ក្រុមមន្ត្រីរុស្ស៊ី បាននិយាយថា មេក្រុមហ៊ុនទាហានស៊ីឈ្នួល Wagner លោក Yevgeny Prigozhin បានជិះនៅលើយន្តហោះឯកជនមួយគ្រឿងដែលបានផ្ទុះធ្លាក់នៅភាគខាងជើងទីក្រុងមូស្គូ កាលពីថ្ងៃពុធ ទី២៣ ខែសីហា ដែលបណ្ដាលឱ្យមនុស្សជិះលើយន្តហោះនោះស្លាប់ទាំងអស់។
បើតាមទីភ្នាក់ងារសារព័ត៌មាន AFP នៅថ្ងៃព្រហស្បតិ៍ ទី២៤ ខែសីហា នេះ ក្រុមមន្ត្រីអាកាសចរណ៍ស៊ីវិលរុស្ស៊ីបានចេញផ្សាយបញ្ជីឈ្មោះជនរងគ្រោះជាអ្នកដំណើរទាំង ៧នាក់ ក្នុងនោះរួមមានទាំងលោក Prigozhin និងមេបញ្ជាការរងនៃក្រុមទាហានស៊ីឈ្នួលរុស្ស៊ី Wagner ម្នាក់ គឺលោក Dmitry Utkin ព្រមទាំងសមាជិកអាកាសយានិក ៣នាក់ដែលត្រូវបានផ្សាយថាបានស្លាប់ទាំងអស់។
តាមការប្រកាសរបស់ទីភ្នាក់ងារស្ថានភាពអាសន្នរបស់រុស្ស៊ី អ្នកទាំង ១០នាក់នោះ គឺពុំមានមនុស្សណាម្នាក់នៅរស់រានមានជីវិតនោះទេ។
ជាមួយគ្នានេះ ទីភ្នាក់ងារអាកាសចរណ៍ស៊ីវិលរបស់រុស្ស៊ី Rosaviatsia បាននិយាយថា លោក Prigozhin ស្ថិតនៅក្នុងបញ្ជីឈ្មោះអ្នកដំណើរនៅលើយន្តហោះនោះ។
ទីភ្នាក់ងារសារព័ត៌មាន Tass របស់រុស្ស៊ី ដែលបានដកស្រង់សម្ដីរបស់ក្រុមមន្ត្រីសង្គ្រោះបន្ទាន់បានឱ្យដឹងថា អាជ្ញាធរកំពុងតែស៊ើបអង្កេតលើហេតុការណ៍ធ្លាក់យន្តហោះនោះ។ ហេតុការណ៍នោះបានកើតឡើងនៅតំបន់ Tver ដែលមានចម្ងាយជាង ១០០គីឡូម៉ែត្រនៅភាគខាងជើងទីក្រុងមូស្គូ ខណៈយន្តហោះកំពុងហោះសំដៅទៅទីក្រុង Saint Petersburg ជាលំនៅឋានរបស់លោក Prigozhin។
តាមទីភ្នាក់ងារអាកាសចរណ៍ស៊ីវិលរបស់រុស្ស៊ី យន្តហោះដែលបានដឹកលោក Prigozhin គឺយន្តហោះឯកជន Embraer Legacy 600។ ប៉ុន្តែហេតុការណ៍ធ្លាក់យន្តហោះនេះកើតមានឡើងតែជាង ២ខែប៉ុណ្ណោះបន្ទាប់ពីលោក Prigozhin ដឹកនាំការបះបោរយោធារយៈពេលខ្លីមួយប្រឆាំងនឹងមេដឹកនាំយោធារុស្ស៊ី។
ក្នុងការបះបោរនោះ លោក Prigozhin ដែលជាមេក្រុមទាហានស៊ីឈ្នួល Wagner និងកូនទាហានរបស់លោកបានប្រយុទ្ធព្រមគ្នាជាមួយនឹងទាហានរបស់រុស្ស៊ី នៅក្នុងប្រទេសរុស្ស៊ី កាលពីថ្ងៃទី២៤ មិថុនា។ ព្រឹត្តិការណ៍នោះ គឺជាការបះបោរប្រដាប់អាវុធសំដៅប្រឆាំងនឹងមេដឹកនាំយោធារុស្ស៊ី។
