ក្នុងដំណើរតាមរថភ្លើងដោយឆ្លងកាត់ព្រំដែនរួមកូរ៉េខាងជើង និងរុស្ស៊ី បាននាំលោក គីម ជុងអ៊ុន ចូលទៅដល់ខាងក្នុងនៃទឹកដីរុស្ស៊ី ដោយបានឆ្ពោះទៅដល់តំបន់ស៊ីបេរី នោះហើយ ដែលលោក វ្ល៉ាឌីមៀរ ពូទីន រង់ចាំចាប់ដៃរលាក់ជាមួយលោក គីម ជុងអ៊ុន។
តាមការចេញផ្សាយដោយទីភ្នាក់ងារសារព័ត៌មាន AFP មេដឹកនាំកូរ៉េខាងជើង លោក គីម ជុងអ៊ុន និងប្រធានាធិបតីរុស្ស៊ី លោក វ្ល៉ាឌីមៀរ ពូទីន បានជួបគ្នា និងចាប់ដៃគ្នានៅថ្ងៃពុធ ទី១៣ ខែកញ្ញា នេះ ដែលជំនួបនេះធ្វើឡើងនៅឯទីតាំងអវកាស Vostochny Cosmodrome ជាមូលដ្ឋានបាញ់បង្ហោះយានអវកាសដ៏ទំនើបមួយស្ថិតនៅចុងបូព៌ាបំផុតនៃប្រទេសរុស្ស៊ី ហើយនេះក៏ជាជំនួបលើកដំបូងម្ដងទៀតរវាងមេដឹកនាំកំពូលនៃប្រទេសទាំងពីរដែលបានជួបគ្នាម្ដងហើយនៅឯកិច្ចប្រជុំមួយក្នុងទីក្រុង Vladivostok កាលពីឆ្នាំ២០១៩។
បើតាមទីភ្នាក់ងារសារព័ត៌មានរុស្ស៊ី Tass លោក គីម ជុងអ៊ុន និងលោក ពូទីន បានពិភាក្សាគ្នាពីទំនាក់ទំនងពាណិជ្ជកម្ម ក៏ដូចជាកិច្ចការអន្តរជាតិ ប៉ុន្តែលោក ពូទីន បាននិយាយថា រុស្ស៊ីនឹងជួយកូរ៉េខាងជើងផលិតផ្កាយរណប ហើយនៅពេលត្រូវបានសាកសួរថា តើជំនួបនេះមានការជជែកគ្នាអំពីការផ្គត់ផ្គង់អាវុធពីកូរ៉េខាងជើងដែរឬក៏អត់នោះ លោក ពូទីន បានឆ្លើយតបថា មេដឹកនាំទាំងពីរនឹងពិភាក្សាអំពីបញ្ហាទាំងអស់នេះ។
លោក ពូទីន បានឆ្លើយប្រាប់អ្នកសារព័ត៌មានថា នេះហើយជាមូលហេតុដែលលោក និងលោក គីម បានមកកាន់ទីនេះ។ ក្នុងជំនួបនោះ លោក គីម បានបង្ហាញការចាប់អារម្មណ៍ជាខ្លាំងចំពោះវិស្វកម្មគ្រាប់រ៉ុក្កែត ហើយប្រទេសរបស់លោកក៏កំពុងព្យាយាមអភិវឌ្ឍវិស័យអវកាសដែរ។
ក្នុងឱកាសនោះ លោក ពូទីន បាននាំលោក គីម ដើរទស្សនាមូលដ្ឋានអវកាស Vostochny Cosmodrome រួមមានអគារដែលជាកន្លែងកំពុងដំឡើងគ្រាប់រ៉ុក្កែតអវកាសស៊េរីថ្មី Angara របស់រុស្ស៊ី។
