នាយករដ្ឋមន្ត្រីថ្មីរបស់កម្ពុជា ដែលទើបត្រូវបានឪពុកលើកបន្តុប គឺលោក ហ៊ុន ម៉ាណែត នៅថ្ងៃទី៥ ខែកញ្ញា ឆ្នាំ២០២៣ បានឯកភាពជាមួយនាយករដ្ឋមន្ត្រីវៀតណាម លោក ផាម មីញជីញ និងលោក សនសៃ ស៊ីផាន់ដន នាយករដ្ឋមន្ត្រីឡាវ បន្តអនុវត្តយន្តការបញ្ចប់ការកំណត់ព្រំដែនរវាងប្រទេសទាំងបីឱ្យបានទាំងស្រុងនាពេលដ៏ខ្លីខាងមុខ។
ការសម្រេចឯកភាពជាមួយនាយករដ្ឋមន្ត្រីវៀតណាម និងនាយករដ្ឋមន្ត្រីឡាវ នេះ ធ្វើឡើងអំឡុងពេលចូលរួមកិច្ចប្រជុំកំពូលអាស៊ានលើកទី៤៣ និងកិច្ចប្រជុំកំពូលពាក់ព័ន្ធនៅទីក្រុងហ្សាកាតា ប្រទេសឥណ្ឌូនេស៊ី ទៅលើកិច្ចសហប្រតិបត្តិការមួយចំនួនដើម្បីផ្តល់ផលប្រយោជន៍ដល់ប្រជាជននៃប្រទេសទាំងបី។
នាយករដ្ឋមន្ត្រីនៃប្រទេសទាំងបី សម្រេចអនុវត្តគោលការណ៍មួយចំនួន ដូចជាបន្តរក្សាប្រពៃណីនៃការពិភាក្សាការងារត្រីភាគីនៅមុនពេលបើកកិច្ចប្រជុំកំពូលធំៗក្នុងតំបន់ ដែលតែងផ្ដល់ផលប្រយោជន៍ជាច្រើនដល់ប្រទេសទាំងបី បន្តដោះស្រាយជាមួយគ្នា និងជំរុញសម្រេចឱ្យបាននូវលទ្ធផលចំពោះបញ្ហាដែលនៅសេសសល់ទាំងឡាយរវាងប្រទេសទាំងបីផងដែរ។
នាយករដ្ឋមន្ត្រីកម្ពុជា ឡាវ និងវៀតណាម បញ្ជាក់ថា ភាគីទាំងបីត្រូវតែបន្តអនុវត្តយន្តការនៃការកំណត់ព្រំដែនរវាងប្រទេសទាំងបី ដើម្បីបញ្ចប់ទាំងស្រុងឱ្យបានឆាប់ៗ និងបន្តកិច្ចសហប្រតិបត្តិការជាមួយគ្នាទាំងក្នុងទិដ្ឋភាពសង្គម សេដ្ឋកិច្ច សន្តិសុខ ការផ្សារភ្ជាប់រវាងប្រជាជន និងប្រជាជន វប្បធម៌ និងប្រពៃណី ព្រមទាំងជំរុញនូវទំនាក់ទំនង និងការផ្សារភ្ជាប់រវាងប្រទេសទាំងបីលើគ្រប់មធ្យោបាយ រួមទាំងហេដ្ឋារចនាសម្ព័ន្ធ ដូចជាស្ពាន ផ្លូវ ផ្លូវដែក កំពង់ផែ សង្វាក់ផ្គត់ផ្គង់ និងទេសចរណ៍ ជាដើម។
ការឯកភាពគ្នាលើការកំណត់ព្រំដែនរវាងកម្ពុជា ឡាវ និងវៀតណាម នេះ ត្រូវគេមើលឃើញថា កម្ពុជាកាន់តែខាតបង់ទឹកដីរបស់ខ្លួនទៅខាងភាគីវៀតណាមតាំងពីលោក ហ៊ុន សែន នៅជានាយករដ្ឋមន្ត្រីមកម្ល៉េះ។
