មន្ត្រីជាន់ខ្ពស់រដ្ឋាភិបាលកម្ពុជា អះអាងថា ប្រសិនបើសមត្ថកិច្ចរបស់លោក ហ៊ុន ម៉ាណែត នៅតែអនុវត្តច្បាប់ដោយធូររលុងក្រោមអំពើពុករលួយ ដែលបង្កឱ្យមានអំពើឧក្រិដ្ឋផ្សេងៗ ដូចជា ការជួញដូរផ្លូវភេទ និងការចរាចរល្បែងអនឡាញខុសច្បាប់ពីសំណាក់ជនជាតិចិន ដូចសព្វថ្ងៃនេះ គឺជាទង្វើបំផ្លាញទាំងកេរ្តិ៍ឈ្មោះរបស់កម្ពុជាផង និងកំពុងបំផ្លាញសេដ្ឋកិច្ចរបស់កម្ពុជាផងដែរ។
មន្ត្រីជាន់ខ្ពស់នៃរដ្ឋាភិបាលថ្មីមួយរូប បានទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះដើម្បីសុវត្ថិភាពផ្ទាល់ខ្លួននៅថ្ងៃទី២៦ តុលា នេះថា រដ្ឋាភិបាលកម្ពុជាដែលកំពុងដឹកនាំដោយគណបក្សប្រជាជនកម្ពុជា គឺជាអ្នកដែលត្រូវទទួលខុសត្រូវទាំងស្រុងលើកេរ្តិ៍ឈ្មោះរបស់កម្ពុជាដែលបានខូចខាត ដោយសារការលេចឡើងនូវអំពើឧក្រិដ្ឋកម្មនានា ដូចជាការជួញដូរផ្លូវភេទ ការចាប់ជំរិត និងការចរាចរល្បែងតាមអនឡាញ ជាដើមសព្វថ្ងៃនេះ។
ជាងនេះទៀត ក៏ត្រូវតែទទួលខុសត្រូវលើការធ្លាក់ចុះនៃសេដ្ឋកិច្ចរបស់កម្ពុជាផ្នែកខាងវិស័យទេសចរណ៍ផងដែរ ដែលភ្ញៀវទេសចរនៅលើពិភពលោកមានការខ្លាចរអារហូតមិនហ៊ានទៅលេងប្រទេសកម្ពុជាសព្វថ្ងៃនេះ។
ប្រភពដដែលបន្ថែមថា ភ្ញៀវទេសចរដែលរដ្ឋាភិបាលប្រកាសថាមានចំនួនជាង ៣លាននាក់កាលពីពេលថ្មីៗនេះ មិនមែនសុទ្ធតែជាភ្ញៀវទេសចរដែលចូលទៅទស្សនាប្រទេសកម្ពុជានោះទេ ប៉ុន្តែភាគច្រើនលើសលប់ គឺជាភ្ញៀវទេសចរចិនដែលចូលទៅលេងល្បែងក្នុងកាស៊ីណូរបស់ចិន ដែលកំពុងបើកដំណើរការនៅក្នុងស្រុកខ្មែរនាពេលនេះប៉ុណ្ណោះ។
មន្ត្រីរដ្ឋាភិបាលរូបនេះរិះគន់ថា ក្នុងនាមលោក ហ៊ុន ម៉ាណែត ដែលជានាយករដ្ឋមន្ត្រីថ្មីរបស់កម្ពុជា និងបានបញ្ចប់ការសិក្សាខាងបណ្ឌិតសេដ្ឋកិច្ចនៅប្រទេសអង់គ្លេស នាពេលកន្លងមកនោះ មិនទាន់ឃើញដោះស្រាយវិបត្តិសេដ្ឋកិច្ចរបស់ប្រទេសកម្ពុជាដែលកំពុងប្រឈមនៅពេលនេះបាននៅឡើយទេ ប៉ុន្តែក្រោយការឡើងកាន់អំណាចជានាយករដ្ឋមន្ត្រី បែរជាគាត់ដឹកនាំមន្ត្រីរបស់ខ្លួនតម្រង់ជួរគ្នាទៅខ្ចីលុយពីចិនទៅវិញ ខណៈអំពើឧក្រិដ្ឋនៅកម្ពុជាក៏ចេះតែលេចឡើងជាបន្តបន្ទាប់ពីក្រុមឧក្រិដ្ឋជនចិន ផងដែរ។
