អ្នកជំនាញផ្នែកសិទ្ធិមនុស្ស UN ស្នើរដ្ឋាភិបាលកម្ពុជាធ្វើកំណែទម្រង់ឡើងវិញ ដោយថាការបន្តពូជពង្សឡើងកាន់អំណាចនៅកម្ពុជា ធ្វើឲ្យប៉ះពាល់សិទ្ធិមនុស្ស គោលការណ៍ប្រជាធិបតេយ្យ និងច្បាប់អន្តរជាតិ។
ការលើកឡើងរបស់អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា លោក Vitit Muntarbhorn បន្ទាប់ពីលោក ហ៊ុន សែន អតីតនាយករដ្ឋមន្ត្រីកម្ពុជាបានបញ្ជាឲ្យបិទគណបក្សប្រឆាំងមិនឲ្យចូលរួមប្រកួត និងរឹតត្បិតសេរីភាពពលរដ្ឋ មុនពេល និងអំឡុងពេលបោះឆ្នោតជ្រើសតាំងតំណាងរាស្ត្រកាលពីខែកក្កដា កន្លងទៅ ដើម្បីផ្ទេរអំណាចឲ្យលោក ហ៊ុន ម៉ាណែត បន្តវេន។
សេចក្តីប្រកាសព័ត៌មានរបស់ការិយាល័យឧត្ដមស្នងការអង្គការសហប្រជាជាតិ ចេញផ្សាយកាលពីសប្តាហ៍មុន ដោយបង្ហាញការព្រួយបារម្ភពីបញ្ហាសិទ្ធិមនុស្សនៅកម្ពុជា ដោយសារតែការឡើងកាន់អំណាចតពូជនេះ ធ្វើឲ្យប៉ះពាល់ដល់សិទ្ធិមនុស្ស គោលការណ៍ប្រជាធិបតេយ្យ និងច្បាប់អន្តរជាតិ។
ចំពោះឧបសគ្គដែលបានប៉ះពាល់ដល់ការបោះឆ្នោតឆ្នាំ២០២៣ កន្លងទៅ អ្នកជំនាញផ្នែកសិទ្ធិមនុស្សថាការដកសិទ្ធិបេក្ខជន ការយាយីសមាជិកបក្សប្រឆាំង និងឯករាជភាពរបស់គណៈកម្មាធិការជាតិរៀបចំការបោះឆ្នោត ជាដើម។
ហេតុនេះ លោក Vitit Muntarbhorn ថាកម្ពុជាត្រូវធ្វើកំណែទម្រង់ឡើងវិញចំពោះរចនាសម្ព័ន្ធគណៈកម្មាធិការជាតិរៀបចំការបោះឆ្នោត ដោយការជ្រើសរើសបុគ្គលបោះឆ្នោតដោយមិនលម្អៀង និងត្រូវមានអ្នកសង្កេតការណ៍ឯករាជ្យផងដែរ ដើម្បីធានានូវតម្លាភាព និងយុត្តិធម៌។
ចំណែកសហព័ន្ធសិទ្ធិមនុស្សអន្តរជាតិ និងអង្គការអាដហុកវិញ ក៏បានដាក់របាយការណ៍ស្ដីពីបញ្ហាសិទ្ធិមនុស្សនៅកម្ពុជាទៅកាន់ក្រុមប្រឹក្សាសិទ្ធិមនុស្សនៃអង្គការសហប្រជាជាតិដែរ កាលពីពេលថ្មីៗនេះ។
របាយការណ៍របស់សហព័ន្ធសិទ្ធិមនុស្សអន្តរជាតិ និងអង្គការអាដហុក ដែលដាក់ទៅក្រុមប្រឹក្សាសិទ្ធិមនុស្សនៃអង្គការសហប្រជាជាតិ ដោយផ្ដោតទៅលើបញ្ហាសិទ្ធិមនុស្ស បញ្ហាដីធ្លី ការចាប់ខ្លួនសកម្មជននយោបាយ លំហសេរីភាពនយោបាយ លំហសេរីភាពសារព័ត៌មាន និងប្រព័ន្ធច្បាប់នៅកម្ពុជា ជាដើម។
ការដាក់របាយការណ៍ទៅកាន់អង្គការសហប្រជាជាតិនេះ ដើម្បីឲ្យពិនិត្យឡើងវិញនូវយន្តការសកលលើកទីបួន (UPR) ដែលគ្រោងធ្វើឡើងនៅខែមេសា និងខែឧសភា ឆ្នាំ២០២៤ នៅទីក្រុងហ្សឺណែវ ប្រទេសស្វីស។
សហព័ន្ធសិទ្ធិមនុស្សអន្តរជាតិ និងអង្គការអាដហុក បញ្ជាក់ក្នុងរបាយការណ៍ថា រដ្ឋាភិបាលកម្ពុជាមិនបានអនុវត្តទៅតាមអនុសាសន៍ដែលបានដាក់ចេញដោយក្រុមប្រឹក្សាសិទ្ធិមនុស្សនៃអង្គការសហប្រជាជាតិ តាមរយៈយន្តការកំណត់ជាសកល (UPR) លើកទី៣ នោះទេ។ ករណីនេះ ធ្វើឲ្យស្ថានភាពសិទ្ធិមនុស្ស និងលទ្ធិប្រជាធិបតេយ្យនៅកម្ពុជាកាន់តែធ្លាក់ចុះជាបន្តបន្ទាប់៕