អាជ្ញាធរសាលារាជធានីភ្នំពេញ ដាក់ចេញវិធានការដើម្បីត្រៀមជម្លៀសប្រជាពលរដ្ឋក្នុងខណ្ឌមួយចំនួនក្នុងរាជធានីភ្នំពេញ ដែលប្រឈមនឹងគ្រោះទឹកជំនន់នាពេលខាងមុខ។
សេចក្ដីណែនាំស្ដីពីការត្រៀមវិធានការទប់ទល់នឹងគ្រោះទឹកជំនន់ក្នុងភូមិសាស្ត្ររាជធានីភ្នំពេញ កាលពីថ្ងៃទី០៩ ខែតុលា ឆ្នាំ២០២៣ ឲ្យដឹងថា រដ្ឋបាលខណ្ឌទាំង១៤ និងមន្ទីរ-អង្គភាពជំនាញជុំវិញរដ្ឋបាលរាជធានីភ្នំពេញ ត្រូវត្រៀមសហការ និងធ្វើការសម្របសម្រួលការងារពាក់ព័ន្ធទៅតាមជំនាញសមត្ថកិច្ចរៀងខ្លួន ដើម្បីជួយសង្គ្រោះប្រជាពលរដ្ឋដែលរងគ្រោះ។
ដូច្នេះ ដើម្បីទប់ទល់នឹងគ្រោះទឹកជំនន់ សាលារាជធានីភ្នំពេញបានប្រាប់ទៅរដ្ឋបាលខណ្ឌទាំង ១៤ ជាពិសេសរដ្ឋបាលខណ្ឌដង្កោ ខណ្ឌកំបូល ខណ្ឌព្រែកព្នៅ ខណ្ឌឫស្សីកែវ ខណ្ឌជ្រោយចង្វារ ខណ្ឌច្បារអំពៅ ត្រូវអនុវត្តវិធានការមួយចំនួន។
លិខិតដដែលថា ក្នុងនោះ ត្រូវកំណត់ទីទួលសុវត្ថិភាព ដើម្បីត្រៀមជម្លៀសប្រជាពលរដ្ឋ រៀបចំបង្គន់អនាម័យ ទឹកស្អាត និងអគ្គិសនី ដោយធ្វើការសហការជាមួយមន្ទីរ-អង្គភាពជំនាញពាក់ព័ន្ធសម្រាប់ជូនប្រជាពលរដ្ឋប្រើប្រាស់ជាបណ្ដោះអាសន្ន និងណែនាំផ្សព្វផ្សាយជូនប្រជាពលរដ្ឋឲ្យបានជ្រាបនូវទីតាំងទួលសុវត្ថិភាព ដែលរដ្ឋបាលខណ្ឌបានកំណត់ និងត្រូវរៀបចំកម្លាំងការពារសន្តិសុខ សុវត្ថិភាព និងរបៀបរៀបរយនៅទីទួលសុវត្ថិភាពនោះ។
មួយវិញទៀត ត្រៀមមធ្យោបាយដឹកជញ្ជូន រថយន្ត សម្ភារៈ ចប បង្គី បាវខ្សាច់ និងស្បៀង ដើម្បីជួយសង្គ្រោះប្រជាពលរដ្ឋដែលរងគ្រោះដោយទឹកជំនន់ និងត្រៀមធ្វើស្ថិតិប្រជាពលរដ្ឋរងគ្រោះដោយទឹកជំនន់ ដើម្បីងាយស្រួលគាំពារផ្នែកជីវភាព និងជំនួយសង្គមផ្សេងៗ។
លើសពីនេះ ត្រូវផ្សព្វផ្សាយតាមគ្រប់មធ្យោបាយជូនប្រជាពលរដ្ឋក្នុងតំបន់ងាយរងគ្រោះ ឲ្យត្រៀមលក្ខណៈបង្ការ និងការពារសុវត្ថិភាពនៅពេលមានទឹកជំនន់កើតឡើង និងធ្វើការកៀរគររកសប្បុរសជន និងវិស័យឯកជន ដើម្បីចូលរួមឧបត្ថម្ភគាំទ្រថវិកា សម្ភារៈ និងគ្រឿងឧបភោគបរិភោគ ដើម្បីជួយប្រជាពលរដ្ឋរងគ្រោះដោយទឹកជំនន់។
