អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ ត្រូវបានប៉ូលិសឃាត់ខ្លួនភ្លាមៗ ហើយបញ្ជូនទៅកាន់តុលាការ បន្ទាប់ពីរូបលោកវិលត្រឡប់ចូលប្រទេសថៃវិញក្រោយរស់នៅនិរទេសខ្លួននៅឯបរទេសអស់រយៈពេល ១៧ឆ្នាំ។
លោក ថាក់ស៊ីន បានធ្វើដំណើរមកដល់អាកាសយានដ្ឋាន Don Mueang នៅទីក្រុងបាងកក នៅម៉ោង ៩ព្រឹកនេះ តាមរយៈយន្តហោះឯកជនមួយដែលបានចេញដំណើរពីប្រទេសសិង្ហបុរី។
ក្នុងព្រឹត្តិការណ៍នេះ ក្រុមអ្នកគាំទ្រលោក ថាក់ស៊ីន ជាច្រើនពាន់នាក់ដែលស្លៀកពាក់អាវពណ៌ក្រហម បានប្រមូលផ្ដុំគ្នានៅក្បែរព្រលានយន្តហោះ Don Mueang ដើម្បីរង់ចាំទទួលស្វាគមន៍អតីតនាយករដ្ឋមន្ត្រីថៃដែលមានពិរុទ្ធភាពរូបនេះ។
នៅពេលមកដល់ទឹកដីថៃ លោក ថាក់ស៊ីន បានឱនគោរពព្រះឆាយាល័ក្ខណ៍ព្រះមហាក្សត្រថៃ ហើយមួយសន្ទុះក្រោយមក ទើបប៉ូលិសថៃនាំលោកឡើងរថយន្តឆ្ពោះទៅកាន់តុលាការកំពូលជាទីដែលលោកត្រូវបានចោទប្រកាន់ពីបទរំលោភអំណាច និងប្រព្រឹត្តអំពើពុករលួយ។
នៅក្នុងសេចក្ដីថ្លែងការណ៍មួយរបស់តុលាការកំពូល បានបញ្ជាក់អំពីការសម្រេចផ្ដន្ទាទោសអតីតនាយករដ្ឋមន្ត្រីថៃ វ័យ ៧៤ឆ្នាំរូបនេះដាក់ពន្ធនាគារ ៨ឆ្នាំ។
នៅមុនពេលតុលាការនាំខ្លួនលោក ថាក់ស៊ីន ទៅកាន់តុលាការកំពូល អ្នកស្រី ផៃថោថាន ស៊ីណាវ៉ាត់ កូនស្រីរបស់លោក ថាក់ស៊ីន បានបង្ហោះរូបថតជាច្រើនសន្លឹកដែលត្រូវបានថតនៅក្នុងបន្ទប់ VIP នៃអាកាសយានដ្ឋាន Don Muang ក្នុងទីក្រុងបាងកក នៅព្រឹកថ្ងៃអង្គារ ទី២២ ខែសីហា នេះ ដោយបង្ហាញពីឪពុករបស់នាង គឺលោក ថាក់ស៊ីន កំពុងជួបជុំជាមួយចៅៗ កូនប្រសា និងកូនបង្កើត។
នៅលើទំព័រ Facebook អ្នកស្រី ផៃថោថាន ក៏បានសរសេរសំណេរអមជាមួយរូបភាពផងដែរថា ស្វាគមន៍ការត្រឡប់មកកាន់ប្រទេសថៃ លោកឪពុក។ អ្នកស្រីក៏បានអរគុណផងដែរដល់ក្រុមអ្នកគាំទ្រដែលបានមកទទួលស្វាគមន៍លោក ថាក់ស៊ីន ជាឪពុករបស់អ្នកស្រី។
លោក ថាក់ស៊ីន ធ្លាប់បានច្រានចោលរាល់ការចោទប្រកាន់ទាំងឡាយប្រឆាំងនឹងរូបលោក ដោយបានចោទថាតុលាការមានចេតនានយោបាយ។ មុននឹងការវិលត្រឡប់ចូលស្រុកវិញ លោក ថាក់ស៊ីន ក៏ត្រូវបានឱ្យដឹងថា លោកនឹងស្នើសុំឲ្យមានការលើកលែងទោសពីព្រះរាជា។
លោក ថាក់ស៊ីន ជានាយករដ្ឋមន្ត្រីជាប់ឆ្នោតមកពីគណបក្សថៃរ៉ាក់ថៃ ដែលជាបក្សដើមរបស់គណបក្សភឿថៃ។ លោកបានឡើងកាន់តំណែងនាយករដ្ឋមន្ត្រីនៅឆ្នាំ២០០១ ដោយបានកាន់តំណែងពេញមួយអាណត្តិ ៥ឆ្នាំ។ លោកបានកាន់តំណែងនាយករដ្ឋមន្ត្រីអាណត្តិទី២ បានជិតមួយឆ្នាំប៉ុណ្ណោះ ក៏ត្រូវពួកយោធាធ្វើរដ្ឋប្រហារនៅខែកញ្ញា ឆ្នាំ២០០៦។ ការវិលមកវិញរបស់អតីតនាយករដ្ឋមន្ត្រីថៃរូបនេះ គឺជាការបិទបញ្ចប់ភាពជាអ្នកនយោបាយនិរទេសខ្លួនរយៈពេល ១៧ឆ្នាំ។
