អ្នកឃ្លាំមើល ទាមទាររដ្ឋសភាឲ្យកោះហៅរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ទៅសួរដេញដោល ដើម្បីឲ្យបំភ្លឺរឿងដំឡើងពន្ធ ខណៈសេដ្ឋកិច្ចកម្ពុជាត្រូវគេមើលឃើញថាកំពុងធ្លាក់ចុះបន្តបន្ទាប់។
ការទាមទារនេះ ធ្វើឡើងបន្ទាប់ពីរដ្ឋាភិបាលក្បាលធំដែលដឹកនាំដោយលោក ហ៊ុន ម៉ាណែត កំពុងចាត់វិធានការរឹតបន្តឹងការប្រមូល និងដំឡើងពន្ធផ្សេងៗយ៉ាងប្រញាប់ប្រញាល់ ដោយមិនខ្វល់ពីផលប៉ះពាល់ដល់ពលរដ្ឋ និងវិស័យឯកជនមួយចំនួន ខណៈសេដ្ឋកិច្ចកម្ពុជាកំពុងធ្លាក់ចុះដោយពលរដ្ឋជួបវិបត្តិអត់ការងារធ្វើ និងជំពាក់បំណុលធនាគារ ជាដើម។
អ្នកវិភាគនយោបាយ បណ្ឌិត ឡៅ ម៉ុងហៃ លើកឡើងថា តំណាងរាស្ត្រគួរតែកោះអញ្ជើញរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុទៅសួរចម្លើយ និងបំភ្លឺអំពីការដំឡើងពន្ធលើរាស្ត្រ។
ចំណែកលោក ប៉ា ចន្ទរឿន បានលើកឡើងលើហ្វេសប៊ុកនាថ្ងៃទី២៨ កញ្ញា នេះថា នៅប្រទេសជឿនលឿនដែលកាន់របបប្រជាធិបតេយ្យសេរី ប្រសិនបើសង្គមរបស់គេមានបញ្ហាអ្វីមួយ សភារបស់គេតែងតែកោះអញ្ជើញតំណាងរដ្ឋាភិបាល ឬរដ្ឋមន្ត្រីដែលពាក់ព័ន្ធមកបំភ្លឺ និងបង្ហាញអំពីដំណោះស្រាយជូនពលរដ្ឋ។
ដោយឡែកលោក អ៊ូ វីរៈ ក៏បានលើកឡើងដែរថា ទោះបីជាពលរដ្ឋមានកាតព្វកិច្ចបង់ពន្ធក៏ពិតមែន ប៉ុន្តែពួកគេក៏មានសិទ្ធិដឹងអំពីរបៀបដែលប្រាក់របស់ពួកគេត្រូវបានចំណាយដែរ។
សារព័ត៌មាន The Cambodia Daily មិនទាន់អាចសុំការអត្ថាធិប្បាយពីអ្នកនាំពាក្យរដ្ឋសភាកម្ពុជាបាននៅឡើយទេនាថ្ងៃនេះ។
មាត្រា ៩៦ និង ៩៧ នៃរដ្ឋធម្មនុញ្ញកម្ពុជា ចែងថា អ្នកតំណាងរាស្ត្រមានភារកិច្ចដាក់សំណួរ ឬសួរដេញដោលចំពោះសមាជិករដ្ឋាភិបាល ហើយរឿងដែលសំខាន់ចាំបាច់ទៅទៀតនោះ គឺតំណាងរាស្ត្រមានកាតព្វកិច្ចតាមដាន ឃ្លាំមើលការអនុវត្តការងាររបស់ក្រសួងស្ថាប័នទាំងនោះ ដើម្បីធានាឲ្យឃើញថាមានការអនុវត្តការងារបានត្រឹមត្រូវ ស្មោះត្រង់ និងតម្លាភាពក្នុងការបម្រើផលប្រយោជន៍ជាតិ។
តែយ៉ាងណា ចាប់តាំងពីឆ្នាំ២០១៨ ដល់ឆ្នាំ២០២៣ ក្រុមអ្នកឃ្លាំមើលថារដ្ឋសភាដែលជាអ្នកតំណាងរាស្ត្រនេះ មិនបានការពារផលប្រយោជន៍ពលរដ្ឋ និងសង្គមជាតិឡើយ។ ផ្ទុយទៅវិញ រដ្ឋសភាបច្ចុប្បន្នការពារតែផលប្រយោជន៍គ្រួសារត្រកូល «ហ៊ុន» និងបក្ខពួកខ្លួនតែប៉ុណ្ណោះ ពីព្រោះរដ្ឋសភាសព្វថ្ងៃនេះកើតចេញពីគណបក្សតែមួយ ពោលគឺគណបក្សប្រជាជនកម្ពុជា៕