លោក Prigozhin គឺជាមេដឹកនាំក្នុងការបះបោរនោះ។ ក្រោយពីវាយកាន់កាប់បានក្រុងមួយជាប់ព្រំដែនរុស្ស៊ី និងអ៊ុយក្រែន លោក Prigozhin បានដឹកនាំទ័ព ៥០០០នាក់សំដៅទៅក្រុងមូស្គូ នូវអ្វីដែលគេហៅថាដើម្បីទាមទារយុត្តិធម៌ពីលោកប្រធានាធិបតីរុស្ស៊ី វ្លាឌីមៀ ពូទីន ឱ្យដកហូតតំណែងរដ្ឋមន្ត្រីការពារជាតិពីលោក Sergei Shoigu និងពីឧត្តមសេនីយ៍ Valery Gerasimov អគ្គសេនាធិការកងទ័ពដោយចោទថា មេទ័ពរុស្ស៊ី ២រូបនេះជាអ្នកបង្កជម្លោះជាមួយក្រុមទាហានរបស់លោក។
ក្នុងហេតុការណ៍នេះ លោក ពូទីន បានរត់ភៀសខ្លួនតាមយន្តហោះទៅកាន់តំបន់យ៉ាងឆ្ងាយពីក្រុងមូស្គូ ដោយបញ្ជាទ័ពតាមចាប់លោក Prigozhin ឱ្យបាន ហើយនាំយកមកកាត់ទោសក្រោមបទចោទថាជាមេបះបោរ ហើយក្បត់ជាតិ។
ភ្លាមៗក្រោយពីលោក ពូទីន ចេញបញ្ជាឱ្យចាប់ខ្លួន លោក Prigozhin ប្រកាសថារុស្ស៊ីត្រូវការប្រធានាធិបតីថ្មី។ ប្រព័ន្ធផ្សព្វផ្សាយនៅក្រុងមូស្គូ បានហៅការរុលសំដៅទៅក្រុងមូស្គូ របស់ទ័ព Wagner ថាជារដ្ឋប្រហារ។ តែចលនារបស់ទ័ពក្រុម Wagner ដែលសំដៅទៅក្រុងមូស្គូ បានវិលត្រឡប់ទៅជំរំវិញក្រោយពីលោក ពូទីន ទទួលយកការសម្របសម្រួលពីប្រធានាធិបតីនៃប្រទេសបេឡារុស ហើយសម្រេចដកបទបញ្ជាចាប់ខ្លួនលោក Prigozhin ជាមួយនឹងការទុកជាមោឃៈការចោទលោក Prigozhin ថាជនក្បត់ជាតិ។
តែយ៉ាងណានេះក្ដី អ្នកសង្កេតការណ៍ និងក្រុមមន្ត្រីជាន់ខ្ពស់នៃក្រុមបស្ចិមប្រទេស បានហៅស្ថានភាពនៅរុស្ស៊ី ពេលនោះ ថាកំពុងធ្លាក់ក្នុងការបែកបាក់ជុំវិញយុទ្ធសាស្ត្ររបស់លោក ពូទីន ធ្វើសង្គ្រាមឈ្លានពានប្រទេសអ៊ុយក្រែន។
លោក Antony Blinken បាននិយាយថា ការបះបោររបស់ក្រុមទាហានស៊ីឈ្នួលរុស្ស៊ី Wagner ប្រឆាំងនឹងវិមានក្រឹមឡាំង បានបង្ហាញពី «ស្នាមប្រេះ» នៅក្នុងអំណាចដឹកនាំរបស់លោកប្រធានាធិបតី ពូទីន។
ជាមួយគ្នានេះ អគ្គលេខាធិការអង្គការណាតូ Jens Stoltenberg បាននិយាយថា សកម្មភាពបះបោរប្រដាប់អាវុធដែលក្រោយមកត្រូវបោះបង់ចោលវិញរបស់ក្រុមទាហានស៊ីឈ្នួល Wagner នៅប្រទេសរុស្ស៊ី បង្ហាញថា ទីក្រុងមូស្គូបានប្រព្រឹត្តកំហុសឆ្គងផ្នែកយុទ្ធសាស្ត្រដ៏ធំមួយតាមរយៈការសម្រេចចិត្តបង្កសង្គ្រាមនៅអ៊ុយក្រែន។
រឿងនោះបានធ្វើឱ្យលោក ពូទីន មិនត្រឹមតែអាម៉ាស់មុខនៅឆាកអន្តរជាតិ ព្រោះតែករណីបះបោររបស់ក្រុមទាហានស៊ីឈ្នួល Wagner នោះទេ លោកអាចប្រឈមនឹងរលករិះគន់តវ៉ាក្នុងប្រទេសរុស្ស៊ី ថែមទៀត បើសង្គ្រាមលើទឹកដីអ៊ុយក្រែនកាន់តែអូសបន្លាយ ហើយរុស្ស៊ីពុំមានលទ្ធភាពឈ្នះសង្គ្រាម។
តើអ្វីនាំទៅរកស្ថានភាពបែបនេះ?
