ក្នុងគោលបំណងដាក់ញត្តិស្នើសុំអន្តរាគមន៍ឲ្យតុលាការខេត្តកោះកុង ទម្លាក់ចោលរាល់បទចោទប្រកាន់លើសមាជិកសហគមន៍ និងអំពាវនាវឲ្យមានវិធានការផ្លូវច្បាប់ចំពោះបុគ្គលដែលរំលោភសិទ្ធិដីធ្លីរបស់ពួកគេ។
លោកស្រី ដេត ហួរ លោក សុខ ជ័យ និងលោក ហេង ជ័យ ត្រូវរងការចោទប្រកាន់ពីបទញុះញង់ជាលើកទីពីរ និងត្រូវបានបញ្ជូនទៅឃុំខ្លួនបណ្ដោះអាសន្ននៅពន្ធនាគារខេត្តកោះកុង កាលពីថ្ងៃទី៣០ ខែមិថុនា ឆ្នាំ២០២៣ ខណៈលោកស្រី អិន ធូ ដែលបានចូលរួមដំណើរក្នុងការដាក់ញត្តិនោះ ត្រូវបានកោះហៅឲ្យចូលខ្លួនដើម្បីសួរចម្លើយនៅសាលាដំបូងខេត្តកោះកុង នៅថ្ងៃទី១៥ ខែសីហា ឆ្នាំ២០២៣។
គិតចាប់តាំងពីឆ្នាំ២០០៧ មកដល់ឆ្នាំ២០២៣ ពោលរយៈពេលជាង ១០ឆ្នាំមកនេះ ពលរដ្ឋរងគ្រោះដែលមានជម្លោះដីធ្លីជាមួយឧកញ៉ា ហេង ហ៊ុយ នៅមិនទាន់ទទួលបានដំណោះស្រាយនៅឡើយទេ។ ក្រៅពីមិនដោះស្រាយហើយ តំណាងពលរដ្ឋ ១០នាក់ត្រូវបានតុលាការចោទប្រកាន់ ហើយអាជ្ញាធរក្រោមបញ្ជារបស់លោក ហ៊ុន សែន បានធ្វើទុក្ខបុកម្នេញពលរដ្ឋរងគ្រោះជាបន្តបន្ទាប់នៅពេលពួកគេចេញតវ៉ាទាមទារដំណោះស្រាយ និងយុត្តិធម៌៕