រ៉ុក្កែតប្រវែងជាង ៤០ម៉ែត្រនោះ គឺប្រើសម្រាប់បញ្ជូនវត្ថុផ្សេងៗឡើងទៅកាន់គន្លងអវកាសកម្រិតទាបក្បែរផែនដី។ កាលពីប៉ុន្មានខែកន្លងទៅនេះ កូរ៉េខាងជើងធ្លាប់បានព្យាយាមបាញ់បង្ហោះផ្កាយរណបចារកម្មឡើងទៅកាន់អវកាសពីរលើក ប៉ុន្តែទទួលបរាជ័យទាំងពីរលើក។
ក្នុងជំនួបជាប្រវត្តិសាស្ត្រថ្មីទៀត កំពូលមេដឹកនាំកូរ៉េខាងជើង លោក គីម បានប្ដេជ្ញាពង្រឹងទំនាក់ទំនងឱ្យកាន់តែជិតស្និទ្ធជាមួយរុស្ស៊ី។ លោកសន្យាថា កូរ៉េខាងជើងនឹងឈរនៅជាមួយរុស្ស៊ីជានិច្ច ហើយនឹងផ្ដោតអាទិភាពចម្បងបំផុតទៅលើទំនាក់ទំនងជាមួយទីក្រុងមូស្គូ។
លោកបន្តថា ក្រុងព្យុងយ៉ាង សូមគាំទ្ររុស្ស៊ីដោយឥតលក្ខខណ្ឌចំពោះសង្គ្រាមជាមួយអ៊ុយក្រែន។ លោក ជុងអ៊ុន មិនត្រឹមតែសន្យាគាំទ្ររុស្ស៊ីធ្វើសង្គ្រាមជាមួយនឹងអ៊ុយក្រែន នោះទេ គឺសន្យាជួយ និងគាំទ្ររុស្ស៊ី ប្រឆាំងនឹងពួកបស្ចិមប្រទេស ដែលលោក ជុងអ៊ុន ហៅថាពួកចក្រព័ត្រនិយម និងជាកម្លាំងអនុត្តរភាពដែលកំពុងតែព្យាយាមបំផ្លាញសន្តិសុខរបស់ប្រទេសរុស្ស៊ី។
យោងតាមប្រព័ន្ធព័ត៌មានរបស់រុស្ស៊ី លោក ជុងអ៊ុន សន្យាថា កូរ៉េខាងជើងតែងតែគាំទ្រពេញទំហឹង និងឥតលក្ខខណ្ឌចំពោះជំហររបស់រដ្ឋាភិបាលរុស្ស៊ី ដែលប្រឆាំងពួកចក្រព័ត្រដែលលោកធានាជាថ្មីថា កូរ៉េខាងជើងសន្យាបន្តឈរនៅជាមួយរុស្ស៊ីជាប់ជានិច្ច។
បើតាមប្រព័ន្ធផ្សព្វផ្សាយរបស់រុស្ស៊ី ជំនួបកំពូលរវាងមេដឹកនាំទាំងពីរដែលធ្វើឡើងរវាងប្រតិភូមួយទល់មួយ បានបិទបញ្ចប់ទៅវិញក្រោយប្រព្រឹត្តទៅអស់រយៈពេលប្រហែល ២ម៉ោង។ តែយ៉ាងណា សម្រាប់លោក ជុងអ៊ុន គឺជាដំណើរទស្សនកិច្ចក្រៅប្រទេសលើកដំបូងរបស់លោកក្នុងរយៈពេលជាង ៤ឆ្នាំមកនេះ។
ទស្សនកិច្ចរបស់លោក ជុងអ៊ុន នៅឯក្រៅប្រទេសរុស្ស៊ី គឺកាលពីឆ្នាំ២០១៩ នៅពេលដែលរូបលោកបានធ្វើដំណើរទៅកាន់ទីក្រុង Vladivostok សម្រាប់កិច្ចប្រជុំកំពូលលើកទីមួយជាមួយលោក ពូទីន ក្រោយការដួលរលំនៃកិច្ចចរចារំសាយអាវុធនុយក្លេអ៊ែរកូរ៉េខាងជើង ដែលអតីតប្រធានាធិបតីសហរដ្ឋអាមេរិក លោក ដូណាល់ ត្រាំ បានជួបលោក ជុងអ៊ុន ដល់ទៅ ៣លើក។