តាមសារព័ត៌មានក្នុងស្រុកនៃប្រទេសរុស្ស៊ី យន្តហោះនោះអាចត្រូវគ្រាប់មីស៊ីលដែលសាក្សីបានឃើញ និងលឺស្នូរផ្ទុះយ៉ាងខ្លាំង មុនវាធ្លាក់ដល់ដីលើវាលស្មៅ ហើយឆេះបង្កឱ្យមានអណ្ដាតភ្លើងយ៉ាងខ្លាំង។ ដំបូងភ្លាម គេរកឃើញសាកសព ៤នាក់ ហើយក្រោយមករកឃើញ ៥នាក់ទៀត តែសាកសពទាំងនោះមិនអាចកំណត់អត្តសញ្ញាណបាននោះទេ។ យន្តហោះបានស្ថិតក្នុងប្រព័ន្ធរ៉ាដាប្រហែលជា ៣០នាទី ហើយក៏បាត់ពីប្រព័ន្ធរ៉ាដាភ្លាម ទើបហេតុការណ៍នេះកើតឡើង។
ទោះជាយ៉ាងណា គ្មានប្រភពផ្លូវការណាមួយបញ្ជាក់ថា វាជាហេតុការណ៍ធម្មជាតិ ឬករណីបច្ចេកទេស ឬក៏រងការវាយប្រហារអ្វីនោះទេ។
ប៉ុន្តែកាលពីពេលថ្មីៗនេះ ប្រធានចារកម្មនៃប្រទេសអ៊ុយក្រែន ឧត្តមសេនីយ៍ Kyrylo Budanov បានបញ្ចេញព័ត៌មានថា លោក Prigozhin ជាមេក្រុមទាហានស៊ីឈ្នួលឱ្យរុស្ស៊ី ដែលមានជម្លោះនឹងមេទ័ពរុស្ស៊ី អាចនឹងត្រូវបានធ្វើឃាតដោយការបំពុល ឬការធ្វើឃាតដោយបាញ់សម្លាប់។ លោកបន្តថា លោក ពូទីន អាចនឹងបញ្ជាឱ្យកម្លាំងសម្ងាត់សម្លាប់លោក Prigozhin ឱ្យទាល់តែបាន។
យ៉ាងណា លោក ចូ បៃដិន ប្រធានាធិបតីសហរដ្ឋអាមេរិកបានថ្លែងថា លោកមិនមានការភ្ញាក់ផ្អើលអ្វីនោះទេចំពោះដំណឹងពីការបាត់បង់ជីវិតមេក្រុមទាហានស៊ីឈ្នួលឱ្យរុស្ស៊ី លោក Prigozhin។
Adrienne Watson អ្នកនាំពាក្យសម្រាប់ក្រុមប្រឹក្សាសន្តិសុខជាតិអាមេរិក បានប្រាប់បណ្ដាញផ្សាយព័ត៌មាន NBC ថា បើទោះជាពិតក៏ដោយ គឺលោក បៃដិន មិនមានអ្វីគួរឱ្យចាប់អារម្មណ៍នឹងរឿងនេះទេ៕