ប្រទេសកម្ពុជាមានខេត្តចំនួន ៩ ដែលជាប់ព្រំប្រទល់ជាមួយប្រទេសវៀតណាម ដូចជាខេត្តកំពត ខេត្តព្រៃវែង ខេត្តស្វាយរៀង ខេត្តកំពង់ចាម ខេត្តក្រចេះ ខេត្តមណ្ឌលគិរី ខេត្តរតនគិរី ខេត្តកណ្ដាល និងខេត្តតាកែវ ដែលមានព្រំដែនគោករួមគ្នាប្រវែង ១២៧០គីឡូម៉ែត្រ ខណៈការកំណត់បោះបង្គោលព្រំដែននៃប្រទេសទាំងពីរនៅសល់តែ ១០% ទៀតប៉ុណ្ណោះ ដែលកំពុងចរចាដើម្បីបោះបង្គោលបញ្ចប់ ចំណែកការកំណត់ព្រំដែនរវាងកម្ពុជា និងឡាវ បានប្រមាណជា ៨៦% នៅពេលនេះ។
ទាក់ទិននឹងបញ្ហានេះ កាលពីអំឡុងខែឧសភា ឆ្នាំ២០២២ លោក ហ៊ុន សែន ដែលជាឪពុករបស់លោក ហ៊ុន ម៉ាណែត បានលើកឡើងថា សព្វថ្ងៃនេះការបោះបង្គោលព្រំដែនរវាងកម្ពុជា-វៀតណាម សម្រេចបាន ៩០% ហើយ ខណៈភាគីទាំងពីរកំពុងចរចាគ្នាបន្តទៀត ដើម្បីឱ្យឈានទៅដល់គោលដៅបោះបង្គោលឱ្យបាន ១០០% តែម្តង។
លោក ហ៊ុន សែន អះអាងថា កម្ពុជា-វៀតណាម បានឯកភាពគ្នាស្នើសុំអ្នកជំនាញការបារាំងដើម្បីជួយផ្ទេរផែនទីពីផែនទីបោនខ្នាត ១/១០០ពាន់ មកផែនទី UTM ខ្នាត ១/៥០ពាន់វិញ ដើម្បីមានភាពច្បាស់លាស់ងាយស្រួលក្នុងការបោះបង្គោលព្រំដែនរវាងប្រទេសទាំងពីរ។
អនុប្រធានវេទិកាពលរដ្ឋលោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី៥ កញ្ញា នេះថា ប្រសិនបើលោក ហ៊ុន ម៉ាណែត ប្រើផែនទីខ្នាត ១/២៥ពាន់ និងផែនទីខ្នាត ១/៥០ពាន់ ជំនួសផែនទីខ្នាត ១/១០០ពាន់ដូចលោក ហ៊ុន សែន ឪពុករបស់គាត់នោះ គឺមានន័យថា ផែនការសម្បទានទឹកដីរបស់កម្ពុជាឱ្យទៅវៀតណាម គឺនៅតែបន្តក្នុងជំនាន់ដឹកនាំរបស់លោក ហ៊ុន ម៉ាណែត បន្តពីលោក ហ៊ុន សែន ដែលជាឪពុកដដែល។
លោក ម៉ែន ណាត អះអាងថា ការចុះកិច្ចព្រមព្រៀងជាមួយវៀតណាម ដោយកំណត់យកផែនទីខ្នាត ១/២៥ពាន់ និងផែនទីខ្នាត ១/៥០ពាន់ជំនួសផែនទីខ្នាត ១/១០០ពាន់ ដែលមានចែងក្នុងរដ្ឋធម្មនុញ្ញដើម្បីកំណត់ខ្សែបន្ទាត់ព្រំដែនរវាងកម្ពុជា និងវៀតណាម នោះនឹងធ្វើឱ្យកម្ពុជាបាត់បង់ទឹកដីទៅវៀតណាមយ៉ាងធ្ងន់ធ្ងរ ដែលបង្ហាញពីការបាត់បង់បូរណភាពទឹកដីរបស់កម្ពុជាផងដែរទៅថ្ងៃអនាគតកាន់តែជ្រៅទៅៗ។
អនុប្រធានវេទិកាពលរដ្ឋរូបនេះអំពាវនាវឱ្យនាយករដ្ឋមន្ត្រីថ្មីរបស់កម្ពុជាលោក ហ៊ុន ម៉ាណែត សើរើឯកសារខុសច្បាប់ដែលលោក ហ៊ុន សែន បានចុះហត្ថលេខាខុសច្បាប់កាត់ទឹកដីឱ្យវៀតណាមកន្លងមក ប្រសិនបើគាត់ពិតជាគិតគូរពីបូរណភាពទឹកដីរបស់ប្រទេសជាតិនៅពេលដែលគាត់ឡើងកាន់តំណែងជានាយករដ្ឋមន្ត្រីរបស់កម្ពុជានៅពេលនេះមែននោះ៕