ប្រធានអង្គភាពប្រឆាំងអំពើពុករលួយលោក ឱម យ៉ិនទៀង ជំរុញឱ្យប្រទេសដែលជាសមាជិកអាស៊ាន បន្តធ្វើការរួមគ្នាដើម្បីប្រឆាំងអំពើពុករលួយនៅតាមបណ្ដាប្រទេសរបស់ខ្លួន។
យ៉ាងណាក៏ដោយ ប្រទេសកម្ពុជាសព្វថ្ងៃនេះនៅតែបន្តជាប់លេខរៀងអាក្រក់ដដែល ដែលមានអំពើពុករលួយធ្ងន់ធ្ងរជាងគេបំផុតក្នុងចំណោមប្រទេសដែលជាសមាជិកអាស៊ានទាំង ១០ លើកលែងតែប្រទេសភូមា។
ប្រធានអង្គភាពប្រឆាំងអំពើពុករលួយលោក ឱម យ៉ិនទៀង និងជាប្រធានស្ថាប័នប្រឆាំងអំពើពុករលួយអាស៊ាន បានលើកឡើងនៅក្នុងកិច្ចប្រជុំលេខាធិការដ្ឋានអាស៊ាន-ផេក (ASEAN-PAC) នៅថ្ងៃទី១៦ ខែសីហា ឆ្នាំ២០២៣ នេះថា ជាការពិតណាស់ តំបន់អាស៊ានក៏ដូចជាពិភពលោកទាំងមូលដែរដែលតម្រូវឱ្យមានកិច្ចសហការ និងការជួយគ្នាទៅវិញទៅមកពីបណ្តាប្រទេសជាមិត្ត និងជាបងប្អូន។
លោក ឱម យ៉ិនទៀង លើកឡើងថា ផ្អែកលើស្មារតីចែករំលែកក្នុងនាមជាបងប្អូនដែលមានគោលដៅរួមគ្នា គឺត្រូវប្រឆាំងអំពើពុករលួយនៅក្នុងប្រទេសនីមួយៗរបស់ខ្លួន ដើម្បីមានលទ្ធភាពឈានទៅជួយ និងគាំទ្រគ្នាទៅវិញទៅមកផ្អែកទៅតាមបរិបទ និងលទ្ធភាពនៃកិច្ចសហប្រតិបត្តិការដូចមានចែងនៅក្នុង ASEAN-PAC MOU នាពេលកន្លងទៅនោះ។
ការអះអាងនេះ ធ្វើឡើងស្របពេលដែលគេរកឃើញថាកម្ពុជាជាប្រទេសដែលជាប់ចំណាត់ថ្នាក់ខាងប្រព្រឹត្តអំពើពុករលួយខ្លាំងបំផុតនៅក្នុងចំណោមប្រទេសក្នុងតំបន់អាស៊ីអាគ្នេយ៍។
ប្រធានកម្មវិធីសុចរិតភាពធុរកិច្ច និងធនធានរ៉ែនៃអង្គការតម្លាភាពកម្ពុជា លោក តុង សុប្រាជ្ញ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីពេលថ្មីៗនេះថា បើទោះបីជាអំពើពុករលួយកើតមាននៅកម្ពុជារហូតសហគមន៍អន្តរជាតិដាក់ពិន្ទុឱ្យស្ថិតក្នុងលេខរៀងដ៏អាក្រក់ក៏ដោយ ក៏ស្ថាប័នពាក់ព័ន្ធ ដូចជាអង្គភាពប្រឆាំងអំពើពុករលួយ (ACU) ជាដើម មិនសូវឃើញមានវិធានការស៊ើបអង្កេតលើស្ថាប័ននានាដែលមន្ត្រីនៃស្ថាប័ននោះកំពុងសម្ងំប្រព្រឹត្តអំពើពុករលួយកេងប្រវ័ញ្ចលុយជាតិនោះទេ។
មន្ត្រីជាន់ខ្ពស់អង្គការតម្លាភាពកម្ពុជារូបនេះបញ្ជាក់ថា នៅពេលដែលអំពើពុករលួយកាន់តែរីកដុះដាល និងកាន់តែចាក់ឫសចូលជ្រៅនៅកម្ពុជា អ្នកដែលរងនូវផលប៉ះពាល់ពីបញ្ហានេះ គឺមានតែមន្ត្រីរាជការដែលស្មោះត្រង់ និងពលរដ្ឋប៉ុណ្ណោះ។ ជាងនេះទៀត វិបត្តិផ្សេងៗ ដូចជាអយុត្តិធម៌សង្គម គ្រឿងញៀន អំពើជួញដូរមនុស្ស និងការលាងលុយកខ្វក់ ជាដើម នឹងកើតមានយ៉ាងអនាធិបតេយ្យជាមិនខាន។