ក្រុមមន្ត្រីរបស់សហរដ្ឋអាមេរិក អះអាងថា រុស្ស៊ីមានការចាប់អារម្មណ៍លើសព្វាវុធរបស់កូរ៉េខាងជើង ដោយចង់ទិញគ្រាប់រំសេវដូចជាគ្រាប់កាំភ្លើងធំ និងមីស៊ីលប្រឆាំងរថក្រោះជាដើម ដើម្បីយកទៅប្រើប្រាស់ក្នុងសង្គ្រាមឈ្លានពានរបស់ក្រុងមូស្គូទៅលើអ៊ុយក្រែន។
ចំណែកខាងទីក្រុងព្យុងយ៉ាង ក៏អាចទទួលបានផលប្រយោជន៍មកវិញផងដែរ ខណៈដែលខ្លួនចង់បានបច្ចេកវិទ្យាផ្កាយរណបទំនើបៗ និងបច្ចេកវិទ្យានាវាមុជទឹកដើរដោយថាមពលនុយក្លេអ៊ែរ។
កាលពីដើមខែកញ្ញា ក្រុងវ៉ាស៊ីនតោន សង្ស័យថា ក្រុងព្យុងយ៉ាងអាចផ្តល់ឱ្យរុស្ស៊ីនូវគ្រាប់រ៉ុក្កែត និងមីស៊ីល។ តែសម្រាប់អ្នកស្រាវជ្រាវនៅវិទ្យាស្ថានសិក្សាយុទ្ធសាស្ត្រអន្តរជាតិក្រុងមូស្គូ យល់ថា រុស្ស៊ីពិតជាត្រូវការពីកូរ៉េខាងជើង នូវគ្រាប់កាំភ្លើងធំ ព្រោះព្យុងយ៉ាងមានឃ្លាំងស្តុកគ្រាប់កាំភ្លើងធំផលិតសម័យសហភាពសូវៀតច្រើនជាងគេបំផុត ដែលអាចមកបំពេញឃ្លាំងស្តុកគ្រាប់របស់រុស្ស៊ី។
បើតាមសារព័ត៌មាន The Sydney Morning Herald លោក ជុងអ៊ុន ត្រឡប់ទៅវិញជាមួយនឹងការសន្យារបស់លោក ពូទីន ជួយប្រេងឥន្ធនៈ ស្បៀង និងបច្ចេកវិទ្យានាវាមុជទឹកដើរដោយថាមពលនុយក្លេអ៊ែរ ហើយកូរ៉េខាងជើងអាចនឹងជួយរុស្ស៊ីវិញនូវអ្វីដែលរុស្ស៊ីត្រូវការ គឺគ្រាប់រំសេវមួយចំនួន។
ប៉ុន្តែសហរដ្ឋអាមេរិកព្រមានខ្លាំងៗទៅលើកូរ៉េខាងជើងថា ប្រសិនបើកូរ៉េខាងជើងលក់គ្រាប់កាំភ្លើងធំ ឬអាវុធណាមួយទៅឱ្យរុស្ស៊ី គឺត្រូវតែប្រឈមមុខនឹងទណ្ឌកម្មធ្ងន់ធ្ងរថែមទៀត។
តែក្នុងពេលដែលលោក ជុងអ៊ុន និងលោក ពូទីន ជួបគ្នានេះ កូរ៉េខាងជើងបានបាញ់មីស៊ីលបាលិស្ទីច ចំនួន ២គ្រាប់។
យោងតាមសេចក្ដីថ្លែងការណ៍មួយរបស់នាយសេនាធិការកងទ័ពកូរ៉េខាងត្បូង កូរ៉េខាងជើងបានបាញ់មីស៊ីលបាលិស្ទីច ទម្លាក់ចូលក្នុងសមុទ្រជប៉ុន។
ជាមួយគ្នានេះ ក្រសួងការពារជាតិជប៉ុន បានឱ្យដឹងថា គ្រាប់មីស៊ីលបាលិស្ទីចដែលកូរ៉េខាងជើងបានបាញ់នៅព្រឹកថ្ងៃពុធ ទី១៣ ខែកញ្ញា នេះ វាបានធ្លាក់ទៅលើសមុទ្រជប៉ុន ដែលអាជ្ញាធរជប៉ុនបានតាមដានជាខ្លាំង៕