មន្ត្រីជាន់ខ្ពស់បក្សប្រឆាំង អះអាងថា ប្រទេសកម្ពុជាបានធ្លាក់ចូលទៅក្នុងការគ្រប់គ្រងផ្ដាច់មុខនៃគ្រួសារនិយមរបស់ត្រកូលហ៊ុនថែមមួយកម្រិតទៀត ក្រោយការផ្ទេរអំណាចពីលោក ហ៊ុន សែន ទៅលោក ហ៊ុន ម៉ាណែត និងការរៀបចំតែងតាំងសាច់ញាតិខ្លួនឯងឱ្យចូលទៅកាន់តួនាទីកាន់តែខ្ពស់ ដោយកម្ចាត់អ្នកដទៃឱ្យចេញផុតពីតួនាទីសំខាន់ៗក្នុងជួររដ្ឋាភិបាលនៅពេលនេះ។
តំណាងរាស្ត្រអតីតគណបក្សសង្គ្រោះជាតិលោក អ៊ុំ សំអាន បានសរសេរនៅលើគណនីហ្វេសប៊ុករបស់លោកនៅថ្ងៃទី២៤ សីហា នេះថា ខ្លឹមសារដែលចែងនៅក្នុងសេចក្តីសម្រេចបែងចែកតួនាទីសម្រាប់រដ្ឋាភិបាលអាណត្តិថ្មី បានបញ្ជាក់យ៉ាងច្បាស់ពីតួនាទីរបស់ឧបនាយករដ្ឋមន្ត្រីទី១ លោក នេត សាវឿន ដែលត្រូវក្លាយជានាយករដ្ឋមន្ត្រីស្តីទីជំនួសលោក ហ៊ុន ម៉ាណែត ពេលដែលនាយករដ្ឋមន្ត្រីអវត្តមាននៅក្នុងប្រទេស។
លោកបន្ថែមថា ខ្លឹមសារនេះបង្ហាញយ៉ាងច្បាស់ថា អំណាចត្រកូលហ៊ុនក្នុងស្ថាប័នរដ្ឋាភិបាលកាន់តែរីកធំជាងកាលពីពេលដែលលោក ហ៊ុន សែន នៅធ្វើជានាយករដ្ឋមន្ត្រីដែលមានលោក ស ខេង ពេលនោះជានាយករដ្ឋមន្ត្រីស្តីទីរាល់ពេលអវត្តមាននាយករដ្ឋមន្ត្រីនៅក្នុងប្រទេស ដែលមានន័យថា មុននឹងលោក ហ៊ុន សែន ធ្វើអ្វីក៏ត្រូវមានការឯកភាពពីលោក ស ខេង ជាមុនដែរ មិនមែនចេះតែធ្វើអ្វីៗស្រេចតែនឹងចិត្ត ឬតាមអំណាចដែលខ្លួនមាននោះទេ។
ប្រភពដដែលលើកឡើងថា លោក នេត សាវឿន ដែលត្រូវជាបងជីដូនមួយសាច់ថ្លៃរបស់លោក ហ៊ុន ម៉ាណែត ដូច្នេះការក្តោបក្តាប់អំណាចដើម្បីកាន់កាប់ប្រទេសកម្ពុជានឹងធ្លាក់ចូលទៅក្នុងការគ្រប់គ្រងផ្ដាច់មុខរបស់គ្រួសារត្រកូលហ៊ុនយ៉ាងពិតប្រាកដ ខណៈលោក ស សុខា ដែលរដ្ឋមន្ត្រីក្រសួងមហាផ្ទៃនឹងមិនបានក្លាយជានាយករដ្ឋមន្ត្រីស្តីទីដូចសម័យឪពុករបស់គាត់កាលពីជំនាន់លោក ហ៊ុន សែន ធ្វើជានាយករដ្ឋមន្ត្រីនោះទេ។
លោក អ៊ុំ សំអាន បញ្ជាក់ថា ការកំណត់តួនាទីឱ្យលោក នេត សាវឿន ក្លាយជានាយករដ្ឋមន្ត្រីស្តីទីបែបនេះ ពិតមែនតែធ្វើឱ្យត្រកូលហ៊ុនមានអំណាចកាន់តែខ្លាំង ប៉ុន្តែក៏បង្ហាញពីការបែកបាក់សាមគ្គីផ្ទៃក្នុងរបស់គណបក្សប្រជាជនកម្ពុជាក្នុងចំណោមមន្ត្រីជាន់ខ្ពស់របស់ពួកគេដែរ ខណៈមន្ត្រីបក្សកាន់អំណាចភាគច្រើនមានគោលដៅត្រឹមតែការពារអំណាចគណបក្សប៉ុណ្ណោះ មិនមែនប្រមូលផ្ដុំអំណាចក្នុងគ្រួសារដូចគ្រួសារត្រកូលហ៊ុននោះឡើយ។
កាលពីថ្ងៃទី២២ ខែសីហា ឆ្នាំ២០២៣ រដ្ឋសភាជាតិបានបោះឆ្នោតផ្ដល់សេចក្តីទុកចិត្តដល់រាជរដ្ឋាភិបាលអាណត្តិទី៧ ឆ្នាំ២០២៣ ដើម្បីកំណត់សមាសភាពរាជរដ្ឋាភិបាលអាណត្តិថ្មីដែលមានឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី ដែលសរុបមានចំនួនដល់ទៅជាង ១ពាន់នាក់ (១៥៤៣នាក់) ក្នុងនោះបក្ខពួក និងសែស្រឡាយសាច់ញាតិរបស់ត្រកូលហ៊ុន ត្រូវបានតែងតាំងជាមន្ត្រីជាន់ខ្ពស់ឱ្យកាន់តួនាទីសំខាន់ៗជាច្រើន ដូចជាលោក នេត សាវឿន ដែលត្រូវជាក្មួយប្រសារបស់លោក ហ៊ុន សែន ត្រូវតែងតាំងជាឧបនាយករដ្ឋមន្ត្រីទី១ ជាដើម។
