សាលាដំបូងរាជធានីភ្នំពេញ ផ្ដន្ទាទោសអនុប្រធានគណបក្សភ្លើងទៀន លោក ថាច់ សេដ្ឋា ឲ្យជាប់ពន្ធនាគារជាង ១ឆ្នាំក្នុងសំណុំរឿងចេញសែកស្អុយ ខណៈសំណុំរឿង «ញុះញង់» តុលាការនឹងបើកសវនាការនៅខែតុលា ខាងមុខនេះវិញ។
ការប្រកាសសាលក្រមនេះ ធ្វើឡើងបន្ទាប់ពីចៅក្រមជំនុំជម្រះសាលាដំបូងរាជធានីភ្នំពេញ អ្នកស្រី ឈុន ដារី បានបើកសវនាការជំនុំជម្រះសំណុំរឿងអនុប្រធានគណបក្សភ្លើងទៀន លោក ថាច់ សេដ្ឋា កាលពីព្រឹកថ្ងៃទី៦ ខែកញ្ញា។
ចៅក្រមជំនុំជម្រះសាលាដំបូងរាជធានីភ្នំពេញ អ្នកស្រី ឈុន ដារី នៅថ្ងៃទី២១ ខែកញ្ញា នេះ បានប្រកាសសាលក្រមដោយផ្ដន្ទាទោសអនុប្រធានគណបក្សភ្លើងទៀន លោក ថាច់ សេដ្ឋា ឲ្យជាប់ពន្ធនាគារចំនួន ១៨ខែក្រោមបទចោទប្រកាន់ «មិនបំពេញកាតព្វកិច្ចចំពោះឧបករណ៍អាចជួញដូរបាន ឬចេញសែកអត់ប្រាក់»។
ក្រៅពីផ្ដន្ទាទោសហើយ អ្នកស្រី ឈុន ដារី ក៏បានបង្គាប់ឲ្យលោក ថាច់ សេដ្ឋា សងសំណងរដ្ឋប្បវេណីទៅកាន់ដើមបណ្ដឹងប្រមាណ ៣ម៉ឺនដុល្លារ និងសងជំងឺចិត្តដល់ដើមបណ្តឹងរដ្ឋប្បវេណីដដែលចំនួន ៥លានរៀល រួមទាំងបង្គាប់ឲ្យលោក ថាច់ សេដ្ឋា បង់ប្រាក់ពិន័យចូលរដ្ឋចំនួន ៣លានរៀលបន្ថែមទៀតផងដែរ។
ភរិយារបស់លោក ថាច់ សេដ្ឋា និងអ្នកដែលគាំទ្រលោក រួមទាំងអនុប្រធានគណបក្សភ្លើងទៀន លោក រ៉ុង ឈុន ផងនោះ បានចាត់ទុកការសម្រេចរបស់ចៅក្រមសាលាដំបូងរាជធានីភ្នំពេញនាថ្ងៃទី២១ កញ្ញា នេះថាជារឿងអយុត្តិធម៌។
ភរិយារបស់អនុប្រធានគណបក្សភ្លើងទៀនលោក ថាច់ សេដ្ឋា គឺលោកស្រី ថាច់ សុខបូរ៉ានី ធ្លាប់លើកឡើងថា រយៈពេលជាប់នៅក្នុងពន្ធនាគារនេះ សុខភាពរបស់ស្វាមីអ្នកស្រីកាន់តែទ្រុឌទ្រោម ដោយសារមិនបានទទួលការព្យាបាលជំងឺដូចនៅខាងក្រៅ ស្របពេលស្វាមីលោកស្រីកំពុងមានជំងឺបេះដូង និងជំងឺប្រចាំកាយផ្សេងទៀតផងដែរ។
ក្រៅពីរឿងចេញសែកស្អុយ ឬសែកអត់ប្រាក់ លោក ថាច់ សេដ្ឋា ក៏ត្រូវបានសាលាដំបូងរាជធានីភ្នំពេញចោទពីបទ «ញុះញង់បង្កឲ្យមានភាពវឹកវរក្នុងសង្គម និងបទញុះញង់ឲ្យមានការរើសអើងពូជសាសន៍» បន្ថែមទៀតដែរ បន្ទាប់ពីលោកនិយាយអំពីនយោបាយ និងប្រវត្តិសាស្ត្រប្រទេសកម្ពុជាជាមួយពលករនៅប្រទេសកូរ៉េខាងត្បូង កាលពីដើមឆ្នាំ២០២៣។