សាលារាជធានីភ្នំពេញក៏ឲ្យរៀបចំក្រុមវេនយាមប្រចាំការនៅតាមអង្គភាពរបស់ខ្លួន ដើម្បីក្តាប់ព័ត៌មានត្រៀមអន្តរាគមន៍ និងចាត់វិធានការដោះស្រាយរាល់បញ្ហាដែលបានកើតឡើងឲ្យបានទាន់ពេលវេលា។
ការដាក់ចេញវិធានការទៅរដ្ឋបាលខណ្ឌទាំង ១៤ នាពេលនេះ គឺអនុវត្តតាមសេចក្ដីណែនាំរបស់ក្រសួងមហាផ្ទៃ កាលពីថ្ងៃទី០៣ ខែតុលា ឆ្នាំ២០២៣ ដើម្បីចូលរួមបង្ការ និងត្រៀមជួយសង្គ្រោះប្រជាពលរដ្ឋដែលងាយរងគ្រោះ និងមានហានិភ័យខ្ពស់ដោយគ្រោះទឹកជំនន់នៃទន្លេ ស្ទឹង និងទឹកជំនន់ដោយទឹកភ្លៀងនៅតំបន់មួយចំនួនក្នុងភូមិសាស្ត្ររាជធានីភ្នំពេញ ព្រមទាំងធានាបាននូវសុខុមាលភាពល្អប្រសើរជូនប្រជាពលរដ្ឋ។
ប្រភពដដែលថា ស្នងការដ្ឋាននគរបាលភ្នំពេញ បញ្ជាការដ្ឋានកងរាជអាវុធហត្ថរាជធានីភ្នំពេញ និងបញ្ជាការដ្ឋានយោធភូមិភាគពិសេស ត្រូវត្រៀមកម្លាំង មធ្យោបាយដឹកជញ្ជូន រថយន្ត ទូក កាណូតអូប័រ និងសម្ភារៈផ្សេងៗ ដើម្បីជួយអន្តរាគមន៍សង្គ្រោះប្រជាពលរដ្ឋរងគ្រោះដោយទឹកជំនន់ ខណៈរដ្ឋបាលខណ្ឌទាំង ១៤ មន្ទីរ-អង្គភាពជំនាញជុំវិញរដ្ឋបាលរាជធានីភ្នំពេញ និងគ្រប់ភាគីពាក់ព័ន្ធ ត្រូវចាត់ចែងផ្សព្វផ្សាយ និងអនុវត្តឲ្យមានប្រសិទ្ធភាព និងប្រកបដោយស្មារតីទទួលខុសត្រូវខ្ពស់។
ជារឿយៗ ទីក្រុងភ្នំពេញដែលតែងតែរងការជន់លិចដោយជំនន់ទឹកភ្លៀងគ្រប់រដូវវស្សា ដែលជំនន់នេះដោយសារបឹងធម្មជាតិធំៗនៅរាជធានីភ្នំពេញត្រូវបានចាក់លុបអស់។
កន្លងមក ក្រុមអង្គការសង្គមស៊ីវិលមួយក្រុម គឺអង្គការការពារសិទ្ធិមនុស្សលីកាដូ បណ្ដាញយុវជនកម្ពុជា អង្គការសមធម៌កម្ពុជា អង្គការសមាគមធាងត្នោត ធ្លាប់បានចេញរបាយការណ៍ព្រមានពីលទ្ធភាពនៃការជន់លិចក្នុងទីក្រុងភ្នំពេញ ដោយសារការចាក់ដីបំពេញផ្ទៃបឹងធំៗ ដូចជាបឹងទំពុន ឬបឹងជើងឯក ជាដើម។
របាយការណ៍ឲ្យដឹងថា បឹងទំពុនរងការបំផ្លិចបំផ្លាញដោយសារការអភិវឌ្ឍហេដ្ឋារចនាសម្ព័ន្ធផ្លូវថ្នល់ និងលំនៅឋានថ្មីៗ។
កាលពីចុងឆ្នាំ២០១៩ សមាគមធាងត្នោត ក៏បានចេញរបាយការណ៍ដាច់ដោយឡែកមួយដោយបានលើកឡើងអំពីការចាក់ដីលុបផ្ទៃបឹងធំមួយទៀត គឺបឹងតាមោក ឬបឹងទំនប់កប់ស្រូវ ដែលមានផ្ទៃដីចំនួន ៣២៣៩ហិកតារ ខណៈបច្ចុប្បន្ននេះ ផ្ទៃបឹងធម្មជាតិនេះនៅសល់ប្រមាណ ១០០០ហិកតារប៉ុណ្ណោះ៕