ទាក់ទិននឹងបញ្ហានេះ នាយករដ្ឋមន្ត្រីថ្មីដែលត្រូវឪពុកលើកបន្តុបលោក ហ៊ុន ម៉ាណែត បានចេញសេចក្តីសម្រេចកាលពីថ្ងៃទី២២ ខែសីហា ស្ដីពីការកំណត់របៀបរបបការងារ និងបែងចែកភារកិច្ចរបស់ក្បាលម៉ាស៊ីនរដ្ឋាភិបាលដែលទើបនឹងត្រូវតែងតាំងផងដែរ ក្នុងនោះត្រង់ប្រការ៣ កំណត់ថា លោក នេត សាវឿន ដែលជាឧបនាយករដ្ឋមន្ត្រីទី១ ត្រូវទទួលបន្ទុកជានាយករដ្ឋមន្ត្រីស្ដីទីពេលនាយករដ្ឋមន្ត្រីអវត្តមាន។
ជាងនេះទៀត ត្រូវជួយនាយករដ្ឋមន្ត្រីលើវិស័យសន្តិសុខជាតិ និងសណ្ដាប់ធ្នាប់សាធារណៈក្នុងក្របខ័ណ្ឌអន្តរក្រសួង ជួយនាយករដ្ឋមន្ត្រីក្នុងការសម្របសម្រួលដឹកនាំកម្លាំងគ្រប់ប្រភេទ ដើម្បីការងារសន្តិសុខជាតិ និងសណ្ដាប់ធ្នាប់សាធារណៈ។ លើសពីនេះ ក៏ត្រូវទទួលសិទ្ធិពីនាយករដ្ឋមន្ត្រីក្នុងការបញ្ជាកងរាជអាវុធហត្ថលើផ្ទៃប្រទេស ក្នុងពេលនាយករដ្ឋមន្ត្រីអវត្តមានផងដែរ។
បន្ថែមពីនេះ ត្រូវជួយតម្រង់ទិសដល់អាជ្ញាធរ គណៈកម្មាធិការ ក្រុមប្រឹក្សាដែលចំណុះឱ្យរាជរដ្ឋាភិបាល ព្រមទាំងទទួលបន្ទុកអនុវត្តការងារពិសេស ឬបេសកកម្មពិសេសផ្សេងទៀតដែលនាយករដ្ឋមន្ត្រីប្រគល់ជូនថែមទៀត។
ដោយឡែកឧបនាយករដ្ឋមន្ត្រីផ្សេងទៀត ដូចជាលោក អូន ព័ន្ធមុនីរ័ត្ន ឬលោក ស សុខា ជាដើម គ្រាន់តែតម្រូវឱ្យទទួលខុសត្រូវចំពោះក្រសួងដែលពួកគេដឹកនាំប៉ុណ្ណោះ ប៉ុន្តែមិនមានតួនាទីជំនួសកិច្ចការនាយករដ្ឋមន្ត្រីដូចលោក ស ខេង ជំនួសលោក ហ៊ុន សែន កាលពីពេលដែលលោក ហ៊ុន សែន ធ្វើជានាយករដ្ឋមន្ត្រីនោះទេ ដែលនេះបង្ហាញថា ការរៀបចំគ្រប់គ្រងអំណាចរបស់ត្រកូលហ៊ុន គឺកាន់តែរឹងមាំ និងរីកធំជាងមុនទៅថ្ងៃមុខ។
ទាក់ទិននឹងបញ្ហានេះ អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ ធ្លាប់បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីពេលថ្មីៗនេះថា ក្រុមគ្រួសារត្រកូលហ៊ុនកំពុងរៀបចំឱ្យមានអង្គការចាត់តាំងតាមរបៀបប្រព័ន្ធគ្រប់គ្រងរបស់ខ្មែរក្រហម ដើម្បីរក្សាអំណាចនៃវង្សត្រកូលរបស់ខ្លួន។
លោក គឹម សុខ បញ្ជាក់ថា ការរៀបចំអំណាចដឹកនាំប្រទេសឱ្យស្ថិតក្រោមការគ្រប់គ្រងរបស់គណបក្ស ទោះអាក្រក់យ៉ាងណាក៏នៅតែគ្រាន់បើជាងការរៀបចំអំណាចដឹកនាំប្រទេសឱ្យស្ថិតក្រោមការគ្រប់គ្រងរបស់គ្រួសារនិយមដែរ ដូច្នេះការរៀបចំអំណាចក្តោបក្តាប់ប្រទេសកម្ពុជាក្នុងវង្សត្រកូលលោក ហ៊ុន សែន បែបនេះ នឹងទាញកម្ពុជាឱ្យវិលធ្លាក់ទៅក្នុងការដឹកនាំដូចអតីតកាលឡើងវិញ ដែលនឹងនាំវាសនាអាក្រក់ដល់ប្រទេសជាតិ និងប្រជាជននាពេលអនាគតជាមិនខាន៕