ការចោទប្រកាន់នេះ ក្រោមហេតុផលថា លោក ថាច់ សេដ្ឋា បាននិយាយអំពីប្រវត្តិសាស្ត្រថ្ងៃ៧មករា ឆ្នាំ១៩៧៩ ជាថ្ងៃ «វៀតណាមឈ្លានពាន» ការសង់ស្តូបមិត្តភាពកម្ពុជា-វៀតណាម ធ្វើឲ្យ «បែកបាក់ជាតិ» និងនិយាយអំពីប្រវត្តិនៃការកកើតគណបក្សប្រជាជនកម្ពុជា។
ចំពោះសំណុំរឿងទាំងពីរខាងលើនេះ តុលាការគ្រោងនឹងបើកសវនាការនៅថ្ងៃទី២១ ខែកញ្ញា នេះដែរ ប៉ុន្តែក្រោយពីប្រកាសសាលក្រមសំណុំរឿងចេញសែកស្អុយនាព្រឹកនេះរួច តុលាការក៏សម្រេចលើកពេលទៅបើកសវនាការនៅថ្ងៃទី១៨ ខែតុលា ខាងមុខនេះវិញ។
អនុប្រធានគណបក្សភ្លើងទៀន លោក ថាច់ សេដ្ឋា ត្រូវបានសមត្ថកិច្ចចាប់ខ្លួនកាលពីខែមករា ឆ្នាំ២០២៣។ ការចាប់ខ្លួននេះ ធ្វើឡើងតាមបណ្ដឹងរបស់ក្រុមហ៊ុន រិនឆាយ ផនសប ដែលបានប្ដឹងលោកបន្ទាប់ពីលោក ថាច់ សេដ្ឋា បានខ្ចីប្រាក់ពីក្រុមហ៊ុនមួយនេះចំនួន ២ម៉ឺនដុល្លារកាលពីអំឡុងឆ្នាំ២០១១ និងឆ្នាំ២០១២ ប៉ុន្តែបើតាមមេធាវីការពារក្ដីឲ្យលោក ថាច់ សេដ្ឋា អះអាងថា ប្រាក់ដែលកូនក្ដីរបស់លោកជំពាក់ក្រុមហ៊ុន រិនឆាយ នៅតែ ៥ពាន់ដុល្លារទៀតតែប៉ុណ្ណោះ។
យោងតាមរបាយការណ៍របស់ក្រសួងពាណិជ្ជកម្ម ក្រុមហ៊ុន រិនឆាយ ផនសប នេះបានចុះបញ្ជីពាណិជ្ជកម្មផ្លូវការនៅក្នុងក្រសួងពាណិជ្ជកម្ម កាលពីខែតុលា ឆ្នាំ២០១៥។ ម្ចាស់ក្រុមហ៊ុន លោក ហៃ វ៉ាន់រិន ត្រូវគេដឹងថាជាមនុស្សដែលស្និទ្ធនឹងគណបក្សប្រជាជនកម្ពុជា។
ក្រៅពីកាន់កាប់ក្រុមហ៊ុន រិនឆាយ ផនសប ហើយ លោក ហៃ វ៉ាន់រិន ក៏ជាម្ចាស់ក្រុមហ៊ុន Dynith Commercial ដែលមានទីតាំងនៅសង្កាត់ទំនប់ទឹក ខណ្ឌចំការមន រាជធានីភ្នំពេញថែមទៀត។ ក្រុមហ៊ុននេះត្រូវបានចុះបញ្ជីនៅក្រសួងពាណិជ្ជកម្មកាលពីចុងខែមីនា ឆ្នាំ២០១៤។
សព្វថ្ងៃ ក្រុមហ៊ុន Dynith Commercial នេះគ្រប់គ្រងដោយអ្នកស្រី ឌី សុខឃី ជាកូនស្រីអតីតស្នងការនគរបាលក្រុងភ្នំពេញ លោក ហុក ឡង់ឌី ហើយក៏ត្រូវជាភរិយារបស់លោក ហ៊ុន ម៉ានិត ដែលជាកូនប្រុសទីពីររបស់លោក ហ៊ុន សែន ផងដែរ៕