មន្ត្រីរដ្ឋាភិបាលដដែលបញ្ជាក់ថា ដោយសារតែរដ្ឋាភិបាលកម្ពុជាមិនបានពង្រឹងការអនុវត្តច្បាប់បែបនេះហើយ បានជាភ្ញៀវទេសចរល្អៗ រួមទាំងភ្ញៀវទេសចរចិន ផង នាំគ្នាសម្រុកទៅលេងប្រទេសថៃ យ៉ាងច្រើនសន្ធឹកសន្ធាប់ក្នុងពេលបច្ចុប្បន្ននេះ ស្របពេលដែលវិស័យទេសចរណ៍របស់កម្ពុជាមានភាពស្ងាត់ជ្រងំ ដោយសារតែភ្ញៀវទេសចរទាំងនោះមានការភ័យខ្លាចពីអំពើឧក្រិដ្ឋនានាដែលបានកើតឡើងនៅកម្ពុជាសព្វថ្ងៃនេះ ជាហេតុធ្វើឱ្យចំណូលរបស់កម្ពុជាខាងវិស័យមួយនេះធ្លាក់ចុះយ៉ាងគំហុក។
ការអះអាងនេះ ធ្វើឡើងបន្ទាប់ពីមានជនជាតិចិន និងខ្មែរ ប្រមាណ ៣០នាក់ ត្រូវបានកម្លាំងសមត្ថកិច្ចឃាត់ខ្លួនបន្ទាប់ពីសង្ស័យថាពួកគេបានយកប្រទេសកម្ពុជាធ្វើអាជីវកម្មផលិតវីដេអូអាសអាភាសកាលពីពេលថ្មីៗនេះ។
កាលពីថ្ងៃទី២៤ ខែតុលា ឆ្នាំ២០២៣ កម្លាំងសមត្ថកិច្ចក្រសួងមហាផ្ទៃ បានបើកប្រតិបត្តិការចុះបង្ក្រាបជនជាតិចិន និងខ្មែរ នៅទីតាំងអគារក្រុមហ៊ុនដឹកជញ្ជូនអាហារចិនឈ្មោះ Wow Now ដែលមានទីតាំងនៅលើផ្លូវ៣១០ ខណ្ឌបឹងកេងកង រាជធានីភ្នំពេញ បន្ទាប់ពីសង្ស័យថាពួកគេបានយកប្រទេសកម្ពុជាធ្វើអាជីវកម្មផលិតរឿងអាសអាភាសរវាងជនជាតិចិន និងជនជាតិខ្មែរ ដែលបានលេចចេញតាមវេបសាយ និងប្រព័ន្ធសង្គមតេឡេក្រាមនាពេលកន្លងមក។
សមត្ថកិច្ចរបស់ក្រសួងមហាផ្ទៃ បានបញ្ជាក់ក្នុងប្រតិបត្តិការនោះថា ការបង្ក្រាបនេះធ្វើឡើងដោយមានការស៊ើបអង្កេតយ៉ាងម៉ត់ចត់ ខណៈវីដេអូអាសអាភាសមួយចំនួនដែលសមត្ថកិច្ចបានរកឃើញ និងតាមដានកន្លងមកនោះ គឺដោយសារមានការលេចចេញនៅលើវេបសាយប្រមាណជាង ១ខែមកហើយ។
ទាក់ទិននឹងបញ្ហានេះ កាលពីចុងខែកញ្ញា ឆ្នាំ២០២៣ ឧស្សាហកម្មភាពយន្តចិនខ្នាតធំមួយបានចាក់បញ្ចាំងរឿង No More Bets ដែលបានលាតត្រដាងពីការពិតនៃអំពើជួញដូរមនុស្ស និងឧក្រិដ្ឋកម្មផ្សេងៗប្រមាណ ១សែនករណីនៅកម្ពុជា។
បន្ទាប់ពីខ្សែភាពយន្តនេះត្រូវបានចាក់បញ្ចាំង បានធ្វើឱ្យភ្ញៀវទេសចរចិន និងភ្ញៀវទេសចរតាមបណ្តាប្រទេសផ្សេងៗដែលបានទស្សនាខ្សែភាពយន្តនេះ បដិសេធដូចៗគ្នាពីភាពខ្លាចរអាក្នុងការទៅលេងប្រទេសកម្ពុជា។