ក្នុងព្រឹត្តិការណ៍មួយទៀតដែលកើតនៅក្រុងបាងកក ផងដែរនោះ គឺសភាថៃបានបោះឆ្នោតជ្រើសតាំងលោក Srettha Thavisin ជានាយករដ្ឋមន្ត្រីថ្មីរបស់រាជាណាចក្រថៃ។
ព្រឹត្តិការណ៍ជាវិជ្ជមាននេះ នឹងនាំទៅរកការបិទបញ្ចប់ការជាប់គាំងនយោបាយចាប់តាំងពីការបោះឆ្នោតសភាកាលពីថ្ងៃទី១៤ ខែឧសភា មកនេះ។
សភាថៃ បានកោះប្រជុំសាជាថ្មីដើម្បីធ្វើការបោះឆ្នោតជ្រើសតាំងនាយករដ្ឋមន្ត្រីទី៣០ របស់ថៃ កាលពីរសៀលថ្ងៃអង្គារ ទី២២ សីហា នេះ។ ដើម្បីអាចជាប់ជានាយករដ្ឋមន្ត្រីបាន បេក្ខជននាយករដ្ឋមន្ត្រីត្រូវការសំឡេងគាំទ្រចាប់ពី ៣៧៥សំឡេងឡើងទៅ ដែលស្មើនឹងសំឡេងពាក់កណ្តាលនៃចំនួនសមាជិករដ្ឋសភា និងព្រឹទ្ធសភាថៃ សរុបបញ្ចូលគ្នា ៧៥០អាសនៈ។
តាមលទ្ធផលបោះឆ្នោតបង្ហាញថា សមាជិកព្រឹទ្ធសភា និងរដ្ឋសភា ៣៨២រូបបានបោះឆ្នោតគាំទ្រលោក Srettha ដែលនាំឱ្យលោកជាប់ឆ្នោតជានាយករដ្ឋមន្ត្រីដោយមានសំឡេងភាគច្រើនតាមច្បាប់រដ្ឋធម្មនុញ្ញថៃ។ នៅក្នុងការបោះឆ្នោតនេះមានសំឡេង ១៦៥ បោះឆ្នោតប្រឆាំង និង ៨១សំឡេងបោះឆ្នោតអនុបវាទ ខណៈលោក Srettha មានសំឡេងក្នុងដៃ ៣១៤សំឡេងរួចហើយនោះដែលបូកបញ្ចូលគ្នា ១១គណបក្ស។
បក្សធំពីរដែលមិនបោះឆ្នោតឱ្យលោក Srettha គឺបក្សចលនាឆ្ពោះទៅមុខ ដែលមានសមាជិកសភាដល់ទៅ ១៥១រូបដឹកនាំដោយបេក្ខជននាយករដ្ឋមន្ត្រីមិនជាប់ឆ្នោត គឺលោក ភីថា លឹមចារឿនរ៉ាត់ និងគណបក្សប្រជាធិបតេយ្យដែលមានសមាជិកសភា ២៥នាក់ ដឹកនាំដោយអតីតនាយករដ្ឋមន្ត្រី អាប់ភីសិត វេចាជីវ៉ា។
រដ្ឋសភាថៃមានសមាជិកសរុបចំនួន ៥០០នាក់ជាអ្នកតំណាងរាស្ត្រជាប់ឆ្នោត ហើយព្រឹទ្ធសភាមាន ២៥០នាក់ តែពួកគាត់ជាអ្នកនយោបាយមិនបានជ្រើសរើសចេញពីអ្នកបោះឆ្នោតនោះទេ។
សមាជិកព្រឹទ្ធសភានេះកើតឡើងដោយការចាត់តាំងរបស់ពួកយោធាកាលពីឆ្នាំ២០១៧ ក្រោយពីពួកយោធាដឹកនាំដោយលោក ប្រាយុទ្ធ ធ្វើរដ្ឋប្រហារនៅឆ្នាំ២០១៤។ លោក ប្រាយុទ្ធ ជានាយករដ្ឋមន្ត្រីចាំផ្ទះ។
លោកប្រកាសឈប់ធ្វើនយោបាយដោយសារតែបក្សថៃរួបរួមជាតិរបស់លោក មិនបានអាសនៈច្រើនដូចកាលបោះឆ្នោតសភាឆ្នាំ២០១៩។
ឥឡូវនេះ លោក Srettha Thavisin ដែលជាអ្នកនយោបាយជំនាន់ក្រោយនៃគណបក្សភឿថៃ ជាបក្សជាប់ឆ្នោតលេខ២ បន្ទាប់ពីបក្សចលនាឆ្ពោះទៅមុខ បានក្លាយជានាយករដ្ឋមន្ត្រីទី៣០ របស់រាជាណាចក្រថៃ ដោយឡើងជំនួសលោក ប្រាយុទ្ធ ចាន់អូចា។ លោកជានាយករដ្ឋមន្ត្រីនៃរដ្ឋាភិបាលចម្រុះ ១១គណបក្ស ក្នុងនោះមានបក្សរបស់ពួកយោធាផងដែរ៕