វិទ្យុសំឡេងប្រជាធិបតេយ្យ (Voice of Democracy) ដែលហៅកាត់ថា (VOD) ប្រកាសចាប់ផ្តើមដំណើរការសកម្មភាពរបស់ខ្លួនឡើងវិញនៅដើមខែក្រោយ បន្ទាប់ពីត្រូវបានបិទខ្ទប់ពីសំណាក់រដ្ឋាភិបាលកម្ពុជាអស់រយៈពេល ៨ខែកន្លងមក។
សារព័ត៌មានសំឡេងប្រជាធិបតេយ្យ វីអូឌី (VOD) បានចេញសេចក្តីប្រកាសព័ត៌មានស្ដីពីការចាប់ផ្តើមដំណើរការផ្សព្វផ្សាយព័ត៌មានរបស់ខ្លួនឡើងវិញនៅថ្ងៃទី១៩ ខែកញ្ញា ឆ្នាំ២០២៣ នេះថា ខ្លួននឹងចាប់ផ្តើមជីវិតទីពីរដោយដាក់ដំណើរការផ្សាយព័ត៌មានសាជាថ្មីចាប់ពីថ្ងៃទី២ ខែតុលា ឆ្នាំ២០២៣ តាមបណ្ដាញសង្គម Facebook, YouTube និង Tik Tok រៀងរាល់ម៉ោង ៥:៣០នាទីដល់ម៉ោង ៦:០០នាទីល្ងាច ម៉ោងនៅប្រទេសកម្ពុជា។
ប្រភពដដែលបញ្ជាក់ថា រាល់ប្រតិបត្តិការរបស់ VOD នឹងត្រូវធ្វើឡើងពីទីស្នាក់ការកណ្តាលរបស់ខ្លួននៅទីក្រុងតាកូម៉ា នៃរដ្ឋវ៉ាស៊ីនតោន សហរដ្ឋអាមេរិក ហើយ VOD នៅតែបន្តរក្សាជំហរជាសារព័ត៌មានឯករាជ្យ និងបន្តបេសកកម្មក្នុងការផ្តល់ព័ត៌មានពិត ស៊ីជម្រៅជូនពលរដ្ឋកម្ពុជា ដើម្បីចូលរួមលើកស្ទួយសេរីភាពសារព័ត៌មាន និងសេរីភាពបញ្ចេញមតិនៅកម្ពុជាដូចមុនដដែល។
ការចេញសេចក្តីប្រកាសព័ត៌មាននេះ ធ្វើឡើងដើម្បីផ្សាយអំពីដំណើរការសកម្មភាពរបស់កម្មវិធីផ្សាយព័ត៌មានសំឡេងប្រជាធិបតេយ្យ វីអូឌី ឡើងវិញ ក្រោយការបិទខ្ទប់ពីសំណាក់រដ្ឋាភិបាលកម្ពុជាតាំងពីដើមខែកុម្ភៈ ឆ្នាំ២០២៣ មក។
កម្មវិធីផ្សាយព័ត៌មានសំឡេងប្រជាធិបតេយ្យ វីអូឌី Voice of Democracy (VOD) ត្រូវបានបង្កើតឡើងកាលពីអំឡុងឆ្នាំ២០០៩ ដើម្បីជួយលើកកម្ពស់អភិបាលកិច្ចតាមបែបប្រជាធិបតេយ្យ និងការអនុវត្តសិទ្ធិមនុស្សនៅកម្ពុជាក្រោមឆត្ររបស់មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ដែលដឹកនាំដោយលោក ប៉ា ងួនទៀង អស់រយៈពេល ២០ឆ្នាំកន្លងមក។
កាលពីថ្ងៃទី៣១ ខែមករា ឆ្នាំ២០២៣ មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) បានលើកឡើងក្នុងខួប ២០ឆ្នាំរបស់ខ្លួនថា ដំណើរការរបស់ វីអូឌី ក្នុងការផ្សព្វផ្សាយនូវព័ត៌មានឯករាជ្យប្រកបដោយវិជ្ជាជីវៈអស់រយៈពេល ២០ឆ្នាំ បានឆ្លងកាត់នូវឧបសគ្គជាច្រើនពីការរាំងខ្ទប់របស់រដ្ឋាភិបាលកម្ពុជា។
ជាក់ស្តែង នៅអំឡុងឆ្នាំ២០០៧ វីអូឌី បានដាក់លិខិតមួយច្បាប់ទៅរដ្ឋមន្ត្រីក្រសួងព័ត៌មាន ក្នុងបំណងស្នើសុំហ្វ្រេកង់វិទ្យុដើម្បីបើកស្ថានីយផ្សព្វផ្សាយព័ត៌មាន និងកម្មវិធីនានា ប៉ុន្តែត្រូវបានក្រសួងព័ត៌មានបដិសេធក្រោមហេតុផលថា អស់ហ្រេ្វកង់ ស្របពេលដែលស្ថានីយវិទ្យុថ្មីៗជាច្រើនផ្សេងទៀតដែលស្និទ្ធនឹងរដ្ឋាភិបាល បានបើកដំណើរការជាបន្តបន្ទាប់។
