ចាប់តាំងពីរុស្ស៊ីលើកទ័ពលុកលុយប្រទេសអ៊ុយក្រែន ទ្រង់ទ្រាយធំនៅថ្ងៃទី២៤ ខែកុម្ភៈ ឆ្នាំ២០២២ មកទល់ថ្ងៃទី១៦ ខែសីហា នេះ សង្គ្រាមបានអូសបន្លាយអស់រយៈពេល ៥៣៨ថ្ងៃ។ ជាមួយគ្នានេះ ក្រសួងការពារជាតិអ៊ុយក្រែន បានបញ្ចេញតួលេខចុងក្រោយរបស់ខ្លួនជាថ្មីម្ដងទៀត ដោយធ្វើការផ្ទៀងផ្ទាត់អំពីការបាត់បង់ទ័ព និងសព្វាវុធរបស់រុស្ស៊ី។
សារព័ត៌មានរបស់អ៊ុយក្រែន The new voice of Ukraine បានស្រង់របាយការណ៍របស់ក្រសួងការពារជាតិអ៊ុយក្រែន មកចុះផ្សាយថា រុស្ស៊ីបាត់បង់ទ័ព និងសព្វាវុធយ៉ាងសម្បើម បើប្រៀបធៀបទៅនឹងសហភាពសូវៀតលើកទ័ពចូលទៅលុកលុយប្រទេសអាហ្វហ្គានីស្ថាន កាលពីសង្គ្រាមត្រជាក់ គឺខុសគ្នាដល់ទៅជាង ១០ដង បើធៀបនឹងរុស្ស៊ីឈ្លានពានអ៊ុយក្រែននៅពេលនេះ។
របាយការណ៍របស់ក្រសួងការពារជាតិអ៊ុយក្រែន បានបញ្ជាក់នៅលើទំព័រហ្វេសប៊ុករបស់ខ្លួនដោយបង្ហាញថា គិតត្រឹមថ្ងៃពុធ ទី១៦ សីហា នេះ រុស្ស៊ីបាត់បង់៖
- ទ័ពកើនឡើង ២៥ម៉ឺន ៥៥៧០នាក់
- រថក្រោះរុស្ស៊ីបាត់បង់ ៤៣២៥គ្រឿង
- រថពាសដែកចំនួន ៨៣៨០គ្រឿង
- កាំភ្លើងធំ ៥១៥២គ្រឿង
- រ៉ុក្កែត ៧១៤គ្រឿង
- យន្តហោះចម្បាំង ៣១៥គ្រឿង
- ឧទ្ធម្ភាគចក្រ ៣១៤គ្រឿង
- ប្រព័ន្ធការពារដែនអាកាស ៤៨៥គ្រឿង
- ដ្រូនត្រូវបានបាញ់ទម្លាក់បាន ៤២៤៨គ្រឿង
- មីស៊ីលគ្រុស ១៤០៤គ្រាប់
- នាវាតូចធំ ១៨គ្រឿង
- យានយន្តយោធា ៧៦១៤គ្រឿង
- និងឧបករណ៍ដទៃទៀត ៧៧៣គ្រឿង។
យ៉ាងណា បើយោងតាមសារព័ត៌មានដដែលនេះ អំឡុងសង្គ្រាម ២៤ម៉ោងចុងក្រោយនេះនៅរវាងថ្ងៃទី១៥ និងថ្ងៃទី១៦ សីហា ក្រសួងការពារជាតិអ៊ុយក្រែនអះអាងថា ទ័ពរបស់រុស្ស៊ីបានបាត់បង់ចំនួន ៦៥០នាក់ រថក្រោះ ១១គ្រឿង រថពាសដែក ១០គ្រឿង និងប្រព័ន្ធកាំភ្លើងធំ ២៤គ្រឿង។ តែតួលេខទាំងអស់នេះ សារព័ត៌មាន The new voice of Ukraine មិនបានធ្វើការផ្ទៀងផ្ទាត់ជាមួយនឹងក្រសួងការពារជាតិរុស្ស៊ីនោះទេ។
ប៉ុន្តែក្រសួងការពារជាតិរបស់ប្រទេសនេះបានចេញសេចក្ដីប្រកាសព័ត៌មានថា អំឡុងនៃសង្គ្រាមវាយបករបស់អ៊ុយក្រែនរយៈពេលបីខែមកនេះ ទ័ពអ៊ុយក្រែនបាត់បង់នៅលើសមរភូមិជាង ៤ម៉ឺននាក់ហើយ បាត់បង់សព្វាវុធប្រមាណជា ៥០០គ្រឿង ក្នុងនោះមានរថក្រោះ និងរថពាសដែក។
ប្រធានាធិបតីរុស្ស៊ី លោក វ៉្លាឌីមៀរ ពូទីន បានថ្លែងប្រាប់អ្នកសារព័ត៌មានថា អ៊ុយក្រែនមិនអាចវាយយកទឹកដីពីដៃនៃកងទ័ពរុស្ស៊ីបានទេ ទោះជាអ៊ុយក្រែនព្យាយាមប្រើប្រាស់សព្វាវុធរបស់ពួកបស្ចិមប្រទេសក៏ដោយនោះ។ រុស្ស៊ីអះអាងថា ឆាប់ៗនេះ អ៊ុយក្រែននឹងបាត់បង់ការប្រយុទ្ធរបស់ខ្លួនជាមួយនឹងសព្វាវុធរបស់ពួកបស្ចិមប្រទេសដែលផ្ដល់ទៅឲ្យអ៊ុយក្រែន នឹងត្រូវបានកម្ទេចនៅលើសមរភូមិ។