ខ្សែភាពយន្តខ្នាតធំ No More Bet បានពណ៌នាពីខ្សែជីវិតអ្នកសរសេរកម្មវិធីម្នាក់ (Programmer) និងតារាស្រីបង្ហាញម៉ូតម្នាក់ (Model) ជាជនជាតិចិន ដែលបានចាញ់បោកក្រុមឧក្រិដ្ឋជនពីការប្រកាសស្វែងរកការងារតាមអនឡាញដោយការសន្យាទទួលបានប្រាក់ខែខ្ពស់។
ប៉ុន្តែទីបំផុត ពួកគេត្រូវបានបោកប្រាស់យកទៅធ្វើការខុសច្បាប់ឱ្យធ្វើការឆបោកតាមប្រព័ន្ធអ៊ីនធឺណិត ដែលត្រូវក្រុមឧក្រិដ្ឋជនលក់ពីកន្លែងមួយទៅកន្លែងមួយ ជាដើម ខណៈជនរងគ្រោះដែលជាបុរសត្រូវបានបង្ខំឱ្យធ្វើការឆបោកតាមប្រព័ន្ធអនឡាញ ដូចជា ការបណ្ដាក់ទុន (Investments in stock, bitcoin, Mining, Online Games, E-Commerce) ឬការជំរិតទារប្រាក់តាមវិធីផ្សេងៗ ជាដើម។
សាច់រឿងនេះ ក៏បានបង្ហាញពីការធ្វើទារុណកម្មរបស់ក្រុមឧក្រិដ្ឋជនទៅលើជនរងគ្រោះយ៉ាងព្រៃផ្សៃដែរ ដូចជាការលក់មនុស្សឱ្យបម្រើសេវាកម្មផ្លូវភេទ ការចាក់បញ្ចូលថ្នាំញៀនឱ្យទទួលភ្ញៀវ ការបាញ់សម្លាប់ជនរងគ្រោះដែលមានបំណងលួចរត់ ការដកក្រចក ការយកស្គុតរុំច្រមុះឱ្យថប់ដង្ហើម កាត់ស្លឹកត្រចៀក ច្រានជនរងគ្រោះទម្លាក់ពីលើអគារ និងការវេះយកគ្រឿងក្នុងជនរងគ្រោះទៅលក់ក្នុងទីផ្សារងងឹត ជាដើម ដែលធ្វើឱ្យអ្នកទស្សនាភ័យខ្លាច និងព្រឺព្រួចជាខ្លាំង។
ទាក់ទិននឹងបញ្ហានេះ កាលពីថ្ងៃទី១៤ ខែកក្កដា ឆ្នាំ២០២២ សារព័ត៌មានអន្តរជាតិ អាល់ចាហ្ស៊ីរ៉ា (Aljazeera) បានចេញផ្សាយជាវីដេអូរយៈពេលជាង ៤០នាទី ដែលមានចំណងជើងថា «Forced to Scam: Cambodia’s Cyber Slaves» ឬ «ទាសករតាមអ៊ីនធឺណិតនៅកម្ពុជា» ដោយក្នុងវីដេអូនោះបានរៀបរាប់យ៉ាងច្រើនពីការស៊ើបអង្កេតនៃអំពើជួញដូរមនុស្ស និងការធ្វើទាសភាពដោយប្រតិបត្តិការបោកប្រាស់តាមអ៊ីនធឺណិតរបស់ជនជាតិចិននៅកម្ពុជា និងបណ្ដាញរបស់ពួកគេដែលពាក់ព័ន្ធជាមួយមន្ត្រីជាន់ខ្ពស់នៃរដ្ឋាភិបាលកម្ពុជា ដែលធ្វើឡើងជាប្រព័ន្ធ ជាពិសេសគឺមេដឹកនាំបក្សកាន់អំណាចលោក ហ៊ុន សែន តែម្តង។
ក្រសួងការបរទេសអាមេរិក កាលពីចុងឆ្នាំ២០២២ បានបញ្ចេញរបាយការណ៍របស់ខ្លួនស្ដីពីការជួញដូរមនុស្ស ដោយបានដាក់ប្រទេសកម្ពុជាចូលក្នុងបញ្ជីខ្មៅស្ថិតក្រោមការឃ្លាំមើល កម្រិត៣ (Tier 3 Watch List) ដែលបញ្ជាក់ថា កម្ពុជាស្ថិតនៅក្នុងបញ្ជីខ្មៅនៃការជួញដូរមនុស្សធ្ងន់ធ្ងរនៅឡើយសព្វថ្ងៃនេះ៕