រហូតដល់ឆ្នាំ២០១៥ វីអូឌី បានចាប់ផ្តើមដំណើរការផ្សាយកម្មវិធីរបស់ខ្លួនដោយសហការជាមួយក្រុមហ៊ុនឯកជនដែលទទួលបានសិទ្ធិផ្សព្វផ្សាយ ប៉ុន្តែត្រូវបានក្រសួងព័ត៌មានលុបសិទ្ធិគ្រប់គ្រងអាជ្ញាប័ណ្ណរបស់ក្រុមហ៊ុនឯកជនមួយនោះវិញ បន្ទាប់ពីខ្លួនបានផ្សព្វផ្សាយត្រឹមតែមួយសប្តាហ៍ប៉ុណ្ណោះ។ ក្រៅពីនេះ ស្ថានីយវិទ្យុក្រុមហ៊ុនផ្សេងៗទៀតដែលបានសហការផ្សាយកម្មវិធីរបស់ VOD ក៏ត្រូវបានហាមឃាត់ដោយរដ្ឋាភិបាលកាលពីអំឡុងខែសីហា ឆ្នាំ២០១៧ ផងដែរ។
ទោះបី VOD ខំប្រឹងធ្វើសកម្មភាពទៅមុខដោយច្រកចង្អៀតអស់រយៈពេល ២០ឆ្នាំក៏ដោយ ក៏ការគំរាមកំហែងនៅកើតមានជានិច្ច។ ជាក់ស្តែង កាលពីអំឡុងខែឧសភា ឆ្នាំ២០១៥ អ្នកសារព័ត៌មាន វីអូឌី បានរងនូវការវាយដំទាត់ធាក់រហូតសន្លប់នៅទីលានប្រជាធិបតេយ្យ។ ជាងនេះទៀត ក៏មានការឃាត់ខ្លួន និងការប្រើអំពើហិង្សាមកលើក្រុមការងារ VOD នៅតំបន់អភិរក្សសួនសត្វភ្នំតាម៉ៅ កាលពីថ្ងៃទី១៦ ខែសីហា ឆ្នាំ២០២២ ផងដែរ ក្នុងនោះក៏មានការគំរាមកំហែងជាច្រើនពីសំណាក់អាជ្ញាធរថែមទៀត។
ជាអកុសល នៅថ្ងៃទី១៣ ខែកុម្ភៈ ឆ្នាំ២០២៣ ក្រសួងព័ត៌មានបានចេញសេចក្តីប្រកាសព័ត៌មានលុបអាជ្ញាប័ណ្ណរបស់អង្គភាពសារព័ត៌មានមួយនេះ តាមការបញ្ជារបស់អតីតនាយករដ្ឋមន្ត្រីកម្ពុជាលោក ហ៊ុន សែន បន្ទាប់ពី VOD បានចុះផ្សាយអត្ថបទមួយពាក់ព័ន្ធនឹងលោក ហ៊ុន ម៉ាណែត ដែលបានដើរតួនាទីជំនួសលោក ហ៊ុន សែន ក្នុងការផ្តល់ជំនួយឲ្យប្រទេសតួកគី ហើយដែលត្រូវបានលោក ហ៊ុន សែន ចោទថា VOD មានចេតនាមួលបង្កាច់លើលោក ហ៊ុន ម៉ាណែត និងមានចេតនាធ្វើឲ្យប៉ះពាល់ដល់រាជរដ្ឋាភិបាលរបស់លោក។
ទាក់ទិននឹងការបិទអង្គភាពសារព័ត៌មាន វីអូឌី នេះ អង្គការក្រៅរដ្ឋាភិបាល និងបណ្ដាញអ្នកសារព័ត៌មានអន្តរជាតិមួយចំនួន រួមមានសហព័ន្ធអ្នកសារព័ត៌មានអន្តរជាតិ (អាស៊ីប៉ាស៊ីហ្វិក) អង្គការអ្នករាយការណ៍គ្មានព្រំដែន (RSF) និងក្លឹបអ្នកសារព័ត៌មានបរទេសជប៉ុន (Foreign Correspondents’ Club of Japan (FCCJ) បានរិះគន់ថា ការសម្រេចចិត្តលុបចោលអាជ្ញាប័ណ្ណផ្សាយព័ត៌មានរបស់ វីអូឌី នៅមុនការបោះឆ្នោតថ្នាក់ជាតិឆ្នាំ២០២៣ បានបង្ហាញពីការគំរាមកំហែងប្រឆាំងនឹងសារព័ត៌មានឯករាជ្យយ៉ាងធ្ងន់ធ្ងរ។
អង្គការអ្នកសារព័ត៌មានគ្មានព្រំដែន (Reporters Without Borders) បានដាក់ចំណាត់ថ្នាក់សេរីភាពសារព័ត៌មាននៅកម្ពុជាសម្រាប់ឆ្នាំ២០២២ ស្ថិតក្នុងលំដាប់លេខរៀងទី១៤២ ក្នុងចំណោមប្រទេស១៨០ ដែលជាចំណាត់ថ្នាក់ដ៏អាក្រក់មួយ ក្រោយគេរកឃើញថា ប្រព័ន្ធផ្សព្វផ្សាយឯករាជ្យនៅកម្ពុជាត្រូវបានបំផ្លិចបំផ្លាញ និងបោសសំអាតដោយរដ្ឋាភិបាលកម្ពុជា ចាប់តាំងពីអំឡុងឆ្នាំ២០១៧ និងឆ្នាំ២០១៨ រហូតមក ដែលធ្វើឱ្យសេរីភាពសារព័ត៌មាននៅប្រទេសកម្ពុជាបន្តធ្លាក់ចុះជាបន្តបន្ទាប់រហូតមកដល់ពេលនេះ៕