តែយ៉ាងណា អ្នកជំនាញមើលឃើញថា ចំនួនទ័ពរបស់រុស្ស៊ីដែលបាត់បង់នៅលើសមរភូមិដ៏ច្រើនសម្បើមនេះ បើធៀបនឹងសង្គ្រាមរយៈពេល ១០ឆ្នាំដែលសហភាពសូវៀតលើកទ័ពចូលទៅប្រទេសអាហ្វហ្គានីស្ថាន កាលពីទសវត្ស១៩៨០ គឺសហភាពសូវៀតបាត់បង់ទ័ពតែ ២ម៉ឺន ៥ពាន់នាក់ប៉ុណ្ណោះ។
ដូចនេះ ត្រឹមតែ ១៨ខែប៉ុណ្ណោះ រុស្ស៊ីក្រោមការដឹកនាំរបស់បុរសខ្លាំង វ៉្លាឌីមៀរ ពូទីន ដែលបញ្ជាឲ្យលើកទ័ពលុកលុយប្រទេសអ៊ុយក្រែន គឺចំនួនទ័ពរុស្ស៊ីដែលបាត់បង់ដូចនេះគឺខុសគ្នាដល់ទៅជាង ១០ដង។
រុស្ស៊ីបាត់បង់ទ័ពក្នុងមួយថ្ងៃពី ៤០០នាក់ឡើងទៅ រីឯសហភាពសូវៀតបាត់បង់ទ័ពមួយថ្ងៃប្រមាណជាជិត ៤០នាក់ប៉ុណ្ណោះ ហើយបើប្រៀបធៀបជាមួយនឹងសហរដ្ឋអាមេរិកលើកទ័ពចូលទៅធ្វើសង្គ្រាមនៅវៀតណាមខាងត្បូងរយៈពេល ១១ឆ្នាំ អាមេរិកបាត់បង់ទ័ពជាង ៨ម៉ឺននាក់ ហើយអាមេរិកក៏បានបាត់បង់ទ័ពក្នុងមួយថ្ងៃ ២០នាក់។ ដូចនេះ រុស្ស៊ីបច្ចុប្បន្នបាត់បង់ទ័ពនៅលើសមរភូមិទឹកដីអ៊ុយក្រែន គឺច្រើនជាងអាមេរិក ២០ដង។
អង្គភាពចារកម្មរបស់អង់គ្លេស និងសហរដ្ឋអាមេរិក ទទួលស្គាល់ថាតួលេខដែលក្រសួងការពារជាតិអ៊ុយក្រែន បានបញ្ចេញដូចនេះ វាអាចប្រហាក់ប្រហែលនឹងស្ថានភាពជាក់ស្ដែងដែលរុស្ស៊ីបាត់បង់ទ័ព និងសព្វាវុធក្នុងសង្គ្រាមលើទឹកដីអ៊ុយក្រែន។
ចារកម្មរបស់អាមេរិក CIA ថ្មីៗនេះបានបញ្ចេញរបាយការណ៍របស់ខ្លួនថា គ្រាន់តែសមរភូមិបាក់មុត នៅភាគខាងកើតប្រទេសអ៊ុយក្រែន ដែលមានផ្ទៃដី ៤០គីឡូម៉ែត្រការ៉េ រុស្ស៊ីប្រើប្រាស់ទ័ពយ៉ាងសម្បើម ហើយប្រើពេលដល់ទៅ ១ឆ្នាំទើបវាយយកបានពីដៃរបស់ទ័ពអ៊ុយក្រែន នៅថ្ងៃទី២០ ឧសភា ឆ្នាំ២០២៣ ដោយចំណាយទ័ពជាង ៥ម៉ឺននាក់។
លោកប្រធានាធិបតី ចូ បៃដិន កាលពីប្រជុំនៃមេដឹកនាំកំពូលប្រទេសឧស្សាហកម្មជឿនលឿន G7 បានថ្លែងប្រាប់វេទិកាដែលធ្វើឡើងនៅប្រទេសជប៉ុន កាលពីដើមខែមិថុនា ថា ការបាត់បង់ទ័ពរុស្ស៊ីយ៉ាងសម្បើមនៅបាក់មុត បានបង្ហាញអំពីមហាអំណាចមួយនេះមានចំណុចខ្សោយយ៉ាងខ្លាំងក្នុងការគូសវាសយុទ្ធសាស្ត្រសង្គ្រាម។ លោកបានថ្លែងដោយទទូចឲ្យប្រទេសសម្ព័ន្ធមិត្តត្រូវពង្រឹងជំនួយយោធារបស់ខ្លួនឲ្យកាន់តែច្រើនថែមទៀតទៅឲ្យអ៊ុយក្រែន។
មកដល់ពេលនេះ ទាំងរុស្ស៊ី និងអ៊ុយក្រែន មិនដែលបង្ហាញជំហររត់ទៅរកការចរចានោះទេ គឺភាគីទាំងពីរចង់យកឈ្នះរៀងៗខ្លួន ហើយជាពិសេសគឺអ៊ុយក្រែនជាប្រទេសរងគ្រោះដោយសារសង្គ្រាមបានប្រកាសប្រាប់ពិភពលោកថា គ្មានទេការចរចា លើកលែងតែទីក្រុងមូស្គូ ដកទ័ពទាំងស្រុងចេញពីទឹកដីអ៊ុយក្រែន៕