ក្រុមអ្នកឃ្លាំមើលសង្គមរិះគន់ថា អំពើពុករលួយនៅកម្ពុជាកំពុងតែចាក់ឫសយ៉ាងជ្រៅចូលទៅក្នុងស្ថាប័នជាតិ ដែលកំពុងទាញទម្លាក់កម្ពុជាចូលទៅក្នុងចំណោមប្រទេសក្រីក្រដែលងើបមុខមិនរួច ប្រសិនបើរដ្ឋាភិបាលកម្ពុជាមិនមានវិធានការច្បាប់ច្បាស់លាស់លើមន្ត្រីខិលខូចដែលកំពុងចងបណ្ដាញដើម្បីបំផ្លាញជាតិក្នុងស្ថាប័នរដ្ឋទេនោះ។
កាលពីពេលថ្មីៗនេះ អង្គការតម្លាភាពអន្តរជាតិ (Transparency International) បានបង្ហាញរបាយការណ៍របស់ខ្លួនស្ដីពីអំពើពុករលួយសម្រាប់ឆ្នាំ២០២២ ថា កម្ពុជាបានជាប់ចំណាត់ថ្នាក់លេខ ១៥០ ក្នុងចំណោមប្រទេសចំនួន ១៨០ នៅលើពិភពលោក ជុំវិញនៃការប្រព្រឹត្តអំពើពុករលួយ ហើយចំណាត់ថ្នាក់នេះកម្ពុជាស្ថិតក្នុងលេខរៀងល្អជាងប្រទេសភូមា តែមួយប៉ុណ្ណោះ ក្នុងចំណោមប្រទេសដែលជាសមាជិកអាស៊ាន។ ជាក់ស្តែង ប្រទេសឡាវជាប់លេខ ១២៦ ហ្វីលីពីនជាប់លេខ ១១៦ ឥណ្ឌូនេស៊ីជាប់លេខ ១១០ ថៃជាប់លេខ ១០១ វៀតណាមជាប់លេខ ៧៧ ម៉ាឡេស៊ីជាប់លេខ ៦១ ដោយឡែកប្រទេសសិង្ហបុរីជាប់លេខ៥។
កម្ពុជាត្រូវបានគេចាត់ថ្នាក់ចូលទៅក្នុងប្រទេសដែលប្រព្រឹត្តអំពើពុករលួយធ្ងន់ធ្ងរតាំងពីឆ្នាំ២០១២ មក ក្នុងនោះឆ្នាំ២០១៦ កម្ពុជាបានជាប់ចំណាត់ថ្នាក់លេខ ១៥៦ ឆ្នាំ២០១៧ និងឆ្នាំ២០១៨ ជាប់ចំណាត់ថ្នាក់លេខ ១៦១ ខណៈឆ្នាំ២០១៩ ជាប់លេខ១៦២ ឆ្នាំ២០២០ ជាប់លេខ១៦០ និងឆ្នាំ២០២១ ជាប់ចំណាត់ថ្នាក់លេខ ១៥៧ ខណៈឆ្នាំ២០២២ គឺជាប់លេខ១៥០ ដែលជាចំណាត់ថ្នាក់អាក្រក់ដដែលខាងប្រព្រឹត្តអំពើពុករលួយ។
មាត្រា១ នៃច្បាប់ស្ដីពីការប្រឆាំងអំពើពុករលួយ ចែងថា ច្បាប់នេះមានគោលបំណងលើកកម្ពស់ប្រសិទ្ធភាពសេវាគ្រប់បែបយ៉ាង ពង្រឹងអភិបាលកិច្ច និងនីតិរដ្ឋនៅក្នុងការដឹកនាំ និងការគ្រប់គ្រងរដ្ឋ ព្រមទាំងរក្សាភាពស្អាតស្អំ និងយុត្តិធម៌ដែលជាមូលដ្ឋានចាំបាច់ក្នុងការអភិវឌ្ឍសង្គមជាតិ និងកាត់បន្ថយភាពក្រីក្រ ជាដើម។
ទាក់ទិននឹងបញ្ហានេះ កាលពីថ្ងៃទី៥ ខែឧសភា ឆ្នាំ២០២៣ នេះ មានការចោទប្រកាន់ថា រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានប្រព្រឹត្តអំពើពុករលួយធ្ងន់ធ្ងរនៅក្នុងក្រសួងពាណិជ្ជកម្ម ជុំវិញការបញ្ចូលមន្ត្រីកម្មសិក្សាឱ្យចូលបម្រើការងារក្នុងក្របខ័ណ្ឌក្រសួងពាណិជ្ជកម្មសម្រាប់ឆ្នាំ២០២៣ ចំនួន ៦៦រូប ក្នុងនោះមន្ត្រីដែលត្រូវធ្វើកម្មសិក្សាសម្រាប់ចូលបម្រើការងារក្នុងក្របខ័ណ្ឌក្រសួងពាណិជ្ជកម្មសម្រាប់ឆ្នាំ២០២៣ ទាំង ៦៦រូបនោះ ត្រូវគេដឹងថាសុទ្ធតែជាប់ទាំងអស់ ដោយសារតែមានការសូកប៉ាន់ទាំងអស់ដែលមានទំហំទឹកប្រាក់រាប់លានដុល្លារអាមេរិក ជាថ្នូរនឹងការទទួលបានក្របខ័ណ្ឌជាមន្ត្រីពេញសិទ្ធិក្នុងក្រសួងនេះ៕